A Rahaab solga rap a yiibã

Rap nins a Zozuwe sẽn tʋmã taa Zeriko. B tɩ kẽe pag a ye zakẽ. Pagã yʋʋr la a Rahaab. Zeriko rĩmã bãngame, n tʋm sodaas a Rahaab zakẽ wã. A Rahaab ra kɩtame tɩ rap a yiibã rʋ a roogã zug n solge. Sodaasã sẽn wa wã, a Rahaab belg-b lame tɩ b rɩk sor a to n looge. Rẽ poore, a yeela rap a yiibã yaa: ‘M na n sõnga yãmba, bala m miime t’a Zeova bee ne yãmba, la tɩ yãmb na n wa reega tẽngã. La m kot-y lame tɩ y fãag m zakã rãmba.’

Rapã yeela a Rahaab yaa: ‘Neb nins fãa sẽn na n wa pa fo roogẽ wã pa na n ki ye. Rɩk wĩ-moomd n loe fo fenetrẽ wã, tɩ bũmb pa na n maan f zakã rãmb ye.’

A Rahaab loee wĩir a fenetrẽ wã, tɩ rap a yiibã tũ be n sigi. B teesa tãmsẽ wã, n tɩ solg be rasem a tãabo, n yaool n na n leb a Zozuwe nengẽ. Israyɛll nebã pasga Zʋrdẽ kʋɩlgã, n na n tɩ zab n deeg tẽngã. Zeriko n yɩ pipi tẽng b sẽn zab n deege. A Zeova yeel-b lame tɩ daar fãa bɩ b kẽn n gilg tẽngã vugri. B maana rẽ rasem a yoobe. La rasem a yopoe daarã, b gilga tẽngã naoor a yopoe. Rẽ poore, maan-kʋʋdbã peeba b bardã, tɩ tã-biisã kelem ne b pãng fãa. Tẽngã lals lʋɩɩme, la a Rahaab roogã sẽn da me n tong ne lalgã pa lʋɩ ye. A sẽn teeg a Zeova wã, yẽ ne a zakã rãmb põsame.