A Zeova zab n sõnga a Zozafate

Zida rĩm a Zozafat sãama a Baal tẽn-kugã, la bõn-naandsã fãa. A ra ratame tɩ nebã bãng a Zeova noyã. Rẽ n so t’a tʋm nanambs ne Levi neb tɩ b na n gilg Zida tẽngã n zãms nebã a Zeova noyã.

Tẽn-yagsã ra yɛɛsdame n pa rat n zab ne Zida nebã, bala b ra miime t’a Zeova bee ne-ba. B ra wat n kõta rĩm a Zozafat kũun menga. La Mowaab ne Amon la Seyɩɩr soolmã neb waame n na n zab ne Zida nebã. A Zozafat ra miime t’a segd n baoo a Zeova sõngre. A kɩtame tɩ rapã ne pagbã la kambã fãa tigim taab Zerizalɛm. A yalsa nebã fãa taoor n pʋʋs a Zeova n yeel yaa: ‘Zeova, fo sã n pa sõng tõndo, d pa na n tõog-b ye. D kotame tɩ f togs tõnd d sẽn segd n maane.’

A Zeova leokame n yeel yaa: ‘Da yɛɛs-y ye. Mam na n sõnga yãmba. Yals-y n ges-y mam sẽn na n maan to-to n fãag yãmba.’ Bõe la a Zeova maan n fãag-ba?

Vẽkembeoogã yibeoogo, a Zozafat yãka yɩɩn-yɩɩndba, n yeel-b tɩ b lʋɩ taoore, tɩ tãb-biisã pʋgda. B yii Zerizalɛm n kẽng zabrã zĩigẽ Tekowa.

Yɩɩn-yɩɩndbã sẽn da zẽkd b koees n yɩɩnd ne sũ-noogã, a Zeova kɩtame tɩ Amon ne Mowaab nebã wẽneg n kʋ taaba. Ned baa a ye pa põs ye. La a Zeova kogla Zida nebã, tãb-biisã la maand-kʋʋdbã. Tẽn-yagsã wʋma bũmb ning a Zeova sẽn maanã, n bãng t’a ket n sõngda a nebã. Rũndã-rũndã, bũmb toor-toor la a Zeova maand n fãagd a nebã. A pa baood tɩ ninsaalb sõng-a ye.