“Bɩ y maan fãa Wẽnnaam waoogr yĩnga”

TÕND sẽn dɩk d mens n kõ Wẽnnaam n tũud-a wã, d segd n modgdame tɩ d no-goamã ne d tʋʋm-tʋmdɩ wã waoogd-a. Tẽn-tʋmd a Poll kõo saglg rẽ wɛɛngẽ n yeele: “Yãmb sã n dɩtẽ wall y sã n yũuda, wall y sẽn maand bũmb ning fãa, bɩ y maan fãa Wẽnnaam waoogr yĩnga.” (1 Kor. 10:31) Rẽ baoodame tɩ d tũ a Zeova noyã sẽn yaa tɩrsã sẽn wilgd a sẽn yaa Wẽnnaam ning buudã. (Kolo. 3:10) Tõnd sẽn yaa nin-buiid sẽn yaa sõamyã wã, d segd n dɩka Wẽnnaam togs-n-taare.—Efɛɛ. 5:1, 2.

² Tẽn-tʋmd a Pɩyɛɛr tẽega kiris-nebã rẽ, n yeele: “Yãmb sẽn yaa kom-sakdsã yĩnga, ra le maan-y tɩ zems ne tʋlsem nins y sẽn da tar y zɩɩlmã wakatã ye. La y segd n lebga sõamyã y yel-manesem fãa pʋgẽ wa Sõng soabã sẽn bool yãmbã, bala b gʋlsame: ‘Yãmb segd n yɩɩ sõamyã, bala mam yaa sõngo.’” (1 Pɩy. 1:14-16) Kiris-nebã fãa segd n kell n yɩɩ sõamyã, wa pĩnd wẽndẽ Israyɛllã neb sẽn da segd n yɩ sõamyã wã. Rat n yeelame tɩ b segd n kell n yɩɩ neb sẽn pa tar rẽoko, neb sẽn zãagd b mens ne yel-wẽna, la ne dũniyã yamã. Rẽ n so tɩ b yaa neb sẽn welg toor Wẽnnaam tʋʋmdã yĩnga.—Yik. 20:5.

³ Sẽn na yɩl n kell n yɩ sõamyã, d segd n tũuda a Zeova noyã la a saglsã b sẽn wilg Biiblã pʋgẽ wã. (2 Tɩm. 3:16) Tõnd sẽn zãms Biiblã, d bãnga a Zeova la a soayã, n lebg a zoa. Zãmsgã sõnga tõnd tɩ d bãng tɩ d segd n dengd n baooda Wẽnnaam Rĩungã, la tɩ yaa a Zeova raabã maaneg n segd n pak tõnd n yɩɩda. (Mat. 6:33; Rom. 12:2) Rẽ baoodame tɩ d yeelg nin-paalgã.—Efɛɛ. 4:22-24.

D SEGD N YƖƖ YƖLEM TŨUDMÃ WƐƐNGẼ, LA D MANESMÃ PƲGẼ

⁴ A Zeova noyã tũub pa nana wakat fãa ye. A Sʋɩtãan sẽn yaa tõnd bɛyã ratame tɩ d bʋdg n bas sɩdã. Dũni-kãngã sẽn dat n kʋɩɩb tõndã n paas tõnd mengã pãn-komsmã kɩtame tɩ pa nana wakat ning ye. Yɩl n tõog n pids bũmb ning d sẽn pʋlem Wẽnnaam n dɩk d meng n kõ-a wã baoodame tɩ d zab tẽebã yĩnga. Gʋls-sõamyã yetame tɩ d sã n wa paamd namsg wall makre, pa segd n ling-d ye. Yaa tɩlɛ tɩ d paam namsg tɩrlmã yĩnga. (2 Tɩm. 3:12) D sã n wa paam namsgo, d tõe n maana sũ-noogo, d sẽn mi tɩ namsg a woto wilgdame tɩ d maanda Wẽnnaam daabã yĩnga.—1 Pɩy. 3:14-16; 4:12, 14-16.

⁵ Baa a Zeezi sẽn da yaa ned sẽn zems zãngã, a zãmsa sakr namsg nins a sẽn paamã maasem yĩnga. A zɩ n lʋɩ a Sʋɩtãan makr pʋgẽ, wall a bas tɩ dũniyã yam kẽ-a ye. (Mat. 4:1-11; Zã 6:15) A Zeezi zɩ n mak baa vugr meng n na n yols yɛlã tɩ yɩ nana ne-a ye. Baa a sẽn da maand sɩd ne Wẽnnaamã sẽn kɩt tɩ dũniyã neb ra kis-a wã, a kell n tũu a Zeova noyã sẽn yaa tɩrsã. A Zeezi kũumã sẽn wa n kolgdẽ wã, a yeela a karen-biisã tɩ dũniyã na n kisga bãmb me. Wakat kãng tɛka, a Zeezi karen-biisã paamda namsgo, la b tara raoodo, bala b miime tɩ Wẽnnaam Biigã tõoga dũniyã.—Zã 15:19; 16:33; 17:16.

⁶ Sẽn na yɩl n da yɩ dũniyã rẽnda, d segd n tũuda a Zeova noyã sẽn yaa tɩrsã, wa d Zu-soabã sẽn maanã. D segd n gũusame n da wa kẽes d mens dũniyã politikã yɛl la a no-koɛɛmã pʋsẽ ye. La pa rẽ bal ye. D segdame me n gũus tɩ dũniyã sẽn põogd n dabdã ra wa kʋɩɩb-d ye. D tũuda bũmb ning sẽn be Zak 1:21 pʋgẽ wã ne d sũur fãa. Be, b yeelame: “Bɩ y bas rẽgd buud fãa la wẽnem buud fãa, la y tall sũ-bʋgsem n sak tɩ b ning Wẽnnaam gomdã sẽn tõe n fãag yãmbã y sũyã pʋsẽ.” Ne Biiblã zãmsg la tigissã kẽnd maasem, d sakdame tɩ b ningd Wẽnnaam gomdã sẽn yaa sɩdã d yamẽ wã la d sũyã pʋsẽ, tɩ d yamã ra wa kẽ bũmb nins d sẽn tõe n paam dũniyã pʋgẽ wã ye. Karen-biig a Zak yeelame yaa: “Yãmb pa mi tɩ zood ne dũniyã yaa beem ne Wẽnnaam la? Woto wã, ned ning fãa sẽn dat n lebg dũniyã zoa lebgda Wẽnnaam bɛya.” (Zak 4:4) Rẽ n so tɩ Biiblã sagend tõnd vẽeneg-vẽeneg tɩ d gãd a Zeova noyã sẽn yaa tɩrsã kãn-kãe, la d kell n zãag d mens ne dũniyã.

⁷ Wẽnnaam Gomdã keoogda tõnd tɩ d zãag d mens ne yãn-tʋʋma, la yoobo. A yeelame: “B pa segd n pʋd yoob la rẽgd buud baa a ye wall yão-beed yell yãmb sʋka, bala bõn-kãensã pa zems ne nin-sõamyã ye.” (Efɛɛ. 5:3) Dẽnd d pa segd n tagsd bõn-dẽgd yelle, yãn-tʋʋm wall bõn-wẽns yell ye. D pa segd meng n gom b yell ye. Woto, d wilgdame tɩ d rat n tũu a Zeova noyã sẽn yaa sõma la tɩrsã ne d sũy fãa.

D SEGD N YƖƖ YƖLEM YĨNGÃ WƐƐNGẼ

⁸ D sẽn segd n yɩ yɩlem tũudmã wɛɛngẽ la d manesmã pʋgẽ wã sẽn yãk a toogo, kiris-nebã miime tɩ tara yõod tɩ b yɩ yɩlem yĩngã wɛɛngẽ. Wẽnnaam sẽn yaa sõngã ra yeela Israyɛll nebã tɩ b segd n gesame tɩ b sik-zĩigã yɩ yɩlemde. Tõnd me segd n yɩɩ yɩlma, t’a Zeova “ra wa yã bũmb sẽn pa sõma” tõnd nengẽ ye.—Tõo. 23:14.

⁹ Biiblã pʋgẽ, b sã n wa gomd sõmblem yelle, b wae n gomda yɩlemd yell me. Wala makre, tẽn-tʋmd a Poll yeelame: “M nin-nongdse, . . . bɩ d yɩlg d mens n yiis rẽgd buud fãa sẽn yaa yĩngã rẽnd la sɩɩgã rẽnda, n lebgd sõamyã n paasd Wẽnnaam zoeesã pʋgẽ.” (2 Kor. 7:1) Woto yĩnga, kiris-nebã segd n modg n sooda koom wakat fãa la b pegd b futã, sẽn na yɩl n yɩ yɩlem yĩngã wɛɛngẽ. Baa tẽnsã yɛl sẽn pa taabã, naoor wʋsgo, d tõe n paama safãnd la koom n soodẽ la d sood d kambã.

¹⁰ Tõnd sẽn moond koɛɛgã yĩnga, neb wʋsg mii tõnd d babgẽ wã. D sã n modg tɩ d zakã pʋgẽ la a yɩngã yaa yɩlemde, kõta yagsã kaseto. Zakã neb fãa tõe n kẽesa b toog zakã na yɩ yɩlemd yĩnga. Saam-biisã segd n gesa b zakã pʋgẽ la a yɩngã yelle, n miẽ tɩ b sã n ges tɩ b zakã yaa neer la pa zũna, kɩtdame tɩ neb a taabã pẽgda. B sã n maand woto, la b lʋɩt taoor n sõngd b zakã rãmb tɩ b tẽebã tall pãnga, b wilgdame tɩ b yaa zak-soben-dãmb sẽn get b zagsã yell sõma. (1 Tɩm. 3:4, 12) Saam-bi-pogsã me segd n gesa bũmb kẽer yelle, sẽn yɩɩd fãa roogã pʋgẽ. (Tɩt 2:4, 5) Kamb nins sẽn paam wubr sõma wã modgdame n yaa yɩlma, n manegd b rotã teed tɩ pa zũna, la b getẽ tɩ bũmb fãa yaa yɩlemde. Woto, zakã neb fãa naagda taab n tʋmdẽ, n paamd minung yɩlemdã wɛɛngẽ. Rẽ na n naf-b-la dũni-paalgã pʋgẽ, Wẽnnaam Rĩungã naam sasa.

¹¹ Rũndã-rũndã, a Zeova Kaset rãmb wʋsg tara mobila, montɛy bɩ wiid n kẽnd tigissã. Zĩis kẽere, yaa tɩlɛ tɩ b yi koɛɛgã mooneg ne mobilli. Y sã n tar mobilli, a segd n yɩɩ yɩlemde, la y manegd-a t’a yaa sõma. D zagsã la d bõn-zombdsã segd n wilgdame tɩ d yaa a Zeova nin-buiid sẽn yaa yɩlem la sõamyã. D koe-moonegã korg la d Biiblã me segd n yɩɩ yɩlemde.

¹² D fu-yerdɩ wã la d sẽn manegd d mens to-to wã segd n wilgdame tɩ d tũuda Wẽnnaam noyã. D sã n wa rabd nin-kãseng taoore, d pa na n ning fut tɩ yaa wa d toog kae, wall wa d bee yir ye. Woto wã, d sã n wa gomd a Zeova yʋʋr yĩng koɛɛgã mooneg sasa wall ɛstaraadã zugu, d pa segd n ning fu-sõma n yɩɩd sɩda? Tõnd sẽn manegd d meng to-to wã la d fu-yerdɩ wã tõe n kɩtame tɩ nebã tagsg sẽn yaa a soab a Zeova tũubã wɛɛngẽ wã toeeme. Yaa vẽeneg tɩ d pa segd n yeelg fut sẽn yaa hobragi, wall sẽn wilgd tɩ d pa tagsd neb a taabã yell ye. (Mii. 6:8; 1 Kor. 10:31-33; 1 Tɩm. 2:9, 10) Rẽ n so tɩ d sã n wa segend d mens n na n yi koɛɛgã moonego, n kẽng tigsg wall tigis-kãsenga, d segd n tẽegame tɩ Gʋls-sõamyã yeelame tɩ d tog n yɩɩ yɩlma, la tɩ d segd n manegda d mens ne sik-m-menga. D rat n waoogda a Zeova wakat fãa la d kõt-a ziiri.

¹³ D sã n wa na n tɩ kaag a Zeova Kaset rãmbã biru-kãsengã wall filiyalle, d segd n tũu sagl-kãensã. Tẽeg-y tɩ Betɛll rat n yeelame tɩ “Wẽnnaam doogo.” Woto yĩnga, d sẽn maneg d meng to-to wã la d manesmã segd n yɩɩ wa d sẽn kẽng tigsg Rĩungã roogẽ.

¹⁴ Baa d sã n wa kokd pemsem, d segd n gũusa ne d fu-yerdɩ wã la d sẽn maneg d meng to-to wã. D tõe n soka d meng yaa: ‘Mam sã n paam sɛgb n tõe n moon koɛɛgã, m na n zoee yãnd n pa moone, m sẽn maneg m meng to-to wã yĩng bɩ?’

PEMSEM KOKR LA REEM SẼN ZEMSE

¹⁵ Sẽn na yɩl n tar laafɩ, vʋʋsg la pemsem kokr yaa tɩlɛ. Vugri, a Zeezi yeela a karen-biisã tɩ b wa tɩ b kẽng zĩig neb sẽn ka beẽ “n tɩ vʋʋs bilfu.” (Mark 6:31) Vʋʋsg la pemsem kokr bɩ reem tõe n booga d yɩɩrã bilfu. Tõe n kɩtame tɩ d paam pãnga, n tõog n lebs n sɩng d daar fãa tʋʋmã.

¹⁶ Bũmb wʋsg sẽn be rũndã-rũndã d sẽn tõe n maan n kok pemsmã yĩnga, kiris-nebã segd n tũusa bõn-kãens ne yam wa Wẽnnaam sẽn datã. Yaa sɩd tɩ pemsem kokr yaa sõma, la pa rẽ n tar yõod n yɩɩd ye. Biiblã keoogda tõnd tɩ d bãng tɩ “yaoolem wakatã,” nebã na n “nonga yõ-noogrã n pa nong Wẽnnaam ye.” (2 Tɩm. 3:1, 4) Bũmb nins nebã sẽn maand n kokd pemsmã wʋsg pa zems ne neb nins sẽn baood n tũ a Zeova noyã sẽn yaa tɩrsã ye.

¹⁷ Yɩɩ tɩlɛ tɩ pipi kiris-nebã mao n lak b mens ne b wakatẽ nebã sẽn da tar manesem-wẽns la sẽn da nong yõ-noogrã wʋsgã. Rom nebã reemã zĩisẽ, nebã ra kẽnd n geta neb sẽn namsd taaba. B ra wilgda nen-kɛglem tʋʋma, nin-kʋʋr la neb sẽn kẽed ne taab sẽn na yɩl tɩ nin-buiidã ges n noog b yõore. La pipi kiris-nebã ra zãagda b mens ne bõn-kãense. Rũndã-rũndã, dũniyã reem wʋsg wilgda bũmb toor-toor sẽn wõnd woto n noogd ninsaalbã yõore, baa rẽ sẽn yaa wẽng wʋsgã. D segd n “kell n gũusa neer” ne d sẽn kẽnd to-to wã, n lakd d mens ne reem nins sẽn sãamd nedã. (Efɛɛ. 5:15, 16; Yɩɩn. 11:5) Baa reemã meng sã n pa wẽnga, d sẽn na n deem ne neb ninsã tõeeme n pa zems ye.—1 Pɩy. 4:1-4.

¹⁸ Reem buud toor-toor n be n yaa sõma, tɩ kiris-ned tõe n deeme. Neb wʋsg tũu Biiblã saglsã la sagls nins sẽn be tõnd sɛbã pʋsẽ wã tɩ naf-ba.

¹⁹ Wakat ninga, nina tõe n boola zags wʋsg neb tɩ b wa a zakẽ tɩ b naag taab n kok pemsem. B tõe n boola d tẽed-n-taas me tɩ b wa yi-kãadem kibs wall kibs a to. (Zã 2:2) Neb nins sẽn bool b taabã segd n tẽegame tɩ bũmb nins sẽn maand be wã roga bãmb zutu. Yaa vẽeneg tɩ sã n yaa neb wʋsg n na n tigim taaba, b segd n maana gũusg wʋsgo. Tigiss a woto sẽn yaa reem zĩigã yĩnga, neb kẽer tõe n wa maan bũmb sẽn pa zems ne kiris-neda. Wala makre, kẽer tõe n dɩɩme wall b yũ rãam tɩ loog nugu, pa rẽ bɩ b maan bõn-wẽns a taaba. Kiris-neb nins sẽn tar yamã sẽn mi rẽ wã, b sã n na n maan tigri, b pa boond neb wʋsgo, la b pa maand tɩ kaoos wʋsg me ye. B sã n na n kõo nebã rãam, b gũusdame tɩ ra loog nug ye. (Fili. 4:5) D sã n maan d sẽn tõe fãa tɩ tigsg a woto yɩ sõma la kengd tẽebo, pa na n yɩ rɩɩbã la rãamã n na n tall yõod n yɩɩd ye.

²⁰ Yɩta sõma tɩ d yɩ neb sẽn nong sãamb reegre. (1 Pɩy. 4:9) D sã n wa na n bool d tẽed-n-taas tɩ b wa d zakẽ tɩ d naag taab n dɩ, n dɩk maasg la d sõse, d segd n tagsa neb nins nus sẽn pa zãadã me yelle. (Luk 14:12-14) Sã n yaa tõnd la b bool-yã, d manesmã segd n zemsa ne goam nins sẽn be Mark 12:31 pʋgẽ wã. D segd n wilga wakat fãa tɩ d sũur nooma ne neb a taabã sẽn maand-d neerã.

²¹ Kiris-nebã sũy nooma ne bũmb ka tɛkã Wẽnnaam sẽn kõt-bã, la b sẽn mi tɩ b tõe n ‘dɩɩme la b yũ n noog b sũur b tʋʋm-toogã fãa yĩngã.’ (Koɛ. 3:12, 13) Tõnd sã n “maan fãa Wẽnnaam waoogr yĩnga,” sẽn bool-b nebã, la neb nins b sẽn boolã fãa sã n wa tagsd tigr ning b sẽn maanã yelle, b sũur na n yaa noogo, bala kenga b raoodo, la paas b tẽebã pãnga.

BŨMB NINS B SẼN MAAND LEKOLLẼ WÃ

²² A Zeova Kaset rãmbã kamb sẽn paamd zãmsg ning lekollẽ wã nafd-b-la wʋsgo. B sẽn kẽnd lekollã, b modgd n zãmsda kareng la gʋlsg sõma. Bũmb a taab b sẽn zãmsd lekollẽ wã tõe n nafa kom-bɩɩsã, b sã n wa yãk bũmb n na n maan Wẽnnaam tʋʋmdã pʋgẽ. B karengã sasa, b segd n maanda b sẽn tõe fãa n lʋɩɩsd Wẽnnaam daabã maaneg taoore, n ‘tẽegd b Naandã sẽn yaa kãsengã yelle.’—Koɛ. 12:1.

²³ Yãmb sã n yaa bi-bɩɩg n ket n kẽnd lekolle, bɩ y maan gũusg n da wa maan tũud-n-taar sẽn pa tɩlɛ ne dũniyã kom-bɩɩs ye. (2 Tɩm. 3:1, 2) A Zeova sẽn maan bũmb toor-toor sẽn na yɩl n kogl yãmbã yĩnga, bũmb wʋsg la y tõe n maan tɩ dũniyã yam ra kẽ-y ye. (Yɩɩn. 23:4; 91:1, 2) Woto wã, bɩ y modg n dɩ bũmb nins a Zeova sẽn maanã yõodo, n tõog n kogl y mense.—Yɩɩn. 23:5.

²⁴ Karen-biis nins sẽn yaa a Zeova Kaset rãmbã wʋsg yãka yam n pa na n naag n maan bũmb b sẽn maand lekollẽ wã tɩ yaool n pa naag karengã yɛla, sẽn na yɩl n zãag b mens ne dũniyã. Tõe n yɩɩ toog ne b karen-bi-taasã la karen-saam-dãmbã tɩ b wʋm rẽ võore. La sẽn tar yõod n yɩɩd yaa noog Wẽnnaam sũuri. Rẽ baoodame tɩ y kibl y sũur-kasetã ne Biiblã maasem, la y modg n da rɩk dũniyã neb togs-n-taar n kẽes y toog wags-taab la tẽng-n-biilem yɛl pʋgẽ ye. (Gal. 5:19, 26) Yãmb a kom-bɩɩsã sã n kelgd y roagdb nins sẽn tũud Wẽnnaamã saglsã sẽn tik Biiblã zugã, la y baood zo-rãmb sẽn yaa sõma tigingã pʋgẽ, y na n tõog n tũu a Zeova noyã sẽn yaa tɩrsã.

NUG-TƲƲMÃ LA LIGDÃ BAOOBO

²⁵ Biiblã wilgame tɩ yaa tɩlɛ tɩ zak-soben-dãmbã ges b zakã rãmb yelle. (1 Tɩm. 5:8) Baa ne rẽ, b sẽn yaa kiris-nebã, b miime tɩ Rĩungã tʋʋm n segd n pak-b n yɩɩd b nug-tʋʋmã. (Mat. 6:33; Rom. 11:13) B sã n sakd Wẽnnaam ne b sũy fãa, la b maand sũ-noog ne rɩɩb la fut nins b sẽn tarã, b na n tõog n gila yɩɩre, la b ra lʋɩ ligdã nonglem bẽdg pʋgẽ ye.—1 Tɩm. 6:6-10.

²⁶ Neb nins fãa sẽn dɩk b mens n kõ Wẽnnaamã segd n tagsda Biiblã sagls yell wakat fãa. Bao f noorã rɩɩb ne pʋ-peelem rat n yeelame tɩ f ra maan bũmb sẽn kɩɩsd a Zeova noyã, wall tẽngã laloa wã ye. (Rom. 13:1, 2; 1 Kor. 6:9, 10) D pa yĩmd tũud-n-ta-wẽnsã sẽn tõe n wa ne yɛl ninsã me ye. Tõnd sẽn yaa Kirist sodaasã, d na n gũusame n da wa kẽes d toog ligd baoob afɛɛr sẽn na n kɩt tɩ d kɩɩs Biiblã noy pʋgẽ, wall afɛɛr sẽn na n kɩt tɩ d kẽes d toog politikã yɛlẽ, pa rẽ bɩ sẽn na n boog d tẽebã pãnga. (Eza. 2:4; 2 Tɩm. 2:4) Sẽn paase, d pa tar lagem-n-taar ne “Babilon-kãsengã” sẽn yaa Wẽnnaam bɛyã ye.—Vẽn. 18:2, 4; 2 Kor. 6:14-17.

²⁷ D sẽn tũud Wẽnnaam noyã sẽn yaa tɩrsã kɩtame tɩ d pa rat n tũnug ne d tigissã n koosd teed wall d maand yɛl a taab sẽn na n naf tõnd bal ye. D sẽn tigimd taab tigissã sasa, tigims sull tigis-kãsemsã la rasem a tãab tigis-kãsemsã sasa wã yaa a Zeova waoogr yĩng bala. D paamda bũmb wʋsg sẽn paasd d tẽebã pãnga, la d paamdẽ tɩ ‘ned kam fãa tẽeb kengd a to raoodo.’ (Rom. 1:11, 12; Ebre. 10:24, 25) D segd n modgame tɩ tigiss a woto kell n yɩ d tẽebã kengr yĩnga.

D MODG TƖ ZEMS-N-TAAR KELL N ZĨND D SƲKA

²⁸ A Zeova noyã sẽn yaa tɩrsã wilgdame tɩ d segd n modgame tɩ ‘laafɩ kell n zĩnd tõnd ne taab sʋka, la d modg tɩ zems-n-taar ning d sẽn paam vʋʋsem sõngã maasem yĩngã kell n zĩnd d sʋka.’ (Efɛɛ. 4:1-3) Ned kam fãa baooda sẽn na n naf a taabã, la pa sẽn noom yẽ mengã bal ye. (1 Tes. 5:15) Yaa vẽeneg tɩ y neeme tɩ yãmb tigingã pʋgẽ me yaa woto. Baa d yĩngã kõbg sẽn yaa a soaba, d sẽn yit tẽng ninga, d tarmã sẽn yaa to-to, d sẽn karem n ta zĩig ninga, d fãa tũuda Wẽnnaam noyã sẽn yaa tɩrsã. Yɩng rãmbã meng neeme tɩ rẽ kɩtame t’a Zeova nin-buiidã yaa toore.—1 Pɩy. 2:12.

²⁹ Tẽn-tʋmd a Poll wilga bũmb ning sẽn kɩt tɩ d zemsd taabã n yeele: “Yĩng a yembr n be, tɩ vʋʋsem sõng a yembr me beẽ, wa sẽn zems bool-yɛng ning pʋgẽ b sẽn bool yãmbã. Zu-soab a yembre, tẽeb a yembr la lisg a yembr n be. Wẽnnaam-yɛng n be, n yaa nebã fãa Ba. Yẽ n yaa soab ning sẽn so fãa, sẽn tũnugd ne fãa n tʋmdẽ, la sẽn tʋmd fãa pʋgẽ wã.” (Efɛɛ. 4:4-6) Rẽ kɩtame tɩ d rat n modg tɩ d sẽn wʋmd Biiblã goam võor to-to wã yaa yembre, tɩ wilgdẽ tɩ d sak n deegame t’a Zeova n yaa yĩngr la tẽng naaba. Sɩd-sɩda, a Zeova zãmsa a nin-buiidã buud-gomd sẽn yaa yɩlemde, tɩ kɩt tɩ d tõe n naag taab yam a yembr n tũ-a.—Sof. 3:9.

³⁰ Zems-n-taar la laafɩ sẽn be kiris-nebã tigingã pʋgẽ wã kengda neb nins fãa sẽn waoogd a Zeova wã raoodo. Tõnd nee bũmb ning a Zeova sẽn pʋlmã sẽn pidsdi. A yeelame: “Mam na n naag-b-la taab zĩ-yend wa piis sẽn be yãgrẽ.” (Mii. 2:12) D rat n tũu Wẽnnaam noyã sẽn yaa tɩrsã, tɩ zems-n-taar la laafɩ kell n zĩnd d sʋka.

³¹ Sũ-noog rãmb la neb nins a Zeova sẽn sak a tigingã sẽn yaa yɩlemdã pʋgẽ wã! Paam tɩ b boond-f t’a Zeova Kaset soab yõod yɩɩda bũmb ning fãa f sẽn na n mong f menga. D sẽn maood sẽn na yɩl tɩ tõnd ne a Zeova zoodã kell n tall pãngã, d na n ket n tũuda a noyã sẽn yaa tɩrsã ne d sũur fãa, la d sagend neb a taabã tɩ b maan woto.—2 Kor. 3:18.