BABG A NAASE
F sã n ningd f meng taale: “Yɩlg maam n yiis m yel-wẽnã”
A Martha yeelame: “Mam paama tʋʋmd sẽn da kɩt tɩ m tõe n maan bũmb wʋsg n sõng m zakã rãmba. La tʋʋmdã kɩtame me tɩ m kẽes m meng yɛl sẽn pa sõma pʋgẽ. M da naagd n maanda kibs rãmba, n kẽed politikã yɛlẽ, la m da kẽnd baa egiliiz menga. Maana yʋʋm 40 tɩ m pa le kẽnd tigissã ye. M wa n tolg n kɩsa sɩd t’a Zeova pa le tõe n kõ-m sugr ye. Mam meng ra getame tɩ m pa segd ne sugr ye. Bala m da mii a Zeova raabã la m sẽn baas n maan woto fãa wã.”
TAAL tõe n zɩlga ned sũur hal tɩ yaa wa a tʋka tãnga. Rĩm a Davɩɩd ra yeelame: “Mam yel-wẽnã zãntlem yɩɩda m zugã woglem, la a lebga zɩɩbo, n zɩsg maam hal wʋsgo.” (Yɩɩn-sõamyã 38:5) Kiris-neb kẽer maana bũmb tɩ sãamd b sũy wʋsgo, tɩ b ningd b mens taale, hal n kɩs sɩd t’a Zeova pa tol n tõe n kõ-b sugr ye. (2 Korẽnt-rãmbã 2:7) La tagsg a woto buud zemsame bɩ? Baa fo yel-wẽnã sẽn zem to-to fãa, f segd n tagsame tɩ f yellã sẽn ta zĩig ningã, a Zeova pa na n tol n kõ-f sugr bɩ? Ayo, fo pa segd n tags woto ye!
“M kotame tɩ y wa tɩ d yẽs ne taaba”
Ned sã n sak n deeg t’a sẽn maan pa segde, a Zeova pa basd a soab ye. A pʋd n dat n sõng-a lame. Yel-bũnd ning pʋgẽ a Zeezi sẽn gomd biig sẽn sãam a ba paoongã, a maka a Zeova ne ba sẽn nong a kamba. Biigã yi n basa a ba wã zaka, n tɩ vɩɩmd vɩ-yooko. A wa n yãka yam n na n lebg n wa zakẽ. “La yẽnda [biigã] sẽn ket n be yɩɩga, a ba wã yãnd-a lame t’a nimbãanega yõk-a. A ba wã wudgame n tɩ mobg-a n mok-a.” (Luk 15:11-20) Fo rat n lebg n waa a Zeova nengẽ, la f yaool n tagsdẽ tɩ fo yellã sẽn ta zĩig ningã, f wõnda ned “sẽn ket n be yɩɩg” bɩ? Wa ba wã sẽn maan to-to yel-bũndã pʋgẽ wã, a Zeova me na n maana woto, bala fo nimbãaneg tar-a lame. A yãgdame n dat tɩ f lebg n wa.
La f sã n tagsdẽ tɩ f sẽn maanã yaa yel-wẽn-kãsemse, pa rẽ bɩ waoogame hal t’a Zeova pa tol n tõe n kõ-f sugri? Ges bũmb ning a Zeova sẽn yeel Ezai 1:18 wã pʋgẽ. A yeelame: “Mam kotame tɩ y wa tɩ d yẽs ne taaba. Baa yãmb yel-wẽnã sã n yaa miuug wa saag-pag-a-minamina, b na n lebga pɛɛlg wa lampalga.” Dẽnd baa fo yel-wẽnã pãng sẽn ta zĩig ninga, a Zeova tõe n kõo foo sugri.
A Zeova pa rat tɩ f ket n ningd f meng taal f sũurã pʋgẽ tɩ namsd-f ye. La woto wã, bõe la f tõe n maan n paam tɩ Wẽnnaam kõ-f sugri, tɩ f sũurã ra le ning-f taale? Ad bũmb a yiib rĩm a Davɩɩd sẽn maane. Pipi, a vẽneg n togsa a kongrã. A yeelame: “Mam na n sak n deega Sẽn-Ka-Saab taoor tɩ m beegame.” (Yɩɩn-sõamyã 32:5) Tẽeg t’a Zeova zoe n boonda foo tɩ f wa tɩ y “yẽs ne taab” ne pʋʋsgã maasem. Sak a boollã, n vẽneg f yel-wẽnã n togs-a, la f pelg f pʋg n togs sẽn be f sũurẽ wã. A Davɩɩd ra miime t’a tõe n kosa a Zeova t’a bas a yel-wẽnã taale. Rẽ n so t’a pʋʋs-a ne bas-m-yam, n yeele: “Yɩlg maam n yiis m yel-wẽnã. . . . Ned sẽn sikd a meng zãng fasɩ, yãmb a Wẽnnaam ka tõdgd a soab ye.”—Yɩɩn-sõamyã 51:4, 19.
Yiib-n-soaba, a Davɩɩd saka Wẽnnaam no-rɛɛs a Natã sõngre. (2 Sãmwɛll 12:13) Rũndã-rũndã me, a Zeova yãka kãsem-dãmb tiging fãa pʋgẽ. B paama zãmsg sõma, n tõe n sõng sẽn maan-b yel-wẽn n tek yamã tɩ b le paam zood ne a Zeova. Fo sã n tɩ yã kãsem-dãmbã, b na n talla Biiblã n sõng-fo, la b pʋʋs f yĩnga. Woto na n kɩtame tɩ f yam gãande, tɩ f tags-kɛgã sa bɩ booge, tɩ f paam maagre.—Zak 5:14-16.
A Zeova ratame n kõ-f sugri, tɩ f sũurã ra le ningd-f taal ye
Ned sã n paam a beegrã sugri, bark bee a soab zugu
Yaa sɩd tɩ fo tõe n getame tɩ vẽneg f yel-wẽnã n togs a Zeova la f tɩ yã kãsem-dãmbã yaa toog wʋsgo. La bãng tɩ pa yɩ nana ne a Davɩɩd me ye. A ra ‘sĩndame’ n pa rat n togs a yel-wẽnã ye. (Yɩɩn-sõamyã 32:3) La a sẽn wa n vẽneg n togse, n le rɩk so-sõngã, naf-a-la hal wʋsgo.
A Davɩɩd lebg n paama a sũ-noogã. Rẽ meng zoe n yaa nafa. A yeelame tɩ bark bɩ sũ-noog soab la ned ning sẽn paam a beegrã sugri, la a yel-wẽnã yẽesgã. (Yɩɩn-sõamyã 32:1) A leb n pʋʋsa a Zeova n yeel woto: “Zu-soaba, yaag-y m no-bɩmsã, la m noorã na n pẽga yãmba.” (Yɩɩn-sõamyã 51:17) A Davɩɩd sẽn paam t’a sũurã pa le ningd-a taalã, n paas a sẽn dat n pʋʋs Wẽnnaam bark a sẽn kõ-a sugrã kɩtame t’a ra tʋll ne a sũur fãa n gom a Zeova yell ne neb a taabã.
A Zeova ratame n kõ-f sugri, tɩ f sũurã ra le ningd-f taal ye. Sẽn paase, a ratame tɩ f gomd a yell ne neb a taabã, la f togsd-b yẽ raabã ne pʋ-peelem la sũ-noog hakɩɩka. A pa rat tɩ f maand woto tɩ f sũurã yaool n ningd-f taal ye. (Yɩɩn-sõamyã 65:2-5) Ra yĩm t’a Zeova boonda foo ye. A ratame tɩ f wa t’a yẽes f yel-wẽnã, tɩ f paam yolsgo.—Tʋʋmã 3:19, 20.
A Martha lebg n waa a Zeova nengẽ. A yeelame: “Mam bi-riblã ra ket n toonda maam Gũusg Gasgã ne Réveillez-vous ! wã. Bilf-bilfã, m tõog n lebg n waa a Zeova nengẽ. Yɩl n vẽneg m yel-wẽnã fãa n togs la m kos sugrã n yɩ toog ne maam n tɩ yɩɩda. La m wa n tõog n pʋʋsa Wẽnnaam n kos sugri. M sã n tags tɩ m maana yʋʋm 40 n yaool n na n lebg n wa a Zeova nengẽ, yaa wa pa sɩd ye. Mam kibarã wilgda vẽeneg tɩ ned sã n bas a Zeova, baa kaoos to-to, a ket n tõe n lebg n waame, n le paam t’a nong-a.”