SAK 51
Bõe la d tõe n maan tɩ d no-goamã ta a Zeova yam?
A Zeova sẽn naan tõnd tɩ d tõe n gomã yaa kũun sẽn yaa kãsenga. Tõnd sẽn maand to-to ne kũun-kãngã tara yõod a nifẽ bɩ? Yaa vẽeneg tɩ n-ye! (Karm-y Zak 1:26.) Woto wã, wãn to la d tõe n maane, tɩ d no-goamã tat a Zeova yam?
1. Wãn to la d tõe n bãng n tʋm ne d no-goamã?
Biiblã pʋgẽ, b yeta tõnd yaa: ‘Bɩ y ket n kengd taab raoodo, la y paasd taab tẽeb pãnga.’ (1 Tesalonik rãmb 5:11) Yãmb mii neb sẽn dat raood kengr bɩ? Bõe la y tõe n maan n sõng-b tɩ b yam gãande? Sõng-y-b tɩ b bas b yam tɩ b yell pak-y lame. Y tõe n togs-b-la bũmb nins sẽn noom yãmb b nengẽ. Y tẽra vɛrse sẽn tõe n keng ned y sẽn mi raood bɩ? Vɛrse rãmb ka tɛk n be y sẽn tõe n yãke. Sẽn paase, tẽeg-y tɩ y sã n na n togs ned bũmbu, y sẽn na n togs rẽ to-to wã me tõe n kenga a raood wʋsgo. Woto wã, bɩ y modgd wakat fãa n gomd ne bʋgsem.—Yel-bũnã 15:1.
2. Gom-bʋs buud la d pa segd n gome?
Biiblã pʋgẽ, b yetame yaa: “Bɩ gom-põosg baa a ye ra yi y noorẽ” ye. (Karm-y Efɛɛz rãmb 4:29.) Woto rat n yeelame tɩ d pa gomd gom-põaasa, d leb n pa gãs-gãs ne d taabã sẽn na yɩl n sãam b sũy ye. Sẽn paase, d segd n zãaga d meng ne wɩdga, la kãnegre.—Karm-y Yel-bũn 16:28.
3. Bõe n na n sõng-d tɩ d gomd goam sẽn kengd d taabã raoodo?
Naoor wʋsgo, tõnd sẽn gomd bũmb nins yellã wilgda sẽn sɩd be d sũurẽ, pa rẽ bɩ d sẽn sɩd tagsde. (Luk 6:45) Dẽnd yaa tɩlɛ tɩ d kibl d mengã, sẽn na yɩl n tagsd bũmb nins sẽn yaa sõma, sẽn yaa tɩrse, sẽn yaa yɩlma, sẽn tog ne nonglem, la sẽn tog ne pẽgrã yelle. (Filip rãmbã 4:8) Sẽn na yɩl n tagsd bõn-kãens yelle, d segd n bãngd n yãkda d zo-rãmbã, la bũmb nins d sẽn maand n deemdẽ bɩ n kokd pemsmã. (Yel-bũnã 13:20) Sẽn paase, y sã n maag y yĩng n tags n yaool n gome, sõngdame. Tags-y y goamã sẽn tõe n maan y taabã bũmb ningã yelle. Biiblã pʋgẽ, b yetame yaa: “Gom-to-ned goam pogenda wa zabr sʋʋga, la yam soab goam wata ne maagre.”—Yel-bũnã 12:18.
D BAO N BÃNG N PAASE
D ges y sẽn tõe n maan to-to tɩ y no-goamã ta a Zeova yam, la keng y taabã raoodo.
4. Maand-y gũusg ne y goamã
Sasa ninga, tõnd ned kam fãa mi n yeela bũmbu, n wa maand d bãngẽ. (Zak 3:2) Karm-y Galat-rãmb 5:22, 23, tɩ rẽ poor bɩ y leok sogsgã:
Zʋg-sõma kãensã sʋka, bʋs la y tõe n pʋʋs n kose, tɩ sõng-y tɩ y gũusd ne y no-goamã? Wãn to la zʋg-sõma kãensã tõe n sõng yãmba?
Karm-y 1 Korẽnt rãmb 15:33, tɩ rẽ poor bɩ y leok sokrã:
Y zo-rãmbã, la bũmb nins y sẽn maand n deemdẽ bɩ n kokd pemsmã tõe n wa kɩtame tɩ y no-goamã yaa wãn-wãna?
Bõe n tõe n wa kɩt tɩ d sẽn gomd to-to wã sãamd d taabã sũuri, wall kengd b raoodo?
Karm-y Koɛɛg soab 3:1, 7, tɩ rẽ poor bɩ y leok sokrã:
Sasa bʋg la d segd n sĩndi, bɩ n gũ wakat sẽn zems n yaool n gome?
5. Gomd-y y taabã yell neere
Bõe n na n sõng-d tɩ d ra wa gomd d taabã yell wẽnga, bɩ n yɩ gãs-gãs ne-ba? Ges-y VIDEO wã, tɩ rẽ poor bɩ y leok sogsgã.
Video wã pʋgẽ, bõe yĩng tɩ saam-biigã da rat n toeem a sẽn gomd a taabã yell to-to wã?
Bõe la a maan n tõog n toeeme?
Karm-y Koɛɛg soab 7:16, tɩ rẽ poor bɩ y leok sokrã:
Bõe yell la d segd n tẽege, d sã n wa rat n gom ned yell wẽnga?
Karm-y Koɛɛg soab 7:21, 22, tɩ rẽ poor bɩ y leok sokrã:
Ned sã n gom tõnd yell wẽnga, wãn to la vɛrse kãensã tõe n sõng-do, tɩ d ra yik d sũuri?
6. Gomd-y ne y zakã rãmb ne bʋgsem
A Zeova ratame tɩ zak rãmb sõsd ne taab noog-noogo, la ne nonglem. Ges-y VIDEO wã, tɩ rẽ poor bɩ y leok sokrã.
Bõe n na n sõng-y tɩ y gomd ne y zakã rãmb ne bʋgsem?
Karm-y Efɛɛz rãmb 4:31, 32, tɩ rẽ poor bɩ y leok sokrã:
Gom-bʋs buud n kengd zak neb raoodo?
A Zeova togsa vẽeneg t’a nonga a Bi-ribl a Zeezi. Karm-y Matiye 17:5, tɩ rẽ poor bɩ y leok sokrã:
Wãn to la y tõe n dɩk a Zeova togs-n-taare, y sẽn gomd ne y zakã rãmb to-to wã wɛɛngẽ?
Baood-y segb n pẽgd y taabã
NEB KẼER SẼN YETE: “Mam togsda m sẽn tagsde. Neb a taabã sũur sã n pa noom ne m sẽn yeelã, paka bãmba.”
Yãmb me tagsda woto bɩ? Bõe yĩnga?
KƲMSGO
Goam tara pãnga. D segd n maaga d yĩng n tags bũmb nins d sẽn yetã zugu, wakat ning d sẽn yet rẽ wã, la d sẽn yet rẽ to-to wã.
Lebg-n-gese
Togs-y d sẽn tõe n tũnug ne d no-goamã n sõng d taabã to-to.
Y segd n zãaga y mens ne gom-bʋs buudu?
Bõe n tõe n sõng-do, tɩ wakat fãa bɩ d goamã yɩ ne bʋgsem, la kengd d taabã raoodo?
BŨMB A TAABA
Bõe n tõe n sõng yãmb tɩ y gomd goam sẽn kengd y taabã raoodo?
Bõe n tõe n sõng-y tɩ y ra wa gomd gom-yõodo?
Bõe n na n sõng-y tɩ y ra wa wɩt y taabã?
A Zeova sẽn sõng rao a ye to-to, t’a tõog n bas gom-põaasa.
“Mam maaga m yĩng n tags n ges m sẽn da vɩ to-to wã” (Yʋʋmd 2013 sa-sik kiuug pipi daar Gũusg Gasgã)