A Zeova goma ne a Sãmwɛlle

Maan-kʋʋdb kãsem a Eli ra tara kom-dibli a yiibu, a Ofni ne a Fineyaase. Bãmb me ra yaa maan-kʋʋdb n tʋmd sɛk-roogẽ wã. B ra pa tũud a Zeova noyã ye. B ra namsda nebã me wʋsgo. Israyɛll nebã sã n da wa kʋ rũms n na n maan maoong n kõ a Zeova, a Ofni ne a Fineyaas ra yãkda nem-sõma wã. A Eli bãnga a kambã sẽn maand bũmb ningã, la a pa zab-b ye. La rẽ yĩnga, a Zeova basame tɩ b kell n maan woto bɩ?

Baa a Sãmwɛll sẽn da yaa biigã, a pa maan wa a Ofni ne a Fineyaas ye. A Zeova sũur da nooma ne a Sãmwɛlle. Daar a ye yʋngo, a Sãmwɛll ra gõeeme n wa wʋmd b sẽn boond a yʋʋrã. A yikame n zoe n kẽng a Eli nengẽ, n yeel-a yaa: ‘M waame.’ La a Eli yeelame: ‘Mam ka bool foo ye. Lebg n tɩ gãande.’ T’a Sãmwɛll lebg n tɩ gãande. Yɩɩ woto naoor a tãabo. La naoor a tãab-n-soabã, a Eli bãngame tɩ yaa a Zeova n boond a Sãmwɛlle. A yeela a Sãmwɛll t’a sã n le wʋm b sẽn boond-a, bɩ a yeel yaa: ‘Gome Zeova, tɩ f tʋm-tʋmdã kelgdame.’

A Sãmwɛll lebg n tɩ gãandame. A wa n wʋmda b sẽn boond-a: ‘Sãmwɛlle, Sãmwɛlle.’ T’a leoke: ‘Gom tɩ f tʋm-tʋmdã kelgdame.’ A Zeova yeel-a lame yaa: ‘Yeel a Eli tɩ m na n sɩbga yẽ ne a zakã rãmba. A miime t’a kom-dibli wã maanda sẽn pa sõma mam sɛk-roogẽ wã, la a pa zabd-b ye.’ Beoogã sẽn vẽege, a Sãmwɛll yikame n pak sɛk-roogã kʋɩlens wa a sẽn mi n maandẽ wã. A ra yɛɛsdame n pa rat n togs maan-kʋʋdb kãsem a Eli a Zeova sẽn yeelã ye. La a Eli bool-a lame n yeel-a yaa: ‘Sãmwɛlle, bõe la a Zeova yeel foo? Togs maam zãnga.’ A Sãmwɛll sɩd togsa a Eli zãnga.

A Sãmwɛll ra bɩtame, t’a Zeova me sõngd-a wakat fãa. Israyɛll tẽnsã fãa pʋsẽ, nebã ra miime tɩ yaa a Sãmwɛll la a Zeova yãk t’a na n yɩ no-rɛɛs la bʋ-kaooda.