“Tẽegd-y sẽn lʋɩt-b taoor yãmb sʋkã yelle”

YƲƲMD 33 Pãntekotã tɛkã, Zu-soab a Zeezi Kirist tẽn-tʋmdb nins sẽn maan sɩd ne-a wã lʋɩɩ kiris-neb tigingã sẽn da nan lugl paalmã taoore, n get a nin-buiidã yelle. (Tʋʋ. 6:2-4; Ebre. 13:7) Yʋʋmd 49 wã sẽnese, taoor lʋɩtb sul-kãngã nebã sõor paasame, tɩ neb sẽn da pa a Zeezi tẽn-tʋmdb me naage. B sẽn wa n na n welg bãongã kõom yellã, rẽ tɩ taoor lʋɩtbã sull ra yaa ‘tẽn-tʋmdbã ne kãsem-dãmbã sẽn be Zerizalɛmmã.’ (Tʋʋ. 15:1, 2) Bãmb n da segd n welg zu-loɛɛg ning fãa sẽn be kiris-nebã sʋka. B ra toonda lɛta la sɛb a taab n kengd tigimsã neb tẽebo, la b sõngd-b tɩ b zemsd taab yam a yembr n tʋmd b tʋʋmã. Tigimsã neb ra kelgda taoor lʋɩtbã saglsã, la b sulgd b mens n sakd-ba. Rẽ kɩtame t’a Zeova ra ningd-b barka, tɩ b sõorã fɩɩgdẽ.—Tʋʋ. 8:1, 14, 15; 15:22-31; 16:4, 5; Ebre. 13:17.

² Tẽn-tʋmdbã kũum poore, neb n yik n sɩng sɩdã kɩɩsgo, hal tɩ yellã paam pãnga. (2 Tes. 2:3-12) Wa a Zeezi sẽn da pĩnd n togs ki ne nadensã yel-bũndã pʋgẽ wã, bɛ n wa n kẽ ki wã sẽn makd kiris-neb nins sẽn paam vʋʋsem sõng zaeebã sʋka, n bʋd nadense, sẽn makd kiris-neb ne yʋʋrã. Na maan yʋʋm kobse, b basame tɩ ki wã ne nadensã naag taab n bɩ, hal n tãag tigsgã wakate, rat n yeel tɩ “dũniyã saabo.” (Mat. 13:24-30, 36-43) Yaa sɩd tɩ kiris-neb sẽn paam vʋʋsem sõng zaeebã yembr-yembr da ket n paamda a Zeezi bark wakat kãnga, la taoor lʋɩtb sull sẽn sigl sõma ra pa le be tẽngã zugu, a Zeezi sẽn tũnugd n get a karen-biisã yell ye. (Mat. 28:20) La a Zeezi ra pĩnd n togsame tɩ tigsgã wakate, yɛlã na n toeemame.

³ A Zeezi Kirist sẽn wa n na n sɩng a yel-bũnd ning sẽn gomd “dũniyã saab wakat” bãndã yellã, a sokame tɩ “ãnda n yaa tʋm-tʋmd sẽn tũud sɩd la sẽn tar yamã?” (Mat. 24:3, 42-47) A wilgame tɩ tʋm-tʋm-kãng ra na n geta Wẽnnaam nin-buiidã tẽebã yelle, n kõt-b rɩɩb “wakat sẽn zemse.” Pipi kiris-nebã wakate, yɩɩ rap sull la a Zeezi yãk-yã, tɩ b na n get a karen-biisã yelle, pa nin-yend ye. Rũndã-rũndã sẽn yaa dũniyã saab wakatã me, tʋm-tʋmd sẽn tũud sɩdã a Zeezi sẽn yãk t’a get a nebã yellã pa nin-yend ye.

“TƲM-TƲMD SẼN TŨUD SƖD LA SẼN TAR YAMÔ SẼN YAA A SOABA

⁴ Ãnda la a Zeezi yãk t’a na n get a karen-biisã yelle? Zemsame t’a yãk kiris-neb sẽn paam vʋʋsem sõngã zaeeb n be tẽngã zugu. Biiblã goma nin-kãens yelle, n yeel tɩ b yaa “maan-kʋʋdb sẽn yaa rĩm-dãmba,” b sẽn yãk tɩ b segd n “‘moon [Wẽnnaam] sõmblmã zĩig fãa.’ Yẽ la soab ning sẽn bool bãmba, n yiis-b lik pʋgẽ n kẽes a vẽenem-kãsengã pʋgẽ wã.” (1 Pɩy. 2:9; Mal. 2:7; Vẽn. 12:17) Rẽ yĩnga, sẽn paam-b vʋʋsem sõng zaeeb n be tẽngã zugã fãa n yaa tʋm-tʋmd sẽn tũud sɩdã bɩ? Ayo. A Zeezi sẽn na n maan yel-solemd n dɩlg rap tus a nu, pagbã ne kambã sẽn pa naagã, a rɩka burã n kõ a karen-biisã, t’a karen-biisã reeg n kõ kʋʋngã. (Mat. 14:19) A tũnuga ne neb bilfu, n dɩlg neb kʋʋngo. Yaa woto me la a maand rũndã-rũndã n get a nebã yelle.

⁵ Dẽnd “yel-gɛt sẽn tũud sɩdã, soab ning sẽn tar yamã” yaa saam-biis sul-bil sẽn paam vʋʋsem sõngã zaeebo, tɩ b tʋʋmd yaa ges Kiristã karen-biisã tẽebã yell Kiristã waoongã wakate. (Luk 12:42) Yaoolem wakatã sasa, saam-biis nins sẽn paam vʋʋsem sõng zaeeb n yaa “tʋm-tʋmd sẽn tũud sɩd la sẽn tar yamã” tʋmda siglgã biru-kãsengẽ wã. Bãmb n yaa a Zeova Kaset rãmbã Siglgã taoor lʋɩtb Sull rũndã-rũndã.

⁶ Ne Kiristã maasem, sul-kãngã yiisda sɛb n wilgd Biiblã bãngr-goam sẽn pidsd to-to, la b kõt tõnd sagls sẽn zems a wakate, tɩ d bãngd d sẽn tõe n tũ Biiblã sẽn yetã to-to. D paamda sagl-kãens a Zeova Kaset rãmbã tigims toɛy-toɛyã pʋsẽ. (Eza. 43:10; Gal. 6:16) Pĩnd wẽndẽ wã, ra yaa tʋm-tʋmd bɩ yel-gɛt b sẽn kɩs sɩd n get zak rãmb yelle. Woto me, b yãka tʋm-tʋmd sẽn tũud sɩd la sẽn tar yamã t’a na n get kiris-nebã sẽn yaa wa zak a ye rãmbã tẽeb yelle. Tʋm-tʋmd sẽn tũud sɩdã me n get siglgã paoongã yelle, koe-moonegã ne tigis-kãsems toɛy-toɛyã yelle, la a yãkd yel-gɛtb tɩ b tʋmd tʋʋm toɛy-toɛy siglgã pʋgẽ. Sẽn paase, a yiisda sɛb sẽn tik Biiblã tɩ nafd Kiristã “zakã rãmb” fãa.—Mat. 24:45.

⁷ La “zakã rãmb” yaa ãnd dãmba? Koɛɛg-koɛɛga, yaa neb nins b sẽn dɩlgdã. Sɩngrẽ wã, zakã rãmb fãa ra paama vʋʋsem sõng zaeebo. La kaoosg zugẽ, “piis a taabã” sẽn yaa kʋʋn-kãsengã nebã wa n naaga zakã rãmba. (Zã 10:16) Sul a yiibã neb fãa rɩta bũmb nins tʋm-tʋmd sẽn tũud sɩdã sẽn yiisd b tẽebã kengr yĩngã yõodo.

⁸ To-kãsengã sasa, a Zeezi sã n wa n na n kao dũni-kãngã bʋʋdo, a na n kɩtame tɩ tʋm-tʋmdã “ges a paoongã fãa yelle.” (Mat. 24:46, 47) Tʋm-tʋmd sẽn tũud sɩdã neb na n tɩ reega b keoorã saasẽ. Bãmb ne neb 144 000 neb a taabã fãa na n wa tɩ naaga Kiristã n dɩ naam saasẽ. Baa tʋm-tʋmd sẽn tũud sɩd la sẽn tar yamã sẽn pa na n le be tẽngã zugã, a Zeova ne a Zeezi na n yãka “nanambs” tɩ b ges Rĩungã poorẽ dãmbã sẽn ket tẽngã zugã tẽeb yelle.—Yɩɩn. 45:16.

BÕE YĨNG TƖ D SEGD N TẼEGD SẼN LƲƖT-B TAOORÃ YELLE?

⁹ Bʋʋm wʋsg yĩng n kɩt tɩ d segd n tẽegd sẽn lʋɩtb taoorã yelle, la d wilg tɩ kɩs-b-la sɩda. Bõe yĩng tɩ rẽ maaneg tar yõodo? Ad tẽn-tʋmd a Poll sẽn yeele: “B geta yãmb yell wakat fãa, n miẽ tɩ Wẽnnaam na n kaoa b bʋʋd tɩ zems b tʋʋma. Bɩ y maan woto sẽn na yɩl tɩ b tʋm ne sũ-noog la ra yɩ ne siri, bala rẽ pa na n naf yãmb ye.” (Ebre. 13:17) Yaa tɩlɛ tɩ d kelgd sẽn lʋɩt-b taoorã, la d sulgd d mens n sakd-ba, bala b geta tõnd tẽebã la d mensã neer yelle.

¹⁰ Woto wã, ‘bɩ d maan bũmb fãa ne nonglem,’ wa tẽn-tʋmd a Poll sẽn yeel 1 Korẽnt rãmb 16:14 pʋgẽ wã. No-sɩɩr nins b sẽn dɩkd Wẽnnaam nin-buiidã neer yĩngã tika nonglmã sẽn yaa zʋg-sõng ning sẽn yɩɩdã zugu. Nonglmã wɛɛngẽ, 1 Korẽnt rãmb 13:4-8 yetame: “Nonglem maanda sũ-mare, la a maand neere. Nonglem pa maand sũ-kiir ye. A pa pẽgd a menga, la a pa wukd a meng me ye. A pa maand sẽn ka zems ye. A pa baood a meng nafr ye. A pa yikd a sũur ye. A pa bĩngd wẽng b sẽn maan-a a sũurẽ ye. A pa kɩdemd sũ-noog ne bũmb sẽn pa tɩrg ye. A maanda sũ-noog ne sɩda. Baa sẽn wa n yaa a soab fãa, a pa komsd raood n bas ye. A tẽeda bũmb fãa, a saagda manegr bũmb fãa pʋgẽ, a tõogda toog bũmb fãa pʋgẽ. Nonglem pa sat a bada.” Bũmb nins fãa siglgã sẽn yãkd yam n maand a Zeova nin-buiidã neer yĩngã sẽn tik nonglmã, d yam gãee bãane, tɩ d tũud b sẽn yetã. Sẽn paase, wilgdame tɩ d rɩkda a Zeova nonglmã togs-n-taare.

¹¹ Pipi kiris-nebã wakate, a Zeova sẽn da yãk neb nins tɩ b get a nin-buiidã yellã ra pa zems zãng ye. Yaa woto me rũndã-rũndã. La hal pĩnd wẽndẽ, a Zeova tũnuga ne ninsaalb sẽn pa zems zãng n pids a raabã. Wala makre, a Nowe kaa koom-koglgo, la a moon n wilg a wakatẽ nebã tɩ sãoong n wate. (Sɩng. 6:13, 14, 22; 2 Pɩy. 2:5) A Zeova yãka a Moyiiz t’a lʋɩ a nin-buiidã taoor n yiis-b Ezɩpti. (Yik. 3:10) Yaa neb sẽn pa zems zãng la Wẽnnaam vẽneg tɩ b gʋls Biiblã. (2 Tɩm. 3:16; 2 Pɩy. 1:21) Rũndã-rũndã me, a Zeova yãka neb sẽn pa zems zãng tɩ b get koɛɛgã mooneg yelle, la tʋʋmd ning sẽn yaa sõng nebã tɩ b lebg Kiristã karen-biisã yelle. La woto pa kɩtd tɩ d pa maneg n kɩs a siglgã sɩd ye. D sũur keemame, bala d miime tɩ sã n da pa tũ ne a Zeova sõngre, siglgã ra pa na n tõog n tʋm tʋʋm nins a sẽn tʋmdã ye. Tʋm-tʋmd sẽn tũud sɩdã wilga zu-loees toor-toor sasa, tɩ yaa Wẽnnaam n get siglgã yell ne a vʋʋsem sõngã maasem. Rũnda-rũndã, a Zeova ningda siglgã babg ning sẽn be tẽngã zugã bark wʋsgo. Woto wã, d teenda siglgã ne d sũur fãa, la d kɩs-a sɩd zãng-zãnga.

D SẼN WILGD TO-TO TƖ D KƖSA SIGLGÃ SƖDA

¹² Neb nins b sẽn yãk tɩ b lʋɩt taoor tigimsã pʋsẽ wã wilgdame tɩ b kɩsa siglgã sɩda, n sakd tʋʋm nins b sẽn kõt-bã, la b tʋmd ne sũ-noogo. (Tʋʋ. 20:28) D sẽn yaa Rĩungã koe-moondbã, d moonda koɛɛgã zak-zaka, n kẽnd n kaagd nebã, la d zãmsd-b Biiblã ne yẽesem. (Mat. 24:14; 28:19, 20) Sẽn na yɩl n dɩ bũmb nins tʋm-tʋmd sẽn tũud sɩdã sẽn kõt-dã yõod sõma, d segenda d mens n kẽnd tigissã fãa, tigis-kãsemsã sẽn naage. D sã n kẽnd tigis-kãensã fãa n paamd n be ne d tẽed-n-taasã tɩ d kengd taab raoodo, nafda d fãa sõma.—Ebre. 10:24, 25.

¹³ D sã n teend siglgã ne d sẽn tarã, d wilgda vẽeneg tɩ d kɩs-a-la sɩda. (Yel. 3:9, 10) D sã n wa yã tɩ d tẽed-n-taas n dat sõngre, d sõngd-b-la tao-tao. (Gal. 6:10; 1 Tɩm. 6:18) D maanda rẽ ne nonglem, n baood segb wakat fãa n na n wilg a Zeova ne a siglgã tɩ d sũur yaa noogo, b sẽn maand-d neerã yĩnga.—Zã 13:35.

¹⁴ D sã n tũud no-sɩɩr ning fãa siglgã sẽn dɩk me, d wilgdame tɩ d kɩs-a-la sɩda. Rẽ baoodame tɩ d sik d mens n sak yel-gɛtbã, rat n yeel tɩ tigims sull yel-gɛtbã la kãsem-dãmbã sẽn be tigimsã pʋsẽ wã. Nin-kãensã naaga neb nins sẽn “lʋɩt taoor” tɩ d segd n kelg la d sulg d mens n sakã. (Ebre. 13:7, 17) Baa d sã n pa wʋmd yam-yãkr ning võor sõma, d miime tɩ d sã n kell n tũ, na n naf-d-la wakat fãa. D sẽn tũud a Zeova Gomdã la d sakd a siglgã, a ningd-d-la barka. D sẽn maand woto wã, d wilgdame tɩ d sakda d Zu-soab a Zeezi Kirist.

¹⁵ Hakɩɩka, d bee bʋʋm n na n kɩs tʋm-tʋmd sẽn tũud sɩd la sẽn tar yamã sɩda. A Sʋɩtãan sẽn yaa dũni-kãngã wẽnnaamã maanda a sẽn tõe fãa, n na n sãam a Zeova ne a siglgã yʋʋre. (2 Kor. 4:4) La tõnd pa zɩ a Sʋɩtãan sɩlmã ye. (2 Kor. 2:11) A miime tɩ wakatã sẽn ket tɩ b na n lob-a bog-zulungã pʋgẽ wã yaa bilfu. Rẽ n so t’a maand a sẽn tõe fãa n dat tɩ Wẽnnaam a Zeova nin-buiidã wʋsg bʋdg n bas-a. (Vẽn. 12:12) La baa a Sʋɩtãan sẽn nangd pãngã, bɩ tõnd me kell n mao n tall zood sõma ne a Zeova. D kɩs a Zeova sɩda, la d kɩs a siglgã a sẽn tũnugd n get a nin-buiidã yell rũndã-rũndã wã me sɩda. Woto, tõnd ne d tẽed-n-taasã na n maneg n zemsa taab wa zag-yɛng neba.