Yel-gɛtb sẽn na n ges bãgrã yelle

A ZEEZI koe-moonegã sasa, a wilgame tɩ yẽ la “pe-kɩɩm-sõngã.” (Zã 10:11) A sẽn yã kʋʋngã sẽn kaoogd n pʋgd-a wã, ‘b nimbãaneg yõk-a lame. Bala, a mikame tɩ b yaa wa piis sẽn pa tar kɩɩma, n namsdẽ la b pa tar ned sẽn get b yell ye.’ (Mat. 9:36) A Pɩyɛɛr ne tẽn-tʋmdb a taabã yãa nebã yell sẽn da pak a Zeezi to-to wã. Ad a sɩd ra yaa toor fasɩ ne Israyɛll pe-kɩɩmbã. B ra basa piisã yell gesg hal tɩ b sãeege, tɩ tẽeb kom da tar-ba. (Eze. 34:7, 8) A Zeezi kõo mak-sõng sẽn ka to, n da zãmsd a karen-biisã la a get b yelle, hal n sak n ki b yĩnga. Woto sõnga a tẽn-tʋmdbã tɩ b bãng b sẽn tõe n maan to-to n sõng neb nins sẽn tar tẽebã tɩ b lebg n wa a Zeova sẽn yaa b “sɩɩsã pe-kɩɩm la b gũudã nengẽ.”—1 Pɩy. 2:25.

² Daar a yembr a Zeezi sẽn wa n gomd ne a Pɩyɛɛre, a wilgame tɩ tara yõod wʋsg tɩ b ges Wẽnnaam nin-buiidã a sẽn mak ne piisã yelle, n dɩlg-ba. (Zã 21:15-17) Sãmbg sẽn ka be, a goamã kẽe a Pɩyɛɛr hal sõma, n kɩt tɩ yẽ me wa yeel pipi kiris-nebã tigingã kãsem-dãmb kaoosg zugẽ yaa: “Kɩɩm-y Wẽnnaam bãgrã b sẽn gũnug yãmbã, n get a yell neere. La pa segd n yɩ ne modgr ye. Tog n yɩɩ ne yamleoog Wẽnnaam taoore. Pa tog n yɩ y sẽn dat n paam ligd la arzɛgs yĩng ye. Tog n yɩɩ ne y sũur fãa. Y pa tog n soog neb nins sẽn yaa Wẽnnaam rẽndã ne pãng ye. Yɩ-y mamsg bãgrã yĩnga.” (1 Pɩy. 5:1-3) A Pɩyɛɛr goamã paka kãsem-dãmbã rũndã-rũndã me. Kãsem-dãmbã rɩkda a Zeezi naoore, n lʋɩt taoor n get Wẽnnaam tʋʋmdã yelle, la b get bãgrã yell ne yamleoogo, n kõt-b mak-sõngo.—Ebre. 13:7.

³ D sũur yaa noog ne tigingã yel-gɛtbã vʋʋsem sõngã sẽn yãkã. B sẽn get d yellã nafa yaa wʋsgo. Wala makre, kãsem-dãmbã geta tigingã ned fãa yelle, n kengd a raoodo. Semen fãa, b lʋɩta taoor tigissã sasa, n dɩlgd b tẽed-n-taasã tẽebo. (Rom. 12:8) B sẽn modgd n kogend tigingã neb tɩ baa fʋɩ ra sãam-bã, wala makre nin-wẽnsã, kɩtame tɩ bãan be tigingã pʋgẽ. (Eza. 32:2; Tɩt 1:9-11) B sẽn lʋɩt taoor koe-moonegã sasa wã kengda tõnd raoodo, tɩ d ket n moond koɛɛgã ne yẽesem kiuug fãa. (Ebre. 13:15-17) Ne nin-kãensã sẽn yaa “kũun sẽn yaa rapã” maasem, a Zeova sõngdame tɩ tigingã neb tẽeb bɩtẽ.—Efɛɛ. 4:8, 11, 12.

ZƲG-SÕMA NINS YEL-GƐTBÃ SẼN SEGD N BƖƖSÃ

⁴ Sẽn na yɩl tɩ tigingã neb paam gesg wa sẽn segdã, rap nins b sẽn yãkd tɩ b yaa yel-gɛtbã segd n bɩɩsa zʋg-sõma toor-toor b sẽn wilg Wẽnnaam Gomdã pʋgẽ. Yaa b sã n sɩd bɩɩs zʋg-sõma kãensã la b tõe n yeel tɩ yaa vʋʋsem sõngã n yãk-ba. (Tʋʋ. 20:28) Sɩd-sɩda, Wẽnnaam Gomdã sẽn sõdg zʋg-sõma nins yel-gɛtbã sẽn segd n tallã bɩɩsg baooda modgr wʋsgo, bala b tʋʋmdã pa reem yell ye. La zʋg-sõma kãensã bɩɩsg pa tolg n yaa toogo, hal tɩ rap nins sẽn nong Wẽnnaam la b rat n yɩ tʋʋm-teed a nugẽ wã pa tõe n bɩɩs ye. Nebã fãa segd n nee vẽeneg tɩ yel-gɛtbã modgda daar fãa n tũud Biiblã sẽn yetã bũmb fãa pʋgẽ.

⁵ Tẽn-tʋmd a Poll goma zʋg-sõma kãensã yelle, a pipi lɛtr ning a sẽn tool a Tɩmote wã pʋgẽ la a Tɩt sebrã pʋgẽ. Sɩd me, 1 Tɩmote 3:1-7 yetame: “Rao sã n modgd n dat n lebg yel-gɛta, yaa tʋʋm-sõng la a baooda. Yel-gɛt segd n yɩɩ ned sẽn pa tar taale, pʋg-yɛng sɩda, ned sẽn maand gũusg bũmb fãa pʋgẽ, ned yam sẽn vẽenẽ, ned sẽn pa nong zũnd-zãnde, sẽn maand sãamb sãando, sẽn mi neb zãmsgo, ned sẽn pa rã-yũud-kãaga, sẽn pa nen-kɛglem soaba, sẽn pa dem-deme, sẽn pa zab-zabda, sẽn pa ligd-noanga, ned sẽn zãad a zak sõma, t’a kambã yaa sakdb la b zãad b mens sõma, (bala ned sã n pa mi a sẽn tõe n zã a zak to-to, a na n yɩɩ wãn n ges Wẽnnaam tigingã yelle?) pa segd n yɩ ned sẽn nan lebg kiris-ned paalem, sẽn na yɩl t’a ra wa wuk a menga, n wa paam taal ning b sẽn ning a Sʋɩtãanã ye. Sẽn paase, a segd n tara kaset-sõng yɩng rãmbã nifẽ, sẽn na yɩl tɩ nebã ra wa paoog-a, la t’a ra wa lʋɩ Sʋɩtãanã bẽdgẽ ye.”

⁶ Tɩt sebrã pʋgẽ, a Poll yeelame yaa: “Mam basa foo Kɛrɛt sẽn na yɩl tɩ f maneg bũmb nins sẽn pa sõma wã, la f yãk kãsem-dãmb tẽng-tẽng wa sẽn zems noor ning mam sẽn kõ foomã: Sã n mikame tɩ rao bee be n pa tar taale, n yaa pʋg-yɛng sɩda, n tar kamb sẽn yaa tẽedb sẽn pa tar taal b sẽn vɩ vɩ-yook yĩnga, wall b sẽn yaa tõatb yĩnga. Bala, kãsem-soab sẽn yaa Wẽnnaam yel-gɛtã yĩnga, a pa segd n yɩ ned sẽn tar taale, tɩta-neda, ned sũur sẽn yikd tao-tao, rã-yũud-kãaga, nen-kɛglem soaba, la rat-tɩ-loog soab sẽn baood ligd la arzɛgs ye. La a segd n yɩɩ ned sẽn maand sãamb sãando, ned sẽn nong sẽn sõmbe, ned yam sẽn vẽenẽ, nin-tɩrga, ned sẽn maand sɩda, la yõk-m-meng soaba. A sẽn zãmsd nebã to-to wã segd n wilgame t’a gãda sɩdã goamã kãn-kãe. Rẽ la a tõogd n keng nebã raood ne zãmsg ning sẽn nafdã maasem, la a wilg kɩɩsdbã b kongr me.”—Tɩt 1:5-9.

⁷ Yaa sɩd tɩ yɩl n bɩɩs zʋg-sõma nins b sõdg Biiblã pʋgẽ wã tõe n wõnda yɩɩda d nugu. Baasgo, saam-biisã pa segd n koms raood n pa bao n na n bɩɩs-b ye. B sã n wilgd ne b manesem tɩ b tara zʋg-sõma kãense, kengda tigingã neb a taabã raood tɩ bãmb me maan woto. A Poll yeelame tɩ b kõo nin-kãensã sẽn yaa “kũun sẽn yaa rapã,” “nin-sõamyã wã remsg yĩng la neb a taabã sõngr yĩnga, sẽn na yɩl tɩ Kiristã yĩngã paam pãnga. B na n maana woto hal tɩ d fãa wa lebg bũmb a yembr tẽebã pʋgẽ, la d paam bãngr hakɩɩk Wẽnnaam Biigã zugu, n lebg neb sẽn bɩ zãng wa Kiristã.”—Efɛɛ. 4:8, 12, 13.

⁸ Yel-gɛtbã pa kamb bɩ neb sẽn nan tũub paalem ye. B yaa neb sẽn tar minim Kirist tũubã wɛɛngẽ, neb sẽn mi Biiblã sõma n wʋmd a goamã võor me sõma, la b nong tigingã neb ne nonglem hakɩɩka. B tõe n goma ne raood n dems tʋʋm-wẽns maandbã, n kogl Wẽnnaam piisã tɩ ned ra maan-b wẽng ye. (Eza. 32:2) Tigingã neb fãa nee vẽeneg tɩ yel-gɛtbã yaa neb tẽeb sẽn bɩ, n nong Wẽnnaam piisã hal wʋsgo.

⁹ Neb nins b sẽn yãkd tɩ b yaa yel-gɛtbã wilgda b vɩɩm manesmã pʋgẽ tɩ b tara yam. Yel-gɛt sã n kẽe kãadem, a segd n tũu Biiblã sẽn yet bũmb ning kãadmã wɛɛngẽ wã, rat n yeel t’a segd n yɩɩ pʋg-yɛng sɩda, la ned sẽn zãad a zak sõma. Yel-gɛt sã n tar kamb sẽn yaa tẽedba, sẽn yaa sakdb la b zãad b mens sõma, kamb sẽn pa tar taal b sẽn vɩ vɩ-yook yĩnga, wall b sẽn yaa tõatb yĩnga, tigingã neb tõe n kolg-a-la ne bas-m-yam n kos sagls zak pʋgẽ vɩɩmã wɛɛngẽ, la kiris-ned vɩɩmã wɛɛngẽ. Sẽn paase, yel-gɛt segd n yɩɩ ned sẽn pa tar taale, la sẽn tar kaset-sõng baa yɩng rãmbã nifẽ. B pa segd n yã bũmb n tik n dõd-a t’a maana sẽn pa zems ye. Bala rẽ tõe n sãama tigingã yʋʋre. A pa segd n yɩ ned b sẽn nan kibl paalem, a sẽn maan yel-wẽn-kãseng yĩng ye. Tigingã neb a taabã rɩkda a mak-sõngã togs-n-taare, la b sakd ne yamleoog t’a na n get b tẽebã yelle.—1 Kor. 11:1; 16:15, 16.

¹⁰ Yel-gɛtbã sẽn tar zʋg-sõma wã tõe n gesa kiris-neb tigingã yelle, wa Israyɛll kãsem-dãmbã b sẽn yeel tɩ b ra yaa “rap sẽn tar yam, bãngr la minimã.” (Tõo. 1:13) Tigingã kãsem-dãmbã pa neb sẽn pa maand yel-wẽn ye. La tigingã ne yɩngã neb miime tɩ b yaa pʋ-peelem dãmba, la wẽn-zoɛtb sẽn tũud Biiblã noy b vɩɩmã pʋgẽ hal sẽn kaoose. B sẽn pa tar taalã yĩnga, b tõe n goma ne bas-m-yam tigingã neb taoore.—Rom. 3:23.

¹¹ Rap nins b sẽn yãk tɩ b yaa yel-gɛtbã maanda gũusg b bũmb fãa pʋgẽ, la b manesmã ne b taabã pʋgẽ. B pa tar yẽesem sẽn loog noor ye. B maanda bũmba fãa n zemsdẽ, la b yaa yõk-m-mens rãmba. B maanda gũusg rɩɩbã ne rãamã yũub wɛɛngẽ, la pemsmã kokr ne bũmb nins b sẽn maand n deemdẽ wã wɛɛngẽ. B pa yũud rãam tɩ loog noore, sẽn na yɩl tɩ b ra wa rõd-b tɩ b yaa rã-tɩgda, wall rã-yũud-kãag ye. Ned sã n yũ rãam n su, a pa le so a meng ye. Rẽ kɩtdame t’a pa tõe n ges tigingã neb tẽeb yell sõma ye.

¹² Ned sã n dat n lebg yel-gɛt tigingã pʋgẽ, a pa tog n yɩ ned sẽn nong zũnd-zãnd ye. A segd n wilgda rẽ a sẽn manegd a mengã to-to wã wɛɛngẽ, a zakã sẽn yaa to-to wã, la a sẽn maand fãa pʋgẽ. Wala makre, a pa segd n minim n viigd a tʋʋm ye. A mii a sẽn segd n maane, n sigind a yɛlã wa sẽn zems rẽ. A tũuda Biiblã sẽn yetã neere.

¹³ Yel-gɛt pa segd n yɩ ned sẽn yaa dem-dem ye. A segd n yɩɩ ned sẽn tõe n naag tigingã kãsem-dãmb a taabã n tʋme, tɩ b zemsd taaba. A segd n talla tagsg sẽn zems a mengã zugu, n da bao tɩ neb a taabã maan bũmba fãa tɩ zems wa a sẽn datã ye. Yel-gɛt sẽn pa dem-demã yĩnga, a pa tẽed tɩ wakat fãa yẽ sẽn yetã la sõma n yɩɩd kãsem-dãmb a taabã ye. A taabã tõe n tara zʋg-sõma la minim a sẽn pa tare. Kãsem-soab wilgdame t’a pa dem-deme, a sã n tikd a goamã Biiblã zugu, la a maood n dɩkd a Zeezi Kirist mak-sõngã. (Fili. 2:2-8) Kãsem-soab pa zab-zabd bɩ nen-kɛglem soab ye. A waoogda a taabã n getẽ tɩ b yɩɩda yẽ. A pa tɩta-neda, n wae n pẽdgd n dat tɩ b tũ a raab wall b sak a sẽn yet ye. A sũur pa yikd tao-tao ye. A wilgda a manesem ne a taabã pʋgẽ t’a baooda laafɩ.

¹⁴ Sẽn paase, ned sẽn dat n yɩ yel-gɛt tigingã pʋgẽ segd n yɩɩ ned yam sẽn vẽenẽ. Woto rat n yeelame t’a tõee a menga, n pa yɩt tao-tao n kao yell bʋʋd ye. A mii Wẽnnaam noyã sõma, la a mi a sẽn tõe n tũ-b to-to. Ned yam sẽn vẽen sakda saglga, la a sakdẽ tɩ b wilgd-a sore. A pa pʋ-lik soab ye.

¹⁵ A Poll tẽega a Tɩt tɩ yel-gɛt segd n yɩɩ ned sẽn nong sẽn sõmbe. A segd n yɩɩ nin-tɩrga, la ned sẽn maand sɩda. A wilgda rẽ vẽeneg a manesem ne a taabã pʋgẽ, la a sẽn modgd n gãt sẽn yaa sõma la tɩrgã me pʋgẽ. A pa reemd ne a Zeova tũubã ye. A gãda Biiblã noyã kãn-kãe me. A yaa ned sẽn tõe n wʋm gomd n pa rɩk n togs ye. Sẽn paase, a yaa ned sẽn nong n maand sãamb sãando, la sẽn sakd n kõt a mengã la a tarem a taabã sõngr yĩnga.—Tʋʋ. 20:33-35.

¹⁶ Sẽn na yɩl n tõog n tʋm a tʋʋmdã sõma, yel-gɛt segd n yɩɩ ned sẽn mi neb zãmsgo. Wa a Poll sẽn yeel a Tɩtã, yel-gɛt “sẽn zãmsd nebã to-to wã segd n wilgame t’a gãda sɩdã goamã kãn-kãe. Rẽ la a tõogd n keng nebã raood ne zãmsg ning sẽn nafdã maasem, la a wilg kɩɩsdbã b kongr me.” (Tɩt 1:9) A tõe n tika Biiblã n sõng ned t’a tags neere, n kɩt tɩ ned sak n deeg tɩ bũmb yaa sɩda. A leb n tõe n tika Biiblã n leok ned sẽn wa ne no-koeemde, la a wilg b sẽn tõe n tũ Biiblã goam to-to tɩ kɛlgdbã bas b yam, la keng b tẽebã. “Noog la toog wakate,” yel-gɛt zãmsda nebã woto. (2 Tɩm. 4:2) A yaa sũ-mar soaba, n tõe n sõng ned sẽn bʋdg ne bʋgsem wall a sõng ned sẽn tar sãmbs t’a bas a yam, la a tõog t’a soab tʋm tʋʋm-sõma a tẽebã yĩnga. A sẽn tõe n yals zãma taoor n wɛgs sõsg wall a zãms ned Biiblã, wilgda vẽeneg t’a tara karen-saamd minim, sẽn yaa zʋg-sõng yel-gɛt sẽn segd n bɩɩsã.

¹⁷ Kãsem-dãmbã segd n moonda koɛɛgã ne yẽesem. Koɛɛgã mooneg wɛɛngẽ, segd n yɩɩ vẽeneg tɩ b maoodame n lʋɩɩsd koe-noogã mooneg taoor wa a Zeezi sẽn da maandã. A Zeezi wilgame t’a karen-biisã yell pak-a lame, n sõng-b tɩ b ra tõe n moon koɛɛgã sõma. (Mark 1:38; Luk 8:1) Kãsem-dãmbã sẽn modgd n yit koe-moonegã baa b tʋʋmã sẽn waoogã, kɩtdame tɩ tigingã nebã fãa tʋll n tall b yẽesmã buudu. Sẽn paase, kãsem-dãmbã sã n moond ne b zagsã rãmb wall ne tigingã neb a taaba, b “ned kam fãa tẽeb na n kenga a to raoodo.”—Rom. 1:11, 12. 12.

¹⁸ Yɩl n bɩɩs zʋg-sõma kãensã fãa n paam tɩ b yãk-f tɩ f lebg yel-gɛt tõe n wõnda yaa toogo. Yaa vẽeneg tɩ kãsem-soab kae n tõe n bɩɩs zʋg-sõma kãensã fãa b sẽn wilg Biiblã pʋgẽ wã tɩ zems zãng ye. La zʋg-sõma kãensã baa a ye pa segd n paoog kãsem-soab wʋsgo, hal tɩ yaa zu-loe-kãseng ye. Kãsem-soab tõe n tara zʋg-sõma kẽere, t’a to são-a zĩis a taaba. Woto kɩtame tɩ kãsem-dãmbã sullã tar zʋg-sõma nins fãa sẽn yaa tɩlɛ sẽn na yɩl n ges Wẽnnaam tigingã yell wa sẽn segde.

¹⁹ Kãsem-dãmbã sull sã n wa tigim taab n na n yãk neb b sẽn dat tɩ b lebg kãsem-dãmba, b segd n tẽega tẽn-tʋmd a Poll gom-kãensã: “Mam yeta yãmb ned kam fãa t’a ra tags t’a tara yõod wʋsg ye. La bɩ a tagsa wã yɩ tagsa sẽn wilgd t’a tara yam-sõngo, wa sẽn zems tẽeb ning Wẽnnaam sẽn kõ-a wã.” (Rom. 12:3) Kãsem-soab fãa segd n gesame t’a pa ta a taabã ye. B sã n wa zĩnd n na n yãk ned b sẽn dat t’a lebg kãsem-soaba, b ned baa a ye pa segd n wilg t’a yaa “nin-tɩrg tɩ loog” ye. (Koɛ. 7:16) Kãsem-dãmbã sull sã n tẽeg zʋg-sõma nins Biiblã sẽn baood tɩ yel-gɛtbã bɩɩsã, na n sõng-b lame tɩ b bãng ned ning b sẽn dat n yãkã sã n tara zʋg-sõma kãensã wa sẽn segdã. Kãsem-dãmbã sã n ning b yamẽ tɩ ned baa a ye pa zems zãnga, la b zãag b meng ne pʋ-lik la bak-n-sõnge, na n sõng-b lame tɩ b sã n wa baood n na n yãk ned t’a lebg kãsem-soaba, bɩ b tõog n maan dẽ tɩ zems ne a Zeova no-tɩrsã la naf tigingã me. B segd n pʋʋsa yam-yãkr fãa yĩnga, la b bas tɩ Wẽnnaam vʋʋsem sõngã wilg-b sore. Kãsem-soab yãkr naaga yel-gɛtbã tʋʋm nins sẽn pa reem yellã, tɩ b segd n maan dẽ tɩ zems ne a Poll saglgã. A yeelame yaa: “Ra yɩ yãg-yãg n tik ned baa a ye ne f nus ye.”— 1 Tɩm. 5:21, 22.

VƲƲSEM SÕNGÃ BIISI

²⁰ Segd n yɩɩ vẽeneg tɩ rap nins b sẽn yãkã basdame tɩ vʋʋsem sõngã wilgd-b sore, la b wilgd b vɩɩm manesmã pʋgẽ tɩ b tara zʋg-sõma nins vʋʋsem sõngã sẽn sõngd ned t’a bɩɩsã. A Poll sõdga vʋʋsem sõngã biis a wɛ wã. Yaa “nonglem, sũ-noogo, laafɩ, sũ-mare, maan-neere, sõmblem, tẽebo, sũ-bʋgsem, la yõk-m-menga.” (Gal. 5:22, 23) Nin-kãensã sẽn yaa yel-gɛtbã kengda tigingã neb raood la b sõngd-b tɩ b zemsd taab n tʋmd Wẽnnaam tʋʋmdã. B manesmã ne b tʋʋm-tʋmdɩ wã wilgdame tɩ yaa vʋʋsem sõngã n yãk-ba.—Tʋʋ. 20:28.

NEB SẼN SÕNGD TƖ ZEMS-N-TAAR BEẼ

²¹ Yaa tɩlɛ tɩ kãsem-dãmbã naag taab yam a ye n sõng tɩ zems-n-taar zĩnd tigingã pʋgẽ. B zʋgdã tõeeme n pa a yembr ye. La b ned kam fãa sã n maagd a yĩng n kelgd a to ne waoogr baa a tagsgã sã n yaa toor ne nin-kãngã, b na n tõogame tɩ zems-n-taar kell n zĩnd kãsem-dãmbã sʋka. Kãsem-dãmbã sull sã n dɩk sard tɩ pa kɩɩsd Biiblã noore, b ned kam fãa segd n yɩɩ wʋmd n sake. Kãsem-soab sã n yaa wʋmda, wilgdame t’a basdame tɩ “yam ning sẽn yit yĩngrã” wilgd-a sore. Yam-kãng kɩtdame tɩ ‘ned baood laafɩ,’ la a “maand bũmb fãa ne yam.” (Zak 3:17, 18) Kãsem-soab baa a ye pa segd n tags t’a yɩɩda a taabã, wall a baood n na n soog-b ye. Kãsem-dãmbã sull sã n naagd taab yam a ye n tʋmd tigingã neer yĩnga, b wilgdame tɩ b sɩd yaa Wẽnnaam tʋmd-n-taase.—1 Kor. sak 12; Kolo. 2:19.

RAO SÃ N MODGD N DAT N LEBG YEL-GƐTA

²² Kiris-ned sẽn yaa rao fãa tẽeb sẽn bɩ segd n tʋllame n lebg yel-gɛta. (1 Tɩm. 3:1) La kãsem-soab tʋʋmd baooda modgr la mong-m-menga. Baoodame me t’a sak wakat fãa n tʋm a tẽed-n-taasã neer yĩnga, n ges b tẽebã yelle. Ned sã n dat tɩ b yãk-a t’a lebg yel-gɛta, a segd n modgame n bɩɩs zʋg-sõma nins Biiblã sẽn wilgã.

NED YƐL TÕE N WA TOEEMAME

²³ Saam-biig sẽn tʋm Wẽnnaam tʋʋmdã ne a sũur fãa n kaoos tõe n wa lʋɩɩ bãaga, wall a komse. Tõe tɩ yaa a yʋʋm sẽn vẽsg yĩng n kɩt t’a pa le tõe n tʋm yel-gɛt tʋʋmd ye. Baasgo, b sã n pa reeg a tʋʋmdã, b segd n ket n waoogd-a-la wa kãsem-dãmb a taabã. Pa tɩlɛ t’a bas tʋʋmdã a sẽn pa le tõe n tʋm wa pĩndã yĩng ye. B segd n ket n waoogda yẽ me ne waoogr wʋsg wa kãsem-dãmb a taabã sẽn tʋmd wʋsg n get Wẽnnaam bãgrã yellã.

²⁴ La kãsem-soab sã n tagsdẽ tɩ sẽn yaa sõma ne yẽ yaa b sẽn na n deeg a tʋʋmdã, a yɛlã sẽn toeem t’a pa le tõe n tʋm wa pĩndã yĩnga, sor beeme. (1 Pɩy. 5:2) La b segd n ket n waoogd-a lame. Baa a sã n pa le tõe n tʋm tʋʋm nins kãsem-dãmbã sẽn tʋmdã, a tõe n sõnga tigingã neb hal sõma.

KÃSEM-DÃMBÃ SẼN TƲMD TƲƲM NINS TIGINGÃ PƲGẼ

²⁵ Kãsem-dãmbã tʋmda tʋʋm toɛy-toɛy tigingã pʋgẽ. Tiging fãa pʋgẽ, kãsem-dãmbã sull yel-gɛt n be, n paas sekertɛɛre, koe-moonegã yel-gɛta, Gũusg Gasgã zãmsg taoor lʋɩta, la Kiris-nebã vɩɩm la b tʋʋma tigissã yel-gɛta. Kãsem-dãmb wʋsg yaa koe-mooneg sul yel-gɛtba. B pa yãk wakat kãsem-soab sẽn segd n tʋm a tʋʋmdã n tek ye. La saam-biig sã n toeem tiginga, pa rẽ bɩ a sã n pa le tõe n tʋm a tʋʋmd a sẽn ka laafɩ yĩnga, wall b sã n deeg a kãsem-sobendã a sẽn pa le pidsd noy nins Biiblã sẽn wilgã, b tõe n yãka kãsem-soab a to t’a ledg-a a tʋʋmdẽ wã. Tiging pʋgẽ, yel-gɛtbã sõor sã n pa waooge, tõe n yɩɩ tɩlɛ tɩ kãsem-soab a yembr tʋmd tʋʋm wʋsg hal tɩ b wa paam saam-biis b sẽn tõe n yãk tɩ b lebg kãsem-dãmba.

²⁶ Kãsem-dãmbã tigissã sasa, yaa kãsem-dãmbã sull yel-gɛtã n lʋɩt taoore. A sikda a menga, n naagd kãsem-dãmb a taabã tɩ b get Wẽnnaam bãgrã yelle. (Rom. 12:10; 1 Pɩy. 5:2, 3) A segd n yɩɩ ned sẽn mi bũmb siglg sõma, la sẽn tõe n lʋɩ taoor n tʋm a tʋʋmdã neere.—Rom. 12:8.

²⁷ Yaa tigingã sekertɛɛrã n get koe-moondbã rapoor-dãmbã yelle. Tigingã sã n paam koees wall lɛta, yẽ n get tɩ kãsem-dãmbã bãnge. Sã n wa yaa tɩlɛ, b tõe n yãka kãsem-soab a to wall kãsem-sõngd sẽn tõe tʋʋmdã t’a sõng-a.

²⁸ Yaa koe-moonegã yel-gɛt n get koe-moonegã siglg yelle, la bũmb nins fãa sẽn kẽed ne koe-moonegã. A siginda a sẽkã sõma, sẽn na yɩl tɩ kiuug fãa, bɩ a tɩ kaag koe-moonegã sull a ye. Koe-moonegã sulã sã n pa waoogẽ, a tõe n kaaga sull fãa naoor a yiib yʋʋmd fãa. Kaagrã sasa, a lʋɩta taoor n maan koe-moonegã tigissi, a naagda sullã koe-moondb n tʋme, la a sõngd-b lebg-n-tɩ-ges rãmbã la Biiblã zãmsg wɛɛngẽ.

KOE-MOONEGÃ SUL YEL-GƐTBA

²⁹ Tʋʋmd a ye sẽn tar yõod wʋsg tigingã pʋgẽ yaa koe-moonegã sull yel-gɛtã tʋʋmde. Ad a tʋʋmdã sẽn baood t’a maane: 1) Modg n ges sullã ned kam fãa tẽeb yelle, 2) sõng sullã ned fãa t’a moond koɛɛgã ne yẽesem, raood la sũ-noogo, la 3) zãms sullã kãsem-sõngdbã sõma tɩ b paam minim la zʋg-sõma n wa lebg kãsem-dãmba. Kãsem-dãmbã sull n yãkd saam-biis nins sẽn tar minim n yɩɩd n tõe n tʋm tʋʋm-kãensã fãa.

³⁰ Tʋʋmdã sẽn tar yõod wʋsgã yĩnga, yaa kãsem-soab la b segd n yãk t’a yɩ koe-moonegã sull yel-gɛta. Kãsem-soab sã n kae, b tõe n yãka kãsem-sõngd t’a tʋm tʋʋmdã hal tɩ b wa paam kãsem-soaba. La kãsem-sõngdã sẽn pa tigingã yel-gɛtã yĩnga, b na n boond-a lame tɩ sullã sõngda. Tigingã kãsem-dãmb n wilgd-a sor a tʋʋmdã pʋgẽ.

³¹ Bũmb a ye koe-moonegã sull yel-gɛt sẽn maand tɩ tar yõod wʋsgo, yaa a sẽn lʋɩt taoor koe-moonegã tigissã sasa wã. A sẽn wae n yit koe-moonegã, a yẽesmã la a sũur sẽn noom ne tʋʋmdã kengda sullã neb raoodo. Sullã neb sã n paamd n be ne taaba, n kengd taab raood la b sõngd taaba, b sũur yaa noogo. Woto yĩnga, yɩta sõma tɩ b sigl koe-moonegã yiib wakat tɩ naf neb wʋsgo. (Luk 10:1-16) Yel-gɛtã segd n gesame tɩ wakat fãa bɩ b tõe n paam mooneg zĩiga. Naoor wʋsgo, yaa yẽ n maand koe-moonegã tigsgã, la a ges tɩ koe-moond fãa paam tũud-n-taaga. A sã n pa na n tõog n yi, a segd n gesame tɩ kãsem-soab a to, pa rẽ bɩ kãsem-sõngd lʋɩ taoor n ges tʋʋmdã yelle, tɩ naf koe-moondbã. Kãsem-soab bɩ kãsem-sõngd sã n pa be, a tõe n yãka saam-biig a to sẽn tar minim.

³² Sullã yel-gɛt segd n segla bũmba fãa, koe-moonegã yel-gɛt kaagrã yĩnga, la a togs a sullã koe-moondb kaagrã daare, n wilg sẽn na n naf-b to-to. Sullã neb fãa sã n mi kaagrã tiiri, na n sõngame tɩ b kẽes b toog ne sũ-noogo.

³³ B sigla sull fãa t’a nebã sõor yaa bilfu. Rẽ kɩtame tɩ sullã yel-gɛt tõe n bãng a sullã nebã fãa sõma. A geta a sullã ned fãa yell sõma, wa pe-kɩɩm sẽn nong a piisi. A sõngda sullã ned fãa la a kengd a raood t’a kẽesd a toog koe-moonegã pʋgẽ, la a kẽnd tigissã n pa vaandẽ ye. A modgdame n maand sẽn segd sẽn na yɩl tɩ sullã ned kam fãa tẽeb tall pãnga. A kaagda ned ning fãa sẽn ka laafɩ, wall sẽn maood ne sũ-sãamse. Goam sẽn kengd raoodo, pa rẽ bɩ saglg sẽn zems tõe n sõnga kẽer tɩ b bao tʋʋm a taab tigingã pʋgẽ, n paam n sõng b tẽed-n-taasã. Sull fãa yel-gɛt segd n sõngda a sullã nebã n yɩɩda. La a sẽn yaa kãsem-soab la pe-kɩɩmã yĩnga, a geta tigingã nebã fãa yell ne nonglem, n segl n sa n na n sõng sẽn dat-a sõngr fãa.—Tʋʋ. 20:17, 28.

³⁴ Sullã yel-gɛt tʋʋmd me yaa a rees a sullã koe-moondbã rapoor-dãmba, n kõ sekertɛɛrã. Koe-moondbã sã n kõt b rapoor-dãmbã tao-tao, na n sõnga sullã yel-gɛtã a tʋʋmdã pʋgẽ. Kiuug fãa kũumẽ, b tõe n kõo sullã yel-gɛtã b rapoor-dãmbã, wall b tɩ ning koglgã b sẽn dɩgl Rĩungã roogẽ rapoor-dãmbã yĩngã pʋgẽ.

SULL NING SẼN GET KOE-MOONEGÃ YELLE

³⁵ Tʋʋm kẽer n be tɩ yaa tigingã sull ning sẽn get koe-moonegã yellã n segd n tʋme. Sul-kãng neb yaa kãsem-dãmbã sull yel-gɛtã, sekertɛɛrã ne koe-moonegã yel-gɛtã. Wala makre, ned sã n wa rat Rĩungã roog n maan a kãadem diskuur wall ned kaalem diskuuri, yaa sul-kãng n get b sã n na n kõo sore. Leb n yaa bãmb n wilgd koe-moond fãa a sẽn be sull ninga. Ned sã n gʋls demand n dat n yɩ sõngr so-pakd bɩ wakat fãa so-pakda, pa rẽ bɩ demand a to, yaa sul-kãng me n get rẽ yelle. Sull ning sẽn get koe-moonegã yellã tũuda kãsem-dãmbã sullã sẽn yetã.

³⁶ Yaa filiyallã n wilgd sull ning sẽn get koe-moonegã yellã b tʋʋmdã sẽn tog n yɩ to-to, n paas Gũusg Gasgã zãmsg taoor lʋɩtã tʋʋmde, ne Kiris-nebã vɩɩm la b tʋʋma tigsgã yel-gɛtã la kãsem-dãmb a taabã fãa tʋʋmde.

³⁷ Tigingã kãsem-dãmbã tara wakat takɩ n tigimd taab n sõsd tigingã neb tẽebã zugu. B tigimda taab tigims sull yel-gɛtã kaagr fãa sasa, la kiis a tãab rẽ poor me. La sẽn yaa wakat ning fãa, yell sã n beẽ, kãsem-dãmbã tigimda taab n welg-a.

SULGD-Y Y MENS N SAKDẼ

³⁸ Yel-gɛtbã yaa neb sẽn pa zems zãnga. Baasgo, b sagenda tigingã neb fãa tɩ b sulg b mens n sak-ba, bala a Zeova n bas tɩ b beẽ. A na n wa soka yel-gɛtbã b tʋʋmã wɛɛngẽ. B tʋmda a Zeova yʋʋr yĩnga, la a naamã yĩnga. Ebre-rãmb 13:17 yetame: “Bɩ y kelg sẽn lʋɩt-b taoor yãmb sʋkã, la y sulg y mens n sak-ba, bala b geta yãmb yell wakat fãa, n miẽ tɩ Wẽnnaam na n kaoa b bʋʋd tɩ zems b tʋʋma. Bɩ y maan woto sẽn na yɩl tɩ b tʋm ne sũ-noog la ra yɩ ne siri, bala rẽ pa na n naf yãmb ye.” Yaa ne a vʋʋsem sõngã maasem la a Zeova yãkd ned t’a lebg yel-gɛta. Yaa ne vʋʋsem sõng-kãng maasem me la a na n deeg yel-gɛt tʋʋmde, a sã n pa le bɩɩsd vʋʋsem sõngã biisi, wall a pa le tũud noy nins Biiblã sẽn wilgã.

³⁹ Rẽ yĩnga, kãsem-dãmbã sẽn tʋmd wʋsg la b kõt mak-sõngã pa noom-d sɩda? A Poll lɛtr ning a sẽn tool Tesalonik nebã pʋgẽ, a yeel-b lame yaa: “M saam-biisi, tõnd kota yãmb tɩ y waoog neb nins sẽn tʋmd wʋsg yãmb sʋkã, sẽn lʋɩt yãmb taoor Zu-soabã pʋgẽ la sẽn sagend yãmbã. Wilg-y tɩ y nand-b-la wʋsg ne nonglem b tʋʋmdã yĩnga.” (1 Tes. 5:12, 13) Yel-gɛtbã sẽn tʋmd wʋsg tigingã nafr yĩngã, kɩtame tɩ d tõe n tʋm Wẽnnaam tʋʋmdã faag-faaga, la ne sũ-noogo. A Poll pipi lɛtr ning a sẽn tool a Tɩmote wã pʋgẽ me, a goma tigingã nebã sẽn tog n tall manesem ning ne yel-gɛtbã yelle, n yeele: “Kãsem-dãmb nins sẽn lʋɩt tigingã taoor sõma wã segda ne waoogr wʋsgo, sẽn yɩɩd fãa, b rãmb nins sẽn tʋmd wʋsg koɛɛgã mooneg pʋgẽ, la nebã zãmsg pʋgẽ wã.”—1 Tɩm. 5:17.

TƲƲM A TAAB B SẼN TƲMD SIGLGÃ PƲGẼ

⁴⁰ B tõe n wa yãka kãsem-dãmb kẽer tɩ b naag sull ning sẽn kaagd bãad-rãmbã. Kãsem-dãmb a taab naaga sull ning sẽn get logtor-yirẽ tɩbsg yellã (CLH), n mi n gilgd logtor-yiyã n sõsd ne logtoɛɛmbã n kengd b raoodo, sẽn na yɩl tɩ b ket n sakd n tɩpd a Zeova Kaset rãmb n pa ning-b zɩɩm ye. Sãnda sõngda ne Rĩungã tʋʋma, n naagd n met Rĩungã rot la tigis-kãsems roto, bɩ n naagd sull ning sẽn get tigis-kãsemsã yellã n tʋmdẽ. Siglgã neb fãa nanda saam-bi-kãensã sẽn tʋmd wʋsg la b mongd b mens woto wã. Hakɩɩka, d ‘waoogda neb a woto buudã.’—Fili. 2:29.

TIGIMS SULL YEL-GƐTÃ

⁴¹ Siglgã taoor lʋɩtb sullã getame tɩ b yãkd kãsem-dãmb sẽn tar minim wʋsg tɩ b lebg tigims sul yel-gɛtba. Yaa filiyallã n yãkd nin-kãensã tɩ b kaagd tigimsã b sẽn sigl sull-sullã naoor a yiib yʋʋmd fãa. B kaagda so-pakdb nins sẽn be koe-moonegã zĩis nins sẽn zãrã. B rengd n yãka b kaagrã daare, la b togs tigingã pĩnd-pĩnda, sẽn na yɩl tɩ kaagrã naf-b sõma.

⁴² Kãsem-dãmbã sull yel-gɛtã n lʋɩt taoor n ges tɩ b segl bũmb fãa sõma, tɩ kaagrã keng nebã fãa raoodo. (Rom. 1:11, 12) Kãsem-dãmbã sull yel-gɛtã sã n bãng tigims sull yel-gɛtã kaagr daare, la bũmb nins sẽn yaa tɩlɛ ne tigims sull yel-gɛtã ne a pagã, (a sã n kẽe kãadem) a na n yẽsa ne saam-biis toɛy-toɛya, n ges tɩ yel-gɛtã paam gãag zĩig la bũmb a taab sẽn yaa tɩlɛ. A getame tɩ tigims sull yel-gɛtã la nebã fãa bãng bũmb nins b sẽn maanã.

⁴³ Tigims sull yel-gɛtã na n sõsa ne kãsem-dãmbã sull yel-gɛtã n bãng tigissã ray la b wakate, la koe-moonegã tigissã wakat me. B na n tũu tigims sull yel-gɛtã ne filiyallã saglse, n yãk rayã la wakatã. B segd n togsa tigingã neb fãa pĩnd-pĩnda, tɩ b bãng tigissã ray la b wakato, n paas so-pakdbã tigsga, ne kãsem-dãmbã la kãsem-sõngdbã tigsgã wakate, la koe-moonegã tigissã ray la b wakat me.

⁴⁴ Talaatã daar zaabre, tigims sull yel-gɛtã geta koe-moonegã rapoor-dãmba, tigissã rapoor-dãmba, koe-moonegã kart-dãmb la ligdã rapoore. Rẽ kɩtdame t’a bãng tigingã sẽn dat sõngr zĩig ninga, la a sẽn tõe n sõng sẽn get-b rapoor toɛy-toɛyã yell to-to. Kãsem-dãmbã sull yel-gɛtã na n modgame tɩ tigims sull yel-gɛtã paam rapoor-dãmbã pĩnd-pĩnda.

⁴⁵ Kaagrã sasa, sã n tõeyã, tigims sull yel-gɛtã baooda sẽk n sõs ne saam-biisã yembr-yembre. Tõe n yɩɩ tigissã zĩigẽ, koe-moonegã zĩigẽ, rɩɩbã sasa la wakat a taaba. Sẽn paase, a tigimda ne kãsem-dãmbã la kãsem-sõngdbã n kõ-b sagls la noy sẽn tik Biiblã, tɩ keng b raood tɩ b tõog n ges Wẽnnaam bãgrã a sẽn gũnug-bã yelle. (Yel. 27:23; Tʋʋ. 20:26-32; 1 Tɩm. 4:11-16) A tigimda ne so-pakdbã me, n keng b raood b tʋʋmdã pʋgẽ, la a sõng b ned kam fãa wa sẽn zems zu-loees nins a sẽn paamd koe-moonegã pʋgẽ.

⁴⁶ Bũmb a taab sã n dat manegr kaagrã semen sasa, tigims sull yel-gɛtã na n sõnga wa a sẽn tõe. La b sã n pa tõe n welg rẽ kaagrã sasa, yel-gɛtã tõe n sõnga kãsem-dãmbã, bɩ neb nins sẽn dat sõngrã tɩ b maan vaeesg n bãng Biiblã sẽn yet rẽ zugu. Filiyallã sã n dat kibay yellã zugu, yẽ ne kãsem-dãmbã na n gʋlsa rapoor n toole.

⁴⁷ Tigims sull yel-gɛtã sã n wa kaagd tiginga, a kẽnda tigissã fãa. La b tõe n mi n toeema tigsg daar wall a wakat tɩ zems filiyallã sẽn wilgi. A na n wɛgsa sõss n keng tigingã neb raoodo, n zãms-b la a paas b tẽebã pãnga. A na n modgame me n sõng tigingã neb tɩ b nong a Zeova ne a Zeezi Kirist la siglgã.

⁴⁸ Tigims sull yel-gɛtã sẽn maand a kaagrã sasa me tɩ tar yõod yaa a keng tigingã neb raood tɩ b moon koɛɛgã ne yẽesem, la a kõ-b sagls sẽn zemse. Neb wʋsg na n tõog n manega b sẽkã n paam n moon koɛɛgã sõma kaagrã semen sasa, tɩ sã n tõe bɩ b yɩ sõngr so-pakdb ki-kãngã. Ned sã n dat n naag tigims sull yel-gɛtã wall a pagã n moon koɛɛgã, a tõe n kosame. D sã n kos yel-gɛtã bɩ a pagã t’a yãag-d tɩ d tɩ zãms ned Biiblã wall d lebg n tɩ ges ned d sẽn moon koɛɛgã, na n woma biis wʋsgo. Fo sẽn maand f sẽn tõe n kẽesd f toog tʋʋmdã bab-kãng pʋgẽ wã, noogda sũur wʋsgo.—Yel. 27:17.

⁴⁹ Yʋʋmd fãa, b maanda tigis-kãsems a yiib tigims sull fãa yĩnga. Yaa tigims sull yel-gɛtã n get tigis-kãens fãa seglg yelle. A yãkda tigis-kãsengã yel-gɛta, la tigis-kãsengã yel-gɛt sõangda. B segd n sõng-a-la neere, n segl tigsgã. Woto na n kɩtame t’a paam sẽk n ges tigis-kãsengã na-kẽndrã yell sõma. Yel-gɛtã yãkda saam-biis a taab me tɩ b ges tigis-kãsengã tʋʋm toɛy-toɛy yelle. Tigis-kãseng sasa, a yãkda neb me tɩ b maan ligdã gɛɛl rapoore. Vugr yʋʋmd fãa, filiyallã yãkda saam-biig t’a yɩ sõsd sẽn yaa kaagd tigims sull tigis-kãseng sasa. B welgda tigims sul kẽer bõones-bõones tɩ sull fãa tar a tigis-kãsenga, zĩigã sẽn zãr wʋsgã yĩnga, pa rẽ bɩ tigis-kãsemsã zĩig sẽn yaa sẽkã yĩnga.

⁵⁰ Kiuug fãa baasgẽ, tigims sull yel-gɛtã toonda filiyallã a tʋʋmdã rapoore. A sã n maana depãens-rãmb sẽn zemse, wala makre, ligd a sẽn yiis so-toakã yĩnga, rɩɩb bɩ gãag zĩig wall bũmb a taab sẽn yaa tɩlɛ a tʋʋmdã yĩnga, a tõe n gʋlsa filiyallã n kos tɩ b lebs-a, la yaa tiging ning a sẽn kaagã sã n pa tõe n yao depãens-kãense. Tigims sull yel-gɛtbã kɩsa sɩd tɩ b sã n lʋɩɩs a Zeova Rĩungã taoore, wa a Zeezi sẽn pʋlmã, bũmb sẽn yaa tɩlɛ pa na n paoog-b ye. (Luk 12:31) Tigingã neb fãa segd n bãngame tɩ b sã n deeg nin-kãensã sẽn tʋmd b nafr yĩngã sãando, yaa zu-zẽkr tɛkẽ.—3 Zã 5-8.

FILIYALLÃ TAOOR LƲƖTB SULLI

⁵¹ Dũniyã gill zugu, a Zeova Kaset rãmbã filiyall fãa pʋgẽ, b yãkda kãsem-dãmb a tãab bɩ sẽn yɩɩd rẽ tɩ b yaa filiyallã taoor lʋɩtb sull neba, n get koe-moonegã yell tẽns nins fãa filiyallã sẽn so wã pʋgẽ. B yãkda b nin-yend t’a yaa filiyallã taoor lʋɩtb sull yel-gɛta.

⁵² Bãmb n get yɛl nins sẽn pak b filiyallã tigimsã fãa yelle. Filiyallã taoor lʋɩtb sull geta Rĩungã koe-noogã mooneg yell zĩis nins fãa a sẽn so wã, la a getẽ tɩ b lugund tigims la tigims sula, sẽn na yɩl tɩ b tõog n moon koɛɛgã zĩisã fãa wa sẽn segde. Leb n yaa filiyallã n get misioneer-dãmbã tʋʋmd yelle, zall so-pakdbã, wakat fãa so-pakdbã la sõngr so-pakdbã me tʋʋm yelle. Tigims sull tigis-kãsenga, pa rẽ bɩ rasem a tãab tigis-kãseng sã n beẽ, filiyallã bobenda neb tʋʋmde, la a ges tɩ “bũmb fãa maan wa sẽn segde, la ra yɩ ne zũnd-zãnd ye.”—1 Kor. 14:40.

⁵³ Tẽns kẽer pʋsẽ, b lugunda sull sẽn na n tũud filiyallã sẽn yetã n get Wẽnnaam tʋʋmdã yell tẽn-kãense. Woto kɩtdame tɩ sul-kãng tõe n ges Rĩungã tʋʋm yell sõma tẽng ning pʋgẽ a sẽn be wã. A geta Betɛllã zak rãmb yelle, la a get lɛta wã la rapoor-dãmbã me yelle. Leb n yaa sul-kãng n get Rĩungã tʋʋmd yelle.

⁵⁴ Yaa Siglgã taoor lʋɩtb sullã n yãkd filiyallã taoor lʋɩtb sull neba, la sull ning sẽn get Wẽnnaam tʋʋmdã yell tẽng a ye pʋgẽ wã neba.

SAAM-BIIS BIRU-KÃSENGÃ SẼN TƲMDE

⁵⁵ Wakat-wakate, Siglgã taoor lʋɩtb sullã mi n gesame tɩ saam-biis tẽeb sẽn bɩ sõma tɩ kaag filiyall-dãmbã sẽn be dũniyã gill zugã. B boonda saam-biis nins b sẽn yãkã tɩ saam-biis biru-kãsengã sẽn tʋme. A tʋʋmdã meng-meng yaa keng Betɛllã zak rãmb raoodo, la a sõng filiyallã taoor lʋɩtb sullã neb tɩ b welg zu-loeese, wall a leok sogsg nins fãa b sẽn tar koɛɛgã mooneg wɛɛngẽ, la sõng nebã tɩ b lebg Kiristã karen-biisã wɛɛngẽ. A mi n talla tigsg ne tigims sull yel-gɛtb kẽere, la ne misioneer-dãmbã me. A sõsda ne-b b zu-loeesã wɛɛngẽ, la bũmb nins fãa sẽn yaa tɩlɛ ne-bã wɛɛngẽ, n keng b raood sõma tɩ b wɩng ne b tʋʋmdã sẽn tar yõod wʋsgã. Tʋʋm-kãng yaa Rĩungã koe-noogã moonego, la sõng nebã tɩ b lebg Kiristã karen-biisã.

⁵⁶ Saam-biig ning biru-kãsengã sẽn tʋmã rata ne a sũur fãa n bãng tʋʋmdã sẽn kẽnd to-to, rat n yeel tɩ Rĩungã koɛɛgã moonego, la bũmb nins sẽn maand tigimsã pʋsẽ wã. Sẽk sã n beẽ, a tõe n tɩ kaaga sɛbã lebgr biru-rãmb sẽn be zĩis a taaba. Saam-biig biru-kãsengã sẽn tʋm sã n kaagd filiyalle, a naagd n moona Rĩungã koɛɛgã wa a sẽn tõe.

YEL-GƐTBÃ TƲMDA B TƲƲMDÃ NE NONGLEM

⁵⁷ Yel-gɛtbã sẽn yaa rap tẽeb sẽn bɩ sõma wã tʋmda b tʋʋmdã neere, la ne nonglem tɩ nafd-d hal wʋsgo. D sã n ket n sulgd d mens n sakd nin-kãensã sẽn get bãgrã yellã, d paamd n naagda Kirist Zeezi sẽn yaa tigingã Zu-soabã n tʋmdẽ. (1 Kor. 16:15-18; Efɛɛ. 1:22, 23) Woto kɩtame tɩ dũniyã zĩig fãa, Wẽnnaam vʋʋsem sõngã be tigimsã pʋsẽ, t’a Gomdã wilgd-d sor tɩ d tʋmd d tʋʋmdã dũniyã gill zugu.—Yɩɩn. 119:105.