A Korney paama vʋʋsem sõngã

Rom soda-naab n da be Sezaare tẽngã pʋga, t’a yʋʋr boond t’a Korney. Baa ne a sẽn da pa Zʋɩfã, Zʋɩf-rãmbã ra nong-a lame. Bala a ra yaa nin-sõngo, n sõngd naong rãmbã. A Korney ra tẽeda a Zeova, n pʋʋsd-a wakat fãa. Daar a ye, malɛk n wa a nengẽ n yeel-a yaa: ‘Wẽnnaam wʋma fo pʋʋsgã. Masã, tʋm neb tɩ b kẽng Zope, n tɩ kos a Pɩyɛɛr t’a wa fo yirã.’ Tao-tao bala, a Korney tʋma rap a tãab Zope. Zope ne Sezaare zemsa kilo 50.

Wẽnnaam vẽnega a Pɩyɛɛr sẽn da be Zope wã, t’a yã rũmsi. Zʋɩf-rãmbã ra pa tar sor n na n wãb rũm-kãens nemd ye. A Pɩyɛɛr yaool n wʋma koɛɛg sẽn yet-a t’a wãbe. La a zãgsame n yeele: ‘Mam zɩ n wãb rũng sẽn yaa rẽgd nemd ye.’ La koɛɛgã yeel-a lame yaa: ‘Da bool rũm-kãensã tɩ rẽgd ye. Bala Wẽnnaam kɩtame tɩ b lebg yɩlma.’ Koɛɛgã le yeelame: ‘Rap a tãab n be yɩnga. Yik n tũ-b n looge.’ A Pɩyɛɛr yiime n sok rapã tɩ bõe la b rata. Tɩ b leok yaa: ‘Rom soda-naab a Korney n tʋm tõndo, tɩ d wa bool foo tɩ f wa yẽ yirã Sezaare.’ A Pɩyɛɛr yeela rapã tɩ b gãand yẽ zakẽ wã baraar yʋngo. Vẽkembeoogã, yẽ ne Zope saam-biis kẽer tũu rapã n kẽng Sezaare.

A Korney sẽn yã a Pɩyɛɛrã, a yĩgimda a rũmã zugu. La a Pɩyɛɛr yeel-a lame: ‘Yiki, bala ma-me yaa wa foo bala. Baa Zʋɩf-rãmbã sẽn pa kẽed buud a taabã neb zagsẽ wã, Wẽnnaam yeelame tɩ m wa fo yirã. Masã, togs maam bũmb ning sẽn kɩt tɩ f tʋm tɩ b bool maamã.’

A Korney yeela a Pɩyɛɛr yaa: ‘Rasem a naas la woto, mam da pʋʋsda Wẽnnaam, la malɛk n wa n yeel maam tɩ m tʋm tɩ b bool foo. M bõos tɩ f sõng tõnd tɩ d bãng a Zeova sõma.’ Rẽ, a Pɩyɛɛr yeelame: ‘M bãngame tɩ Wẽnnaam pa tũusd ned ye. Sẽn yaa ned ning fãa n yãk yam n na n tũ-a, a sakdame.’ A Pɩyɛɛr zãmsa a Korney ne a zakã rãmb bũmb wʋsg a Zeezi zugu. Rẽ poore, vʋʋsem sõngã siga b zugu, la b fãa reega lisgu.