SAK 11

Y sẽn tõe n maan to-to tɩ Biiblã kareng naf-y sõma

B sẽn ẽnprimi

Yãmb zoe n paama tʋʋmd y sẽn da segd n tʋme, n da getẽ tɩ yɩɩda y nug bɩ? Tõe tɩ sẽn na yɩl tɩ tʋʋmdã yɩ nana, y pʋɩ-a-la zĩis toor-toore, n tʋmd bilf-bilfu. Yaa woto me ne Biiblã karengo. Tõe tɩ y sokda y meng yaa: ‘Biiblã zĩ-bʋg la m na n sɩng karengo?’ Sag-kãngã pʋgẽ, d na n yãa bũmb a wãn sẽn tõe n sõng tɩ Biiblã kareng la a zãmsg yɩ-y noogo.

1. Bõe yĩng tɩ d segd n karemd Biiblã daar fãa?

Ned sã n karemd Biiblã sẽn yaa a Zeova “tõogã” daar fãa, a paamda sũ-noogo, t’a sẽn maand fãa me yãkd nenga. (Karm-y Yɩɩn-sõamyã 1:1-3.) Sẽn na yɩl n sɩnge, modg-y n karemd-y minit a wãn daar fãa. Yãmb sã n bãngd Wẽnnaam Gomdã n paasdẽ, y na n mikame t’a karengã me lebgda noog n paasdẽ.

2. Bõe n tõe n sõng-y tɩ Biiblã kareng naf-yã?

Sẽn na yɩl tɩ Biiblã kareng naf-do, d segd n mi n yalsame n bʋgs bũmb ning d sẽn karmã zugu. Rat n yeel tɩ d segd n karmame la d “tags a yelle.” (Zozoe 1:8) Y sã n wa karemdẽ, y tõe n soka y meng sogsgo. Wala makre: ‘M sẽn karemdã wilgda maam bõe Wẽnnaam a Zeova zugu? Wãn to la m tõe n tũ m sẽn karemdã? Wãn to la m tõe n tall vɛrse-kãensã n sõng neb a taaba?’

3. Bõe la y tõe n maan n paamd sẽk n karemd Biiblã?

Yaa toog ne-y tɩ y paam sẽk n karem Biiblã bɩ? Tõnd wʋsg me nengẽ yaa woto. Modg-y n “da sãam-y y sẽkã ye.” (Efɛɛz rãmbã 5:16) Woto baoodame tɩ y yãk wakat takɩ, n karemd Biiblã daar fãa. Neb kẽer yãkame tɩ yaa yibeoog pĩnd la b na n karemd Biiblã. Sãnda yãka wakat a to daarã pʋgẽ, wala makre, midi wã vʋʋsg sasa. Kẽer me nengẽ, yaa b sã n wa na n kẽ gãag la b karemd Biiblã. Wakat bʋg n zems ne yãmba?

D BAO N BÃNG N PAASE

D ges y sẽn tõe n maan to-to tɩ Biiblã kareng tall yamleoog ne-yã, la y sẽn tõe n segl y meng sõma to-to me t’a zãmsgã sɩd naf-yã.

Fot-rãmba: Bi-bilf sẽn modgd wakat wʋsg sẽn na yɩl n wa nong rɩɩb a sẽn pa nonge. 1. Biigã zĩ n deemda ne rɩɩbã. 2. Yʋʋm a wãn poore, biigã rɩta rɩɩbã. 3. A sẽn wa n lebg kãsem bilfã, a rɩta rɩɩbã tɩ noom-a. — D tõe n modgame n wa nong rɩbd toor-toore. Woto me, d tõe n modgame n wa nong Biiblã karengo

4. Y sẽn tõe n maan tɩ Biiblã kareng yɩ-y noogo

Yɩl n sɩng Biiblã karengã tõe n yɩɩ toogo. La wa ned sẽn tõe n wa nong rɩɩb a sẽn da zɩ n dɩ wã, tõnd me tõe n wa “tʋlga Wẽnnaam gomdã” karengo. Karm-y 1 Pɩyɛɛr 2:2, tɩ rẽ poor bɩ y leok sokrã:

Yãmb tagsdame tɩ y sã n karemd Biiblã daar fãa, tõe n wa yɩ-y-la noog hal tɩ y pa rat n vaal bɩ?

Ges-y VIDEO wã, tɩ y na n yãa neb sẽn maan to-to, tɩ Biiblã kareng wa noom-ba. Rẽ poor bɩ y leok sogsgã.

VIDEO: Kom-bɩɩs sẽn modg n wa nong Wẽnnaam Gomdã karengo (5:33)

Video wã pʋgẽ, kom-bɩɩsã wilgame tɩ zu-loe-bʋs la b mao ne?
Bõe n sõng-b tɩ b pa bas Biiblã karengo?
Bõe la b maan tɩ Biiblã kareng maneg n tall yamleoog ne-ba?

Sagls sẽn tõe n sõng-y tɩ y sɩnge:

Bao-y Biibl b sẽn lebg tɩ yaa takɩ, t’a goamã võor wʋmb me yaa nana. Karm-y Dũni-paalgã lebgre, sã n mik t’a bee yãmb buud-gomdã pʋgẽ.
Sɩng-y zĩis nins sẽn noom yãmb n tɩ yɩɩdã karengo. Y tõe n gesa na-kẽndr ning sẽn be zĩig ning b sẽn gʋls tɩ: “Sɩng-y Biiblã karengo.”
Ning-y bãnd y sẽn karem n tẽkẽ wã. Y tõe n tũu “Biiblã kareng na-kẽndrã” sẽn be seb-kãngã pʋgẽ wã.
Karm-y Biiblã JW Library^® aplikasiyõ wã pʋgẽ. Y tõe n telesarza aplikasiyõ wã y portaabl bɩ aparɛy a to pʋgẽ, n karem Biiblã wall y kelg Biiblã b sẽn karem tɩ b rɩkã zĩig ning fãa y sẽn date.
Y tõe n gesa vẽnegr nins sẽn be Dũni-paalgã lebgrã pʋgẽ wã. Be, y tõe n yãa kart-rãmba, taablo-rãmba, la gom-biis võor bilgr zĩig sẽn tõe n sõng-y tɩ Biiblã kareng tall yamleoogo.

5. Segl-y y meng y Biiblã zãmsg yĩnga

Karm-y Yɩɩn-sõamyã 119:34, tɩ rẽ poor bɩ y leok sokrã:

Nand tɩ y sɩng Biiblã karengo, wall y segl y meng Biiblã zãmsg yĩnga, bõe yĩng tɩ yaa sõma tɩ y reng n pʋʋse?

Bõe la y tõe n maan tɩ zãmsg fãa naf-yã? Y sã n wa segend y meng Biiblã zãmsg yĩnga, ad sagls sẽn na n sõng-yã:

A. Karm-y pipi sula wã n tek zĩig ning b sẽn gʋls tɩ: “D bao n bãng n paase.”
B. Gẽes-y vɛrse-rãmbã n karme, la y bao n bãng b sẽn tar loees ning ne sakã sẽn gomd bũmb ning yellã.
D. Rẽeg-y goam nins sẽn leokd sokr fãa wã. Rẽ na n sõngame tɩ y tõog n sõs sakã zug ne y karen-saambã.

Fot-rãmba: Pag sẽn segend a meng Biiblã zãmsg yĩnga. A. A karemda pipi sula wã. B. A karemda vɛrse-rãmbã Biiblã pʋgẽ. D. A rẽegda goam nins sẽn leokd sokrã.

Yãmb miime bɩ?

A Zeova Kaset rãmbã tʋma ne Biiblã lebgr toɛy-toɛya. La d sẽn nong n yɩɩd yaa Dũni-paalgã lebgrã, bala a lebgrã yaa takɩ, t’a goamã võor wʋmb me yaa nana. Sẽn paase, Wẽnnaam yʋʋrã bee a pʋgẽ.—Ges-y jw.org sõsg ning gom-zug sẽn yaa: “A Zeova Kaset rãmbã tara b toorẽ Biibl bɩ?”

NEB KẼER SẼN YETE: “Biiblã zãmsg yaa toog wʋsgo. Mam pa tar sẽk n zãmsd-a ye.”

Yãmb tagsg yaa wãn ne rẽ?

KƲMSGO

Sẽn na yɩl n paam tɩ Biiblã kareng naf-y sõma, yãk-y wakat takɩ n karemd-a, pʋʋs-y Wẽnnaam n kos t’a sõng-y tɩ y wʋm y sẽn karemdã võore, la y segend y meng y zãmsg fãa yĩnga.