Wẽnnaam naana pipi raoã ne pagã

A Zeova yãka zĩig n maneg tɩ yaa neere, n bool be tɩ Edɛn. Zĩigã ra pida ne fɩlɛɛr-dãmba, tɩɩse, la rũmsi. Rẽ poore, Wẽnnaam yãka tẽngã tom n naan pipi raoã, n bool-a t’a Ãdem. Wẽnnaam fʋʋsa a yõ-bogdẽ wã. Fo mii bũmb ning sẽn maane? A lebga ned sẽn vɩ. Wẽnnaam ninga a Ãdem zĩ-neerẽ wã, n yeel t’a ges a yelle, la a pʋd rũmsã fãa yʋya.

A Zeova togsa a Ãdem gomd a sẽn da tog n tũ. A yeel-a lame yaa: ‘Fo tõe n dɩɩ tɩɩsã fãa biisi, sã n pa a ye bala. Fo sã n dɩ tɩ-kãng bilã, fo na n kiime.’

A Zeova wa n yeelame yaa: ‘Mam na n maana sõangd n kõ a Ãdem.’ A kɩtame t’a Ãdem gũs tamm, t’a yãk a sĩifã kõbr a ye n maan pag n kõ-a. Pagã yʋʋr la a Awa. A Ãdem ne a Awa n yɩ pipi zak tẽngã zugu. A Ãdem sẽn yã a pagã, a manesem yɩɩ wãna? A sũurã yɩɩ noog wʋsgo, t’a yeele: ‘A Zeova rɩka mam sĩifã kõbr n maan ned sẽn wõnd maam. M pa le yaa m yembr ye.’

A Zeova yeela a Ãdem ne a Awa tɩ b rog kamb n pid dũniyã. A ra ratame tɩ b naag taab n tʋme, n kɩt tɩ tẽngã gill lebg arzãna, tɩ zĩigã fãa yaa neer wa Edɛn. La a Zeova sẽn da ratã pa tõog ye. Bõe yĩnga? D na n yãa rẽ sak ning sẽn pʋgdã pʋgẽ.