Nonglmã sor pa kongd abada
“Bɩ y kell n baood kũun sẽn yaa kãsems n yɩɩda. La m yaool n wilgd-y-la sor sẽn yaa kãseng n yɩɩda.”—1 KORẼNT DÃMBA 12:31, NW.
1-3. a) Wãn-wãn la zãms n wilg nonglmã wõnd buud-gom-zẽng zãmsg wʋsgo? b) Yel-bʋs n tõe n kɩt tɩ zãms n wilg nonglem yaa tʋʋm-toog menga?
YÃMB zoe n makame n zãms buud-gom-zẽng bɩ? D sẽn tõe n yeel bala, yaa tʋʋm-toog menga! Yaa sɩd tɩ biig tõe n zãmsa buud-gom-zẽnga, a sã n kɛlgd-a bala. Yaa wa a kalkõta fõogda gom-biisã rãamd la b võyã, tɩ rẽ kɩt tɩ pa yãt n kaoos la bi-bilfã gomd-a sõma, tɩ tõe tɩ yaa wakat fãa meng ye. Pa woto ne kãsembã ye. D gẽesda buud-gom-zẽngã gom-biis võor sebr n yɩlemdẽ, sẽn na yɩl n bãng gom-yẽg kẽer buud-gom-zẽngẽ bala. La, tar-n-tarẽ, la ne gom n minima, d sɩngdame n tagsd buud-gom-zẽngã pʋgẽ la d gomd-a nana-nana n yɩɩda.
2 Zãms n wilg nonglem wõnda buud-gom-zẽng zãmsg wʋsgo. Yaa sɩd tɩ Wẽnnaam zʋgd kãngã bilf bee ninsaalbẽ wã. (Sɩngre 1:27; mak-y ne 1 Zã 4:8.) Baasg zãnga, wilg nonglem baooda modgr wʋsgo, sẽn yɩɩd fãa rũndã-rũndã, sasa ning rog-ne nonglmã sẽn paood wʋsg woto wã. (2 Tɩmotɩ 3:1-5) Wakat ninga yaa woto zakã pʋgẽ menga. N-yẽe, neb wʋsg rogda zak sẽn tar toom pʋgẽ, tɩ nonglem goam yaa kar-kar be, bɩ ka be meng ye. (Efɛɛz rãmba 4:29-31; 6:4) Rẽnd wãn-wãn la d tõe n zãms n wilg nonglem, baa d sã n yãt-a kar-kare?
3 Biiblã tõe n sõngame. Pipi Korẽnt dãmba 13:4-8 pʋgẽ, a Poll pa wilgd nonglmã sẽn ya a soab bal ye, la a bilgda nonglmã buk kãngã sẽn yɩɩd fãa wã sẽn tʋmd to-to. Verse kãensã vaeesg na n sõnga tõnd tɩ d wʋm Wẽnnaam zʋgd kãngã halhaalã võore, la a segl-d sõma n paas tɩ d puk-a. Bɩ d ges nonglem ning a Poll sẽn bilgã nens a wãna. D na n sigl-b-la yaleng-yaleng tɩ zems ne sul-kãensã b tãabã: tõnd sẽn nong n tar tʋʋm manesem ninga, rẽ poore, sẽn yaa takɩ n yɩɩd yaa tõnd manesmã ne neb a taabã, la sẽn na n baase, yaa tõnd tõog-toogã.
Nonglmã sõngda tõnd tɩ d tõog wuk-m-menga
4. Biiblã kõta yam-vẽenem bʋg sũ-kiirã wɛɛngẽ?
4 A pipi goamã sẽn tɩ loe ne nonglmã poore, a Poll gʋlsa Korẽnt dãmbã tɩ: “Nonglem ka maand sũ-kiir ye.” (1 Korẽnt dãmba 13:4) Sũ-kiir tõeeme n puk sũ-pa-noom sẽn naag ne tʋlsem wẽng ne neb a taabã tarem bɩ b sẽn tõog n pidsã yĩnga. Sũ-kiir a woto sãamda ned yĩngã wɛɛngẽ, yĩn-sidgã la tẽebã wɛɛngẽ.—Yelbũna 14:30, NW; Rom dãmba 13:13; Zak 3:14-16.
5. Wãn-wãn la nonglmã tõe n sõng-d tɩ d tõog sũ-kiirã, sã n wõnd b pʋɩɩ teokaratik zu-noog n gãng tõndo?
5 Rẽ wã yĩngã, bɩ y sʋk y mense: ‘M lebgda sũ-ki-neda, sã n wõnd b pʋɩɩ teokaratik zu-noog n gãng maam bɩ?’ Leokrã sã n yaa n-yẽe, bɩ y ra koms raood ye. Biibl gʋlsd a Zak tẽegda tõnd tɩ “sũ-kiir tʋlsem” bee ninsaalbã fãa sẽn pa zems zãngã nengẽ. (Zak 4:5, NW ) Nonglem y saam-biigã yĩng tõe n sõng-y lame tɩ y lebs n lugl y kɩls tɩ zemsã. A tõe n kɩtame tɩ y kɩdem ne neb nins sẽn kɩdemdã la y ra ges rẽ wala bũmb sẽn beegd yãmb mengã, ned a to sã n paam bark bɩ pẽgr ye.—Mak-y ne 1 Sãmwɛll 18:7-9.
6. Yell sẽn yaa dem-dem bʋg n zĩnd yʋʋm kob-yendẽ Korẽnt tigengã pʋgẽ?
6 A Poll paasdame tɩ nonglem “ka pẽgd a meng ye, la a ka wukd a meng ye.” (1 Korẽnt dãmba 13:4) D sã n tar minim bɩ tõogo, d pa segd n wilg d mens ne rẽ ye. Vẽenega, woto ra yaa zu-loɛɛg ne roap kẽer sẽn da tar mag-bɛd sẽn da soos n kẽ pĩnd Korẽnt tigengẽ wã. Tõe tɩ yaa b sẽn da tar tõod sẽn yɩɩd b taabã, tagsa wã wilgr pʋgẽ, bɩ yɛlã maan tɩ yɩ sõma n yɩɩgã pʋgẽ yĩnga. Tõe tɩ b sẽn da takd nebã yam n sik b mens zutã kɩtame n paas tɩ tigengã welg sul-sula. (1 Korẽnt dãmba 3:3, 4; 2 Korẽnt dãmba 12:20) Yellã lebga dem-dem hal n kɩt tɩ yɩ tɩlae ne a Poll t’a leng Korẽnt dãmbã tɩ b “sakda yalemba,” a Poll sẽn bilg ne sãbgr goam tɩ “tʋm-tʋmdb kãsemsa.”—2 Korẽnt dãmba 11:5, 19, 20.
7, 8. Tik-y Biiblã zug n wilg d sẽn tõe to-to n dɩk tõod nins d sẽn tarã n kɩt tɩ zems-n-taarã paase.
7 Bũmb sẽn wõnd woto tõe n puka rũndã-rũndã. Wala makre, kẽer tõe n datame n wuk b mens ne b sẽn pidsd bũmb ning ministɛɛrã pʋgẽ bɩ b zu-noodã Wẽnnaam siglgã pʋgẽ yĩnga. Baa tõnd sã n sɩd tar minim bɩ tõog zall neb a taabã sẽn pa tar tigengã pʋgẽ, rẽ kõta tõnd sor tɩ d wuk d mens bɩ? Sẽn yɩɩd fãa, d segd n tũnuga ne tõog fãa d sẽn tar n kɩt tɩ zems-n-taarã paase, pa tõnd mengã zẽkr paasg yĩng ye.—Matɩe 23:12; 1 Pɛɛr 5:6.
8 A Poll gʋlsame tɩ baa ne tigeng sẽn tar neb wʋsgã, “Wẽnnaam maana yĩnga tɩ zemse.” (1 Korẽnt dãmba 12:19-26) Gerɛk gom-biig ning b sẽn lebg ne ‘maan tɩ zemsã’ rat n yeelame tɩ naagr sẽn maan tɩ zemse, wala gʋlem gẽdengo. Woto, tigeng pʋgẽ, ned ba a ye pa segd n wuk a meng a tõod yĩnga, la a mak n soog neb a taabã ye. Wuk-m-mengã la rat-taoorã pa tar a zĩig Wẽnnaam siglgã pʋgẽ ye.—Yelbũna 16:19; 1 Korẽnt dãmba 14:12; 1 Pɛɛr 5:2, 3.
9. Makr bʋs sẽn yaa keoogr la Biiblã kõt sẽn tɩ loe ne neb sẽn da baood b mens ratem?
9 Nonglem “ka baood a meng sõngr bal ye.” (1 Korẽnt dãmba 13:5) Ned sẽn tar nonglem pa lɛgend neb a taabã n paam a sẽn datã ye. Biiblã tara magsa sẽn yaa keoogr dẽ wɛɛngẽ. Wala makre: D karemda a Dalila, a Zezabɛll la a Atali sẽn yaa pagb sẽn lɛgl neb a taabã b mens rat-m-yembr daab yĩnga wɛɛngẽ. (Bʋkaoodba 16:16; 1 Rĩm dãmba 21:25; 2 Kɩbaya 22:10-12) Rĩm a Davɩɩd biribl a Absalom me maana woto. A ra pẽnegda neb nins sẽn da wat Zerizalɛm bʋʋdã yĩngã, la ne sɩlem sẽn solge, a ra yetame tɩ rĩmã bʋ-kaoodb sull pa wilgd ratem sɩd-sɩd ne b zu-loeesã ye. Rẽ poore, a togsa vẽeneg-vẽeneg tɩ bʋ-kaoorã sull sẽn sɩd rat ra yaa rao sẽn tar nonglem wa yẽ! (2 Sãmwɛll 15:2-4) Yaa sɩd tɩ sẽn da pak a Absalom pa b sẽn da namsd-b rãmbã ye, la ra yaa yẽ mengã bala. A sẽn tʋmd wala rĩm a toore, a gõdga neb wʋsg sũyã. La wakat n zĩnd t’a Absalom yɛlã sãam wʋsgo. A kũumẽ wã, b ra pa ges meng t’a zemsa ne mumb sõma ye.—2 Sãmwɛll 18:6-17.
10. Wãn-wãn la d tõe n wilg tɩ neb a taabã ratem pak-d lame?
10 Woto yaa keoogr n kõ kiris-nebã rũndã-rũndã. D yaa rao tɩ d yaa pag me, tõeeme tɩ d tara tõod sẽn kɩtd tɩ b sak n deeg d sẽn yetã. Tõeeme tɩ d paamdame tɩ b pidsd d raabã nana-nana, n yãmb sõsg bɩ n pẽdgd neb nins tagsg sẽn yaa toorã. Baasg zãnga, tõnd sã n sɩd tar nonglem, d na n tagsa neb a taabã ratem yelle. (Filip rãmba 2:2-4) D pa na n tũnug ne neb a taabã n naf tɩ pa zemse, bɩ d wa ne tagsa sẽn tar sãmb-sãmbe, tõnd minimã bɩ d yasrã Wẽnnaam siglgã pʋgẽ yĩnga, wala sã n yaa tõnd tagsa wã bal n zems kelgr ye. Walla tɩ yɩ woto, d na n tẽega Biiblã yel-bũn-kãngã: “Tɩtaam n lʋɩt taoor tɩ sãoong pʋgda. La wuk-m-meng n lʋɩt taoor tɩ lʋɩɩs pʋgda.”—Yelbũna 16:18.
Nonglem wata ne laafɩ zems-n-taare
11. a) Wãn-wãn la d tõe n wilg nonglem sẽn yaa sõmblem la maan-tɩ-zemsã me? b) Wãn-wãn la d tõe n wilg tɩ d pa maand sũ-noog ne wẽnga?
11 A Poll gʋlsame me tɩ nonglem tara “sõmblem” la t’a “pa tar manesem sẽn pa zems ye.” (1 Korẽnt dãmba 13:4, 5, NW ) N-yẽe, nonglmã na n kɩtame tɩ d ra tall toom, rẽgd bɩ paoogr manesem ye. Walla tɩ yɩ woto, d na n talla naneb ne neb a taabã yĩn-sidga. Wala makre, ned sẽn tar nonglem na n laka a meng n da maan yɛl sẽn na n nams neb a taabã sũur-kaset ye. (Mak-y ne 1 Korẽnt dãmba 8:13.) Nonglem “ka maand sũ-noog ne wẽng ye, a maanda sũ-noog ne sɩda.” (1 Korẽnt dãmba 13:6) Tõnd sã n nong a Zeova noorã, d pa na n ges raglmã faag-faag bɩ n deem ne yɛl Wẽnnaam sẽn kis ye. (Yɩɩl Sõamyã 119:97) Nonglmã na n sõnga tõnd tɩ d paam sũ-noog yɛl sẽn kengd tẽebo, la pa yɛl sẽn sãamd pʋsẽ ye.—Rom dãmba 15:2; 1 Korẽnt dãmba 10:23, 24; 14:26.
12, 13. a) D segd n talla manesem bʋgo, ned sã n beeg tõndo? b) Sõdg-y Biiblã magsa sẽn wilgd tɩ baa sũ-yikr sẽn zems tõe n tus-d lame tɩ d tʋm ne yalemdo.
12 A Poll gʋlsame tɩ nonglem “pa kãbd a sũur ye” (pa yɩt tao-tao n yik a sũur ye,” Phillips). (1 Korẽnt dãmba 13:5, NW ) Bũmb sẽn be, yaa sẽn zems bal ne tõnd sẽn yaa ninsaalb sẽn pa zems zãngã tɩ d sãam d sũur bɩ d yik d sũuri, ned sã n beeg-do. Baasg zãnga, ra na n yɩɩ tudgr tɩ d tall sũ-kẽk sẽn kaoosde, bɩ d ket n be sũ-yikr pʋgẽ. (Yɩɩl Sõamyã 4:4, NW; Efɛɛz rãmba 4:26) D sã n pa yõk d mens sũ-yikr sẽn zems taoor menga, a tõe n kɩtame tɩ d tʋm ne yalemdo, la a Zeova tõe n dɩka rẽ taalã n dogl tõnd zugu.—Sɩngre 34:1-31; 49:5-7; Sõdbo 12:3; 20:10-12; Yɩɩl Sõamyã 106:32, 33.
13 Kẽer basame tɩ neb a taabã pa-zems-zãng kɩt tɩ b rɩk sard tɩ b kõn wa kiris-neb tigissẽ wã bɩ n kẽes b mens ministɛɛrã pʋgẽ ye. Pĩndã bãmb wʋsg maoo ne b pãng tɛk tẽebã yĩnga, tõe tɩ b tõoga toog zak pʋgẽ kɩɩsgã, tʋmd-n-taasã yaalg bɩ bũmb sẽn wõnd woto yĩnga. B tõoga toog ne bõn-gɩdgds kãensã, bala b ges-b-la wala magsg sẽn wat burkĩndlmã zugu, la b bee bʋʋm. La bõe n maande, kiris-nin-taag sã n yeel bɩ a maan bũmb sẽn pa nonglem tʋʋmde? Rẽ me pa makr sẽn wa burkĩndlmã zug sɩda? Sɩd yaa woto, bala d sã n kell n pa sũ-yikr pʋgẽ, d tõe n “kõo Sʋɩtãanã weer[e].”—Efɛɛz rãmba 4:27.
14, 15. a) Gomd ning sẽn yaa: “Tagsd wẽngã b sẽn maan-a wã yell” rat n yeelame tɩ bõe? b) Wãn-wãn la d tõe n dɩk a Zeova togs-n-taar n yɩ sugr kõta?
14 Yaa ne bʋʋm la a Poll paasd tɩ nonglmã “pa tagsd wẽngã b sẽn maan-a wã yell ye.” (1 Korẽnt dãmba 13:5, NW ) Ka wã a tũnugda ne goam sõdb yĩnga, tɩ wilgd vẽeneg tɩ yaa beegr b sẽn gʋls n tẽegdẽ, sẽn na yɩl n da yĩm-a ye. Yaa nonglem tʋʋmd tɩ d gʋls gomd bɩ tʋʋmd sẽn zabd n tẽegd wakat fãa, tɩ yaa wala d sã n dat n lebg n ges-a-la beoog-daar sɩda? Ad d sũy sɩd yaa noog a Zeova sẽn pa feesd tõnd woto tɩ ninbãan-zoeer kaẽ wã! (Yɩɩl Sõamyã 130:3) N-yẽe, tõnd sã n tek yam n kos sugri, a yẽesda d kongrã.—Tʋʋma 3:19, NW.
15 D tõe n dɩka a Zeova togs-n-taar dẽ wɛɛngẽ. D pa segd n wʋm toogã tɩ looge, sã n wõnd ned n beeg tõnd ye. Tõnd sã n yɩt tao-tao n yik d sũuri, d tõe n maana d mengã wẽng wʋsg n yɩɩg ned ning sẽn beeg tõndã sẽn tõe n maana. (Koɛɛg Soaba 7:9, 22) Walla tɩ yɩ woto, d segd n tẽegame tɩ nonglem “tẽeda bũmb fãa.” (1 Korẽnt dãmba 13:7) Yaa sɩd tɩ tõnd ned ba a yembr pa rat n yɩ ned b sẽn tudgd nana-nana ye. La d pa rat me n maan sãmb-sãmb ne d saam-biisã yam-tusdi ye. Sã n tõe fãa, bɩ d tags tɩ yaa yam-sõng n tus ned a to wã.—Kolos rãmba 3:13, NW.
Nonglmã sõngda tõnd tɩ d tõog toogo
16. Yel-bʋs pʋsẽ la nonglmã tõe n sõng tõnd tɩ d yɩ sũ-mar soaba?
16 Rẽ, a Poll yeta tõnd tɩ “nonglem maanda sũ-mare.” (1 Korẽnt dãmba 13:4) A kɩtdame tɩ d tõog toog yel-tood pʋsẽ, tõe tɩ yaa wakat sẽn wogl zugu. Wala makre, yʋʋm wʋsg pʋgẽ, kiris-neb wʋsg vɩɩmda zags sẽn welg tũudmã wɛɛngẽ. A taab yaa rakõap tɩ pa tũ ne b raab ye, la yaa b sẽn pa tõog n yã kẽed-n-taag sẽn zems “Soaalã pʋgẽ” wã yĩnga. (1 Korẽnt dãmba 7:39, NW; 2 Korẽnt dãmba 6:14) Sẽn paase, neb n be n maood ne yĩns ka laafɩ sẽn komsde. (Galat dãmba 4:13, 14; Filip rãmba 2:25-30) Sɩd-sɩda, yɛl siglg kãngã sẽn pa zems zãngã pʋgẽ, ned ba a yembr pa be tɩ tõog toog pa tɩlae a vɩɩmã pʋgẽ ye.—Matɩe 10:22; Zak 1:12.
17. Bõe n na n sõng tõnd tɩ d tõog toog bũmb fãa pʋgẽ?
17 A Poll kõta tõnd bas-m-yam tɩ nonglem “maanda sugr ne bũmb fãa, . . . a gũuda a tẽeb pidsg ne bũmb fãa, la a tõe n tõoga toog fãa pʋgẽ.” (1 Korẽnt dãmba 13:7) Nonglem a Zeova yĩnga na n kɩtame tɩ d tõog toog yell fãa pʋgẽ tɩrlmã yĩnga. (Matɩe 16:24; 1 Korẽnt dãmba 10:13) D pa baood n na n nams d tẽebã yĩng ye. Sẽn yaa lebende, tõnd bõn-datlã yaa d vɩɩmd laafɩ la bãan pʋgẽ. (Rom dãmba 12:18; 1 Tesalonik rãmba 4:11, 12) Baasg zãnga, makr sã n wa tõnd tẽebã zugu, ne sũ-noogo, d tõogda toog b pʋsẽ wala bũmb sẽn be kiris-neb karenbiilmã sʋka. (Luk 14:28-33) D sẽn tõogd toogã sasa, d modgdame n na n tall yam-sõngo, n saagdẽ tɩ yɛlã na n wa baasa sõma n yɩɩd yel-toodã tẽn-sʋka.
18. Wãn-wãn la tõog toogã yaa tɩlae baa nana sasa?
18 Pa toogã pʋgẽ bal la d segd n tõog toog ye. Wakat ninga, tõog toog rat n yeelame bal tɩ ket n paad sor zugu, tɩ ket n kẽngd taoor sor zugu, yel-toodã sã n bee masã tɩ b pa beẽ me. Tẽeb yɛl sẽn ket n maand sõma wakat fãa bee tõog toogã pʋgẽ. Wala makre, yãmb kẽesda y meng sõma ministɛɛrẽ wã wala sẽn zems ne yãmb vɩɩmã yɛl bɩ? Yãmb karemdame la y bʋgsd Wẽnnaam Gomdã zugu, la y sõsd ne y yĩngr Ba wã pʋʋsg pʋgẽ bɩ? Yãmb kẽngda tigengã tigiss wakat fãa, la y rɩta raool taaba ne y tẽed-n-taasã nafr bɩ? Sã n yaa woto, yaa nana sasa tɩ yaa gudgr sasa me, y tõogda toogo. Ra bas-y ye, “tɩ bõe, wakat sã n ta tõnd na wʋk yaoodo tõnd sã n ka yɛ ye.”—Galat dãmba 6:9.
Nonglmã yaa “sor sẽn yaa kãseng n yɩɩda”
19. Wãn-wãn la nonglmã yaa “sor sẽn yaa kãseng n yɩɩda”?
19 A Poll gom n tadgame n togs tɩ d segd n wilga nonglmã, n bool Wẽnnaam zʋgd kãngã tɩ “sor sẽn yaa kãseng n yɩɩda.” (1 Korẽnt dãmba 12:31, NW ) Wãn-wãn la a yaa “kãseng n yɩɩda”? Be neere, a Poll ra sõdga vʋʋsmã kũun sẽn da wɛ yʋʋm kob-yendẽ kiris-nebã sʋkã paalem. Kẽer da paama tõog n na n togs bãngr-goama, a taab ra paama pãng n na n sãoog bãase, wʋsg ra tara tõog n na n gom gom-zẽna. Ad sɩd yɩɩ kũun kãsems menga! Baasg zãnga, a Poll yeela Korẽnt dãmbã: “Mam sã n gom ne neba goama la malɛk rãmb goama n ka tar nonglem, mam lebga wa waag sẽn wẽed zaalem la wa kenf sẽn wẽed zaalem. La mam sã n tar bãngr-goama kũuni, la bãng sãmbd fãa võyã la paam yam-vẽnegr fãa, la mam sã n tar tẽeb fãa hali n tõe n serg tãense, mam sã n ka tar nonglem mam yaa zaalem.” (1 Korẽnt dãmba 13:1, 2) N-yẽe, baa tʋʋm sẽn da tõe n tall yõod lebgda ‘tʋʋm-kɩɩmse,’ yam ning sẽn tus tɩ b maan-bã sã n pa nonglem Wẽnnaam la f to yĩnga.—Hebre dãmba 6:1, NW.
20. Bõe yĩng tɩ yaa tɩlae tɩ d ket n modgdẽ, d sã n dat n bɩɩs nonglmã?
20 A Zezi kõta tõnd bʋʋm a to sẽn kɩt tɩ d segd n bɩɩs nonglmã sẽn yaa Wẽnnaam zʋgdã. A yeelame: “Yãmb sã n nong taaba, neba fãa na n bãngame tɩ yãmb yaa mam karen-biisi.” (Zã 13:35) Gom-biig ning sẽn yaa “sã n” wã basda kiris-ned fãa t’a wilgi, a sã n na n zãms n wilga nonglem bɩ a pa na n maan woto. Sẽn yɩɩd fãa, zĩnd tẽn-sãangẽ bal a yen-yen pa na n tus-d tɩ d zãms n gom a buud-gomdã ye. Tigissẽ wã kẽngr bal Rĩung Roog bɩ lagem ne kiris-nin-taas pa zãmsd tõnd nana-nana tɩ d wilg nonglem me ye. “Buud-gomd” kãng zãmsgã baoodame tɩ d ket n modgdẽ.
21, 22. a) D manesem segd n yɩɩ wãn-wãna, d sã n pa tũud nonglmã nens kẽer a Poll sẽn sõs b zutã? b) Wãn-wãn la b tõe n yeel tɩ “nonglem pa kongd abada”?
21 Wakat ninga y pa na n tũ nonglmã nens sãnda a Poll sẽn sõs b zutã ye. La ra koms-y raood ye. Maag-y y yĩng n ket n modgdẽ. Ket-y n vaeesd Biiblã la y tũ a noyã y manesmã ne neb a taabã pʋsẽ. Ra tol-y n yĩm mak-sõng ning a Zeova mengã sẽn kõt tõndã ye. A Poll sagla Efɛɛz rãmbã: “Bɩ yãmb maan taab neere, la paam sũ-bʋgsem, la kõ taab sugri wa Wẽnnaam sẽn kõ yãmb sugr Kirist yĩngã.”—Efɛɛz rãmba 4:32.
22 Wala zãms n gom buud-gom-zẽng sẽn wat n baas n yɩ nana n yɩɩdã, sã n beẽ-beẽ, y na n mikame tɩ nonglmã wilgr na n yɩɩ nana n yɩɩda. A Poll kõta tõnd bas-m-yam tɩ “nonglem pa kongd abada ye.” (1 Korẽnt dãmba 13:8, NW ) Sẽn yaa lebend ne vʋʋsmã kũum sẽn yaa yel-soalmã, nonglem pa na n tol n sa ye. Woto yĩng bɩ y ket n zãmsd n pukd Wẽnnaam zʋgd kãngã. Wala a Poll sẽn boond-a to-to wã, yaa “sor sẽn yaa kãseng n yɩɩda.”
Y tõe n wilga b võor bɩ?
◻ Wãn-wãn la nonglmã tõe n sõng tõnd tɩ d tõog wuk-m-mengã?
◻ Zĩ-bʋs la nonglmã tõe n sõng tõnd tɩ d paas laafɩ wã tigengã pʋgẽ?
◻ Wãn-wãn la nonglmã tõe n sõng tõnd tɩ d tõog toogo?
◻ Wãn-wãn la nonglmã yaa “sor sẽn yaa kãseng n yɩɩda”?
[Picture on page 9]
Nonglmã na n sõnga tõnd tɩ d bas d tẽed-n-taasã beegr taale
[Picture on page 13]
Tõog-toogã rat n yeelame tɩ d ket n kẽngd taoor ne d teokaratik yɛlã