SAK 14
Wãn to la d tõe n tũ Wẽnnaam tɩ ta a yam?
Wa d sẽn yã sak ning sẽn loogã pʋgẽ wã, pa tũudmã fãa n tat Wẽnnaam yam ye. La wãn to la d tõe n tũ d Naandã tɩ ta a yam? Tũudum-bʋg buud n tat a yam? (Zak 1:27, notã) D ges b sẽn yet rẽ wɛɛngẽ Biiblã pʋgẽ.
1. Tõnd sẽn tũud Wẽnnaam to-to wã tog n tika bõe zugu?
Tõnd sẽn tũud Wẽnnaam to-to wã tog n tika Biiblã sẽn yetã zugu. A Zeezi yeela Wẽnnaam yaa: “Yãmb gomdã yaa sɩda.” (Zã 17:17) Tũudum kẽer maanda b toog kae ne sɩd ning sẽn be Wẽnnaam Gomdã sẽn yaa Biiblã pʋgẽ wã. B ledga sɩdã sẽn be Biiblã pʋgẽ wã ne ninsaalb zãmsgo, la b minindu. La neb nins sẽn “basd Wẽnnaam noyã” pa tat a yam ye. (Karm-y Mark 7:9.) D sẽn tũud a Zeova to-to wã sã n zems ne Biiblã sẽn yetã, noogda a sũuri.
2. Wãn to la d segd n tũ a Zeova?
A Zeova sẽn yaa d Naandã yĩnga, yaa yẽ bal la d segd n tũ. (Vẽnegre 4:11) Woto rat n yeelame tɩ d segd n nong-a lame, la d tũ yẽ a ye bala, n pa tũnug ne bõn-naandse, imaaz-rãmba, pa rẽ bɩ yɛl a taab ye.—Karm-y Ezayi 42:8.
Tõnd sẽn tũud a Zeova to-to wã segd n yɩɩ “sõma,” la noom-a. (Rom dãmbã 12:1) Woto rat n yeelame tɩ d segd tũuda a noyã la a saglsã d vɩɩmã pʋgẽ. Wala makre, neb nins sẽn nong a Zeova wã me nonga noy la sagls nins a sẽn kõ kãadmã wɛɛngẽ wã, n tũud rẽ. Sẽn paase, b zãagda b mens ne minim-wẽnse. Wala makre, sɩgaarã la dorgã yũubu, pa rẽ bɩ rãamã yũ tɩ loogã.a
3. Bõe yĩng tɩ d segd n naag d tẽed- n-taasã n tũ a Zeova?
Tigissã d sẽn maand semen fãa wã kõta tõnd segbo, tɩ d tõe n ‘pẽg a Zeova’ tigingã pʋgẽ. (Yɩɩn-sõamyã 111:1, 2) Wala makre, d yɩɩndame n pẽgd Wẽnnaam. (Karm-y Yɩɩn-sõamyã 104:33.) A Zeova ratame tɩ d kẽnd tigissã, bala a nonga tõndo. A miime me tɩ rẽ na n sõnga tõndo, tɩ d wa paam vɩɩm sẽn kõn sa wã. Tigissã sasa, d kengda d taabã raoodo, la d paamdẽ tɩ bãmb me kengd tõnd raoodo.
D BAO N BÃNG N PAASE
D ges a Zeova sẽn pa rat tɩ d tũnug ne bõn-naands bɩ imaaz-rãmb n pʋʋs-a wã võore. D na n bãnga bũmb a wãn d sẽn tõe n maane, n pẽg Wẽnnaam.
4. D pa segd n tũnug ne bõn-naands bɩ imaaz-rãmb n pʋʋs Wẽnnaam ye
Bõe n kɩt tɩ d miẽ tɩ d sã n maan woto, pa tat Wẽnnaam yam? Ges-y VIDEO wã, tɩ rẽ poor bɩ y leok sokrã.
Pĩnd wẽndẽ, Wẽnnaam nin-buiidã sʋka, kẽer sẽn bao n na n tũnug ne bõn-naandg n pʋʋs-a wã, bõe n maane?
Neb kẽer tũnugda ne bõn-naands bɩ imaaz-rãmb n pʋʋsd Wẽnnaam. Bala b tagsdame tɩ yaa ne rẽ maasem la b na n paam n pẽneg-a. La rẽ maaneg pa pʋd n zãagd-b ne Wẽnnaam sɩda? Karm-y Yikr 20:4-6 la Yɩɩn-sõamyã 106:35, 36, tɩ rẽ poor bɩ y leok sogsgã:
Bõn-naands bɩ imaaz-rãmb bʋs la yãmb yã tɩ nebã tũnugda ne n pʋʋsd Wẽnnaam?
A Zeova tagsg yaa wãn ne nebã sẽn tũnugd ne bõn-naands bɩ imaaz-rãmb n pʋʋsdẽ wã?
Yãmb menga tagsg yaa wãn ne nebã sẽn tũnugd ne bõn-naands bɩ imaaz-rãmb n pʋʋsdẽ wã?
5. D sã n tũud a Zeova bala, d paamda d mense
D sã n tũud a Zeova tɩ tat a yam, wãn to la rẽ na n sõng tõnd tɩ d paam d mens ne bũmb toor-toor sẽn pa sɩd nebã sẽn tẽede? Ges-y VIDEO wã.
Karm-y Yɩɩn-sõamyã 91:14, tɩ rẽ poor bɩ y leok sokrã:
D sã n wilg tɩ d nonga a Zeova, n tũud yẽ a ye bala, bõe la a pʋlem t’a na n maan n kõo tõndo?
6. Tigissã sasa, d waoogda a Zeova
Tigissã sasa, d sã n yɩɩndẽ la d zẽkd d nus n kõt leoore, d pẽgda a Zeova la d kengd taab raoodo. Karm-y Yɩɩn-sõamyã 22:23, tɩ rẽ poor bɩ y leok sogsgã:
Y sẽn kelg nebã sẽn zẽk b nus n leok tigissã sasa wã, yɩ-y-la noog bɩ?
Y ratame n segl y meng n wa tõog n zẽk y nug n leok bɩ?
7. D sã n wilgd d taabã bũmb nins d sẽn bãngdã, nooma a Zeova
D tõe n tũnuga ne manesem buud toor-toor n wilg d taabã bũmb ning d sẽn bãngd Biiblã pʋgẽ wã. Karm-y Yɩɩn-sõamyã 9:2 la 34:2, tɩ rẽ poor bɩ y leok sokrã:
Togs-y bũmb yãmb sẽn bãng Biiblã pʋgẽ n dat n gom rẽ yell ne ned a to.
NEB KẼER SẼN YETE: “Ninsaal pa tol n tõe n ta Wẽnnaam yam ye.”
Yãmb tagsg yaa wãn ne rẽ?
KƲMSGO
D sã n tũud d Naandã a ye tãa, n pẽgd-a tigissã sasa, la d wilgd d taabã bũmb nins d sẽn bãngdã, noom-a lame.
Lebg-n-gese
Wãn to la d tõe n bãng Wẽnnaam sẽn dat tɩ d tũ-a to-to tɩ ta a yam?
Bõe yĩng tɩ yaa a Zeova bal la d segd n tũ?
Bõe yĩng tɩ d segd n naag neb nins sẽn dat n ta Wẽnnaam yamã n tũ-a?
BŨMB A TAABA
Pag a ye sẽn paam a meng zãng-zãng ne bõn-naandsã pʋʋsgo. A kibarã gom-zug yaa: “Mam pa le pʋʋsd bõn-naands ye.”
“Biiblã toeemda neba” (Yʋʋmd 2011 sẽoog kiuug pipi daar Gũusg Gasgã)
Bũmb toor-toor sẽn tõe n sõng-y tɩ y wa tõog n leok tigissã sasa.
“D pẽg a Zeova tigissã sasa” (Yʋʋmd 2019 yʋʋm-vẽkr kiuug Gũusg Gasgã)
Tigissã kẽnd sẽn naf bi-bɩɩg a ye to-to, baa ne rẽ sẽn da pa nana ne-a wã.
Neb wʋsg tagsdame tɩ pikã naaga kiris-nebã tũudum yɛl pʋgẽ. La rẽ yĩnga, d segd n tũnugda ne pikã n pʋʋsd Wẽnnaam bɩ?
“Bõe yĩng t’a Zeova Kaset rãmbã pa tũnugd ne pikã n pʋʋsdẽ?” (Bee jw.org)
a D na n wa goma bõn-kãensã yelle, sags a taab pʋsẽ.