Kirist yao-n-dɛɛkã:

Wẽnnaam fãagrã sore

“Wẽnnaam talla nonglem ne dũniyã wʋsg hal t’a kõ a Biribl yendã a sẽn naanã, sẽn na yɩl tɩ ned ning fãa sẽn wilgd tẽeb ne-a ra paam sãoong ye, la a na paam vɩɩm sẽn-kõn-sa.”—ZÃ 3:16, NW.

1, 2. Bilg-y yell ning sẽn waa n zĩnd ãdem-biisã sʋkã.

MAMS-Y n ges y sẽn na n namsd ne bãag sẽn sɩd na n tõsg y yõorã, sã n pa b maan-y-la wopeere. Yãmb tagsg ra na n yɩɩ wãn-wãna, wopeerã ligd sã n da yɩɩdẽ yãmb sẽn da tõe n kõ wã zĩig sẽn zãre? Yaa wãn to, baa yãmb zakã la y zo-rãmbã laog fãa sẽn fãoog taab sã n pa tõe n yao-a? F sã n seg yel-gĩtem a woto sẽn dat n yãk f yõore, segd n yɩɩ sũ-sãang menga!

² Woto bilgda yell sẽn waa n zĩnd sẽn tɩ loe ne ãdem-biisã. B ra naana tõnd pipi roagdb a Ãdem ne a Hawa tɩ b zems zãnga. (Tõodo 32:4) B ra tara saagr sẽn yaa vɩɩmd wakat sẽn-kõn-sa la b na n pids Wẽnnaam daabã sẽn yaa: “Rog kamb n pid dũniyã la b tõog-a.” (Sɩngre 1:28) Baasg zãnga, a Ãdem ne Hawa tõdga b Naandã. (Sɩngre 3:1-6) B kɩɩsgã waa ne yel-wẽn a Ãdem ne a Hawa zut yembo, la yaa b kambã ne b yagensã sẽn da pa rogã zut me. Kɩs-sɩd rao a Zoob togsa kaoosg zugẽ tɩ: “Ãnd n tõe n yiis nin-yɩlemd nin-dẽgd pʋgẽ? Ned ba a ye.”—Zoob 14:4, NW.

3. Wãn-wãn la kũumã yelg n ta neba fãa?

³ Woto, yel-wẽndã yaa wa bãag sẽn bẽeg tõnd ned kam fãa, bala Biiblã yetame tɩ ‘fãa maana yel-wẽna.’ Yel-kãngã kɩtame tɩ ninsaal yõor tõe n yãke. Sɩda, “yel-wẽna yaood yaa kũum.” (Rom dãmba 3:23; 6:23) Tõnd ned ba a ye pa tõe n põs-a ye. Ninsaalbã fãa maanda yel-wẽnde, rẽnd ninsaalbã fãa kiidame. D sẽn yaa a Ãdem yagensã, d roga yel-kãngã pʋgẽ. (Yɩɩl Sõamyã 51:7) A Poll gʋlsame: “Rao a yembre n wa ne yel-wẽna dũniyã tɩ kũum wa yel-wẽna yĩnga. Rẽ n kɩt tɩ kũum yõkd neba fãa, fãa sẽn maand yel-wẽna yĩnga.” (Rom dãmba 5:12) La rẽ pa rat n yeel tɩ d pa tar fãagr saagr ye.

Yel-wẽndã la kũumã yiisgu

4. Bõe yĩng tɩ ninsaalbã pa tõe n yiis bãasã la kũumã ne b mens pãnga?

⁴ Bõe la b ra segd n maan n yiis yel-wẽndã la a biisã sẽn yaa kũumã? Vẽenega, yaa bũmb sẽn yɩɩd ninsaal buud fãa sẽn tõe n kõ. Yɩɩl-gʋlsdã sãama a sũur woto: “Yaood ninsaal vɩɩm yĩng yaa toog wʋsg tɩ loog noore. Bũmb ning a sẽn tõe n yao wã ra pa na n tol n sek sẽn na põsg-a ne yaoogo, t’a paam n vɩɩmd wakat fãa ye.” (Yɩɩl Sõamyã 49:8, 9, Today’s English Version) La sẽn be, tõe tɩ d tõog n wogl d yõorã ne yʋʋm a wãn ne rɩ-tũusg sẽn kõt laafɩ la tɩbsg tũnugri. Baasg zãnga tõnd ned ba a yembr pa tõe n maag yel-wẽnã halhaal d sẽn dog ne wã ye. Tõnd ned ba a ye pa tõe n kɩt tɩ kʋʋlmã biis sẽn boogd pãngã zẽneb leb poorẽ la a lebs n lugl tõnd yĩngã t’a paam zems-zãng ning Wẽnnaam sẽn da rat t’a yɩ to-to sɩngrẽ wã ye. Sɩd-sɩda, a Poll ra pa togsd tɩ loog noor a sẽn waa n gʋls t’a Ãdem yel-wẽndã yĩngã, b “ninga [ãdem-biisã] faoolem pʋgẽ,” bɩ wala The Jerusalem Bible sẽn togsd-a wã, “b maan-a lame t’a pa tõe n ta a bõn-datlã ye.” (Rom dãmba 8:20, NW ) La zu-noogo, Naandã pa bas-d ye. A rɩka segls n na n yiis yel-wẽndã la kũumã vugr wakat fãa yĩnga. Wãn-wãna?

5. Wãn-wãn la Tõog ning b sẽn kõ Israɛllã pukd naneb wʋsg ne tɩrlmã?

⁵ A Zeova “nonga tɩrlem la bʋʋd sẽn yaa tɩrga.” (Yɩɩl Sõamyã 33:5) Tõogã noy a sẽn kõ Israɛllã pukda naneb wʋsg ne kɩls-tɩ-zems la tɩrlem sẽn pa bakd n sõng ye. Wala makre, noy kãens pʋsẽ, d karemdame tɩ ‘vɩɩm la b segd n yao vɩɩm yĩnga.’ Sẽn dat n yeel tɩ Israɛll ned sã n da kʋ neda, a mengã vɩɩm ra segd n dɩkame n yao ned ning yõor a sẽn yãkã zĩigẽ. (Yikri 21:23; Sõdbo 35:21) Woto, Wẽnnaam tɩrlmã balãns ra na n peesame n zemse.—Mak-y ne Yikri 21:30.

6. a) Ne bõe wɛɛngẽ la b tõe n bool a Ãdem tɩ nin-kʋʋda? b) Vɩɩm bʋg buud la a Ãdem menes-yã, la yaa maoong bʋg buud n da na n yɩ tɩlae sẽn na yɩl n tɩ tɩrlmã balãns peesg kɩls n zemse?

⁶ A Ãdem sẽn maan yel-wẽndã, a lebga nin-kʋʋda. Wãn-wãna? Ya a sẽn bẽeg a yel-wẽndã, la woto yĩngã kũumã a kambã la a yagensã fãa wã yĩnga. Yaa a Ãdem kɩɩsgã yĩng la sẽn kɩt tɩ masã menga tõnd yĩnsã sãamdẽ, n debd kũum zĩigẽ bilf-bilfã. (Yɩɩl Sõamyã 90:10) A Ãdem yel-wẽndã taglem sẽn pa reem yellã yɩɩda woto menga. Tẽeg-y-yã, a Ãdem sẽn kong bũmb ning yẽ mengã ne a kambã la a yagensã yĩngã pa vɩ-zaalg sẽn yaa yʋʋm 70 bɩ 80 vɩɩm ye. A konga vɩɩm sẽn zems zãnga, sɩd-sɩda, yaa vɩɩm sẽn-kõn-sa. Woto, b sã n segd ‘n yao vɩɩm vɩɩm yĩnga,’ vɩɩm bʋg buud la b ra segd n kõ n pids tɩrlmã yel-kãngã pʋgẽ? Sã n yaa ne sẽn zemse, ra segd n yɩɩ ninsaal vɩɩm sẽn zems zãnga, vɩɩm wala a Ãdem dẽndã sẽn da tar tõog n na n dog ninsaalb sẽn zems zãnga. B sã n da kõ-a wala maoongo, ninsaal vɩɩm sẽn zems zãng ra na n peesame n kɩls n zems balãns zug yembo, la sẽn paase, a ra na n kɩtame tɩ b tõog n yiis yel-wẽndã la a biisã sẽn yaa kũumã zãnga.

Yel-wẽndã yaood rolbo

7. Bilg-y gom-biig ning sẽn yaa “yao-n-dɛɛka” võore?

⁷ Keoor ning b sẽn da baood tɩ b yao n deeg tõnd yel-wẽndã pʋgẽ wã b goma a yell Biiblã pʋgẽ wala “yao-n-dɛɛka.” (Yɩɩl Sõamyã 49:7, NW ) Moor buud-gomd pʋgẽ, gom-bi-kãngã tõe n tɩ loee ne yaood nin-zukd sẽn kot sẽn na yɩl n tek ne ned a sẽn yõke. Yaa sɩd tɩ yao-n-dɛɛk ning a Zeova sẽn kõ wã pa tɩ loe ne ned zukr ye. Keoorã yaoobã võor-wʋmb ket n yaa yembre. Sɩda, Hebre yɛtg buk ning b sẽn lebg ne “yao-n-dɛɛkã” rat n yeela sɩd-sɩd tɩ “ludi.” Sẽn na yɩl n maan paasg yel-wẽndã yĩnga, yao-n-dɛɛkã segd n zemsa kɛpɩ ne bũmb ning a sẽn tog n ludã: a Ãdem vɩɩmã sẽn yaa ninsaal vɩɩm sẽn zems zãngã.

8. a) Bilg-y yao-n-fãagã noor võore? b) Wãn-wãn la yao-n-fãagã tɩ loe ne tõnd sẽn yaa yel-wẽn-maandbã?

⁸ Rẽ zemsa ne noor sẽn be a Moiiz Tõogã pʋgẽ wã: yaa yao-n-fãagã noore. Israɛll ned sã n da kẽ naong pʋgẽ n koos a mengã yembdẽ ne ned sẽn pa Israɛll neda, roagd ra tõe n yao n fãag-a lame (bɩ n kõ yao-n-dɛɛka), n yao keoor ning b sẽn get tɩ zema yambã ligdã. (Maankʋʋre 25:47-49) Biiblã yetame tɩ tõnd sẽn yaa ninsaalb sẽn pa zems zãngã d yaa “yel-wẽna yembs[e].” (Rom dãmba 6:6; 7:14, 25) Bõe la b ra segd n dɩk n yao n fãag tõndo? Wala d sẽn yã wã, ninsaal vɩɩm sẽn zems zãngã menesg ra na n baoo ninsaal vɩɩm sẽn zems zãng yaoodo: pa segd n yɩɩg woto, pa segd n paoog woto.

9. Wãn-wãn la a Zeova rɩk segls sẽn na yɩl n lud yel-wẽna?

⁹ Yaa sɩd tɩ tõnd ninsaalbã rogame n pa zems zãng ye. Tõnd ned ba a yembr pa zem a Ãdem ye. Tõnd ned ba a yembr pa tõe n yao yao-n-dɛɛkã keoor tɩrlmã sẽn baoodã ye. Wala b sẽn wilg sɩngrẽ wã, yaa wala tõnd sã n tara bãag sẽn dat n yãk tõnd yõorã, tɩ d pa tõe n kõ bũmb n yao wopeerã sẽn tõe n maag tõndã ligd ye. Yell a woto pʋgẽ, d kõn tallẽ mi-beoogo, ned sã n wa sõng tõnd n yao yaoodã sɩda? Yaa woto kɛpɩ la a Zeova maan-yã! A rɩka segls n na n fãag tõnd ne yel-wẽndã vugr wakat fãa yĩnga. N-yẽe, a rat n kõo tõnd bũmb ning d sẽn da pa na n tol n tõog n kõ d mense. Wãn-wãna? A Poll gʋlsame: “Wẽnnaam kũuna yaa vɩɩm sẽn-ka-sɛta tõnd Zusoaba Kirist Zezi maasem yĩnga.” (Rom dãmba 6:23) A Zã bilga a Zezi wala “Wẽnnaam Pebila sẽn yiisd dũniyã yel-wẽna.” (Zã 1:29) Bɩ d ges a Zeova sẽn dɩk a Biribl-nongrã n tʋm to-to sẽn na yɩl n yao yao-n-dɛɛkã keoore.

‘Yao-n-dɛɛk sẽn zemse’

10. Wãn-wãn la bãngr-goam nins sẽn tɩ loe ne “yagenga” tik a Zozɛf la a Maari zutu?

¹⁰ Tõdgrã poor Edɛnã bala, a Zeova moona a raabã sẽn yaa kõ “yageng” bɩ ned pendẽ neda, sẽn da na n yao n deeg ãdem-biisã ne yel-wẽndã. (Sɩngre 3:15) Vẽnegr sẽn yit Wẽnnaam nengẽ sẽn pʋgl taab pʋsẽ, a Zeova kɩtame tɩ b bãng roog ning sẽn da na n kõ yageng kãngã wã. Wakat n zĩnd tɩ vẽneg-kãens tik a Zozɛf la a Maari sẽn da yaa neb sẽn pʋlem kãadem kõom ne taab n vɩ Palɛstinã zutu. Zãmsd pʋgẽ, b yeela a Zozɛf t’a Maari ra tara pʋg vʋʋsem sõngã maasem yĩnga. Malɛkã yeelame: “Yẽ na n doga biribla tɩ f pʋd a yʋʋr t’a Zezi, yaa yẽ n na n fãag a neba ne b yel-wẽna.”—Matɩe 1:20, 21.

11. a) Wãn-wãn la a Zeova rɩk segls t’a Biriblã rog n yɩ ninsaal sẽn zems zãnga? b) Bõe yĩng t’a Zezi ra tõe n kõ “yao-n-dɛɛk sẽn zems[e]”?

¹¹ Pʋg-kãngã ra pa pʋg wala a taabã ye, bala a Zezi ra talla belem saasẽ sẽn deng t’a yɩ ninsaala. (Yelbũna 8:22-31; Kolos rãmba 1:15) Ne a pãngã sẽn yaa yel-solemdã, a Zeova yiisa a Zezi vɩɩmã n ning a Maari pʋgẽ wã, n kɩt tɩ Wẽnnaam Biribl nongr kãngã tõog n dog wala ninsaala. (Zã 1:1-3, 14; Filip rãmba 2:6, 7, NW ) A Zeova wilga yɛlã sor t’a Ãdem yel-wẽndã pa bẽeg a Zezi ye. Sẽn yaa lebende, a Zezi rogame n zems zãnga. Woto, a paama bũmb ning a Ãdem sẽn da menesã: ninsaal vɩɩm sẽn zems zãngã. Sẽn na n baase, ad ninsaal sẽn yaa n tõe n yao yel-wẽnã yaoodo! La yaa woto kɛpɩ la a Zezi maan yʋʋmd 33 T.W. Nizã rasem 14. Ra-kãseng kãngã sasa, a Zezi basame t’a bɛɛbã kʋ-a, tɩ ne woto bɩ a kõ “yao-n-dɛɛk sẽn zems[e].”—1 Tɩmotɩ 2:6, NW.

Ninsaal vɩɩm sẽn zems zãngã yõodo

12. a) Bilg-y a Zezi kũumã la a Ãdem kũumã sẽn pa yembr lɛ-lɛ ne taabã. b) Wãn-wãn la a Zezi lebg ãdem-bi-sakdsã “Ba sẽn-ka-kiida”?

¹² A Zezi kũumã ne a Ãdem kũumã pa yembr ye. B kũumã sẽn pa yembrã kɩtdame tɩ yao-n-dɛɛkã yõod puk n paase. A Ãdem kũumã ra zemsame, bala a kɩɩsa a Naandã ne yamleoogo. (Sɩngre 2:16, 17) Sẽn yaa lebende, a Zezi kũumã ra yaa bũmb sẽn pa zems lɛ-lɛ, bala “bãmb ka tol n maan yel-wẽn ye.” (1 Pɛɛr 2:22) Woto, a Zezi sẽn waa n ki wã, a ra tara bũmb yõod sẽn yaa kãseng wʋsg yel-wẽn-maand a Ãdem sẽn da pa tar a kũumẽ wã ye: yaa sor ning a sẽn tar n na n paam ninsaal vɩɩm sẽn zems zãngã. Woto, a Zezi kũumã ra yaa maoong kũum. A sẽn dʋ saasẽ wala ned sẽn yaa vʋʋsmã poore, a wilga a Zeova a maoongã yõodo. (Hebre dãmba 9:24) A sẽn maan woto wã, a Zezi raa ãdem-biisã sẽn yaa yel-wẽn-maandbã n lebg b Ba paalga, n ledg a Ãdem. (1 Korẽnt dãmba 15:45, NW ) Yaa ne bʋʋm sẽn sek la b boond a Zezi tɩ “Ba sẽn-ka-kiida.” (Ezai 9:5) Tags-y woto sẽn dat n yɛɛlga! A Ãdem sẽn yaa ba sẽn yaa yel-wẽn-maandã yelga kũumã tɩ ta a kambã la a yagensã fãa. A Zezi sẽn yaa Ba sẽn zems zãngã rɩkda a maoongã yõod n tʋm n kõ ãdem-bi-sakdbã vɩɩm sẽn-kõn-sa.

13. a) Rɩk-y makr n bilg a Zezi sẽn yiis samd ning a Ãdem sẽn wa ne wã to-to. b) Bõe yĩng t’a Zezi maoongã pa lut tõnd pipi roagdbã yel-wẽnde?

¹³ La wãn-wãn masã la rao a yembr kũum tõe n lud neb wʋsg yel-wẽna? (Matɩe 20:28) Yʋʋm a wãn sẽn looge, sõsg a yembr pʋgẽ, d bilga yao-n-dɛɛkã woto: “D rɩk makr ne luzin kãseng sẽn da na n dɩk neb kob-gĩn tʋʋma. Dɩrɛktɛɛr sẽn yaa pʋ-lik soab wata ne ãnterepiriizã lʋɩɩse: lebga tɩlae tɩ luzina pag a kʋɩlemse. Dẽ, neb kob-gĩn pa leb n tar tʋʋma, la b pa tõe n da b sẽn segd n da wã ye. Bãmb kẽed-n-taasã, b kambã, la baa neb nins b sẽn pemsã, b fãa na n namsa rao a yembr pʋ-lik yĩnga! Rẽ poore, neer-maand sẽn yaa arzɛk soab yaooda ligd n yik ãnterepiriizã la a lebs n pak luzinã. Samdã yãkr maasem yĩnga, tʋmd-tʋmdbã sõor wʋsgã, b zagsã la b sẽn pems b rãmbã paamda nafa kãsemse. La sã n yaa ne dirɛktɛɛrã, yẽ paamda bark kãngã b sẽn leb n paama bɩ? Sɩd-sɩda ayo! A bee bãens roogẽ la a menesa a tʋʋmdã wakat fãa yĩnga. Woto me, a Ãdem samdã yãkr kõta neb tus-kẽema nafa, a yagensã, la pa yẽ mengã ye.”

14, 15. Bõe yĩng tɩ b tõe n yeel t’a Ãdem ne a Hawa yaa neb sẽn maan yel-wẽnd ne yamleoogo, la wãn-wãn la tõnd sẽn be zĩig ningã yaa toor ne bãmb rẽnda?

¹⁴ Woto zemsame. Tẽeg-y t’a Ãdem ne a Hawa maana yel-wẽnd ne yamleoogo. B yãkame n na n kɩɩs Wẽnnaam. Sẽn yaa lebende, tõnd roga yel-wẽnã pʋgẽ. Pa d yell ye. Baa tõnd sẽn modg to-to fãa, d pa na n tol n da maan yel-wẽnd ye. (1 Zã 1:8) Wakat ninga tõeeme tɩ d tags wala a Poll sẽn gʋls woto wã: “Mam sẽn dat n maan neere, wẽng loee ne maam. Tɩ bõe, mam nonga Wẽnnaam tõog hal ne m sũur fãa. La mam yãta tõog a to mam yĩnga wila pʋgẽ sẽn maood ne mam pʋ-tẽer tõogo, la sẽn kẽesd maam yel-wẽna tõog yembd pʋgẽ sẽn be mam yĩnga wila pʋsẽ. Mam yaa ninbãan ned bala. Ãnda n na n fãag maam ne kũum sẽn be yĩng kãngã pʋgẽ wã?”—Rom dãmba 7:21-24.

¹⁵ La yao-n-dɛɛkã yĩnga, d tara saagre! Wala Wẽnnaam sẽn kãabã, a Zezi yaa yageng ning ne a soab maasem “dũniyã buud fãa [sẽn] na n paam barka.” (Sɩngre 22:18; Rom dãmba 8:20) A Zezi maoongã pakda sor tɩ neb nins sẽn wilgd tẽeb ne-a wã tõe n paam segb kãsemse. Bɩ d ges segb-kãensa b wãna.

D rɩ Kirist yao-n-dɛɛkã nafre

16. Baa ne tõnd sẽn yaa yel-wẽn-maandbã, masã bõe nafa la d tõe n paam a Zezi yao-n-dɛɛkã yĩnga?

¹⁶ Biiblã gʋlsd a Zak sak n deegdame tɩ “tõnd fãa kongda ne bũmb wʋsgo.” (Zak 3:2) Baasg zãnga, Kirist yao-n-dɛɛkã yĩnga, tõnd kongrã tõe n paama sugri. A Zã gʋlsame: “Ned sã n maan yel-wẽna, tõnd tara sɛ-yõkda sẽn be tõnd Ba taoore, bãmb yaa a Zezi Kirist sẽn yaa tɩrlem soabã. Bãmb menga yɩɩ maoong tõnd yel-wẽna yĩnga.” (1 Zã 2:1, 2) Yaa sɩd tɩ d pa segd n maan yam-kaalg ne yel-wẽna ye. (Ziid 4, NW; mak-y ne 1 Korẽnt dãmba 9:27.) Baasg zãnga, d sã n bʋdge, d tõe n togsa a Zeova bũmb ning sẽn be d sũurẽ wã, n tar bas-yard t’a “sakame n na n kõ sugri.” (Yɩɩl Sõamyã 86:5, NW; 130:3, 4; Ezai 1:18; 55:7; Tʋʋma 3:19, NW) Woto, yao-n-dɛɛkã kɩtdame tɩ d tõe n sõgen Wẽnnaam ne sũur-kaset sẽn yaa yɩlemde, la a kɩtdẽ tɩ d tõe n kolg-a pʋʋsg pʋgẽ ne a Zezi Kirist yʋʋrã yĩnga.—Zã 14:13, 14; Hebre dãmba 9:14.

17. Yao-n-dɛɛkã yĩnga, beoog-daar bark bʋs n tõe n yɩ?

¹⁷ Kirist yao-n-dɛɛkã paka sor Wẽnnaam daabã pidsg yĩnga: tɩ ãdem-bi-sakdsã vɩɩmd wakat sẽn-kõn-sa tẽng zug Arzãnẽ. (Yɩɩl Sõamyã 37:29) A Poll gʋlsame: “Wẽnnaam kãabg fãa yaa n-ye Kirist maasem yĩnga.” (2 Korẽnt dãmba 1:20) Yaa sɩd tɩ kũumã “rɩɩ naam wa rĩma.” (Rom dãmba 5:17, NW) Yao-n-dɛɛkã kõta Wẽnnaam yẽbgr t’a na n yiis ‘yaoolem bɛ’ kãngã. (1 Korẽnt dãmba 15:26; Wilgri 21:4) A Zezi yao-n-dɛɛkã tõe n nafa neb nins sẽn ki wã menga. A Zezi yeelame: “Wakat watame tɩ b rãmb nins fãa sẽn be tẽegr yaad pʋsẽ wã na n wʋm a [Zezi] koɛɛgã n yi.”—Zã 5:28, 29, NW; 1 Korẽnt dãmba 15:20-22.

18. Bi-wẽns bʋs la yel-wẽndã ra tall ninsaalbã zutu, la wãn-wãn la b na n yiis-a Wẽnnaam dũni paalgã pʋgẽ?

¹⁸ Tags-y n ges sũ-noog kãseng ning d sẽn na n paam vɩɩm buud ning b sẽn da rat t’a yɩ wã, yɩɩr ning sẽn zɩsgd tõnd rũndã wã sã n kaẽ! Yel-wẽndã waa n sãama yɛlã tõnd ne Wẽnnaam sʋk yembo, la yaa ne tõnd mensã yam-tagsgo, d sũy la d yĩnsi. Baasg zãnga, Biiblã kãabdame tɩ Wẽnnaam dũni paalgã pʋgẽ, “tẽnga ned ba a ye ka na n le yeel t’a ka laafɩ ye.” N-yẽe, yĩngã la yĩn-sidgã bãas pa na n leb n nams ãdem-biisã ye. Bõe yĩnga? A Ezai leokdame: “Nebã sẽn be tẽngã pʋgẽ wã na n paama b yel-wẽna sugri.”—Ezai 33:24, NW.

Yao-n-dɛɛkã: Nonglem pukri

19. Wãn-wãn la tõnd yembr-yembrã segd n wilg d sakr ne Kirist yao-n-dɛɛkã ne d tʋʋmã?

¹⁹ Nonglmã tusa a Zeova t’a tʋm a Biribl nongrã. (Rom dãmba 5:8; 1 Zã 4:9) Yaa nonglmã n tus a Zezi me t’a ‘ki neba fãa yĩnga.’ (Hebre dãmba 2:9; Zã 15:13) Yaa ne bʋʋm sẽn zems la a Poll gʋls woto: “Kirist nonglem n so tõndo . . . Bãmb kii neba fãa yĩnga, tɩ neb nins sẽn vɩ wã kõn vɩ b mens yĩng yɛs ye, la b na vɩ sẽn ki-a bãmb yĩng n yaool n vʋʋga yĩnga.” (2 Korẽnt dãmba 5:14, 15) Tõnd sã n nand a Zezi sẽn maan bũmb ning tõnd yĩngã, d na n wilga d sakr ne d tʋʋmã. Baasgo, yao-n-dɛɛkã kɩtdame tɩ d tõe n paam fãagr ne kũum! Sɩd-sɩda, d pa rat n wilg ne d tʋʋm tɩ d geta a Zezi maoongã wala bõn-zaalg ye.—Hebre dãmba 10:29.

20. Manesem kẽer bʋs d sẽn tõe n tũ a Zezi “goama” la bʋse?

²⁰ Wãn-wãn la d tõe n wilg naneb ne d sũur fãa ne yao-n-dɛɛkã? Sẽn deng a yõkrã bilf bala a Zezi yeelame: “Ned sã n nong maam, a na n saka mam goama.” (Zã 14:23) Noor ning a Zezi sẽn kõ tɩ d kẽes d mens n pids tẽn-tʋmd kãngã ne yẽesmã bee a “goama” sʋka: “Bɩ y kẽng n maan neba buud fãa tɩ b yɩ mam karem-biisi n lis bãmb[a].” (Matɩe 28:19) Sak a Zezi wã me baoodame tɩ d wilg nonglem ne d tẽeb saam-biisã.—Zã 13:34, 35.

21. Bõe yĩng tɩ d segd n zĩnd kɛlgdbã sʋk Tẽegrẽ wã tʋʋl-nif kiuug pipi daarã?

²¹ Manesem sẽn be rasãnd n yɩɩdã a yembr d sẽn tõe n tũnug n wilg d naneb ne yao-n-dɛɛkã yaa d sẽn na n kẽng Kirist kũumã Tẽegre, sẽn na n zĩnd tʋʋl-nif kiuug pipi daar rõanda wã.a Rẽ me bee a Zezi “goamã” sʋka, bala a sẽn da waa n lugend tẽegr kãngã wã, a Zezi kõo a karen-biisã noor woto: “Ket-y n maand woto n tẽegd mam yelle.” (Luk 22:19, NW ) Ne tõnd sẽn na n kẽng yel-kãngã sẽn tar yõod n yɩɩdẽ wã, la ne d sẽn na n tũ Kirist sẽn kõ noy ninsã neerã, d na n wilga d sard rɩkr sẽn pa vigsd t’a Zezi yao-n-dɛɛkã yaa Wẽnnaam fãagrã sore. Sɩd-sɩda, “fãagr ka be ne ned a to ye.”—Tʋʋma 4:12.

[Footnotes]

Y tõe n tẽegame bɩ?

◻ Bõe yĩng tɩ ninsaalbã pa tõe n maan paasg b yel-wẽnã yĩnga?

◻ Wãn-wãn la a Zezi yaa “yao-n-dɛɛk sẽn zems[e]”?

◻ Wãn-wãn la a Zezi tũnug ne sor ning a sẽn tar n na n paam ninsaal vɩɩm sẽn zems zãngã tɩ naf tõndo?

◻ Bark bʋs la ãdem-biisã paamd Kirist yao-n-dɛɛkã yĩnga?

[Picture on page 5]

Ra yaa ninsaal sẽn zems zãng bala, sẽn zem a Ãdem, n da tõe n kɩt tɩ tɩrlmã balãns peesg kɩls n zemse

[Picture on page 6]

A Zezi sẽn da tar sor n na n paam ninsaal vɩɩm sẽn zems zãngã yĩnga, a kũumã ra yaa maoongo