Neb a nii n põse

A Nowe ne a zakã rãmb n paas rũmsã kẽe koom-koglgã pʋgẽ. A Zeova paga kʋɩlengã, tɩ saagã sɩng niibu. Saagã nii wʋsgo, hal tɩ koglgã sɩng rugbu. Bilf-bilfã, koomã lima tẽngã gilli. Nin-wẽnsã fãa kiime. La a Nowe ne a zakã rãmb sẽn da be koglgã pʋgẽ wã yĩnga, b põsame. Fo pa tagsd tɩ b sũurã yɩɩ noog wʋsgo, b sẽn sak a Zeova wã sɩda?

Saagã nii rasem 40 la yʋnd 40, n yaool n yalse. Koomã wa n sɩngame n boogd bilf-bilfu, tɩ koglgã tɩ yals tãng zugu. La koomã ra ket n yaa wʋsgo, t’a Nowe ne a zakã rãmb pa tõe n yi ye.

Tarẽ-n-tarẽ, koomã wa n saame. A Nowe ne a zakã rãmb sẽn zĩnd koglgã pʋgẽ wã yɩɩda yʋʋmde. La a Zeova wa n yeel-b lame tɩ b yi. B sẽn yi wã, b maana maoong n kõ a Zeova, n pʋʋs-a bark wʋsgo, a sẽn fãag-bã yĩnga.

A Zeova sũurã yɩɩ noog ne maoongã. A yeelame t’a pa na n tol n le kɩt tɩ saag ni n sãam bũmb nins sẽn be dũniyã zugã ye. Sẽn na yɩl n wilg t’a sẽn yeelã yaa sɩda, a kɩtame tɩ saag-gomtɩʋʋg puki. Fo zoe n yãa saag-gomtɩʋʋg bɩ?

A Zeova yeela a Nowe ne a zakã rãmb tɩ b rog kamb n pid dũniyã.