Bõe yĩng tɩ ninsaalbã namsd wʋsgo?

1, 2. Bõe la neb wʋsg sokd b mense?

TẼN-DIGIMDG n maan mogr pʋgẽ, tɩ koomã fudg n kẽ tẽn-bil a ye, n sãam-a zãnga. Teerorist rãmb n kẽ lotɛll pʋg n tão neb ne bʋg-raado, n kʋ kẽer la b pogl sãnda. Kãnsɛɛrã bãag n kʋ pag n bas a kamb a nu.

² Yel-beed bɩ sabab-wẽng wakate, neb wʋsg sokda b mens bõe yĩng tɩ yaa woto. Neb wʋsg sokda b mens bõe yĩng tɩ dũniyã pid ne kisgr la yel-kɛga? Yãmb me zoe n soka y meng woto bɩ?

3, 4. a) A Habakuk ra sokame tɩ bõe? b) A Zeova leok-a lame tɩ bõe?

³ D sã n karem Biiblã, d mikdame tɩ neb sẽn da kɩs Wẽnnaam sɩd soka b mens namsgã wɛɛngẽ. Wala makre, no-rɛɛs a Habakuk soka a Zeova yaa: “Bõe yĩng tɩ yãmb bas tɩ m yãt tʋʋm-wẽnsã, bõe yĩng tɩ y get tõnd tɩ d be namsg pʋga? Sãoong ne wõr-taabã gũbga maam. Lebga zab taaba, tɩ nokoɛɛmã rãamd zẽkdẽ.”​—⁠Habakuk 1:⁠3.

⁴ D sã n karem Habakuk 2:2, 3, d mikdame tɩ Wẽnnaam leoka a Habakuki, la a pʋlem t’a na n manega yɛlã. A Zeova nonga ninsaalbã hal wʋsgo. Biiblã yetame t’a ‘geta tõnd yelle.’ (1 Pɩyɛɛr 5:7) Wẽnnaam sẽn kis wẽnemã yɩɩda ninsaal buud fãa. (Ezayi 55:8, 9) La bõe yĩng tɩ dũniyã pid ne namsg wʋsg woto? Bɩ d leok sok-kãnga.

BÕE YĨNG TƖ NINSAALBÃ NAMSD WƲSGO?

5. Bõe la tũudmã taoor dãmb wʋsg yet namsgã wɛɛngẽ? Bõe la Biiblã yeta?

⁵ Tũudmã taoor dãmb nong n yetame tɩ nebã sẽn namsdã yaa Wẽnnaam daabo. Kẽer yetame tɩ bũmb ning fãa sẽn paamd nedã, baa sabab-wẽnsã, yaa wẽnd-pʋlengo, la tɩ d pa tõe n bãng rẽ võor ye. Sãnda pʋd n yetame tɩ kãsembã la baa kambã sẽn kiidã yaa Wẽnnaam n boond-b tɩ b wa yẽ nengẽ saasẽ. La pa sɩd ye. Wẽngã sẽn be wã pa yit Wẽnnaam nengẽ ye. Biiblã yetame: “Wẽnnaam sẽn yaa Pãng-Soabã zãra ne wẽng maanego. Bãmb ka tol n maand wẽng ye!”​—⁠Zoob 34:⁠10.

6. Bõe yĩng tɩ neb wʋsg ningd Wẽnnaam taal ãdem-biisã namsg yĩnga?

⁶ Neb wʋsg sã n get ãdem-biisã namsgã, b ningda Wẽnnaam taale, bala b tagsdame tɩ yaa Wẽnnaam la dũniyã naaba. La wa d sẽn yã sak a 3 pʋgẽ wã, dũniyã naab yaa a Sʋɩtãana.

7, 8. Bõe n kɩt tɩ namsgã yaa wʋsg dũniyã zugu?

⁷ Biiblã yetame tɩ “dũniyã zãng bee wẽng soabã nugẽ.” (1 Zã 5:⁠19) Dũniyã naab a Sʋɩtãan yaa sɩlem la wẽnem soaba. Yẽ n “belgd tẽngã zĩig ning fãa neb sẽn beẽ wã nebã.” (Vẽnegre 12:9) Neb wʋsg rɩkda a Sʋɩtãan togs-n-taare. Yaa rẽ la ziri wã ne kisgrã la wẽnemã sẽn be zĩig fãa wã.

⁸ Bũmb a taab me n kɩt tɩ ninsaalbã namsdẽ. A Ãdem ne a Hawa sẽn kɩɩs Wẽnnaam noorã yĩnga, ãdem-biisã rogda ne yel-wẽnã. Kɩtame tɩ b namsd taaba. Naoor wʋsgo, ned fãa rat n wilgame t’a yɩɩda a taabã. Nebã zabda taaba, b maanda taab pãnga, tẽns toɛy-toɛyã me zabda taaba. (Koɛɛg soaba 4:1; 8:9) Yel-lingdem me mi n paamda nebã, tɩ b namsdẽ. (Koɛɛg soaba 9:12) Nina tõe n wa tɩ bee zĩig ning tɩ sabab-wẽng kell n paam-a.

9. Bõe yĩng tɩ d tõe n kɩs sɩd t’a Zeova sẽn bas tɩ namsgã ket n beẽ wã, a tara a bʋʋm?

⁹ Pa a Zeova n kɩt tɩ ninsaalbã namsdẽ ye. Pa yẽ la b segd n ning taale, zabã, bi-be-tʋʋmã la wẽgbã yĩng ye. Leb n pa yẽ n kɩt tɩ tẽn-digimdgã, seb-bɛdã la sa-bɛdã namsd nebã ye. La tõe tɩ y sokda y meng yaa: ‘A Zeova sã n yaa pãng sẽn ka to soaba, bõe yĩng t’a pa kɩt tɩ yel-beedã la namsgã sa?’ D miime tɩ tõnd yell paka Wẽnnaam. Dẽnd a sẽn bas tɩ namsgã ket n beẽ wã, a tara a bʋʋm.—1 Zã 4:8.

WẼNNAAM SẼN BAS TƖ NAMSGÃ BEẼ WÃ VÕORE

10. Bõe la a Sʋɩtãan rõd a Zeova?

¹⁰ Edɛn zẽedã zĩigẽ, a Sʋɩtãan belga a Ãdem ne a Hawa. A rõda Wẽnnaam t’a yaa na-wẽnga. A yeelame tɩ Wẽnnaam rat n monga a Ãdem ne a Hawa bõn-sõngo. A Sʋɩtãan ra ratame tɩ b tẽ tɩ yẽ na n yɩɩ na-sõng n yɩɩd a Zeova, la tɩ Wẽnnaam sõngr pa tɩlɛ ne-b ye.—Sɩngre 3:2-5; ges-y Vẽnegr 26.

11. Sok-bʋg leoor la d tog n bao?

¹¹ A Ãdem ne a Hawa kɩɩsa a Zeova, n lebg tõatba. B tagsame tɩ b tara sor n na n yãk sẽn yaa sõma la sẽn yaa wẽng b toore. Bõe la a Zeova na n maan n wilg tɩ tõatbã ka bʋʋm, la tɩ yẽ n mi sẽn yaa sõma ne ninsaalbã?

12, 13. a) Bõe yĩng t’a Zeova pa sãam tõatbã zĩig pʋgẽ? b) Bõe yĩng t’a Zeova bas a Sʋɩtãan t’a soog dũniyã, la a bas tɩ ninsaalbã tar goosneema rãmba?

¹² A Zeova pa yɩ tao-tao n sãam a Ãdem ne a Hawa ye. A bas-b lame tɩ b rog kamba. A kõo a Ãdem ne a Hawa kambã la b yagensã sore, tɩ b tõe n yãk b sẽn dat a soab t’a yɩ b naaba. Hal sɩngrẽ wã, a Zeova raabã yaa tẽngã pid ne ninsaalb sẽn zems zãnga. La rẽ na n pidsame, baa a Sʋɩtãan sẽn maaneg fãa.​—⁠Sɩngre 1:⁠28; Ezayi 55:10, 11.

¹³ A Sʋɩtãan sẽn wa n dõt a Zeova wã tɩ malɛgs milyõ-rãmb n da gete. (Zoob 38:​7; Vẽnegre 5:⁠11) Rẽ n so t’a Zeova bas t’a Sʋɩtãan na n wilg a sẽn yetã sã n yaa sɩda. Sẽn paase, a Zeova basa ninsaalbã tɩ b na n soog b mense, n tũ a Sʋɩtãana, n lugl b toorẽ goosneema rãmba, la b wilg b sã n na n tõogame tɩ pa tũ ne yẽ sõngre.

14. Ninsaalbã sẽn mak naam buud toor-toor tɩ pa yãk nengã wilgda bõe?

¹⁴ Yʋʋm tusa la woto ninsaalbã sẽn makd naam buud toor-toore, la pa yãkd neng ye. Woto wilgda vẽeneg t’a Sʋɩtãan yaa ziri yagda. Yaa tɩlɛ tɩ ninsaalbã paam Wẽnnaam sõngre. Bũmb ning b sẽn togs Yel-bũn sebrã pʋgẽ wã yaa sɩda. B yeela be yaa: “Sẽn-Ka-Saab n wilgd ninsaal a sore. Ninsaal na n yɩ a wãn n bãng a sore?”—Yel-bũnã 20:24.

BÕE YĨNG T’A ZEOVA BAS TƖ KAOOS WOTO?

15. Bõe yĩng t’a Zeova bas tɩ namsgã kaoosd woto?

¹⁵ Bõe yĩng t’a Zeova bas tɩ namsgã kaoosd woto? Rẽnda kaoose, tɩ lebg vẽeneg t’a Sʋɩtãan naamã pa sõma ye. Ninsaalbã waa ne naam buud toor-toore, la pa yãk neng ye. Siãnsã la tɛknolozi wã wɛɛngẽ, b bãngrã paasa wʋsgo. La baa ne rẽ, wẽgbã, naongã, bi-be-tʋʋmã la zabã paamda pãnga. Hakɩɩka, ninsaal pa tõe n bas Wẽnnaam la a rɩ naam a taabã zug tɩ yɩ sõma ye.

16. Bõe yĩng t’a Zeova pa kɩtd tɩ yel-beed pa paamd nebã?

¹⁶ Bõe yĩng t’a Zeova pa kɩtd tɩ yel-beed pa paamd nebã? A sã n maan woto, na n yɩɩ wa a sõngda a Sʋɩtãan a naamã rɩɩb pʋgẽ. A kõn tol n maan dẽ ye. Sẽn paase, zu-loees sã n da kaẽ, ninsaalbã na n tagsame tɩ b tõe n dɩɩ naam tɩ naf-ba. La yaa ziri. A Zeova yaool n pa teend ziri baa bilfu. A ka tõe n yag ziri ye.—Ebre-rãmbã 6:18.

17, 18. Yɛl nins a Sʋɩtãan sẽn wa ne wã wɛɛngẽ, bõe la a Zeova na n maane?

¹⁷ Rẽ yĩnga, a Zeova tõe n kɩtame tɩ yɛl nins fãa a Sʋɩtãan ne ninsaalbã kɩɩsgã sẽn wa ne wã sa bɩ? N-ye. Bala a Zeova tõee bũmb fãa. A mii sẽn yaa wakat ning la a Sʋɩtãan ziri wã na n puk tɩ lebg vẽenega. Rẽ poore, a na n manega tẽngã tɩ lebg arzãna, wa a sẽn da rat tɩ yɩ to-to wã. Neb wʋsg sẽn be “yaadẽ” na n vʋʋgame. (Zã 5:28, 29) Ned pa na n le bẽ, bɩ n ki ye. A Zeezi na n manega bũmb nins fãa a Sʋɩtãan sẽn sãama. A Zeova na n kɩtame t’a Zeezi “ sãam sʋtãanã tʋʋmã.” (1 Zã 3:​8) A Zeova sẽn maan sũ-marã noom-d lame, bala kɩtame tɩ d tõe n bãng-a sõma, la d wilg tɩ d ratame t’a yɩ d Naaba. (Karm-y 2 Pɩyɛɛr 3:9, 10.) Baa d sã n namsdẽ, a sõngd-d lame tɩ d tõogd toogo.​—⁠1 Tɩmote 2:4; karm-y 1 Korẽnt-rãmb 10:13.

¹⁸ A Zeova pa modgd tõnd tɩ d sak t’a yɩ d Naab ye. A naana ninsaal t’a tõe n yãk yam a toore. Yaa wa kũun a sẽn kõ-do. Bɩ d ges a yõod ne tõndo.

BÕE LA Y NA N YÃK YAM N MAANE?

19. A Zeova naana tõnd tɩ d tõe n maan bõe? Bõe yĩng tɩ d sũur segd n yɩ noog ne rẽ?

¹⁹ Tõnd sẽn tõe n yãk yam d toorã kɩtame tɩ d pa wa rũmsã ye. Sɩd yaa bõn-sõng tɛkẽ! Rũmsã kẽnda ne yam ning b sẽn dog ne wã bala. La tõnd yẽ tõe n yãka d sẽn dat tɩ d vɩɩmã yɩ to-to, la d sã n na n saka a Zeova bɩ d pa na n sak-a. Sẽn paase, tõnd pa wa masĩn-dãmbã sẽn pa tʋmd tɩ pa tʋʋmd ning yĩng b sẽn naan-bã ye. Tõnd tara sor n tõe n yãk d sẽn dat n yɩ ned ning buudu, d zo-rãmba, la d sẽn dat tɩ d vɩɩmã yɩ to-to. A Zeova ratame tɩ d vɩɩmã yɩ noogo.

20, 21. Bõe la yãmb tõe n yãk yam n maan masã tɛka, t’a sõmblmã ka to?

²⁰ A Zeova ratame tɩ tõnd nong-a. (Matye 22:37, 38) A yaa wa ba sẽn dat t’a biig nong-a ne a sũur fãa, la pa ne modgr ye. A Zeova kõo tõnd sore, tɩ d tõe n yãk d sã n na n tũu yẽ bɩ d pa na n tũ-a. A Sʋɩtãan ne a Ãdem la a Hawa yãka b yam n kɩɩs a Zeova. La yãmb yẽ? Bõe la y na n maane?

²¹ Yãk-y yam n tũ a Zeova masã tɛka. Neb milyõ-rãmb n yãk yam n maand sẽn noom a Zeova la b kɩɩsd a Sʋɩtãana. (Yel-bũnã 27:11, Wẽnnaam Sebre, 1983) Bõe la y zoe n tõe n maane, n wa paam n vɩɩmd Wẽnnaam dũni-paalgã pʋgẽ, zĩig ning toog buud fãa sẽn ka na n le zĩndã? Sak ning sẽn pʋgdã na n goma rẽ yelle.