A Zonatã talla raoodo, la a sak a Zeova

A Zonatã yaa rĩm a Sayull bi-kãsenga. Ra yaa sodaag sẽn tar raoodo. A Davɩɩd yeelame t’a Zonatã ra tʋʋla wa sɩlga, n tõe n zoe tao-tao, la t’a tara pãng wa bõnyẽega. Daar a yembre, a Zonatã yãa Filisti tãb-biis sẽn da be tãng zugu. A yeela ned ning sẽn da zãad a zab-teedã yaa: ‘Filisti nebã sã n yeel tõnd tɩ d wa, yaa bãnd a Zeova sẽn maane, sẽn wilgd tɩ d na n tõog-b lame.’ Filisti nebã sɩd kelmame n yeel yaa: ‘Wa-y n zab-y ne tõndo.’ B rʋʋ tãngã n tɩ zab ne-b n kʋ bãmb 20.

A Zonatã sẽn da yaa a Sayull bi-kãsengã yĩnga, yẽ n da segd n wa lebg rĩma. La a Zonatã ra miime t’a Zeova yãka a Davɩɩd t’a na n wa lebg Israyɛll rĩma. A yaool n pa maan sũ-kiir ye. A Zonatã ne a Davɩɩd pʋd n lebga zo-rãmb meng-menga. Ned fãa yeela a to t’a na n sõng-a lame. A Zonatã rɩka a fuugã, a sʋʋgã, a tãpã la a sẽbdgã n kõ a Davɩɩde, n wilg t’a nong-a lame.

A Sayull sẽn wa n baood a Davɩɩd n na n kʋ t’a zoetẽ wã, a Zonatã kẽnga a nengẽ n yeel-a yaa: ‘Tall raoodo, n da zoe rabeem ye. A Zeova yãka foo tɩ f na n lebg rĩma. M baaba meng mii rẽ.’ Rẽ yĩnga, fo pa rat zoa sẽn yaa wa a Zonatã sɩda?

A Zonatã sõnga a Davɩɩd naoor wʋsgo, baa b sẽn da tõe n kʋ-a rẽ yĩngã. A ra miime t’a baaba rat n kʋʋ a Davɩɩde, rẽ n so t’a yeel-a yaa: ‘Fo sã n kʋ a Davɩɩde, yaa yel-wẽnde. A pa bee foo ye.’ A Sayull sũurã yika ne a Zonatã. Yʋʋm a wãn poore, a Sayull ne a Zonatã fãa kii zabr sasa.

A Zonatã kũumã poore, a Davɩɩd gẽesa a biig a Mefibosɛte. A sẽn yã-a wã, a yeel-a lame yaa: ‘F baaba sẽn yɩ mam zoa wã yĩnga, mam na n gesa fo yell f vɩɩmã tõre. Fo na n zĩnda mam na-yirã, n naagd maam n dɩtẽ.’ A Davɩɩd pa tol n yĩm a zoa a Zonatã yell ye.