Soolmã welga zĩis a yiibu

A Salomo sẽn da tũud a Zeova wã, laafɩ la bãan ra bee Israyɛlle. La a wa n dɩka tẽns a taab kom-pugli wʋsg n maan a pagba. B yaool n da pʋʋsda bõn-naandse. Bilf-bilfã, a Salomo me wa n pʋʋsda bõn-naandse. A Zeova sũur yika ne-a. A yeel-a lame yaa: ‘Mam na n welga Israyɛll buudã zĩis a yiibu. Mam na n kɩtame tɩ fo tʋm-tʋmd a ye soog neb wʋsgo, tɩ fo zakã rãmb soog neb bilfu.’

A Zeova maana bũmb sẽn na yɩl t’a sẽn yeelã yɩ vẽenega. Daar a ye, a Salomo tʋm-tʋmd a Zerobowam n da togd sor n wa sɛg no-rɛɛs a Ahiya. A Ahiya yeega a fuugã n pãrg zĩis 12, n yeel a Zerobowam yaa: ‘A Zeova na n deega Israyɛll soolmã a Salomo nengẽ, n welg-a zĩis a yiibu. Reeg fu-gɩrs bãmb 10, bala fo na n lebga Israyɛll buud piig rĩma.’ Rĩm a Salomo wʋmame, n da rat n kʋ a Zerobowam. Rẽ kɩtame t’a zoe n kẽng Ezɩpti. A Salomo wa n kiime, t’a biig a Roboam lebg rĩma. Dẽ, a Zerobowam leba Israyɛlle.

Israyɛll nin-kẽembã yeela a Roboam yaa: ‘Fo sã n maan nebã neere, b na n saka foo.’ La a Roboam zo-rãmbã yeel-a lame yaa: ‘Nams nebã. Kɩt tɩ b tʋm wʋsgo.’ A Roboam kelga a zo-rãmbã sẽn yeelã, n sɩd nams nebã wʋsgo. La buud piig neb n yeel tɩ b pa le rat t’a yɩ b rĩm ye. B yãka a Zerobowam t’a lebg b rĩma. B wa n boonda buud piigã tɩ Israyɛll soolem, la b boond buud a yiibã tɩ Zida soolem. Buud a yiibã neb saka a Roboam. Israyɛll buud 12 sɩd welgame.

A Zerobowam ra pa rat t’a nebã kẽng Zerizalɛm sẽn da be a Roboam soolmẽ wã n tɩ maan maand n kõ a Zeova ye. Fo mii sẽn yaa bũmb ning yĩnga? A Zerobowam ra yɛɛsdame tɩ nebã na n wa basa yẽ n tũ a Roboam. Rẽ n so t’a maan sãnem nag-bi a yiibu, n yeel nebã yaa: ‘Zerizalɛm zãra wʋsgo. Yãmb tõe n paa ka n maan maand n kõ a Zeova.’ Nebã sɩd sɩngame n pʋʋsd nag-bi wã, n le bas a Zeova tũubu.