A Rut ne a Naomi

Kom n wa n kẽ Israyɛlle, tɩ pag a ye yʋʋr sẽn boond t’a Naomi ne a sɩdã, n paas b kom-dibli a yiib yik n tɩ zĩnd Mowaab tẽngẽ wã. La a Naomi sɩdã wa n kiime. A kom-dibli wã paama pagba, a Rut ne a Orpa. Ra yaa Mowaab tẽngã neba. Zu-bʋko, a Naomi kom-dibli wã me wa n kiime.

A Naomi sẽn wa n wʋm tɩ komã saame, a yãka yam n na n leb a ba-yirã Israyɛlle. A Rut ne a Orpa tũ-a lame. La b sẽn wa n be sorẽ, a Naomi yeel-b lame yaa: ‘Yãmb maana mam kom-dibli wã neere, la y maan ma-me neere. Mam datame tɩ y le paam sɩdba. Lebg-y n kuil-y Mowaabe.’ Tɩ b leoke: ‘Tõnd nonga foo. D pa rat n loog n bas foo ye.’ A Naomi pẽdg-b lame n dat tɩ b lebg n kuili. A Orpa sakame, la a Rut pa sak ye. A Naomi yeela a Rut yaa: ‘A Orpa lebg n kuiisa a nebã la a wẽnnaam-dãmbã nengẽ. Tũ-a n kuil f ma nengẽ.’ T’a Rut yeel-a yaa: ‘Mam pa na n loog n bas foo ye. Fo nebã na n yɩɩ mam neba, fo Wẽnnaamã na n yɩɩ mam Wẽnnaam.’ Fo pa tagsd t’a Naomi sũur yɩɩ noog ne a Rut sẽn yeelã sɩda?

A Rut ne a Naomi sẽn ta Israyɛllã tɩ nebã ra sɩnga koodã tigsgu. Daar a ye, a Rut kẽnga rao a ye pʋʋgẽ, n na n tɩ yiis koodo. Raoã yʋʋr la a Bowaaze, n yaa a Rahaab biiga. A wʋmame t’a Rut yita Mowaabe, la t’a sakame n na n wa zĩnd ne a Naomi. A Bowaaz yeela a tʋm-tʋmdbã tɩ b bas koodã bilf t’a Rut wa wʋke.

Baraar zaabre, a Naomi soka a Rut yaa: ‘Ãnda pʋʋgẽ la fo kẽng rũndã?’ A Rut leokame: ‘Yaa rao yʋʋr sẽn boond t’a Bowaaz pʋʋgẽ.’ T’a Naomi yeel-a yaa: ‘A Bowaaz yaa mam sɩdã roagda. Kell n naag pagb a taabã n yiis koodã beenẽ. Dẽ, bũmb pa na n maan foo ye.’

A Rut yiisa koodã a Bowaaz pʋʋgẽ wã hal tɩ tigsgã wa sa. A Bowaaz yãame t’a tʋmda sõma, la t’a yaa pʋg-sõngo. Bãmb wakatẽ wã, rao sã n ki n ka paam bi-ribla, a buudã ned n tog n deeg a pagã n maan a paga. Rẽ n so t’a Bowaaz mar a Rut. B roga bi-ribla, n pʋd-a t’a Obɛɛde. A Obɛɛd yɩɩ rĩm a Davɩɩd yaab-raoogo. A Naomi zo-rãmbã sũur yɩɩ noogo. B yeelame: ‘A Zeova kõo foo a Ruti, t’a ges fo yell sõma. La masã fo paama yagenga. Bɩ a Zeova paam pẽgre.’