SAK 67
Zerizalɛm lalsã meebo
A Ɛsdras wakatẽ wã, Israyɛll rao a ye n da be tɩ b boond t’a Neemi. A ra yaa rĩm a Artazɛgzɛs tʋm-tʋmda, n da be Suuz sẽn be Pɛrs soolmẽ wã. A Neemi ba-biig n yi Zida n wa yeel-a yaa: ‘Neb nins sẽn lebg n kuil Zerizalɛmmã nan pa me tẽngã lals la b maneg kʋɩlensã Babilon nebã sẽn sãamã ye. Rẽ kɩtame tɩ bũmb ka be n kogend-b ye.’ A Neemi sũurã sãamame. A ra rat n kẽnga Zerizalɛm n tɩ sõng-ba. Rẽ n so t’a pʋʋs a Zeova, sẽn na yɩl t’a kɩt tɩ rĩmã kõ-a sore.
Rĩmã wa n yãame t’a Neemi sũurã pa noome, t’a sok-a yaa: ‘Fo nengã gãnemame. Yaa bõe n tar foo?’ T’a Neemi yeel yaa: ‘M sũurã pa tõe n yɩ noog ye. Bala Zerizalɛm sẽn yaa mam ba-yirã sãamame.’ La rĩmã sok-a lame yaa: ‘Bõe la fo rat tɩ m maan n kõ foo?’ Zĩig pʋgẽ, a Neemi pʋʋsa a sũurẽ. Rẽ poore, a yeela rĩmã yaa: ‘M kotame tɩ f kõ-m sor tɩ m kẽng Zerizalɛm n tɩ lebs n me lalsã.’ Rĩm a Artazɛgzɛs yeel-a lame t’a kẽnge. Rĩmã maana bũmb sẽn na yɩl t’a Neemi sã n wa rabd Zerizalɛm bɩ bũmb da maan-a ye. A leb n kõo a Neemi naam n kɩt t’a lebg Zida guvɛrneere, la a kõ-a raado, Zerizalɛm kʋɩlensã manegr yĩnga.
A Neemi sẽn ta Zerizalɛmmã, a gilgame n ges tẽngã lalse. Rẽ poore, a tigma maan-kʋʋdbã ne tẽngã taoor dãmb n yeel-b yaa: ‘Yaa yelle! D segd n sɩnga meebã tao-tao.’ Nebã sakame, n sɩng lalsã meebo.
Israyɛll bɛɛb n wa n yaal-b n yeel yaa: ‘Baa waag sã n dʋ lalgã, na n siigame.’ La tʋm-tʋmdbã pa leok-b ye. B ra tara meeb bala, tɩ lalgã zẽkdẽ, la a tar pãnga.
Bɛɛbã ra rat n wa linga Zerizalɛm nebã, n zab ne-ba. Zʋɩf-rãmbã sẽn bãng rẽ wã, b yɛɛsa wʋsgo. La a Neemi yeel-b lame yaa: ‘Ra yɛɛs-y ye. A Zeova bee ne-do.’ A Neemi yãka neb tɩ b gũud tʋm-tʋmdbã, sẽn na yɩl tɩ bɛɛbã ra wa zab ne-b ye.
Rasem 52 pʋgẽ bala, b mee lalsã la b maneg kʋɩlensã n sa. A Neemi kɩtame tɩ Levi nebã fãa wa Zerizalɛm tɩ b maan kibsa, tʋʋmdã sẽn sa wã yĩnga. A Neemi pʋɩɩ nebã zĩis a yiibu, tɩ b na n yɩɩl n gilg lalgã. B wa n taa rignoor ning b sẽn boond tɩ Bulgã rignoorã. Sull a ye rɩka lalgã nug-rɩtgo, tɩ sull a to wã rɩk nug-goabga, tɩ b yɩɩnd n pẽgd a Zeova la b peebd bardo, tãntãad la yʋʋm teed a taaba, n na n gilg lalgã n sɛg taaba. A Ɛsdras lʋɩɩ sull a ye taoore, t’a Neemi lʋɩ sull a to wã taoore, tɩ b wa sɛg taab wẽnd-doogẽ wã. Rapã, pagbã la kambã fãa maana maand n kõ a Zeova, la b kɩdme. Baa neb nins sẽn da be yɩɩgã wʋma nebã koeese.
“Zab-teoog ning fãa b sẽn maan n na n zab ne foomã kõn tol n tõog n maan foom bũmb ye.”—Ezayi 54:17