‘Mam na n baoo pesg ning sẽn menem-a wã’

BIIBLÃ pʋgẽ, a Zeova wilga naoor wʋsg tɩ yẽ wõnda pe-kɩɩm kãngã. A yeta tõnd woto vẽenega: “Mam meng n na n ges m piisã yell m toore, la m kɩɩm-ba.”—Ezekɩyɛlle 34:11, 12.

“Piisã m sẽn kɩɩmdã”

Ãnd dãmb la a Zeova piisã? Koɛɛg-kooɛga, a Zeova piisã yaa neb nins sẽn nong-a la b tũud-a wã. Biiblã yetame: “Wa-y tɩ d sulgi, n wõgemde, n yĩgimd d rũmã zut Sẽn-Ka-Saab sẽn yaa tõnd naandã taoore. Bala, b yaa tõnd Wẽnnaam, la tõnd yaa bãmb neb b sẽn dɩlgde, n yaa piis bãmb nugã sẽn kogenda.” (Yɩɩn-sõamyã 95:6, 7) A Zeova nin-buiidã sakd n tũud-a-la wa piis sẽn tũud b pe-kɩɩm to-to wã. La rat n yeelame tɩ b ka tol n tar yell bɩ? Ayo. Wakat ninga, kẽer mi n wõnda ‘piis sẽn sãeege,’ ‘pe-menemdse,’ bɩ “piis sẽn meneme.” (Ezekɩyɛlle 34:12; Matye 15:24; 1 Pɩyɛɛre 2:25) La baa ned sẽn tũud a Zeova sã n bʋdge, a Zeova pa basd a soaba, wa sẽn maand le kae ye.

Fo tagsdame t’a Zeova ket n yaa fo pe-kɩɩm bɩ? Rũndã-rũndã, bõe la a Zeova maand tɩ wilgd t’a yaa d pe-kɩɩma? Ad bũmb a tãab a sẽn maande:

A kõta tõnd bũmb nins sẽn yaa tɩlɛ d tẽebã kengr yĩngã. A Zeova yeelame: “M na n talla bãmb n kẽng yam-sõmy zĩisẽ.” A paasa woto: “Beenẽ b na n paama vʋʋsg la yam-maas zĩiga.” (Ezekɩyɛlle 34:14) Wakat fãa, a Zeova kõta tõnd bũmb toor-toor sẽn paasd d tẽebã pãnga. Rẽ me, yaa wakat sẽn zemse. Fo zoe n karma bũmb d sɛbã pʋgẽ, bɩ n kelg sõsg tigsg sasa, wall f ges video siglgã sẽn yiisi, tɩ kell n yaa wa b leoka f pʋʋsg bɩ? Rẽ pa keng f raoodo, n kɩt tɩ f kɩs sɩd t’a Zeova geta f yell sɩda?

A kogenda tõnd la a sõngd tõndo. A Zeova pʋlmame: ‘Mam na n baoo pesg ning sẽn menem-a wã. . . . Mam na n tɩbsa karg sẽn kaoog-a wã, m na n tɩbsa sẽn bẽed-a wã, n kɩt t’a sãoog n paam pãnga.’ (Ezekɩyɛlle 34:16) Ned sã n ka tar pãnga, wall yaa yɩɩrã n loog-a, a Zeova kõt-a-la pãnga. Ned sẽn tũud a Zeova sũur sã n sãame, yaa wa a sẽn paam sãmpogre. Tõe n yɩɩ a tẽed-n-taag meng n maan-a. La a Zeova tɩbsd-a lame, rat n yeel t’a sõngd-a lame t’a le paam raoodo. Kẽer bʋdgame, la tõe meng tɩ b tara tags-kɛga, tɩ namsd-ba. A Zeova sõngda b fãa tɩ b lebg n wa a nengẽ.

A getame tɩ yẽ n tog n ges tõnd yelle. A Zeova meng yeela woto: ‘Mam na n tigma m piisã zĩis nins fãa b sẽn dag n sãeegã.’ A paasame: ‘Mam na n baoo pesg ning sẽn menem-a wã.’ (Ezekɩyɛlle 34:12, 16) A Zeova pa get t’a pesg sã n bʋdge, tɩɩm le kae ye. Sẽn yaa a pesg ning fãa n meneme, a miime. A baood-a lame. A sã n wa yã-a, a maanda sũ-noogo. (Matye 18:12-14) Yẽ meng yeela woto: “Mam na n kɩɩma m piisã m toore.” (Ezekɩyɛlle 34:15) Bãng tɩ fo me naaga a piisã. Dẽnd a geta fo me yelle.

“Leb-y n kõ-y tõnd dasem nins sẽn yaa wa kʋdem-wẽndẽ dẽnda”

Bõe yĩng t’a Zeova gẽesd foo, la a sagend foo tɩ f lebg n wa yẽ nengẽ? Bala a ratame tɩ f paam sũ-noogo. A pʋlmame t’a na n kɩtame t’a piisã “zĩnd barka.” (Ezekɩyɛlle 34:26) Woto pa pʋlen-vɩʋʋg ye. Fo mengã mii rẽ vẽenega.

Tẽeg fo sẽn wa n bãng a Zeova paalmã. Fo sẽn wa n bãng t’a na n kɩtame tɩ tẽngã gill lebg arzãna, la tɩ sẽn ki-bã pa tɩ vɩ zĩig a to n namsdẽ wã, fo sũur pa yɩ noog sɩda? Fo ket n tẽra fo sẽn da kẽnd tigis-kãsemsã n paamd n naagd f tẽed-n-taasã, tɩ ra noom foo to-to wã bɩ? Fo sã n da yi koɛɛgã mooneg n paam n sõs ne ned t’a kelg sõma, fo sã n wa lebg n kuiisẽ, f sũur pa noom hal tɩ f pa tõe n bãng n bilg sɩda?

Bãng tɩ f tõe n le paama sũ-noog woto. Pĩnd wẽndẽ wã, a Zeova nin-buiidã ra pʋʋs-a lame n kos woto: “Sẽn-Ka-Saabo, bɩ y wẽnemd tõnd neng n tees yãmba, la tõnd na leb n wa yãmb nengẽ. Leb-y n kõ-y tõnd dasem nins sẽn yaa wa kʋdem-wẽndẽ dẽnda.” (A Zeremi wiisgu 5:21) A Zeova leoka b pʋʋsgã, n sõng-b tɩ b lebg n wa, n tũ yẽ wa pĩndã n paam sũ-noogo. (Neemi 8:17) A Zeova na n sõnga fo me woto.

Sẽn são yaa f sẽn na n lebg n wa a Zeova nengẽ. Rẽ yeelg yaa nana, la a maaneg yaa toogo. D ges bũmb kẽer sẽn kɩt tɩ yaa toogã, la f sẽn tõe n maan to-to.