A Ɛsdras zãmsa nebã Wẽnnaam tõogã

Israyɛll neb wʋsg sẽn lebg n kuil Zerizalɛmmã taa yʋʋm 70 masã. La kẽer n da ket n be Pɛrs-rãmbã soolmẽ. Wala makre, a Ɛsdras. A ra yaa maan-kʋʋda, n zãmsd nebã a Zeova tõogã. A Ɛsdras wʋmame tɩ neb nins sẽn lebg n kuil Zerizalɛmmã ra pa tũud tõogã, t’a ra rat n tɩ sõng-ba. Pɛrs rĩm a Artazɛgzɛs yeel-a lame yaa: ‘Wẽnnaam kõo foo yam n dat tɩ f zãms nebã a tõogã. Kẽnge. Ned ning fãa sẽn dat tõe n tũu foo.’ A Ɛsdras ne neb nins fãa sẽn da rat n leb Zerizalɛmmã tigma taaba, n pʋʋs a Zeova, sẽn na yɩl t’a kogl-b sorã zugu. Rẽ poore, b loogame.

Kiis a naas poore, b taa Zerizalɛm. Tẽngã taoor dãmb yeela a Ɛsdras yaa: ‘Israyɛll nebã kɩɩsa a Zeova, n mar pagb sẽn pʋʋsd bõn-naandse.’ A Ɛsdras maana wãna? A yĩgimda nebã fãa taoor n pʋʋs n yeele: ‘Zeova, fo maana bũmb wʋsg n kõ tõndo, la tõnd beega foo.’ Nebã sẽn kelgã b toeemame, la b ra ket n data sõngre, sẽn na yɩl n maan sẽn yaa sõma. A Ɛsdras yãka kãsem-dãmb ne bʋ-kaoodba, tɩ b na n sõng-ba. Kiis a tãabã sẽn pʋglã, b riga neb nins fãa sẽn da pa tũud a Zeova wã.

Yʋʋm piig la a yiib poore, b lebs n mee Zerizalɛm lalsã. Dẽ, a Ɛsdras tigma nebã n na n karem Wẽnnaam tõogã tɩ b kelge. A sẽn lak sebrã, nebã yikame n yalse. A gomame n pẽg a Zeova, la nebã fãa zẽka b nus n wilg tɩ b sakame. A Ɛsdras karma tõogã, n wilg a võore. Nebã ra maaga b yĩng n kelgdẽ. B sak n deegame tɩ b ra ket n pa tũud a Zeova sõma, tɩ rẽ kɩt tɩ b yãbe. Vẽkembeoogã, a Ɛsdras le karma tõogã tɩ b kelge. B bãngame tɩ b tog n maana zãn kibsã. Tao-tao bala, b sɩngame n segend b mens kibsã yĩnga.

Kibsã kaoosa rasem a yopoe. Nebã sũy ra noomame, tɩ b pʋʋsd a Zeova barka, a sẽn kɩt tɩ b paam kood wʋsgã. Sã n pa a Zozuwe wakatẽ wã, b ra pa le maan zãn kibs a woto buud ye. Kibsã poore, nebã tigma taab n pʋʋs a Zeova n yeele: ‘Zeova, foo n fãag tõnd yembdã pʋgẽ, n ges tõnd yell weoogẽ wã, la f kõ tõnd tẽn-kãngã sẽn yaa neerã. La tõnd beega foo naoor wʋsgo. Fo tʋma no-rɛɛsdb tɩ b sõng tõndo, la d pa kelg ye. Baa ne rẽ, fo maana sũ-mare ne tõndo. Fo maana wa fo sẽn da pʋlem a Abrahaamã. Masã, d yãka yam n na n sak foo.’ B gʋlsa b sẽn yãk yam n na n maanã sebr zugu, tɩ tẽngã taoor dãmba, Levi nebã ne maan-kʋʋdbã tik b nusi.