Siglgã taoor lʋɩtb Sull lɛtre

D tẽed-n-taaga,

Wa fo sẽn mi wã, Biiblã pida ne kibay sẽn togsd neb vɩɩm sẽn yɩ to-to. Wʋsg yɩɩ pagb la rap sẽn kell n sak Wẽnnaam, baa ne b sẽn mao ne zu-loees sẽn wõnd tõnd zu-loeesã. Bãmb me ra yaa ‘ninsaalb wa tõndo.’ (Zak 5:17) Zu-loeesã la yɩɩrã kɩtame tɩ kẽer meng koms raoodo. Sãnda me nengẽ, yɩɩ b zakã rãmb bɩ b tẽed-n-taas n maan tɩ b sũy sãam hal wʋsgo. A taab me yɩɩ b kongr n da kɩt tɩ b ningd b mens taale, tɩ ra namsd-ba.

Rẽ fãa kɩtame tɩ neb kẽer zãag b mens ne a Zeova nin-buiidã. La rẽ yĩnga, b tolg n basa a Zeova bɩ? Ayo! Wa yɩɩn-gʋlsdã, b wʋsg ra getame tɩ b wõnda pesg sẽn meneme. Ad yɩɩn-gʋlsdã sẽn yeele: ‘Mam saada wa pesg sẽn meneme, bɩ y bao y tʋm-tʋmdã, bala, mam ka yĩmd yãmb noyã yell ye.’ (Yɩɩn-sõamyã 119:176) Fo me mi n tagsa woto bɩ?

A Zeova Kaset rãmb kẽer wõnda piis sẽn yi n bas a yãgrã. La a Zeova zɩ n yĩm b yell ye. A gẽesd-b lame. Naoor wʋsgo, yaa ne b tẽed-n-taasã maasem. Wala makre, d ges a Zeova sẽn sõng wẽn-sakd a Zoob to-to. A Zoob zu-loeesã yɩɩ ka tɛka. A bõna a sẽn da tarã, t’a kambã fãa ki, tɩ bã-toaag me yõk-a. Sẽn paase, neb sẽn da segd n bels-a waa a nengẽ, n gom goam sẽn maneg n sãam a sũuri. Yaa sɩd tɩ wakat n zĩnd t’a Zoob tagsgã ra pa zemse, la a zɩ n bas a Zeova ye. (Zoob 1:22; 2:10) Bõe la a Zeova maan n sõng a Zoob t’a le paam tagsg sẽn zemse?

A Zeova sõnga a Zoob, a sẽn kɩt t’a Elihu sẽn yaa a tẽed-n-taagã wa sõs ne-a wã. A Zoob togsa bũmb nins sẽn namsd-a wã t’a Elihu kelg neere, n yaool n na n gome. Bõe la a yeel-yã? A sãbsa a Zoob wall a bao n na n wilg-a a kongre, sẽn na yɩl tɩ yãnd yõk-a t’a bas a tags kɛgã bɩ? A Elihu gesame tɩ yẽ sãoo a Zoob bɩ? Ayo! Ne Wẽnnaam vʋʋsem sõngã maasem, a Elihu yeelame: “Wẽnnaam taoore, mam yaa wa foom bala. Bãmb naana maam me ne tẽng tom.” Sẽn na yɩl t’a Zoob yam gãande, a paasa woto: “Tõog ning mam sẽn tar n gomdã ka na n kẽes-f rabeem ye. La mam sẽn tar noor ningã ka na n nams-f ye.” (Zoob 33:6, 7) A Elihu pa gom n paas a Zoob toogã ye. Ne nonglem, a pʋd n sagl-a lame la a keng a raoodo, tɩ sɩd sõng-a.

Bãng tɩ yaa tõnd me sẽn dat n maan wa a Elihu wã la d sẽn gʋls seb-kãngã wã. D reng n kelga neb kẽer sẽn da bʋdge, n maag d yĩng n bʋgs b zu-loeesã la b sẽn yeel bũmb ningã zugu. (Yel-bũnã 18:13) Rẽ poore, ne a Zeova sõngre, d tũusa Biiblã kibay sẽn wilgd a Zeova sẽn sõng pĩnd wẽn-tũudb sẽn da tar zu-loe-kãens buudu. D tika nin-kãens kibayã n paas rũndã-rũndã neb kẽer kibay n gʋls sebrã. D rata ne d sũy fãa tɩ f karem seb-kãngã, n bʋgs a zug sõma. Bãng tɩ tõnd nonga foo wʋsgo!

A Zeova Kaset rãmbã Siglgã taoor lʋɩtb Sulli