D sigla sõma a Zeova raabã maaneg yĩnga

DŨNIYÃ gill zugu, sigls wʋsg n be: Yaa tũudum siglsi, politik la leebg siglsi, n paas sigls a taaba. Siglg fãa yaa toor ne a to, tɩ b tʋʋmã la b raabã me pa a yembr ye. La siglg a ye n be, n yaa toor fasɩ ne sigls a taabã fãa. Wẽnnaam Gomdã sõngda tõnd tɩ d bãng vẽeneg tɩ sigl-kãng yaa a Zeova Kaset rãmbã siglgã.

² Tõnd sũur yaa noogo, fo sẽn lebg a Zeova siglgã nedã. Fo reng n bao n bãnga Wẽnnaam daabã sẽn yaa a soaba, la masã fo maanda rẽ. (Yɩɩn. 143:10; Rom. 12:2) Fo naaga f tẽed-n-taas sẽn be dũniyã gill zugu, n tʋmd Wẽnnaam tʋʋmdã ne sũ-noogo. (2 Kor. 6:4; 1 Pɩy. 2:17; 5:9) La wa b sẽn pĩnd n togs Wẽnnaam Gomdã pʋgẽ wã, tʋʋm-kãngã kõta foo bark wʋsgo, la sũ-noog hakɩɩka. (Yel. 10:22; Mark 10:30) Fo sẽn maand a Zeova raabã ne f sũur fãa masã wã, kɩtame tɩ f tõe n wa paam vɩɩm sẽn tar bark beoog-daare.—1 Tɩm. 6:18, 19; 1 Zã 2:17.

³ Tõnd Naand a Zeova tara siglg sẽn pa wõnd a taab dũniyã gill zugu, siglg sẽn tũud Biiblã noya. Woto wilgdame t’a Zeova mengã n yaa siglgã taoor soaba. Tõnd kɩs-a-la sɩd zãng-zãnga. A yaa tõnd Bʋ-kaooda, tõnd Tõod-lugunda, la d Rĩma. (Eza. 33:22) A sẽn pa zũnd-zãnd Wẽnnaamã, a sigla bũmba fãa sõma, tɩ tõnd tõe n naag-a n tʋm a raabã pidsg yĩnga.—2 Kor. 6:1, 2.

⁴ Dũni-kãngã saabã sẽn ta n sa wã, Kirist Zeezi sẽn yaa d Rĩmã wilgd-d-la sore, tɩ d wɩngd ne d tʋʋmdã. (Eza. 55:4; Vẽn. 6:2; 11:15) A Zeezi mengã ra pĩnd n togsame t’a karen-biisã na n tʋma tʋʋm-kãsemse, n yɩɩg tʋʋm nins yẽ sẽn tʋmã. (Zã 14:12) Sɩd me, a karen-biisã ra na n moona koɛɛgã n kaoos n yɩɩg yẽ, tɩ b sõorã sẽn na n fɩɩgã kɩt tɩ b moon-a zĩis wʋsg me. B sɩd moona Rĩungã koe-noogã hal dũniyã tɛk fãa.—Mat. 24:14; 28:19, 20; Tʋʋ. 1:8.

⁵ A Zeezi goamã zoe n pidsame. La wa a sẽn da pĩnd n togsã, yaa wakat ning a Zeova sẽn yãkã sã n ta, la d na n bas koe-noogã moonego. Bũmb nins Wẽnnaam a Zeova sẽn da pĩnd n kɩt tɩ b togsã wilgda vẽeneg t’a ra-kãsengã sẽn sek rabeemã ta n saame.—Zow. 2:31; Sof. 1:14-18; 2:2, 3; 1 Pɩy. 4:7.

⁶ A Zeova ra-kãsengã sẽn ta n sa tɩ d mi a raabã sẽn yaa a soabã, d segd n maneg n wɩnga ne a raabã maanego. Rẽ baoodame tɩ d mao n bãng Wẽnnaam siglgã sẽn tʋmd to-to wã sõma, la d teel-a ne d sũur fãa. Siglgã bũmba fãa tika Wẽnnaam Gomdã a sẽn vẽneg tɩ b gʋlsã noyã, a tõodã, a saglsã la a zãmsgã.—Yɩɩn. 19:7-9.

⁷ A Zeova nin-buiidã sã n tũud Biiblã saglsã, b naagda taab n tʋmdẽ tɩ laafɩ la zems-n-taar be b sʋka. (Yɩɩn. 133:1; Eza. 60:17; Rom. 14:19) Bõe n paasd d tẽed-n-taasã sẽn be dũniyã gill zugã zems-n-taarã pãnga? Yaa nonglmã. D maanda bũmba fãa ne nonglem, la d yeelgd nonglem. (Zã 13:34, 35; Kolo. 3:14) A Zeova sẽn kɩt tɩ zems-n-taar be d sʋkã sõngd-d lame tɩ d kẽnd nao-yakemd a yembr ne a siglgã babg ning sẽn be saasẽ wã.

A ZEOVA SIGLGÃ BABG NING SẼN BE SAASẼ WÃ

⁸ A Zeova ra vẽnega no-rɛɛs a Ezayi ne a Ezekɩyɛll la a Dãniyɛll tɩ b yã a siglgã babg ning sẽn be saasẽ wã. (Eza. sak a 6, Ezek. sak a 1, Dãn. 7:9, 10) Tẽn-tʋmd a Zã me yãa siglgã bab-kãng bõn-makr pʋgẽ, n bilg tõnd a sẽn yaa to-to wã Vẽnegr sebrã pʋgẽ. A Zã yãa a Zeova sẽn zao geer sẽn tar ziir wʋsgo, tɩ malɛgs be ne-a n zẽk b koees n yetẽ: “Sõngo, sõngo, Wẽnnaam a Zeova yaa sõngo. Yẽ n yaa Sẽn-tõe-a-fãa wã, soab ning sẽn da be, la sẽn be, la sẽn watã.” (Vẽn. 4:8.) A Zã yãa “pe-bil sẽn yas geerã tẽn-sʋka.” Yaa a Zeezi Kirist sẽn yaa “Wẽnnaam Pe-bilã.”—Vẽn. 5:6, 13, 14; Zã 1:29.

⁹ A sẽn yã a Zeova sẽn zao geer zugã wilgdame tɩ yaa a Zeova la siglgã babg ning sẽn be saasẽ wã Zu-soaba. Pipi Kibay 29:11, 12 goma a zu-sobendã yell n yeele: “Zeova, yãmb yaa kãseng n tar pãnga, la yãmb n so neerem la naam. Bala bũmb ning fãa sẽn be saasẽ la tẽngã zugã yaa yãmb n so. Zeova, yãmb n so rĩungã. Yãmb n zẽk n yɩɩd bũmb fãa. Arzɛk ne ziir yita yãmb nengẽ, la yãmb rɩta naam bũmb fãa zugu. Pãng bee yãmb nugẽ, la yãmb nugã n tõe n kɩt tɩ ned lebg kãsenga, la a kõ bũmb fãa pãnga.”

¹⁰ A Zeezi Kirist sẽn yaa Wẽnnaam a Zeova tʋmd-n-taagã yĩnga, Wẽnnaam zẽk-a lame n kõ-a naam sẽn yaa kãseng wʋsg saasẽ. Sɩd me, “Wẽnnaam ninga bũmb fãa a naoã tẽngre, la a kɩt t’a lebg bũmb fãa zu-soab tigingã pʋgẽ.” (Efɛɛ. 1:22) Tẽn-tʋmd a Poll goma a Zeezi yell n yeele: “Wẽnnaam zẽk-a lame n kõ-a naam sẽn yaa kãsenga, la a kõ-a yʋʋr sẽn yɩɩd yʋy a taabã fãa ne yamleoogo, sẽn na yɩl tɩ ne a Zeezi yʋʋre, rũmã fãa sẽn be saasẽ, tẽngã zug la tẽn-gãongã pʋgẽ na yĩgimdi, la tɩ zɩlmã fãa na togs vẽeneg t’a Zeezi Kirist yaa Zu-soaba, Wẽnnaam sẽn yaa Ba wã waoogr yĩnga.” (Fili. 2:9-11) Woto yĩnga, d tõe n basa d yam t’a Zeezi Kirist sẽn wilgd tõnd sor to-to wã yaa ne tɩrlem.

¹¹ Wẽnnaam vẽnega no-rɛɛs a Dãniyɛll t’a yã soab ning sẽn be wakat fãa yĩngã sẽn zao a geerã saasẽ. “Malɛgs tusr naoor tusa n da tʋmd a yĩng wakat fãa, tɩ malɛgs tus-piig naoor tus-piig yas a taoore.” (Dãn. 7:10) Biiblã pʋgẽ, b goma malɛgs sulã yell n yeel tɩ b yaa “vʋʋsem sẽn tʋmd Wẽnnaam tʋʋm,” la b paas tɩ ‘Wẽnnaam yeel-b lame tɩ b sõng sẽn na n wa paam-b fãagrã.’ (Ebre. 1:14) B sigla malɛgs sulã fãa tɩ b yaa ‘naam gɛya, zu-soben-dãmba, goosneem la pãn-soaadba.’—Kolo. 1:16.

¹² D sã n maag d yĩng n bʋgs bõn-kãensã fãa sẽn wilgd a Zeova siglgã babg ning sẽn be saasẽ wã sẽn yaa to-to wã zugu, d wʋmda a Ezayi manesmã võore, a sẽn ‘yã a Zeova sẽn zao geer sẽn zẽk n be yĩngri,’ tɩ ‘Serafẽ rãmb da yas a zugẽ wã.’ A yeelame yaa: “Toog bee mam zugu! Mam kiime. Bala mam yaa ned sẽn tar no-bɩms sẽn yaa rẽgdo, la mam sẽn vɩ neb nins sʋkã no-bɩms me yaa rẽgdo. Bala mam nin yãa Rĩmã, tab-biis naab a Zeova menga!” A Ezayi sẽn yã a Zeova siglgã sẽn yaa kãseng to-to wã, kɩtame t’a sũur pid ne waoogre, la ne sik-m-menga. A sẽn yã bũmb ninsã kẽ-a-la sõma, hal t’a Zeova sẽn pa saasẽ n sok tɩ ãnda la a na n tʋm t’a tɩ taas a bʋ-kaoor koeesã, a leokame yaa: “Ad maam! Tʋm-y maam!”—Eza. 6:1-5, 8.

¹³ A Zeova nin-buiidã sẽn bãng a siglgã la b nand-a wã kɩtame tɩ bãmb me rɩkd a Ezayi naoore. Siglgã tʋʋmdã sẽn kẽngd taoorã, tõnd me modgdame n kẽnd nao-yakem a yembr ne-a. Rũndã-rũndã, d maanda d sẽn tõe fãa n na n wilg tɩ d kɩsa a Zeova siglgã sɩda.

A ZEOVA SIGLGÃ TƲƲM KẼNGDA TAOORE

¹⁴ Ezekɩyɛll sak a ye wã pʋgẽ, b bilga a Zeova sẽn zao saar sẽn yaa bedr hal kẽenga. Bõn-zombdg kãngã sẽn pɩndã makda a Zeova siglgã babg ning d sẽn pa tõe n yã ne nifã. A Zeova n so saarã n wẽnd-a t’a teesd zĩig ning fãa a sẽn date, la wa sẽn zems a raabã.—Yɩɩn. 103:20.

¹⁵ Saarã ruzãnt fãa ra yaa wa ruzãnt sẽn sag ruzãnt pʋgẽ. Ruzãnt-rãmbã ra saga taaba, tɩ ruzãnt fãa tees tɩrga, n be a to wã tẽn-sʋka. Rẽ kɩtame tɩ ruzãnt-rãmbã tõe n ‘tees kɩrems a naasã fãa.’ (Eze. 1:17) Ruzãnt-rãmbã tõe n tiig toeema b sẽn teesdẽ wã zĩig pʋgẽ. La woto pa rat n yeel tɩ b kẽnda yaare, tɩ ned pa wilgd-b sor ye. A Zeova pa basd a siglgã t’a tees zĩig ning fãa a sẽn dat ye. Sɩd me, Ezekɩyɛll 1:20 yetame: “B ra kẽngda zĩig ning fãa Wẽnnaam vʋʋsmã sẽn tusd-b tɩ b kẽnge.” Dẽnd yaa a Zeova n kɩtd t’a siglgã tees zĩig ning fãa a vʋʋsmã sẽn tusd-a t’a kẽnge. Ad sokr tõnd ned kam sẽn segd n sok a menga: ‘Mam maanda siglgã sẽn datã bɩ?’

¹⁶ Pa d sẽn na n kẽnd tigissã la d moond koɛɛgã bal n wilgd tɩ d maanda a Zeova siglgã sẽn dat ye. Sẽn yɩɩd fãa, yaa d sẽn na n modgd n bɩɩsd d tẽebã. Rẽ baoodame tɩ d ‘bãngd bũmb nins sẽn tar yõod n yɩɩdã n bake,’ la d rɩt bũmb nins fãa siglgã sẽn yiisd tõnd tẽebã kengr yĩngã yõodo. (Fili. 1:10; 4:8, 9; Zã 17:3) D segd n tẽegame me tɩ siglg buud fãa pʋgẽ, yaa tɩlɛ tɩ b sakd taoor dãmbã, la b lagemd-b n tʋmdẽ. Woto wã, d pa segd n sãamd bũmb nins fãa a Zeova sẽn kõt tõnd sẽn na yɩl tɩ d tõog n tʋm a tʋʋmdã ye. D sã n kẽnd nao-yakemd a yembr ne a Zeova saasẽ saarã, wilgdame tɩ d tũuda koɛɛg ning d sẽn taasd nebã.

¹⁷ A Zeova sõngda tõnd ne a siglgã maasem, tɩ d ket n wɩngd ne a raabã maanego. Tẽeg-y tɩ yaa a Zeova la soab ning sẽn wẽnd saasẽ saarã t’a kẽndã. Dẽnd d sã n sakd n tũud a saarã n kẽnd zĩig ning fãa a sẽn teesẽ, d wilgdame tɩ d waoogda a Zeova sẽn yaa pĩig kugrã, la tɩ d kɩs-a-la sɩda. (Yɩɩn. 18:31) Biiblã yetame: “A Zeova na n kõo a nin-buiidã pãnga. A Zeova na n ninga a nin-buiidã bark tɩ b zĩnd ne laafɩ.” (Yɩɩn. 29:11) D sẽn paam n be a Zeova siglgã pʋgẽ rũndã-rũndã wã, d paamda pãng la laafɩ ning a sẽn kõt a nin-buiidã a sẽn sigl sõma wã. Hakɩɩka, d sã n ket n maand a Zeova raabã, d na n paamda bark masã menga, la wakat sẽn kõn sa.