Yam sebr sẽn tar koɛɛg tõnd wakatã yĩnga

“KORG sẽn pid ne yam n são korg sẽn pid ne bizãana,” woto la tẽn-kʋdem wẽndẽ zak soab a Zoob sẽn da yaa arzɛgs rãmb nins sẽn yɩɩdã a yembr yẽ wakatã tɩ sãmbg ka be wã yeel-yã. (Zoob 1:3; 28:18, NW; 42:12) Sɩd-sɩda, yam n são yĩngã laog zĩig sẽn zãre, sã n wa yaa sõng ned t’a tõog a vɩɩmã pʋgẽ wã wɛɛngẽ. Rĩm a Salomo sẽn yaa yam soabã yeelame: “Bala yam bee koglg yĩng wa ligd sẽn be koglg yĩngã; la bãngr sẽn be nafr n yɩɩdã yaa tɩ yam kogenda neb nins sẽn tar-a wã vɩɩm.” (Koɛɛg Soaba 7:12, NW )

La yɛ la d tõe n yã yam kãngã rũndã-rũndã? Nebã baooda zʋrnall gʋlsdb sẽn yaa sagendba, pisikolog rãmba, pisikiatr dãmb la baa koafɛɛr dãmb ne tagsi sofɛɛr dãmb sõngr ne b zu-loeesã. La mitb sõor ka tɛk sakame n na n kõ sagls yell fãa zug la bala, n deeg ligd sõma. La naoor wʋsgo, “yam” goam a woto baasa ne sũ-sãamse, la yel-beed meng bala. La wãn to la d tõe n paam yam hakɩkã?

A Zezi Kirist sẽn da tar yam-vẽenem kãseng ninsaalbã yɛl pʋsẽ wã togsa woto vugri: “Yam soab tʋʋma n wilgd t’a tara yam.” (Matɩe 11:19) Bɩ d ges yɛl sãnda sẽn wɛ nebã vɩɩm pʋgẽ n bãng yam goam nins sẽn sɩd sõng-bã, la sẽn tall yõod ne bãmb n yɩɩd ‘korg sẽn pid ne bizãana.’ Yãmb me tõe n yãa “yam korg” kãngã la y rɩ a nafre.

Yãmb namsda yam-ka-m-meng yĩng bɩ?

“Yʋʋm kob-gĩn 20 soabã sã n kẽe yɩɩrã zãmaan pʋgẽ, a saabã kõta kaset ne yam-ka-m-mengã zãmaan sɩngre,” woto la Lõndr International Herald Tribune yeta. A paasdame tɩ “pipi vaeesg b sẽn maan tẽn-tẽnsã pʋsẽ sẽn tɩ loe ne yam-ka-m-meng kãsengã wilgdame tɩ yellã tara paasg wakat fãa dũniyã gill zugu. Tẽns toɛ-toɛyẽ wala Taiwan, Libã la Nuvɛll Zelãnde, zãmaan sẽn pʋgd fãa pãngã lebgd n booga bãagã taoore.” B yeelame tɩ neb nins sẽn dog yʋʋmd 1955 poorã tara zu-beed naoor a tãab n na n nams ne yam-ka-m-meng sẽn pa reem yelle, n yɩɩd b yaab rãmbã.

Yɩɩ woto ne a Tomoe, sẽn nams ne yam-ka-m-meng sẽn yaa kãseng la sẽn dɩk a rasem wʋsg sẽn yɩɩdã n pa a gãagẽ wã. A sẽn da pa tõe n ges a yʋʋm a yiib biriblã yell yĩnga, a yik n leba a roagdbã zakẽ. Yak-poak sẽn da tar bipugl yʋʋm sẽn yaa yembr ne a Tomoe biriblã yõga zood ne-a tao-tao. A Tomoe sẽn yeel yakã t’a ra tagsdame t’a mengã ka yõod baa-baa wã, yakã wilg-a-la verse sẽn yit sebrẽ. Verse wã ra yetame: “Nif ka tõe n yeel nugu: ‘Mam ka baood fo sõngr ye.’ La zug ka tõe n yeel nao wã: ‘Mam ka baood yãmb sõngr ye.’ Ayo, la yĩnga wila sẽn wẽnd pãng komslem dãmb n yɩɩda tara võore.”a A Tomoe raaga nintãm, a sẽn bãng tɩ ned kam fãa tara a zĩig dũniyã pʋgẽ la a tara yõodã yĩnga.

Yakã yeel-a lame t’a ges sebr ning sẽn tar gom-kãensa wã. A Tomoe gũmsa a zug n sake, baa ne a sẽn da pa tõog n maan bũmb hal tɩ ta wakat kãnga wã, n pa tõog meng n maan kãab-zaalgã. Yakã sõng-a lame me n da a teedo, la a segla rɩɩb ne a Tomoe daar fãa. Ki-yɛng poore, a Tomoe ra yikda yibeoog fãa, n pɛgd futã, n get a roogã yɩlemd yelle, n kẽngd raaga, la a segend dɩɩbã wala zak pag sẽn da na n maanã. A ra segd n tõoga zu-loees wʋsgo, la a yeelame: “M da kɩsa sɩd tɩ m sã n da tũ yam goamã m sẽn yã wã, m da na n yɩɩ sõma.”

A sẽn tũ yam ning a sẽn bãngã, a Tomoe tõoga a yam-ka-m-mengã ray sẽn yɩ libsgã. Masã a Tomoe tʋmda wakat fãa n sõngd neb a taabã tɩ b tũ goam nins sẽn sõng-a t’a mao ne a zu-loeesã. Yam goam kãensã bee seb-kʋdr pʋgẽ sẽn tar koɛɛg nebã fãa yĩng rũndã-rũndã.

Yãmb segda zak pʋgẽ zu-loees bɩ?

Dũniyã gill zugu, kãadmã kaoob tʋʋlem tara paasgo. Zak pʋgẽ zu-loeesã tara paasgo, baa Yaang tẽnsẽ wã, zĩig ning nebã sẽn da zẽkd b zut ne b zagsã neb sẽn da loe ne taab sõma wã. Yɛ la d tõe n yã kãadem sor-wilgr sẽn tar yam sẽn womd biis sõma?

D rɩk makr ne a Shugo la a Mihoko sẽn yaa kẽed-n-taas sẽn da tall kãadem zu-loees ka tɛkã. B ra zabda taab bũmb sẽn pa sek zabr fãa yĩnga. A Shugo ra yaa zɩ-kaeedem soaba, t’a Mihoko ra maand n lebsdẽ, a sɩdã sã n yã kongr a nengẽ fãa. A Mihoko pʋd n tagsa woto: ‘Tõnd pa tõe n zems taab baa fʋɩ zug ye.’

Daar a yembre pag n wa n ges a Mihoko n karem gom-kãensã sẽn yit sebr pʋgẽ t’a kelge: “Yãmb sẽn dat tɩ neba maan yãmb bũmb ningã, bɩ yãmb me maan bãmb boto.”b Baa ne a sẽn da pa wilgd ratem ne tũudmã, a Mihoko sakame n na n zãms sebr ning sẽn tar gom-kãensã wã. A ra ratame t’a zakã pʋgẽ vɩɩm manege. Yaa rẽ n so tɩ b sẽn wa n bool-a t’a kẽng tigisgẽ b sẽn na n sõs sebr gom-zug sẽn yaa: Comment s’assurer une vie de famille heureuse, a Mihoko ne a sɩdã saka ne yamleoogo.c

Tigisgẽ wã, a Shugo yãame tɩ neb nins sẽn be kɛlgdbã sʋkã sɩd ra tũuda bũmb ning b sẽn da zãmsdã, la a yãame tɩ b ra wõnda neb sẽn tar sũ-noogo. A rɩka sard n na n karem sebr ning a pagã sẽn da zãmsdã. Togsg a yembr n nek a ratmã: “Ned ninga sẽn sigsd a sũur tara yam. La ned ninga sũur sẽn yikd tao-tao wilgda a yalemdo.”d Baa ne sẽn dɩk sẽk wʋsg t’a tũ no-kãngã a vɩɩmã pʋgẽ wã, a toeengã bilf-bilfã ra lebga vẽeneg ne neb nins sẽn da pẽ-a wã, t’a pagã be b sʋka.

A sẽn yã a sɩdã toeengã, a Mihoko me sɩngame n tũud bũmb ning a sẽn da zãmsdã. Sẽn yɩɩd fãa, noor a yembr sẽn da kõt sõngr yaa kada: “Da bʋ-y ned bʋʋd ye, tɩ Wẽnnaam da wa bʋ yãmb bʋʋd ye. Tɩ bõe, yãmb sẽn na n bʋ ned bʋʋd bũmb ninga, yãmb na n paama bʋ-kãnga.”e Woto, a Mihoko ne a sɩdã rɩka sard tɩ b na n goma b zʋg-sõma wã zutu, la b ges b sẽn da na n maan to-to n manege, la b ra bao n yã taab pãn-komslem ye. A biisã yɩɩ bõe? A Mihoko tẽrame: “Woto sɩd kõ-m-la sũ-noogo. D maanda woto zaabr dɩɩb fãa. Tõnd yʋʋm a tãab biriblã meng kẽesda a toog sõsgã pʋgẽ. Woto sɩd kõo tõnd kengr menga!”

Zag-kãngã sẽn tũ sagl-sõng ning b sẽn paama, b tõoga zu-loees nins sẽn da rat n sãam b zems-n-taarã tɩ wa lebg yellã. Woto pa tar yõod ne bãmb n yɩɩd bizãan korg sɩda?

Yãmb rat n tõoga y vɩɩmã pʋgẽ bɩ?

Ne neb wʋsg rũndã-rũndã, arzɛgsã kãag n zam n yaa b bõn-datl vɩɩmã pʋgẽ. La Etazĩni omdafɛɛr sẽn yaa rakãagr sẽn dɩk dolaar milyõ kobs n maan kũun neb sẽn be ratem pʋgẽ yeela vugri: “Ligdã bee yamleoog ne neb kẽere, la ned ba a yembr pa tõe n wid naooda a naas wakat yɛng pʋgẽ ye.” Neb nins sẽn sakd n deeg yel-kãngã wã pa waoog ye, la neb nins sẽn basd arzɛgsã pʋgbã sõor paoodame n yɩɩd menga.

A Hitoshi bɩɩ naong pʋgẽ, woto a ra tʋlla wʋsg n yɩ arzɛk soaba. A sẽn yã sam dãmbã sẽn tar nebã n lengdẽ wã a rɩka sard woto: “Yaa ned ning sẽn paam ligd n yɩɩdã la tõogda.” A Hitoshi talla bas-yard ne ligdã pãn-tõog hal t’a tags tɩ b tõe n daa ninsaalb yõy ne-a menga. Sẽn na yɩl n tigis arzɛgs wʋsgo, a kẽesa a meng sõma a põlõmberi wã tʋʋmd pʋgẽ n tʋm yʋʋmdã tõre, hali n pa tol n vʋʋs daar a yembr meng ye. A modgrã fãa pʋgẽ, a Hitoshi pa kaoos la a bãng tɩ yẽ sẽn pʋgd kõntra wã rãmbã, a pa tol n tõe n paam pãng n ta kõntra wã rãmb sẽn kõ yẽ tʋʋmdã ye. Laogã wɛɛngẽ lʋɩɩsã sũ-sãoong la a rabeem da tar-a-la daar fãa.

Rẽ poore, rao n wa a Hitoshi roogã noorẽ n sʋk-a a sã n da miimi t’a Zezi Kirist ra ki a yĩnga. A Hitoshi sẽn da tagsd tɩ ned ba a yembr da pa na n ki ned sẽn yaa wa yẽ wã yĩngã, a ra rat n bãngame, la a sakame n na n ye sõs n paas nindaare. Semen ning sẽn pʋglã, a kelga sõsga, la ling-a lame, a sẽn wʋm saglg ning sẽn yet tɩ d ‘tall nif sẽn get tɩrgã.’ Sõsdã wilgame tɩ nif “sẽn get tɩrga” yaa nif ning sẽn get zĩ-zãrgẽ la tẽebã yɛl n tɩ yɩɩda. Sẽn yaa lebende, nif sẽn yaa “wẽngã,” bɩ sẽn “tar tʋlsem wẽnga” geta nemsã zĩig pʋgẽ tʋlsmã, la a pa get tɩ zãag zĩig ye. Saglg ning sẽn yaa: “Fo paoong sẽn be zĩig ninga, fo sũur me na n zĩnda be” wã, kẽ a sũurã sõma.f Bũmb n be sẽn tar yõod n yɩɩd arzɛgs paoongo! A ra zɩ n wʋm bũmb sẽn wõnd woto ye.

Kẽ-a-la sõma t’a sɩng bũmb ning a sẽn da zãmsdã tũubu. Wall t’a tʋm wʋsg n bao ligdã, a sɩngame n lʋɩɩsd tẽebã yɛl taoor a vɩɩmã pʋgẽ. A rɩka sẽk me n ges a zakã tẽeb yɩ-neer yelle. Wa sẽn zemse, rẽ kɩtame t’a boog sẽk ning a sẽn da rɩkd tʋʋmã zĩigẽ wã, la a nug-tʋʋmdã marsa sõma. Bõe yĩnga?

A sẽn da yaa zab-zabdã a toeemame n lebg nin-bʋgsg la ned sẽn tar zood manesem, a sẽn sak sagls nins b sẽn da kõ-a wã. Sẽn yɩɩd fãa sagl-kãngã kẽ-a-la sõma: “Masã bɩ y bas bõn-kãens fãa sẽn yaa sũ-puugri, kisgri, pʋ-toogo, kãnegre, la gom-dẽgd sẽn yit yãmb noeyã pʋsã. Bɩ y ra yag taab zĩrĩ ye; tɩ bõe, yãmb da basa nin-kʋdga ne a tʋʋma la y yeelg nedemd paalgã, b sẽn maand tɩ lebgd paalg tɩ zems ne Ned ning sẽn naan-a wã wõnegã ne bãngr sẽn yaa takɩ wã maasmã.”g Sagl-kãngã tũub pa kɩt t’a lebg arzɛk soab ye, la a “nedemd paalgã” talla yamleoog sõma ne a raandensã t’a paam tɩ b tall bas-yard ne-a. N-yẽe, yam goamã a sẽn bãngã sõng-a lame t’a kɩt t’a vɩɩmã tõoge. Sã n yaa ne yẽ, b sɩd tara yõod n yɩɩd bizãan bɩ ligd korgo.

Yãmb na n paka korgã bɩ?

Yãmb tõe n bãnga yam korg ning sẽn tall yõod wʋsg woto ne nebã makr nins sẽn loogã pʋsẽ wã bɩ? Yaa yam ning sẽn be Biiblã pʋgẽ wã, sebr ning sẽn be wʋsg n yɩɩd la sẽn tõe n paama nana n yɩɩd tẽngã zugã. Tõe tɩ y tara a yembr bɩ y tõe n paam-a-la nana-nana. Baasg zãnga, wala ned sẽn na n tar korg sẽn pid ne bizãan yõod sẽn yaa wʋsg n pa rɩkd-b n tʋm sẽn pa na n tall yõod wʋsg ne a soabã, woto me, f sẽn na n tar Biiblã bal pa na n tall yõod wʋsg ne-f ye. Bõe yĩng tɩ y pa na n pak korgã, sã n yaa ne makr wɛɛngẽ, la y tũ Biiblã sagls sẽn zems ne wakatã, la y ges a sẽn tõe n sõng-y to-to tɩ y mao ne vɩɩmã zu-loees n tõoge?

B sã n kõ yãmb korg sẽn pid ne bizãana, y pa na n tall mi-beoogo, la y mak n bãng y neer-maandã sẽn ya a soaba, sẽn na yɩl n tõog n pʋʋs-a bark sɩda? Yãmb mi Kõtã sẽn ya a soaba, sã n yaa ne Biiblã wɛɛngẽ?

Biiblã pukda yam ning sẽn be a pʋgẽ wã a sẽn yet tɩ: “Gʋlsg Sõng fãa yaa Wẽnnaam vʋʋsmã n vẽneg tɩ b gʋls la a bee nafr[e].” (2 Tɩmotɩ 3:16, NW ) A yeta tõnd me tɩ “Wẽnnaam goama vɩɩme la a tara pãnga.” (Hebre dãmba 4:12) Yaa rẽ yĩng la sẽn kɩt tɩ yam goam nins sẽn be Biiblã pʋgẽ wã zems ne wakatã la b rɩk-n-tʋm tar yõod ne tõnd rũndã-rũndã wã. A Zeova Kaset rãmbã sũur na n yɩɩ noog tɩ b sõng yãmb tɩ y zãms n bãng Kõt wʋsg soab a Zeova Wẽnnaam wɛɛngẽ, sẽn na yɩl tɩ “korg sẽn pid ne yam[ã]” sẽn be Biiblẽ wã, sẽn yaa yam sebr ning sẽn tar koɛɛg nebã fãa yĩng rũndã-rũndã wã wa naf-yã.

[Footnotes]

[Box/Picture on page 4]

Yam goam sẽn na yɩl n ket n tar d kɩls tɩ zemsã yĩn-sidgã wɛɛngẽ

“Zusoaba, mam soaala, yãmb sã n tẽeg yel-wẽna n ka base, ãnda n na n yalse? La sugr [“hakɩkã,” NW ] bee yãmb nengẽ, tɩ neb tõe n zoe yãmba.”—Yɩɩl Sõamyã 130:3, 4.

“Sũ-noog kɩtdame tɩ ned neng yɩ neere. La ned sũur sã n sãam, a neng gãnemdame.”—Yelbũna 15:13.

“Bɩ f ra yɩ nin-tɩrg wʋsg ye, la f ra yɩ yam soab tɩ loog me ye. Yaa wãn tɩ f sãam f menga?”—Koɛɛg Soaba 7:16.

“Kũun bee barka [“sũ-noog,” NW ] n yɩɩd reegre.”—Tʋʋma 20:35.

“Yãmb sũyã sã n yiki, bɩ y ra maan yel-wẽna ye, la y ra sak tɩ wĩndg lʋɩ tɩ yãmb sũyã ket n ka sig ye.”—Efɛɛz rãmba 4:26.

[Box/Picture on page 5]

Yam goam sẽn wat ne zak pʋgẽ vɩɩm sẽn kõt sũ-noogo

“Yẽsg sã n kaẽ, ned ka tõe n maan bũmb ye. La sagendb wʋsg sẽn beẽ, b tõogdame.”—Yelbũna 15:22.

“Nin-yẽeseng paamda bãngre. Yam soab kelgdame n baood bãngre.”—Yelbũna 18:15.

“B sã n togs goam a wakate, a yaa sõama wa sãnem tʋblondo.”—Yelbũna 25:11.

“Bɩ y maan sũmar ne taaba la y kõ taab sugri, ned sã n tar yell ne a to, a wa Kirist sẽn kõ yãmb sugrã, bɩ yãmb me kõ taab sugr woto. La sẽn paas bõn-kãens fãa, bɩ y maan [“yeelg,” NW ] nonglem sẽn yaa bũmb fãa loɛtg sɩd-sɩdã.”—Kolos rãmba 3:13, 14.

“Woto yĩnga, m ba-bi-nongdse, bɩ y bãng bõn-kãnga. Bɩ ned kam fãa wɩng ne kelgre la a maag ne goama la a maag ne sũ-yikri.”—Zak 1:19.

[Box/Picture on page 6]

Yam goam sẽn na yɩl n tõog vɩɩmã pʋgẽ

“Zusoaba ka nong zãmb kilo ye. Bãmb nonga kilo sẽn yaa sõama.”—Yelbũna 11:1.

“Tɩtaam n lʋɩt taoor tɩ sãoong pʋgda. La wuk-m-meng n lʋɩt taoor tɩ lʋɩɩs pʋgda.”—Yelbũna 16:18.

“Ned sẽn ka tõe n tõog a meng yaa wa tẽng lalg sẽn wã.”—Yelbũna 25:28.

“Ra sak tɩ f sũur yik tao-tao ye. Tɩ bõe, sũ-yikr paada yalemba pʋsẽ.”—Koɛɛg Soaba 7:9.

“Lob f rɩɩb koom zutu; tɩ bõe, nindaare, fo na n leb n paam-a lame.”—Koɛɛg Soaba 11:1.

“Da sak-y tɩ goam sẽn ka sõama yi yãmb noorẽ ye; la weer sã n beẽ bɩ y gom sẽn yaa sõama sõngr yĩnga, t’a zĩnd bark neb nins fãa sẽn wʋmda yĩnga.”—Efɛɛz rãmba 4:29.

[Picture on page 7]

Biiblã zãmsg yaa pipi zĩ-longdg sẽn na yɩl n dɩ ‘korg sẽn pid ne yamã’ nafre