Kãsem-sõngdbã tʋmda tʋʋm sẽn tar yõodo

TẼN-TƲMD a Poll gʋlsa Filip tigingã neb n yeel-b yaa: “Maam a Poll ne a Tɩmote sẽn yaa Kirist Zeezi yembsã n gʋls seb-kãngã n tool nin-sõamyã nins fãa sẽn be Kirist Zeezi pʋgẽ n be Filip tẽngã, n paas yel-gɛtbã ne kãsem-sõngdbã.” (Fili. 1:1) Ges t’a sõdga kãsem-sõngdbã me. Yaa vẽeneg tɩ wakat kãnga, nin-kãensã tʋma wʋsg n sõng tigingã kãsem-dãmbã. Yaa woto me rũndã-rũndã. Kãsem-sõngdbã tʋmda tʋʋm toor-toor n sõngd yel-gɛtbã, tɩ kɩtdẽ tɩ tigingã bũmba fãa sigl sõma.

² Fo mii yãmb tigingã kãsem-sõngdbã bɩ? Fo mii tʋʋm nins b sẽn tʋmd tɩ nafd foo ne tigingã neb fãa wã bɩ? Hakɩɩka, a Zeova nanda modgr ning b sẽn maandã wʋsgo. A Poll yeelame: “Rap nins sẽn tʋmd sõma wã paamda yʋ-noogo, la b tõe n gom tẽeb ning sẽn be Kirist Zeezi pʋgẽ wã yell ne pʋ-peelem wʋsgo.”—1 Tɩm. 3:13.

ZƲG-SÕMA NINS BIIBLÃ SẼN YET TƖ B SEGD N BƖƖSAME WÃ

³ Kãsem-sõngdbã segd n yɩɩ kiris-neb sẽn kõt mak-sõng b vɩɩmã pʋgẽ, neb b sẽn tõe n teege, la sẽn tʋmd b tʋʋmã sõma. D sã n ges lɛtr ning tʋm-tʋmd a Poll sẽn gʋls a Tɩmote wã pʋgẽ, d yãta b sẽn segd n yɩ neb nins buudã vẽenega. A yeelame: “Woto me, kãsem-sõngdbã segd n yɩɩ neb sẽn zems ne waoogre, sẽn pa yagd ziri, sẽn pa yũud divẽ wʋsgo, sẽn pa rat-tɩ-loog rãmb sẽn baood ligd la arzɛgse, neb sẽn gãt tẽebã yel-soalgdgã sẽn yaa sõngã kãn-kãe ne sũur-kaset sẽn yaa yɩlemde. Sẽn paase, bɩ b reng n mak-b n ges b sã n zemsa ne tʋʋmdã, tɩ sã n mik tɩ rõadg kae bɩ b yaool n lebg kãsem-sõngdba.” (1 Tɩm. 3:8-10, 12) B sã n tikd zʋg-sõma nins Biiblã sẽn wilgã n yãkd kãsem-sõngdbã, ned pa tõe n sãam tigingã yʋʋre, neb nins b sẽn bobend tʋʋm tigingã pʋgẽ wã wɛɛngẽ ye.

⁴ Kãsem-sõngdbã yaa kãsemb tɩ b yaa kom-bɩɩs me, b moonda koɛɛgã kiuug fãa. B rɩkda a Zeezi naoore, n moond koɛɛgã ne yẽesem. B sẽn maand woto wã, b rɩkda a Zeova togs-n-taare, n wilgdẽ tɩ b rata ãdem-biisã fãagre.—Eza. 9:7.

⁵ Kãsem-sõngdbã leb n kõta mak-sõng fu-yerdɩ wã wɛɛngẽ, b sẽn manegd b mens to-to wã, b no-goamã, b tʋʋm-tʋmdɩ wã la b yel-manesmã pʋgẽ. B yaa neb yam sẽn vẽenẽ, tɩ rẽ kɩtdẽ tɩ b taabã nand-ba. Sẽn paase, b modgdame n kogend bãmb ne a Zeova zoodã, la b pa reemd ne tʋʋmd ning b sẽn bobl-b tigingã pʋgẽ wã me ye.—Tɩt 2:2, 6-8.

⁶ ‘B reng n mak-b lame n ges b sã n zemsa ne tʋʋmdã.’ Nand meng tɩ b yãk-ba, b wilgame tɩ b yaa neb sẽn tʋmd Wẽnnaam tʋʋmdã ne b sũy fãa. B wilgame me tɩ b lʋɩɩsda Rĩungã taoore, la tɩ b tʋll n tʋma tʋʋmd ning fãa b sẽn na n kõ-ba. Hakɩɩka, b kõta tigingã neb fãa mak-sõngo.—1 Tɩm. 3:10.

B TƲƲMDÃ SẼN YAA A SOABA

⁷ Kãsem-sõngdbã tʋmda tʋʋm toor-toor b tẽed-n-taasã nafr yĩnga. Woto kɩtdame tɩ yel-gɛtbã paamd sẽk sõma n get nebã zãmsg la pe-kɩʋʋngã yelle. Nand tɩ kãsem-dãmbã sull bobl-b tʋʋmde, b geta b ned kam fãa tõog sẽn yaa a soaba, la tigingã sẽn dat sõngr zĩig ninga.

⁸ Ad b tʋʋmã kẽere: B tõe n yãka kãsem-sõngd t’a get sɛbã yelle, sẽn na yɩl tɩ d tõe n paam sɛbã d meng yĩng la koe-moonegã yĩnga. B yãkda kẽer me tɩ b get tigingã ligdã yelle, la moonegã zĩig kart-rãmbã yelle. Sãnda me geta mikoro-rãmbã la wʋmbã teed yelle, b reegda sẽn wat-b tigissã, la b sõngd kãsem-dãmbã ne manesem a taaba. Tʋʋm wʋsg n be b sẽn segd n tʋm tɩ Rĩungã roog kell n yɩ yɩlemd la sõma wakat fãa. Rẽ kɩtame tɩ b mi n kos kãsem-sõngdbã tɩ b sõng ne tʋʋm-kãense.

⁹ Tigims kẽer pʋsẽ, kãsem-sõngd fãa tõe n sõnga ne tʋʋm-kãensã a yembre. La zĩis a taaba, kãsem-sõngd a yembr tõe n tʋma tʋʋm wʋsgo. Sasa ninga, b tõe n yãka kãsem-sõngdb a yiib bɩ sẽn yɩɩd rẽ tɩ b tʋm tʋʋm-yɛnga. Kãsem-sõngdb sẽn na n tʋm tʋʋm-kãensã kẽer sã n kaẽ, kãsem-dãmbã sull tõe n kosa saam-biis sẽn deeg lisg la sẽn kõt mak-sõng tɩ b ges rẽ yelle. Rẽ na n kɩtame tɩ b paam minim sẽn na n naf-ba, b sã n wa lebg kãsem-sõngdba. Saam-biis sã n kaẽ, b tõe n kosa saam-bi-poak sẽn kõt mak-sõng t’a sõng ne tʋʋm kẽere, baa b sẽn pa tõe n yãk-a t’a lebg kãsem-sõngdã. Ned sẽn kõt mak-sõng yaa ned sẽn tũud Wẽnnaam sõma, la sẽn zãad a meng sõma tɩ b tõe n dɩk a togs-n-taare. A sẽn kẽnd tigissã n pa vaandẽ wã, a sẽn wɩngd ne koe-moonegã, a zakã pʋgẽ vɩɩm sẽn yaa to-to wã, a sẽn nong reem ninsã, a fu-yerdɩ wã la a sẽn manegd a meng to-to wã, la bũmb a taabã a sẽn maandã fãa yaa mak-sõngo.

¹⁰ Tigims nins pʋsẽ kãsem-dãmbã sõor sẽn yaa bilfã, b tõe n kosa kãsem-sõngdb sẽn tar minim tɩ b sõng n sõs ne sẽn dat-b n deeg lisgã bũmb nins d sẽn tẽedã zugu. Bũmb nins b sẽn tõe n tik n sõsã bee Vẽnegrã pipi babgã gom-zug sẽn yaa: “Kiris-nebã sẽn tẽed bũmb ninsã.” Babg a yiib-n-soabã gom-zugã yaa: “Kiris-nebã sẽn segd n vɩɩmd to-to.” B sẽn gomd bũmb kẽer sẽn pak koe-moondã yell bab-kãng pʋgẽ wã yĩnga, yaa kãsem-soab n segd n sõs ne-a rẽ zugu.

¹¹ Sã n zemsame, kãsem-dãmbã sull tõe n kɩtame tɩ kãsem-sõngdbã tʋm tʋʋm kẽer n dees taaba. La sẽn são n yɩɩd yaa b sẽn na n bas tɩ saam-biig tʋm tʋʋm-yɛngã n wogle. Woto sõngdame t’a paam minim la bãngr tʋʋmdã pʋgẽ.

¹² B tõe n kõo kãsem-sõngdb nins sẽn modgd tɩ ‘nebã fãa ne vẽeneg tɩ b bɩtame’ wã tʋʋm a taaba. La bee ne tiging fãa yɛl sẽn yaa to-to. (1 Tɩm. 4:15) Kãsem-dãmbã sã n pa waoogẽ, b tõe n yãka kãsem-sõngd t’a yɩ koe-mooneg sull yel-gɛt sõangda, wall a yɩ koe-mooneg sull tʋm-tʋmda, n tũud kãsem-dãmbã sẽn yetã neere. B tõe n kɩtame tɩ kãsem-sõngdb wɛgsd Kiris-nebã vɩɩm la b tʋʋma tigissã sõss kẽere, wall sã n yaa tɩlɛ b tõe n yãk-b lame tɩ b lʋɩ taoor tigingã Biibl zãmsg sasa, pa rẽ bɩ b wɛgs sõss zãma wã yĩnga. Zĩis nins raab sẽn beẽ, b tõe n kõo kãsem-sõngdbã tʋʋm a taaba, b sã n tara zʋg-sõma nins tʋʋmdã sẽn baood tɩ b tallã. (1 Pɩy. 4:10) Kãsem-sõngdbã sã n sõngd kãsem-dãmbã, segd n yɩɩ ne b sũur fãa.

¹³ Baa ne b tʋʋmã sẽn yaa toor ne kãsem-dãmbã rẽndã, yaa tʋʋm sẽn yaa sõng Wẽnnaam nifẽ, la sẽn sõngd tɩ tigingã tʋʋm kẽngd taoore. Kãsem-sõngdbã sã n tʋmd b tʋʋmã sõma la b bɩɩsd zʋg-sõma nins pe-kɩɩmbã la karen-saam-dãmbã sẽn segd n tallã, b tõe n wa yãk-b lame tɩ b lebg kãsem-dãmba.

¹⁴ Fo sã n yaa saam-biig sẽn yaa bi-bɩɩga, pa rẽ bɩ f nan deega lisgu, fo wilgdame tɩ f ratame tɩ b wa yãk-f tɩ f lebg kãsem-sõngd bɩ? (1 Tɩm. 3:1) Yʋʋmd fãa, neb wʋsg n sakd sɩdã. Woto kɩtame tɩ b rat rap tẽeb sẽn bɩ sõma sẽn na n ges tigingã yelle. Fo tõe n paamame tɩ b yãk-fo, fo sã n wilgdẽ tɩ f rat n sõnga f taabã. Bũmb a ye sẽn na n sõng-f rẽ wɛɛngẽ yaa f sẽn na n bʋgsd a Zeezi mak-sõngã zugu. (Mat. 20:28; Zã 4:6, 7; 13:4, 5) Fo sã n wa yã tɩ f taabã sõngr kõta sũ-noogo, f na n maneg n tʋllame n sõng-b n paase. (Tʋʋ. 20:35) Woto wã, bɩ f wilg tɩ f rat n sõnga f taabã, la f mi n naag n sõng ne Rĩungã roog yell gesgo, pa rẽ bɩ f mi n kõ f yʋʋr n ledg ned Kiris-nebã vɩɩm la b tʋʋma tigsg sasa. Ned sẽn dat n lebg kãsem-sõngd modgdame me n zãmsd Biiblã sõma wakat fãa, tɩ sõngd-a t’a bɩɩsd zʋg-sõma. (Yɩɩn. 1:1, 2; Gal. 5:22, 23) Sẽn paase, b sã n bobl-a tʋʋm tigingã pʋgẽ, a wilgdame t’a yaa ned b sẽn tõe n teeg la sẽn maand sɩda.—1 Kor. 4:2.

¹⁵ Yaa ne vʋʋsem sõngã maasem la b yãkd kãsem-sõngdbã, tigingã neb neer yĩnga. Kãsem-sõngdbã sã n wa tʋmd b tʋʋmã tɩ tigingã neb fãa tũud b sẽn yetã, wilgdame tɩ b nanda kãsem-sõngdbã sẽn tʋmd wʋsgã. Woto na n wilgame me tɩ b sũur yaa noog ne bũmb nins a Zeova sẽn maand sẽn na yɩl tɩ zũnd-zãnd ra zĩnd a nin-buiidã sʋkã.—Gal. 6:10.