“Yaa Tɩlae Tɩ Bõn-kãens Fãa Zi̇̃ndi”
“A Zezi leoka bãmb yaa: ‘. . . Yaa tɩlae tɩ bõn-kãens fãa zĩndi. La a ka dũniyã sɛɛb nand ye.’ ”—MATƖE 24:4-6.
1. Ne gom-zug bʋg la d segd n wilg ratem?
SÃMBG sẽn ka be, y wilgda ratem ne y vɩɩmã la y beoog-daarã. Rẽ, y segd n wilga ratem me ne gom-zug sẽn nek a C. T. Russell ratem yʋʋmd 1877. A Russell sẽn yẽbg Société Watch Tower kaoosg poorã gʋlsa The Object and Manner of Our Lord’s Return (Tõnd Soaalã lebg-n-wa bõn-datl la a sẽn na n yɩ to-to). Seb-bi-kãngã sẽn tar seb-vã-nens 64 goma a Zezi lebg-n-wa wã bɩ a beoog-daar waoongã yelle. (Zã 14:3) Vugri, a sẽn da waa n be Oliiv tɩɩs Tãngã zugã, tʋm-tʋmdbã maana sʋkr lebg-n-wa kãng zug woto: “Wakat bʋg la bõn-kãensã na n zĩndi, la bõe n na n yɩ fo belmã [bɩ, “waoongo,” sã n yaa ne Wẽnnaam Sebre ne moor lebgrã] la yɛl siglgã baasg bãnde?”—Matɩe 24:3, NW.
2. Bõe yĩng tɩ tagsa sẽn kɩɩsd taab wʋsg sẽn tɩ loe ne a Zezi sẽn deng n togs bũmb ninsã beẽ?
2 Yãmb mii a Zezi leokrã, la y wʋmda a võor bɩ? A bee Evãnzill dãmb a tãab pʋsẽ. Porfesɛɛr a D. A. Carson yeelame: “Biiblã pʋgẽ, sags nins sẽn wa ne mo-yõs võor-wilgdbã sʋkã n yɩɩd Matɩe sak 24 la zĩis nins sẽn wõnd-a wã sẽn be Mark sak 13 la Luk sak 21 wã pa waoog ye.” Rẽ poore a kõo a meng tagsg sẽn yaa ninsaalbã tagsa sẽn kɩɩsd taabã a ye bala. Yaoolem kob-gĩndã sẽnẽ, tagsa a woto wʋsg ra pukda tẽeb kaalem. Neb nins sẽn da wilgd tags-kãensa wã ra yetame t’a Zezi ra zɩ n yeel bũmb ning d sẽn karemd Evãnzill dãmbẽ wã ye, tɩ b golma togsg kãens kaoosg zugẽ, bɩ t’a sẽn deng n togs bũmb ninsã pa pids ye: woto yaa tagsa sẽn yit Biiblã sɛb yel-gẽnesdb nengẽ. Ges-y tɩ võor-wilgd a yembr meng n wilg a Mark Evãnzillã võor n ‘tũnug ne budism mahāyāna filozofi wã zãmsg vẽnegre’!
3. Wãn-wãn la a Zeova Kaset rãmbã na n ges a Zezi bãngr-gomdã?
3 Sẽn yaa lebende, a Zeova Kaset rãmbã sakame tɩ Biiblã yaa sɩd la a zemsa ne bas-yardo, t’a Zezi sẽn togs tʋm-tʋmdb a naasã sẽn da be ne-a Oliiv tɩɩs Tãngã zug rasem a tãab sẽn deng a kũumã be sʋka. A Charles T. Russell wakatã tɛka, Wẽnnaam nin-buiidã paama võor-wʋmb sẽn paas bilf-bilf bãngr-gomd ning a Zezi sẽn kõ be wã zugu. Yaoolem yʋʋm a wãnã pʋsẽ, Gũusg Gasgã waa ne vẽenem meng n paas b tagsgã sẽn tɩ loe ne bãngr-gom-kãngã zugã. Yãmb reega zãms-kãngã bɩ, n ne a pãn-tusdgã y vɩɩmã pʋgẽ bɩ?a Bɩ d lebg n ges-a.
Pidsg sẽn yaa yel-beed n da pẽ
4. Bõe yĩng tɩ tõe tɩ tʋm-tʋmdbã sʋka a Zezi beoog-daarã wɛɛngẽ?
4 Tʋm-tʋmdbã ra miimi t’a Zezi ra yaa Mesi wã. Woto, b sẽn wʋm a sẽn gom a kũumã, a vʋʋgrã la a lebg-n-wa wã yellã, tog n yɩɩ bũmb sẽn kɩt tɩ b sʋk woto: ‘A Zezi sã n ki n looge, wãn-wãn la a tõe n pids bõn-kãsems nins b sẽn gũud tɩ Mesi wã pidsã?’ Sẽn paase, a Zezi goma Zerizalɛm la a wẽn-doogã saab yelle. Tõeeme tɩ tʋm-tʋmdbã sʋkame: ‘Wakat bʋg la wãn-wãn la rẽ na n wa?’ B sẽn makd n na n wʋm bõn-kãensã võorã tʋm-tʋmdbã sʋkame: “Bõn-kãens na n waa wakat bʋgo, la bãnd ning sẽn wilgd bõn-kãens fãa sẽn pʋlem tɩ na n ta b baasg zĩigẽ wã na n yɩɩ bʋgo?”—Mark 13:4, NW; Matɩe 16:21, 27, 28; 23:37–24:2.
5. Wãn-wãn la a Zezi sẽn yeel bũmb ningã paam pidsg yʋʋm kob-yendẽ wã?
5 A Zezi reng n togsame tɩ zaba, kom, bã-longdem, tẽn-digimdsi, kiris-nebã kisgr la b namsgo, ziri mesi rãmba, la Rĩungã koe-noog mooneg dũniyã gill zug n da na n zĩndi. Rẽ poor la saabã ra segd n wa. (Matɩe 24:4-14; Mark 13:5-13; Luk 21:8-19) A Zezi togsa woto yʋʋmd 33 T.W. sɩngrẽ. Yʋʋm pi-gĩn nins sẽn pʋglã, a karen-biis nins sẽn da tũud keoogrã ra tõe n bãngame tɩ bũmb nins b sẽn deng n togsã sɩd ra pidsda vẽenega. N-yẽe, kʋdemdã wilgdame tɩ bãndã paama pidsg rẽ wẽnde, n tall n wa baas ne Zʋɩf rãmbã yɛl siglg baasg Rom dãmbã nusẽ yʋʋmd 66-70 T.W. Wãn-wãn la rẽ zĩnd-yã?
6. Bõe n zĩnd Rom dãmbã ne Zʋɩf rãmbã sʋk yʋʋmd 66 T.W.?
6 Zide, yʋʋmd 66 T.W. tʋʋlgã sasa, Zʋɩf rãmb nins sẽn da be Zelot rãmbã sullẽ wã zaba ne Rom gũudbã zĩ-lilldgẽ sẽn pẽ wẽn-doogã sẽn da be Zerizalɛmã, n yelgd nen-kɛglmã zĩig fãa tẽngã pʋgẽ. Sebr ning sẽn yaa Histoire des Juifs pʋgẽ, Porfesɛɛr a Heinrich Graetz togsdame: “A Cestius Gallus sẽn da yaa Siri Guvɛrneerã tʋʋmd sẽn da ya a teel Rom tãb-biisã yʋ-noogã, . . . ra pa tõe n ket n get tõdgr sẽn yelgd n gũbgd-a n pa maan baa fʋɩ n gɩdg-a ye. A boola a sodaasã sul tɩ b fãoog taaba, la na-yagsã saka ne yamleoog n tʋm b sodaasã.” Tãb-biis kãensa sẽn da tar sodaas 30 000 wã gũbga Zerizalɛm. B sẽn maan zabr bilfu, Zʋɩf rãmbã leba lalsã sẽn pẽ wẽn-doogã poorẽ. “Rasem a nu sẽn pʋg taab pʋgẽ, Rom dãmbã piga lalsã, la wakat fãa yɩɩ tɩlae tɩ b leb poorẽ, Zida nebã kʋlfɩb yĩnga. Ra yaa rasem a yoob-n-soaba daar bal la b tõog n sãam rɩtg babgã lalg pedg sẽn get Wẽn-doogã.”
7. Bõe yĩng t’a Zezi karen-biisã ra tõe n ges yɛlã ne manesem sẽn yaa toor ne Zʋɩf rãmbã wʋsg sẽn yɩɩdã?
7 Tags-y n ges yam-yuusg ning sẽn da segd n kẽ Zʋɩf rãmbã yamẽ wã, b sẽn da tags hal sẽn kaoos tɩ Wẽnnaam da na n kogla bãmb ne b galʋ-tẽn-sõngã yĩnga! A Zezi karen-biisã yẽ ra zoe n paama keoogr tɩ yel-beed n da gũud Zerizalɛm. A Zezi ra reng n togsa woto: “Wakat n wat tɩ fo bɛɛba na n tu bok n gilgi n gũbg foom tɩ fo neba ka tõe n yi ye. Bãmb na n sarma foom ne f kamba sẽn be f pʋgẽ wã, la bãmb kõn bas kugr ba a yembr kugr a to zugu fo pʋgẽ ye.” (Luk 19:43, 44) La rẽ ra na n waa ne kũum kiris-neb nins sẽn da be Zerizalɛm yʋʋmd 66 T.W. zut bɩ?
8. Yel-beed bʋg la a Zezi reng n togse, la yaa ãnd dãmb la ‘nin-tũusds’ nins yĩng b sẽn da na n boog rayã?
8 A sẽn da wa n leokd tʋm-tʋmdbã Oliiv tɩɩs Tãngã zugã, a Zezi reng n togsame: “Ra-kãensa tooga na n yɩɩ kãseng n yɩɩd tood nins fãa sẽn da zĩnd Wẽnnaam sẽn naan dũniyã hal sɩngre tɩ ta masã wã; la toog sẽn yaa woto kõn leb n zĩnd yɛs abada. Zusoaba [“a Zeova,” NW ] sã n ka boogẽ da-kãense, ned ba a ye kõn põs ye. La nin-tũusdsa bãmb sẽn tũusa yĩnga, b booga ra-kãense.” (Mark 13:19, 20; Matɩe 24:21, 22) Woto b ra na n booga ra-kãens tɩ “nin-tũusdsa” põse. B ra yaa ãnd dãmba? Sɩd-sɩda pa Zʋɩf tõtb nins sẽn da yet b balemda a Zeova la sẽn da zãgs a Biriblã ye. (Zã 19:1-7; Tʋʋma 2:22, 23, 36) B sẽn sɩd ra tũus b rãmb rẽ wẽndã ra yaa Zʋɩf rãmb la sẽn pa-b Zʋɩf rãmb nins sẽn wilg tẽeb ne a Zezi sẽn yaa Mesi la Fãagdã. Wẽnnaam tũusa nin-bãmbã, la yʋʋmd 33 T.W. Pãntekotã, a maaname tɩ b lebg tẽeb bu-paalga, “Israɛll sẽn yaa Wẽnnaam dẽnda.”—Galat dãmba 6:16; Luk 18:7; Tʋʋma 10:34-45; 1 Pɛɛr 2:9.
9, 10. Wãn-wãn la b ra “boog” Rom zabrã raya, la a baasg yɩɩ bõe?
9 Ra-kãens ‘boogame,’ la nin-tũusdsã sẽn be Zerizalɛmã paama fãagr bɩ? Porfesɛɛr a Graetz wilgda woto: “[A Cestius Gallus] pa tags tɩ yaa yam bũmb t’a ket n zabd ne neb sẽn tar daood sẽn zabd bõn-datem yĩnga, n maan zabr sẽn kaoosd rẽ wẽnde, tɩ-sʋʋr saagã sẽn da na n sɩng bilf poorã sasa ye . . . la tõe t’a gɩdga sodaasã tɩ b pa paam rɩɩb ye. Rẽ wã yĩnga, tõe t’a tagsame tɩ yaa yam bũmb n yɩɩd t’a looge.” A Cestius Gallus sẽn da tagsd to-to fãa, Rom tãb-biisã loog n basa galʋ-tẽngã, n paam bõn kãseng sẽn yit Zʋɩf rãmbã sẽn da rigd-bã nengẽ.
10 Rom dãmbã poorẽ lep kãngã b sẽn pa wʋmd a võorã kõo sor tɩ “ned[a] [“nemse,” NW ]” sẽn yaa a Zezi karen-biisã yõy sẽn da be yell pʋgẽ Zerizalɛmã paam fãagre. Kʋdemdã kɩbay wilgdame tɩ sor sẽn waa n pakã, kiris-nebã zoe n yii babgã. Ad woto sɩd wilgda tõog ning Wẽnnaam sẽn tar n na n deng n bãng beoog-daarã la a kɩt t’a balemdbã põsb yɩ waazibã! La yaa bõe yẽ n paam Zʋɩf rãmb nins sẽn pa tẽ, n pa Zerizalɛm la Zida wã?
Rẽ wẽndẽ nebã ra na n yãa to-kãsengã
11. Bõe la a Zezi yeel “zãmaan kãnga” wɛɛngẽ?
11 Zʋɩf rãmb wʋsg tagsame tɩ b balengã siglg sẽn tik wẽn-doogã zugã ra na n ket n bee wakat fãa. La a Zezi yeelame: “Bɩ y zãms yel-bũnd ne kankanga. A wila sẽn ket n yaa poala, la a sẽn tobda, yãmb bãngame tɩ sig-noor kolgame. Woto me, yãmb sã n yã bõn-kãens fãa, bɩ y bãng tɩ Ninsaal Biiga waoong kolgame n ta rig-noorẽ. Mam yeta yãmb sɩda tɩ zãmaan kãnga kõn loog ye, hal tɩ bõn-kãens fãa paam pidsgu. Yĩngri la tẽnga na n loogame, la mam goama kõn tol n loog ye.—Matɩe 24:32-35.
12, 13. Wãn-wãn la karen-biisã ra wʋm a Zezi sẽn gom “zãmaan kãnga” yellã võore?
12 Yʋʋm nins sẽn tall n tɩ tãag yʋʋmd 66 T.W. pʋsẽ, kiris-nebã ra yãa bãndã sẽn tar yɛl wʋsgã pipi babs wʋsg sẽn pidsdi: yaa zaba, kom, la Rĩungã koe-noog mooneg sẽn yalg wʋsg menga. (Tʋʋma 11:28; Kolos rãmba 1:23) La yaa wakat bʋg la saabã ra na n wa? Bõe la a Zezi ra rat n yeel a sẽn togs tɩ: ‘Zãmaan [Gerɛk yaa généa] kãnga kõn loogã’? A Zezi ra nong n boonda yẽ wakatẽ Zʋɩf rãmbã sẽn yaa kɩɩsdbã kʋʋndo, tũudmã nanambs sẽn be sʋk tɩ “zãmaan kãngã neba sẽn yaa wẽnse la yoaadba.” (Matɩe 11:16; 12:39, 45; 16:4; 17:17; 23:36) Woto, Oliiv tɩɩs Tãngã zugu, a sẽn ye wa n gom “zãmaan kãnga” yellã, vẽenega a ra pa rat n yeel tɩ yaa Zʋɩf rãmbã buud tõr sẽn zĩnd kʋdemdã fãa pʋgẽ wã ye. A ra pa rat n yeel me tɩ ra ya a karen-biisã, baa ne b sẽn da yaa “buud b sẽn tũusã” ye. (1 Pɛɛr 2:9, NW ) A Zezi ra pa rat n yeel me tɩ “zãmaan kãnga” ra yaa wakat sasa ye.
13 Walla tɩ yɩ woto, a Zezi ra tara rẽ wẽndẽ Zʋɩf rãmb nins sẽn da na n yã bãndã a sẽn kõ wã pidsgã a yamẽ. Sẽn tɩ loe ne “zãmaan kãnga” sẽn be Luk 21:32, NW pʋgẽ wã wɛɛngẽ, Porfesɛɛr a Joel B. Green wilgdame: “Evãnzill a Tãab-n-soabã pʋgẽ, wakat fãa, ‘zãmaan kãnga’ (la goam nins sẽn tɩ loe ne-a wã) ra rat n yeelame tɩ yaa neb buk sẽn kɩɩsd Wẽnnaam daabã. . . . [A tɩ loee] ne neb sẽn gũt Wẽnnaam daabã kudg ne tõdgr manesem.”b
14. Bõe la “zãmaan” kãnga yã-yã, la wãn-wãn la yɛlã sẽn baas to-to wã yɩ toor ne kiris-nebã?
14 Kɩɩsdb sẽn yaa Zʋɩf rãmbã zãmaan-wẽng sẽn da tõog n yã bãndã sẽn pidsdã ra na n yãa saabã me. (Matɩe 24:6, 13, 14) La sɩd yɩɩ woto! Yʋʋmd 70 T.W., Rom tãb-biisã lebg n waame, t’a Titus sẽn yaa Ãmperɛɛr a Vɛspasiẽ biriblã lʋɩ b taoore. Zʋɩf rãmbã b sẽn da leb n pig galʋ-tẽngã pʋgẽ wã namsg ra pa tõe n bãng n bilg la bal ye.c A Flavius Zozɛf sẽn maan kaset ne nif yãabã wilgame tɩ Rom dãmbã sẽn waa n siig galʋ-tẽngã, sẽn zems Zʋɩf rãmb 1 100 000 n da ki, tɩ b rɩk sẽn zems bãmb 100 000 n kẽng yembdo, tɩ nin-bãmb wʋsg sẽn yɩɩd pa kaoos la b ki kũ-toaag kom bɩ Rom gesrã zĩisẽ ye. Sɩd-sɩda, yʋʋmd 66-70 T.W. toogã yɩɩ toog ning sẽn yaa kãseng n yɩɩda, Zerizalɛm la Zʋɩf rãmbã siglg sẽn da zɩ n vɩɩmd la sẽn da pa na n tol n vɩɩmd ye. Ad yɛlã baasg sɩd yɩɩ toor wʋsg n kõ kiris-neb nins sẽn da kelg a Zezi keoogrã sẽn yaa bãngr-gomdã la sẽn da zoe n yi Zerizalɛm yʋʋmd 66 T.W. Rom tãb-biisã loogr poorã! ‘Nin-tũusdsã’ sẽn yaa kiris-neb nins sẽn zaeyã ra ‘põsame,’ bɩ b paama koglg yʋʋmd 70 T.W.—Matɩe 24:16, 22.
Pidsg a to sẽn wate
15. Wãn-wãn la d tõe n kɩs sɩd t’a Zezi bãngr-gomdã ra na n paama pidsg sẽn yaa kãseng n yɩɩd yʋʋmd 70 T.W. poore?
15 Baasg zãnga, pa pidsgã zãng fãa la woto ye. A Zezi ra reng n wilgame tɩ b sã n da wa sãam galʋ-tẽngã poore, a ra na n waa a Zeova yʋʋr yĩnga. (Matɩe 23:38, 39, NW; 24:2) Rẽ poore, a wilga rẽ vẽeneg n paase, a bãngr-gomd ning a sẽn togs Oliiv tɩɩs Tãngã zugã. A sẽn gom “toog kãseng[ã]” yelle, a yeelame tɩ rẽ poore, ziri Kirist rãmb n da na n puki, la tẽn-tẽnsã ra na n taga Zerizalɛm hal tɩ kaoose. (Matɩe 24:21, 23-28; Luk 21:24, NW ) Tõeeme tɩ pidsg a to sẽn yaa kãseng n yɩɩd n da segd n wa bɩ? Yɛlã wilgdame tɩ n-yẽe. D sã n mak Wilgri 6:2-8 (b sẽn gʋls toog ning sẽn wa Zerizalɛm yʋʋmd 70 T.W. zugã poorã) ne Matɩe 24:6-8 la Luk 21:10, 11, d neeme tɩ zaba, kom la namsg sẽn yaa kãseng n yɩɩd n da wate. A Zezi goamã pidsg kãngã sẽn yaa kãseng n yɩɩdã sɩnga pidsg Dũni gill Pipi Zabrã sẽn pusg yʋʋmd 1914 tɛka.
16-18. Bõe la d gẽegd tɩ ye wa?
16 Sẽn na maan yʋʋm pi-gĩn masã, a Zeova Kaset rãmbã zãmsa nebã tɩ bãndã pidsg masã wã wilgdame tɩ “toog kãseng” n ye wate. Masã “zãmaana” sẽn yaa wẽngã na n yãa to-kãngã. Wõnda bab-sɩngdg n na n ye zĩndi (zabr ning b sẽn na n yik ne ziri tũudmã fãa wã), wala a Gallus zabrã yʋʋmd 66 T.W. sẽn sɩng to-kãsengã Zerizalɛmã.d Rẽ, wakat woglem sẽn pa yãk takɩ pʋgẽ, saabã na n waame: sãoong dũniyã gill zugu, sẽn wõnd a soab ning sẽn zĩnd yʋʋmd 70 T.W.
17 A sẽn gomd to-kãseng ning sẽn be tõnd taoor ka la bilfã yelle, a Zezi yeelame: “Ra-kãens tooga zugẽ tao-tao bala [ziri tũudmã sãoongo] wĩndga na n sobgame, la kiuug kõn kõ a vẽenem yɛs ye. Yĩngr ãds na n lʋɩɩme, la saasẽ pãens na n digimdame. Wakat kãnga Ninsaal Biiga bãnd na n puka yĩngri, la dũniyã buud fãa na n wiisame. La bãmb na n yãa Ninsaal Biiga sẽn wat yĩngri sawatẽ ne pãnga la naam kãsenga.”—Matɩe 24:29, 30.
18 Woto, a Zezi mengã yeelame tɩ “ra-kãens tooga zugẽ,” yĩngr yel-bãn buud n na n zĩndi. (Mak-y ne Zoɛll 3:1-5; 4:15.) Rẽ na n linga ninsaan-kɩɩsdbã wʋsg hal tɩ b na n ‘wiisi.’ Neb wʋsg “sũyã na n lebga yog-yoge rabeem yĩnga b sẽn gũud bũmb nins sẽn na n wa dũniyã zuga yĩnga.” La pa na n yɩ woto ne kiris-neb hakɩkã ye! Bãmba ‘na n doog n nak n gesa yĩngri, tɩ bõe, b fãagra kolgame.’—Luk 21:25, 26, 28.
Bʋ-kaoor sẽn wate!
19. Wãn-wãn la d tõe n wilg wakat ning piisã la bʋʋsã bilgr sẽn na n paam pidsgã?
19 Bãng-y tɩ Matɩe 24:29-31 reng n togsame tɩ 1) Ninsaal Biriblã watame, 2) tɩ waoong kãng na n yɩɩ ne ziir kãsengã, 3) tɩ malɛk rãmbã na n zĩnda ne-a, la 4) tɩ tẽngã buud fãa na n yã-a lame. A Zezi lebs n togsa bõn-kãensã piisã la bʋʋsã bilgr pʋgẽ. (Matɩe 25:31-46) Woto, d tõe n baas n yeelame tɩ bilgr kãngã gomda wakat ning sẽn na n zĩnd to-kãsengã sɩngr poorã, a Zezi sã n wa wa ne a malɛk rãmbã n zĩnd a geerã zug n na n kao bʋʋdã. (Zã 5:22; Tʋʋma 17:31; mak-y ne 1 Rĩm dãmba 7:7, NW; Daniɛll 7:10, NW, 13, 14, 22, 26; Matɩe 19:28.) Ãnd la b na n bʋ, tɩ na n baas ne bõe? Bilgrã wilgdame t’a Zezi sika a yamã tẽn-tẽnsã fãa zutu, tɩ yaa wala b sã n da tigma a yĩngr geerã taoore.
20, 21. a) Bõe n na n paam a Zezi bilgrã piisi? b) Bõe n na n paam bʋʋsã beoog-daare?
20 B na n welga roap la pagb nins sẽn wõnd piisã n ning a Zezi lohorem rɩtg babgẽ wã. Bõe yĩnga? Bala b tũnuga ne segb nins b sẽn da paam fãa n maan a ba-biisã neere. Ba-biis kãens yaa kiris-neb nins sẽn zaeyã sẽn na n lagem n dɩ naam Kirist saasẽ Rĩungẽ wã. (Daniɛll 7:27, NW; Hebre 2:9–3:1) Wala sẽn zems ne bilgr kãngã, kiris-neb milyõ rãmb sẽn wõnd piis sak n deega a Zezi tẽeb ba-biisã la b tʋmd n tɛɛnd-ba. Rẽ kɩtame tɩ kʋʋng kãseng kãngã tar saagr sẽn yẽbg Biiblã zug sẽn yaa põs “toog kãseng[a]” la rẽ poore bɩ b vɩɩmd wakat sẽn-kõn-sa Arzãn pʋgẽ, sẽn yaa Wẽnnaam Rĩungã tẽng zug babgã.—Wilgri 7:9, 14; 21:3, 4; Zã 10:16.
21 Ad sɩd yaa baasg sẽn yaa toor wʋsg meng n na n zĩnd bʋʋsã yĩnga! B bilg-b-la Matɩe 24:30 wa neb ‘sẽn wiisd’ a Zezi waoongã sasa. La b sɩd na wiisi, bala rẽ tɩ b wilgame tɩ b zãgsda Rĩungã koe-noogo, tɩ b kɩɩsda a Zezi karen-biisã, la b nonga dũniyã sẽn loogdã n yɩɩda. (Matɩe 10:16-18; 1 Zã 2:15-17) Yaa a Zezi, la pa a karen-biig ba a yembr sẽn be tẽng zugu, n na n wilg bʋʋsã sẽn yaa b rãmba. A yeta bãmb wɛɛngẽ: “Bãmba rãmbã na n kẽnga sãoong sẽn kõn saẽ wã.”—Matɩe 25:46, NW.
22. A Zezi bãngr-gomdã bab-bʋg n zems ne tõnd vaeesg nindaare?
22 Tõnd võor-wʋmbã taoor kẽngr sẽn tɩ loe ne bãngr-gomd ning sẽn be Matɩe sak 24 la 25 pʋgẽ wã sɩd sidgda yĩnga. Baasg zãnga, a Zezi bãngr-gomdã babg a yembr n zems ne d vaeesg nindaare: “sãoong bõn-wẽnga sẽn yas zĩ-sõnga pʋgẽ” wã. A Zezi sagla a karen-biisã tɩ b tall yam-welgr sẽn tɩ loe ne rẽ, la b segl n sa n maan bũmbu. (Matɩe 24:15, 16) “Sãoong bõn-wẽnga” yaa bõe? Wakat bʋg la a yals zĩ-sõngẽ wã? La wãn-wãn la tõnd masã la d beoog-daar vɩɩmã saagr tɩ loe ne rẽ? Sõsg ning sẽn pʋgdã na n sõsa rẽ yelle.
[Footnotes]
a Ges-y Gũusg Gasgã (farende) zãmsg sõss sẽn yaa yʋʋmd 1994, wao-fugdg kiuug rasem 15; yʋʋmd 1995, zĩ-likr kiuug rasem 15 la sɩpaolg kiuug pipi daare; la yʋʋmd 1996, sa-sik kiuug rasem 15.
b Gãrãnd Bertayn mit a G. R. Beasley-Murray yetame: “Gomd ning sẽn yaa ‘zãmaan kãnga’ wã pa segd n wa ne zu-loɛɛg võor-wilgdbã nengẽ ye. Baa ne d sẽn sak n deeg tɩ généa wã pipi Gerɛkã lebgrẽ dat n yeelame tɩ rogmã, yagengã, la woto yĩngã buudã, . . . [Septante Gerɛkã] pʋgẽ, naoor wʋsg sẽn yɩɩd fãa, a lebgda Hebre gomd ning sẽn yaa dôr, sẽn dat n yeel tɩ wakatã, ãdem-biisã wakate, bɩ zãmaane, sẽn dat n yeel tɩ wakat yɛng pʋgẽ nebã. . . . Goam nins b sẽn yet tɩ yaa a Zezi n togsã pʋsẽ, gomdã tara võy a yiibu: pipi, wakat fãa a rat n yeelame tɩ ya a wakatẽ nebã, la sẽn paase, d sã n gese, wakat fãa a tɩ loee ne sãbgr goama.”
c Histoire des Juifs sebrã pʋgẽ, Porfesɛɛr a Graetz yeelame tɩ wakat ninga, Rom dãmbã ra kaada b sẽn yõg b rãmbã bãmb 500 ra-lugs zut daar fãa. B kʋʋsa Zʋɩf rãmb a taab b sẽn yõg nusi, rẽ poore, b ra talld-b lame n lebs galʋ-tẽngã pʋgẽ. Yɛlã ra yaa wãn to be? “Ligdã ra wa n ye pa tar yõod ye, bala a ra pa tõe n da rɩpẽ ye. Roapã ra zabda taab soyã zut yɩɩr sẽn pa tõe n bãng n bilg pʋgẽ rɩɩb sẽn yaa midgã, mo-beell sẽn pa zem baa fʋɩ, gãn-bɛrga, bɩ sagd b sẽn lob baasã yĩnga. . . . Kũumã b sẽn pa mumdã sõor paasg tao-tao kɩtame tɩ tʋʋlgã wakat pemsmã sẽn yaa yũugã yõkd vʋʋsem, tɩ zãma wã ki bãasã, komã la zabrã yĩngã.”
d Sõsg ning sẽn pʋgdã gomda beoog-daar toogã nen-kãngã yelle.
Y tẽrame bɩ?
◻ Pidsg bʋg la Matɩe 24:4-14 tall yʋʋm kob-yendẽ wã?
◻ Tʋm-tʋmdbã wakate, wãn-wãn la b boog rayã, la b fãag nemse, wa b sẽn deng n togs Matɩe 24:21, 22 pʋgẽ wã ?
◻ Bõe n zẽng “zãmaan” ning yell b sẽn gom Matɩe 24:34 pʋgẽ wã?
◻ Wãn-wãn la d mi tɩ bãngr-gomd ning b sẽn kõ Oliiv tɩɩs Tãngã zugã ra na n paama pidsg a to sẽn yaa kãseng n yɩɩda?
◻ Wakat bʋg la wãn-wãn la piisã la bʋʋsã bilgr na n paam pidsgu?
[Picture on page 18]
Yimaas sẽn be Arc de Titus zug Rom sẽn wilgd Zerizalɛm sãoongã zabr te-zaeedem
[Picture on page 18]
Soprintendenza Archeolozica di Roma