SÕNG-Y-B TƖ B LEBG A ZEEZI KAREN-BIISI
SAK 12
Sagl-y-b ne pʋ-peelem
Biiblã sẽn yete: “Kaam ne wisd noogda sũuri. Yaa woto me ne f zoa sẽn sagend-f ne pʋ-peelem.”—Yel. 27:9.
A Zeezi sẽn maan to-to
1. Ges-y VIDEO wã, wall y karem Mark 10:17-22. Rẽ poor bɩ y leok sogsgã:
Zʋg-sõma bʋs la a Zeezi yã raoã nengẽ?
Bõe yĩng tɩ d tõe n yeel t’a Zeezi pelga a pʋg n sagl raoã ne nonglem?
A Zeezi sẽn maan to-to wã wilgda tõnd bõe?
2. Yaa sɩd tɩ d segd n nonga d Biibl karen-biisã. La d segd n wilg-b-la vẽeneg b sẽn segd n maan n kell n tall zood sõma ne a Zeova.
Maan-y wa a Zeezi
3. Sõng-y y karen-biigã t’a yãk a sẽn dat n wa maane, la a modg n maan rẽ.
a. Ges-y Vɩɩmd-y wakat sẽn kõn sa! sebrã sak fãa pʋgẽ, zĩig ning b sẽn gʋls tɩ “M sẽn tõe n maane.”
b. Sõng-y y Biibl karen-biigã t’a bãng bũmb takɩ a sẽn segd n maane, bũmb ning a sẽn yãk n dat n maan masã wã wɛɛngẽ, la kaoosg zugẽ wã wɛɛngẽ.
d. Nong-y n pẽgd-y y Biibl karen-biigã, a sẽn maand modgrã yĩnga.
4. Bao-y n bãng-y bũmb nins sẽn kɩt t’a pa modgdẽ wã, la y sõng-a t’a mao ne bõn-kãense.
Sok-y y meng yaa:
‘Mam Biibl karen-biigã sã n pa maand modgr sẽn na yɩl n wa reeg lisgu, bõe n gɩdgd-a?’
‘Bõe la m tõe n maan n sõng-a?’
Pʋʋs-y-yã a Zeova t’a kõ-y raood tɩ y pelg y pʋg n wilg y Biibl karen-biigã a sẽn segd n maan bũmb ningã vẽenega. La maan-y rẽ ne nonglem.
5. Bas-y Biibl karen-biis nins sẽn pa modgdã
Sẽn na yɩl n bãng y Biibl karen-biigã sã n maanda modgre, sok-y y meng yaa:
‘Mam Biibl karen-biigã tũuda a sẽn zãmsd bũmb ningã bɩ?’
‘Rẽ yĩnga, a wata tigissã la a gomd bũmb nins a sẽn zãmsdã yell ne neb a taabã bɩ?’
‘A sẽn sɩng Biiblã zãmsgã sã n kaoosame, rẽ yĩnga a rat n wa yɩɩ a Zeova Kaset soab bɩ?’
Biibl karen-biig sã n pa rat n maan modgre:
Kos-y-yã-a t’a tags bũmb ning sẽn gɩdg-a wã yelle.
Wilg-y-yã-a bũmb ning sẽn kɩt tɩ y rat n bas Biiblã zãmsg ne-a wã. La maan-y rẽ ne bʋgsem.
Wilg-y-yã-a bũmb ning a sẽn segd n maane, a sã n dat tɩ y le wa sɩng Biiblã zãmsg ne-a.