Sak-y Wẽnnaam sẽn sigl yɛlã to-to zu-sobendã wɛɛngẽ wã tɩ naf-yã

YAA tɩlɛ tɩ d sak a Zeova sẽn yaa yĩngr la tẽng Naabã, d sã n dat n sigl sõma a raabã maaneg yĩnga. D sak n deegame tɩ yaa a Biigã la tigingã zu-soaba, la d sakd noy nins a sẽn gãneg zu-sobendã wɛɛngẽ wã d vɩɩmã nens fãa pʋsẽ. D sã n sakd no-kãense, nafda tigingã neb fãa.

² Yɩɩ Edɛn zẽedẽ wã la b wilg ninsaalbã pipi tɩ b segd n saka zu-sobendã. Noy nins Wẽnnaam sẽn kõ tɩ be Sɩngr 1:28; ne 2:16, 17 wã wilgda rẽ. Bõn-naands a taabã ra segd n sakda a Ãdem ne a Awa, tɩ bãmb me sakd Wẽnnaam daabã la a zu-sobendã. Wẽnnaam zu-sobendã sakr ra na n kɩtame tɩ laafɩ beẽ. Zũnd-zãnd me ra pa na n zĩnd ye. Kaoosg zugẽ, b togsa zu-sobendã sẽn sigl to-to wã vẽeneg 1 Korẽnt rãmb 11:3 pʋgẽ. Be, tẽn-tʋmd a Poll yeelame: “Mam datame tɩ yãmb bãng tɩ rao fãa zu-soab yaa Kiristã, tɩ pag zu-soab yaa raoa, tɩ Kiristã zu-soab yaa Wẽnnaam.” Woto wilgdame t’a Zeova sẽn yãk a toogo, ned kam fãa tara zu-soaba.

³ Rũndã-rũndã, neb wʋsg pa sakd noor ning b sẽn kõ zu-sobendã wɛɛngẽ wã ye. Bõe yĩnga? Yellã sɩnga Edɛn zẽedẽ zĩigẽ, wakat ning a Ãdem ne a Awa sẽn yãk yam n kɩɩs Wẽnnaam zu-sobendã. (Sɩng. 3:4, 5) La b pa paam lohorem wʋsg ye. B pʋd n lebga a Sʋɩtãan sẽn yaa malɛg-wẽngã poorẽ dãmba. B kɩɩsgã kɩtame tɩ ninsaalbã zãag ne Wẽnnaam. (Kolo. 1:21) Rẽ kɩtame tɩ ninsaalbã fãa la bal be wẽng soabã nugẽ.—1 Zã 5:19.

⁴ Tõnd sẽn bãng Wẽnnaam Gomdã sẽn yetã la d tũudẽ wã, d pa le be a Sʋɩtãan nugẽ ye. Tõnd sẽn dɩk d mens n kõ a Zeova n deeg lisg n yaa a Kaset rãmbã, d sak n deegame tɩ yaa yẽ n dɩt naam tõnd zugu. D sak n deegame tɩ rĩm a Davɩɩd sẽn yeel bũmb ningã yaa sɩda. A yeelame t’a Zeova “n zẽk n yɩɩd bũmb fãa.” (1 Kib. 29:11) D sika d mens n yetẽ: “Bãng-y t’a Zeova yaa Wẽnnaam. Yẽ n yaa soab ning sẽn naan tõndã, tɩ tõnd yaa yẽ rẽnda. Tõnd yaa yẽ nin-buiidu, la a rũms wãbneg zĩigẽ piisi.” (Yɩɩn. 100:3) D sakame t’a Zeova n yaa kãsenga, tɩ yaa yẽ n zems tɩ d sak-a ne d sũur fãa, bala yẽ n naan bũmb fãa. (Vẽn. 4:11) Tõnd sẽn yaa Wẽnnaam tʋm-tʋmdbã, d rɩkda a Zeezi Kirist togs-n-taare. Yẽ n kõ mak-sõng sẽn zems zãng Wẽnnaam zu-sobendã sakr wɛɛngẽ.

⁵ Namsg ning a Zeezi sẽn paam tẽngã zugã kɩtame t’a bãng bõe? Ebre-rãmb 5:8 yetame: “Baa a sẽn da yaa Wẽnnaam biigã, a zãmsa sakr namsg nins a sẽn paamã maasem yĩnga.” A Zeezi kell n saka a saasẽ Ba wã, baa a sẽn wa n paam namsgã. Sẽn paase, a Zeezi pa maan baa fʋɩ ne a meng raab ye. A ra pa togsd a meng tagsa, wall a baood a meng ziir ye. (Zã 5:19, 30; 6:38; 7:16-18) A sẽn wa n moond koɛɛgã, a Ba wã raabã maaneg ra kõt-a-la sũ-noogo, baa rẽ sẽn da kɩt tɩ nebã kɩɩsd-a la b namsd-a wã. (Zã 15:20) A Zeezi kell n saka Wẽnnaam, n “sik a meng hal n ki kũum ra-luk zugu.” A sẽn kell n sak a Zeova woto wã waa ne nafa wʋsgo. Kɩtame tɩ ninsaalbã tõe n wa paam fãagr wakat fãa yĩnga. Sẽn paase, kɩtame tɩ Wẽnnaam zẽk-a. A kõo a Ba wã ziir me.—Fili. 2:5-11; Ebre. 5:9.

D SẼN SEGD N SAK B RÃMBA

⁶ Neb nins sẽn zãgs tɩ b kõn sak t’a Zeova n yaa yĩngr la tẽng Naabã paamda yɩɩr la zu-loeese. La tõnd sã n sakd Wẽnnaam n maand a raabã, d na n gila zu-loe-kãens wʋsgo. Wakat fãa, a Sʋɩtãan sẽn yaa tõnd bɛ wã baooda tõnd n na n sãame. Tõnd sã n kɩɩs-a, la d sik d meng n sakd a Zeova ne yamleoogo, d na n paama d meng ne-a.—Mat. 6:10, 13; 1 Pɩy. 5:6-9.

⁷ Tõnd sẽn be kiris-neb tigingã pʋgẽ wã, d sakda a Zeezi Kirist zu-sobendã, la zu-sobend ning a sẽn kõ “tʋm-tʋmd sẽn tũud sɩd la sẽn tar yamã.” D manesem sẽn yaa a soab ne d taabã wilgda rẽ. D sẽn sakd Wẽnnaamã kɩtame tɩ d sakd a Gomdã d tũudmã nens fãa pʋgẽ. Wala makre, koɛɛgã mooneg pʋgẽ, tigissã kẽnd la kẽes d toogã, d sẽn tar manesem ning ne kãsem-dãmbã, la d sẽn sakd siglgã noyã.—Mat. 24:45-47; 28:19, 20; Ebre. 10:24, 25; 13:7, 17.

⁸ D sẽn sakd Wẽnnaamã kɩtame tɩ laafɩ la bãan be tigingã pʋgẽ, tɩ zũnd-zãnd me kae ye. Neb nins sẽn sakd a Zeova wã rɩkda a togs-n-taare. (1 Kor. 14:33, 40) Bũmb nins tõnd sẽn yã a Zeova siglgã pʋgẽ wã kɩtame tɩ d tagsd wa rĩm a Davɩɩde. A sẽn yã welgr ning sẽn be a Zeova tʋm-tʋmdbã ne nin-wẽnsã sʋkã poore, a sũur yɩɩ noog t’a yeel yaa: “Sũ-noog rãmb la neb nins Wẽnnaam sẽn yaa a Zeova wã!”—Yɩɩn. 144:15.

⁹ Kãadmã pʋgẽ la zakã pʋgẽ, “pag zu-soab yaa raoa.” La rapã segd n sakda Kiristã, tɩ Kiristã me zu-soab yaa Wẽnnaam. (1 Kor. 11:3) Pagbã segd n sakda b sɩdbã, tɩ kambã sakd b roagdbã. (Efɛɛ. 5:22-24; 6:1) Zakã ned kam fãa sã n tũud noy nins b sẽn kõ zu-sobendã wɛɛngẽ wã, laafɩ na n zĩnda zakã pʋgẽ.

¹⁰ Pʋg-sɩd segd n dɩka Kiristã togs-n-taare, n tʋmd a zu-sobendã tʋʋm ne nonglem. (Efɛɛ. 5:25-29) A sã n pa tũnugd ne a zu-sobendã n weoogd a zakã rãmba, la a lʋɩt taoor zakã yɛl pʋgẽ, a pagã ne a kambã na n sakd-a-la ne sũ-noogo. Pagã segd n yɩɩ sõangd sẽn zems ne a sɩdã. (Sɩng. 2:18) A sã n teend a sɩdã la a waoogd-a ne sũ-mare, a na n taa a sɩdã yam, la a kɩt tɩ Wẽnnaam paam pẽgre. (1 Pɩy. 3:1-4) Pagbã ne b sɩdbã sã n tũud Biiblã sagls zu-sobendã wɛɛngẽ, b kõta b kambã mak-sõng Wẽnnaam sakrã wɛɛngẽ.

¹¹ Tõnd sẽn sakd Wẽnnaamã kɩtame tɩ d sakd “nanambsã” me, bala “nanambs nins sẽn be n dɩt naam toor-toorã yaa Wẽnnaam n bas tɩ b rɩt naam.” (Rom. 13:1-7) Kiris-nebã sẽn sakd tẽngã laloa wã yĩnga, b yaooda lampo-rãmba, n kõt ‘a Sezaar bũmb nins sẽn yaa a Sezaar dẽndã, la b kõt Wẽnnaam bũmb nins sẽn yaa Wẽnnaam dẽndã.’ (Mat. 22:21) Sẽn paase, d sẽn maand to-to sẽn na yɩl n taas nebã fãa koɛɛgã n pa bakã zemsda ne tẽngã laloa sẽn wilg kibay nins d sẽn tar sor n na n gʋls ned a to zugã. Tõnd sẽn sakd tẽngã taoor dãmb noy nins fãa sẽn pa kɩɩsd a Zeova noyã sẽn yaa tɩrsã yĩnga, d tõogd n moonda koɛɛgã ne d pãng fãa.—Mark 13:10; Tʋʋ. 5:29.

¹² Tõnd sakda Wẽnnaam sẽn sigl yɛlã to-to zu-sobendã wɛɛngẽ wã d vɩɩmã nens fãa pʋsẽ. D sẽn tar tẽebã yĩnga, d gũuda wakat ning ninsaalbã fãa sẽn na n sak Wẽnnaam a Zeova wã. (1 Kor. 15:27, 28) Neb nins sẽn sak n deeg t’a Zeova n yaa yĩngr la tẽng Naaba, la b na n kell n sak a zu-sobendã wakat fãa yĩngã na n wa paama bark la lohorem tɛkẽ!