Yɩ-y Gũusdb La Y Modg Sõma!

“Woto yĩnga bɩ y ket n gũudẽ, tɩ bõe, yãmb ka mi daarã la wakatã me ye.”—MATƖE 25:13, NW.

BIIBLÃ yaoolem sõsg pʋgẽ, a Zezi kãabame: “Mam wata tao-tao.” A tʋm-tʋmd a Zã leokame: “Ãmiina! Bɩ y wa, Zusoab a Zezi.” Tʋm-tʋmdã ra pa sãmbd ne a Zezi ra na n waame ye. A Zã ra bee tʋm-tʋmdb nins sẽn da sʋk a Zezi woto wã sʋka: “Wakat bʋg la bõn-kãensã na n zĩndi, la bõe n na n yɩ fo belmã [ne Gerɛk yaa parousia] la yɛl siglgã baasg bãnde?” N-yẽe, a Zã ra gẽegda a Zezi beoog-daar belmã ne kɩs-sɩda.—Wilgri 22:20; Matɩe 24:3, NW.

2. Sã n yaa ne a Zezi belmã wɛɛngẽ, yɛlã yaa wãn to egiliiz rãmbẽ wã?

² Bas-yard a woto yaa kar-kar tõnd wakatã. Egiliiz rãmb wʋsg tara tẽeb b sẽn sak sẽn tɩ loe ne a Zezi “waoongã,” la b neb nins sẽn sɩd gũud-a wã pa waoog ye. B vɩɩme tɩ yaa wa a Zezi pa na n wa ye. Sebr a ye (The Parousia in the New Testament) yetame: “Parousia wã saagr sẽn tar pãn-tusd-sõng egiliizã vɩɩm, a tagsg la a tʋʋm zut pa zem baa fɩ ye. . . . Yãgdem kãseng ning egiliizã sẽn da segd n maan a tek-yam-n-kos-sugrã tʋʋmã la a moon koe-noogã n yɩ misioneerã pãng boogame, t’a sã n pa sa menga.” La pa woto ne nebã fãa ye!

3. a) Wãn-wãn la kiris-nebã tagsd parousia wã wɛɛngẽ? b) Sẽn yɩɩd fãa, bõe la d na n vaeese?

³ A Zezi karen-biis hakɩkã gũuda yɛl siglg kãngã saab ne b sũy fãa. D sẽn maand woto ne kɩs-sɩdã sasa, d segd n talla tagsg ning sẽn zemsã ne bũmb nins fãa sẽn tɩ loe ne a Zezi belmã la d tʋm tɩ zems ne rẽ. Rẽ na n sõnga tõnd tɩ d ‘tõog toog hal tɩ ta saabã n paam fãagre.’ (Matɩe 24:13, NW ) A sẽn da waa n kõt bãngr-gomd ning d sẽn yãt Matɩe sak 24 la 25 pʋgẽ wã, a Zezi kõo sagls sẽn tar yam d sẽn tõe n tũ tɩ naf-d n kaoose. Sak 25 wã tara bilsg y sẽn tõe n miẽ, t’a yembr gomd pʋg-sadb piig (pʋg-sadb nins sẽn yaa yam dãmb la sẽn ya-b yalembã) la talã rãmb yelle. (Matɩe 25:1-30) Wãn-wãn la bilsg kãensã tõe n naf tõndo?

Yɩ-y gũusdb wa pʋg-sadb a nu wã!

4. Pʋg-sadbã bilgr tags-yẽgr yaa bʋgo?

⁴ Tõe tɩ y na n tʋllame n ye karem pʋg-sadbã bilgr sẽn be Matɩe 25:1-13 pʋgẽ wã. Yɛlã sẽn maand zĩig ningã yaa Zʋɩf rãmb kãadem kãseng sasa. Wakat kãngã pʋg-sɩdã kẽngda pʋg-paalã ba-yir n na n tɩ pɛɛg-a n wa pʋg-sɩdã zakẽ (bɩ a meng ba wã zakẽ). Tõe tɩ yʋʋmb la yɩɩn-yɩɩndb ra bee ne bãmba, la yãagdb sull a woto waoong wakate b ra pa mi takɩ ye. Bilgrã pʋgẽ pʋg-sadb piigã gũu pʋg-sɩdã waoong yʋngã sasa. A nu wã maana yalemd n pa zã fɩtl kaam sẽn sekd ye, la woto yĩnga b ra segd n loogame n tɩ bao n da n paase. A nu a taabã bãnga yam n zã kaam ne tʋgd n paase, sẽn na yɩl n lebs n tõog n pids b fɩtl dãmbã gũubã sasa, sã n wa yaa tɩlae. Ra yaa bãmb b nu wã bal n da be be, la b ra segl n sa, pʋg-sɩdã sẽn waa n wa wã. Woto yĩnga, yaa bãmb bal n da paam sor n kẽ kibsẽ wã. Pʋg-sad-yalems a nu wã sẽn wa n lebg n wa wã, ra kẽ n bõogame, tɩ b ye pa tõog n kẽ ye.

5. Verse bʋs n wat ne vẽenem pʋg-sadbã bilgr makr võor zugu?

⁵ D tõe n wʋma bilgr kãngã nens wʋsg võor makr wɛɛngẽ. Wala makre, Gʋlsgã gomda a Zezi yell n yetẽ t’a yaa pʋg-sɩda. (Zã 3:28-30) A Zezi maka a meng ne rĩm biribl b sẽn segl pʋg-peegr kibs a yĩnga. (Matɩe 22:1-14) La Biiblã makda a Zezi ne sɩda. (Efɛɛz rãmba 5:23) Bũmb sẽn nekd ratem yaa tɩ b bilgda kiris-neb nins sẽn zaeyã zĩis a taab wala Kirista “pʋg-paalã,” tɩ bilgrã yaool n pa gomd pʋg-paal yell ye. (Zã 3:29; Wilgri 19:7; 21:2, 9) La a gomda pʋg-sadb piig yelle, la zĩig a to b rɩka sẽn zae-bã n mak ne pʋg-sad b sẽn sɩʋ kãadem ne Kirista.—2 Korẽnt dãmba 11:2.a

6. A Zezi kõo sagl-bʋg a sẽn wa n baasd a bilgrã sẽn tɩ loe ne pʋg-sadbã?

⁶ Yel-bõones a woto la a pidsgã bãngr-goamã wɛɛngẽ toor sẽn ka be, sɩd-sɩda, noy sẽn yaa sõma la bilg-kãngã tõe n zãms tõndo. Wala makre, ges-y t’a Zezi baas-a-la ne gom-kãensã: “Woto yĩnga bɩ y ket n gũudẽ, tɩ bõe, yãmb ka mi daarã la wakatã me ye.” Woto, bilgrã wilgdame tɩ yaa tɩlae ne tõnd ned kam fãa tɩ d yɩ gũusdb ne yɛl siglg wẽng kãngã saab sẽn kolgdã. Saab kãngã watame tɩ sãmbg ka be ye, baa d sã n pa tõe n yãk wakat n kõ. Rẽ wɛɛngẽ wã, ges-y manesem nins pʋg-sadbã sul a yiibã sẽn tallã.

7. Wãn-wãn la pʋg-sadb a nu wã wilg tɩ b ka yam?

⁷ A Zezi yeelame: “A nu wã ka yam ye.” Yaa b sẽn pa tẽ tɩ pʋg-sɩdã ra watame wã yĩng bɩ? B ra loogame n tɩ noogd b yõor bɩ? Bɩ b belg-b lame? Sʋgs-kãensa fãa leoor yaa ayo. A Zezi yeelame tɩ bãmba b nu wã “yi[imi] n na n tɩ seg pʋg-paal sɩda.” B ra miimi t’a ra watame, la b ra rat n kẽesa b toogo, hali n naag n maan “[kãadem] kibsã.” La b ra seglame tɩ sek bɩ? B gũ-a-la wakat a wãna, hal tɩ ta “yʋʋn-sʋka,” la b ra pa segl a waoongã wakat buud fãa a sẽn tõe n wa, pĩnd bɩ kaoosg zugẽ n yɩɩd bãmb sẽn da tẽed sɩngrẽ wã yĩng ye.

8. Wãn-wãn la bilgrã pʋg-sadb a nu wã wilg tɩ b yaa gũusdba?

⁸ A nu a taabã, b rãmb nins a Zezi sẽn bool tɩ yam dãmbã me yii ne fɩtl dãmb sẽn wita, n gẽegd pʋg-paal sɩdã waoongo. Bãmb me ra segd n gũume, la b ra yaa “gũusdba.” Gerɛk gom-biig ning b sẽn lebg ne “gũusda” tõe n dat n yeelame tɩ yɩ “gũus-m-meng soaba, ned sẽn wʋmde, sẽn tʋmd ne yam.” A nu kãensa wã wilgame tɩ b ra tara yam, n tall tʋgd ne kaam n paas sẽn na yɩl n lebs n pids b fɩtl dãmbã, sã n wa yaa tɩlae. Sɩda, b ra maooda wʋsg n na n segl b mens n sa pʋg-paal sɩdã yĩng hal tɩ kɩt tɩ b pa sak n kõ b kaamã ye. Gũusg a woto pa bũmb sẽn pa zems ye. Bũmb ning sẽn wilgd dẽ wã yaa b belmã beenẽ la b sẽn segl zãng pʋg-paal sɩdã sẽn wa n wa wã. Bãmbã sẽn “segl n sɛ wã tũu yẽnda n kẽ [kãadem] kibsã, la kʋɩlenga pagame.”

9, 10. Pʋg-sadbã bilgr tags-yẽgr yaa bõe, la sʋgs-bʋs la d segd n sʋk d mense?

⁹ A Zezi ra pa kõt zãmsg sẽn tɩ loe ne manesem sẽn zems kãadem sasa ye. A ra pa kõt zãmsg me sẽn tɩ loe ne pʋɩ f sẽn tar ne neb a taabã ye. A sẽn da rat n yeelã yaa woto: “Woto yĩnga bɩ y ket n gũudẽ, tɩ bõe, yãmb ka mi daarã la wakatã me ye.” Sʋk-y y menga: ‘Mam sɩd yaa gũusd a Zezi belmã wɛɛngẽ bɩ?’ Tõnd tẽedame t’a Zezi rɩta naam saasẽ masã, la yaa hal sẽn ta zĩ-bʋg la tõnd sɩd gãt yel-sɩd ning sẽn yaa tɩ ‘Ninsaal Biiga na n waa yĩngr sawatẽ ne pãnga la naam kãseng ka la bilfã’? (Matɩe 24:30) ‘Yʋʋn-sʋka’ kolgre, pʋg-paal sɩdã waoong sɩd ra pẽnegame n yɩɩd wakat ning pʋg-sadbã sẽn da yi pipi n na n tɩ seg-a wã. Woto me, ninsaal Biriblã waoong sẽn na yɩl n sãam masã yɛl siglg wẽngã pẽnegame n yɩɩd tõnd sẽn da sɩng n gẽegd a waoongã. (Rom dãmba 13:11-14) D kell n talla d gũusgã n ket n yaa gũusdb meng n yɩɩda, wakatã sẽn pẽnegd n paasdẽ wã bɩ?

¹⁰ Sẽn na yɩl n sak noor ning sẽn yaa “bɩ y ket n gũudẽ” wã, baooda gũusg wakat fãa. Pʋg-sadb a nu n bas tɩ b kaamã sa tɩ b kẽng n na n tɩ ra n paase. Woto me, rũndã-rũndã, bũmb tõe n tiisa kiris-ned wʋsg hal t’a pa segl zãng n sa a Zezi waoongã sẽn kolg wʋsgã yĩng ye. Rẽ paama yʋʋm kob-yendẽ kiris-neb kẽere. La a tõe n waa rũndã-rũndã neb kẽer zutu. Woto, bɩ d sʋk d mense: ‘Rẽ paamda maam bɩ?’—1 Tesalonik rãmba 5:6-8; Hebre dãmba 2:1, NW; 3:12, NW; 12:3; Wilgri 16:15.

Modg-y sõma tɩ saabã kolgdame

11. Bilg-bʋg la a Zezi kõ rẽ poore, la bʋg la a wõnda?

¹¹ A bilgr ning sẽn pʋgdã pʋgẽ, a Zezi maana sẽn yɩɩd sagl a karen-biisã tɩ b yɩ gũusdba. A sẽn gom pʋg-sadb sẽn tar yam la sẽn pa tar-b yamã yell poore, a goma talã rãmbã bilgr yelle. (Karm-y Matɩe 25:14-30.) Zĩis wʋsg pʋsẽ, rẽ wõnda min dãmbã bilgr a Zezi sẽn kõ wã, bala wʋsg ra “tẽedame tɩ Wẽnnaam soolem na n puka wakat kãng bala.”—Luk 19:11-27.

12. Talã rãmbã bilgr tags-yẽgr yaa bʋgo?

¹² Talã rãmbã bilgrẽ, a Zezi goma rao sẽn bool a yembs a tãab n yaool n kẽng so-toak sãand weoogo. A kõo ned a yembrã talã a nu, a to wã a yiibu, yaoolem soabã a yembr bala, “yẽ kõo ned kam fãa sẽn zems a [tõogo].” Wõnda woto yaa wanzũri talã rãmba, sẽn yaa noor sẽn da be rẽ wẽnd sẽn zem ligd ning tʋm-tʋmd sẽn paamd yʋʋm 14 pʋgẽ, tɩ woto sɩd yaa ligd wʋsgo! Rao wã sẽn lebg n wa, a kɩtame tɩ yembsã kolg n togs ne bũmb ning b sẽn maan a ‘sẽn kaoos wʋsg’ n da be sãand weoogã sasa wã. Pipi yembs a yiibã paasa bũmb ning b sẽn da bobl-bã yõod naoor a yiibu. T’a yeel tɩ “yaa neere,” n kãab t’a na n kõo bãmb ned kam fãa zɩɩb n paase, la a baas n yeele: “Bɩ f paam pʋɩɩr ne f zu-soaba sũ-noogo.” A sẽn yet tɩ zu-soabã ra kota yɛl tɩ loog nugã, yamb ning sẽn paam-a talã a yembrã pa tolem ne talã wã n paam yõod baa bilf ye. A solga talã wã, n pa tɩ ning-a bãnkã rãmb nengẽ meng sẽn na yɩl n paam yõod ye. Zu-soabã yeelame t’a yaa “tʋm-tʋm wẽnga sẽn yaa kʋɩɩma,” a sẽn da maan t’a zu-soabã kong nafa wã yĩnga. Woto yĩnga, b reega talã wã a nengẽ, la b yiis-a yɩnga, zĩig ning “yãbre ne yẽn wãbre [sẽn] na n zĩnda” zĩigẽ.

13. Wãn-wãn la a Zezi wilg t’a wõnda bilgrã zu-soaba?

¹³ Sẽn paas yɛsa, yel-bõones võor la d tõe n wʋm sã n yaa ne makr võor-wʋmb wɛɛngẽ. Wala makre, a Zezi, rao wã sẽn maan so-toak n kẽng tẽn-zãrgẽ wã sẽn da makdã, ra na n loog n basa a karen-biisã n kẽng saasẽ, n gũ n kaoos hali n wa paam rĩm naam.b (Yɩɩl Sõamyã 110:1-4, NW; Tʋʋma 2:34-36; Rom dãmba 8:34; Hebre 10:12, 13) La ye yɛsa, d tõe n yãa zãmsg bɩ noore, sẽn yaa kãseng n yɩɩda, tõnd fãa sẽn segd n tũ d vɩɩmã pʋgẽ. Yaa bʋgo?

14. Talã rãmbã yel-bũnd gomd n tadgda ratem kãseng bʋg zugu?

¹⁴ Tõnd saagrã yaa pa-kiid vɩɩm saasẽ bɩ vɩɩm sẽn-kõn-sa tẽng zug arzãnẽ me, d sã n ges a Zezi bilgrã yaa vẽeneg tɩ d segd n modgda kiris-neb tʋʋma pʋsẽ. Sɩda, d tõe n kʋmsa bilgr kãngã koɛɛgã gom-yɛng pʋgẽ: modgr sõma. Tʋm-tʋmdbã kõo mak-sõng yʋʋmd 33 T.W. n tar n watẽ. D karemdame: “Ne goam a taabã [a Pɛɛr] sagla bãmb n kos bãmb ne a sũur fãa n yeele: ‘Bɩ y fãag y mens zãmaan kãngã nin-wẽnsã sʋka.’ ” (Tʋʋma 2:40-42) La ad a modgrã sɩd ra woma bi-sõma! Neb a taabã sẽn lagem tʋm-tʋmdbã kiris-ned moonegã pʋgẽ wã, bãmb me ra yaa neb sẽn modgd sõma, ne koe-noogã ‘sẽn paasd dũniyã tɛk fãa.’—Kolos rãmba 1:3-6, NW, 23; 1 Korẽnt dãmba 3:5-9.

15. Ne manesem bʋg sẽn yaa zall la d segd n tũ talã rãmbã yel-bũnd tags-yẽgre?

¹⁵ Ning-y bilgr kãngã b sẽn kõ yɛl nins pʋsẽ wã y yamẽ: bãngr-gomd sẽn tɩ loe ne a Zezi belmã. D tara bʋʋm wʋsg sẽn wilgd t’a Zezi parousia wã kẽngda taoore, la ka la bilfu a na n taa a zug tẽn-sʋka. Tẽeg-y loees ning a Zezi sẽn maan “sɛɛb[ã]” la tʋʋmd ning kiris-nebã sẽn segd n maana sʋka: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Matɩe 24:14) Ne rẽ d yamẽ, yamb bʋg buud la d wõnda? Sʋk-y y menga: ‘Bʋʋm beeme tɩ m na n baas n yeel tɩ m wõnda yamb ning sẽn solg bũmb ning b sẽn da bobl-a wã, tõe tɩ ya a sẽn ges a meng yɛlã yellã yĩng bɩ? Bɩ yaa vẽeneg tɩ m yaa wa sẽn da yɩ-b nin-sõma la kɩs-sɩd dãmbã? M dɩka sard zãng-zãng n na n paas Zusoabã yõod segb fãa bɩ?’

Gũusdb la modgdb sõma a belmã wakate

16. Koe-bʋg la bilsg a yiibã tõnd sẽn sõs b zugã tar yãmb yĩnga?

¹⁶ N-yẽe b makr võorã la b võorã bãngr-goamã wɛɛngẽ wã toor sẽn ka be, bilsg a yiib kãensã kõta tõnd raoolg sẽn yaa vẽeneg sẽn yit a Zezi meng noorẽ. A koɛɛgã yaa woto: Yɩ-y gũusdba, yɩ-y modgdb sõma, sẽn yɩɩd fãa, b sẽn yã Kirista parousia wã tɛkã. Rẽ yaa masã. Woto, tõnd sɩd yaa gũusdb la modgdb sõma bɩ?

17, 18. Bõe la karen-biig a Zak sagl sẽn tɩ loe ne a Zezi belmã?

¹⁷ A Zezi ma-biig a Zak ra pa zĩnd Oliiv tɩɩs Tãngã zug n wʋm a Zezi bãngr-gomdã ye. La kaoosg poore, a wʋma a kɩbare, la a wʋma a võorã vẽenega. A gʋlsame: ‘Dẽ yĩnga, m ba-biisi, bɩ y maan sũ-mar hal tɩ ta Zusoaba waoongo. Gese, ka-koaad gũudame n dat n paam tẽnga bõn-koaadla bi-sõama, la yẽ maanda sũ-mar ne bãmb hal tɩ bãmb paam dẽenem la yaoolem saaga. Bɩ yãmb me maan sũ-mare n keng y sũyã tɩ Zusoaba waoong [“belmã,” NW ] kolgame.’—Zak 5:7, 8.

¹⁸ A sẽn kõ bas-m-yam tɩ Wẽnnaam na n bʋʋ neb nins sẽn tʋmd wẽng ne b arzɛgsã n ning-b taalã, a Zak sagla kiris-nebã tɩ b ra kong sũ-mare, b sẽn gũud t’a Zeova maan bũmbã sasa ye. Kiris-ned sẽn pa tar sũ-mar tõe n lebga sũ-toog soaba, tɩ yaa wala yẽ mengã segd n demsa wẽngã sẽn maana. Pa segd n yɩ woto, bʋʋdã wakat sẽn sɩd na n wa wã yĩng ye. Ka-koaad makrã n bilgd rẽ, wala a Zak sẽn wilgã.

19. Israɛll ka-koaad ra segd n talla sũ-mar bʋg buudu?

¹⁹ Israɛll ka-koaad sẽn bʋd bũmb ra segd n gũume, pipi yaa tɩ vãadã yi, rẽ poore tɩ bõn-bɩtgã bɩ, la baasgẽ wã yaa tigisgã. (Luk 8:5-8; Zã 4:35) Ki-kãens pʋgẽ, ra yaa yɩɩr buud sasa, bɩ tõe tɩ yaa yɛl sẽn wat ne yɩɩr buud sasa. Pipi saasã ra na n niimi tɩ sek bɩ? Yaa wãn to yẽ ne sa-yaoosã? Bõn-yɩgdɩ bɩ sobg n na n wa sãam bõn-bɩtsã bɩ? (Mak-y ne Zoɛll 1:4; 2:23-25.) Baasg zãnga, naoor wʋsgo Israɛll ka-koaad ra tõe n teega a Zeova ne yʋʋmd fãa sa-niirã sasa rãmb a sẽn luglã. (Tõodo 11:14; Zeremi 5:24) Ka-koaad sũ-marã sɩd ra tõe n yɩɩ gẽegr ne bas-yardo. Ne tẽebo a ra miimi t’a sẽn da gũud bũmb ningã ra na n waame. Sɩd yɩta woto me!

20. Wãn-wãn la d tõe n tall sũ-mar tɩ zems ne a Zak saglgã?

²⁰ Baa ne ka-koaad sẽn tõe n bãng wakat ning tigisgã sẽn na n wa wã, yʋʋm kob-yendẽ kiris-nebã ra pa tõe n mag n bãng a Zezi belmã sẽn da na n yɩ wakat ning ye. La ra yaa vẽeneg t’a na n waame. A Zak gʋlsame: “Zusoaba waoong [“belmã,” NW; Gerɛk, parousia] kolgame.” A Zak sẽn gʋls gom-kãensã wã sasa, Kirist belmã bãnd kãsengã, bɩ a pidsgã dũniyã gill zugã ra nan pa vẽeneg ye. La a yaa vẽeneg masã! Woto, tõnd tagsg segd n yɩɩ wãn masã wakatã? Bãndã sɩd yaa vẽenega. D ne-a lame. D tõe n yeela ne bas-m-yam tɩ: ‘M nee bãndã sẽn pidsdi.’ D tõe n yeela woto ne bas-yard tɩ: ‘Soaalã belem kolgame, la a zug-tẽn-sʋkã ta n saame.’

21. Bõe la d rɩk sard kãn-kãe n na n maane?

²¹ Sẽn yaa woto wã yĩnga, sẽn yɩɩd fãa d tara bʋʋm sẽn tar pãng n na n gãd zãms-kãsems nins a Zezi bilsg a yiibã tõnd sẽn sõs b zutã la d tũ-ba. A yeelame: “Woto yĩnga bɩ y ket n gũudẽ, tɩ bõe, yãmb ka mi daarã la wakatã me ye.” (Matɩe 25:13, NW ) Sãmbg sẽn ka be, yaa masã la wakat ning d sẽn segd n tall yẽesem d kiris-ned tʋʋmdã pʋgẽ wã. Bɩ d wilg d vɩɩmã pʋgẽ daar fãa tɩ d wʋmda a Zezi sẽn dat n yɛɛlgã. Bɩ d yɩ gũusdba! Bɩ d yɩ modgdb sõma!

[Footnotes]

Yãmb tẽrame bɩ?

◻ Tags-yẽgr bʋg la y paam pʋg-sadb nins sẽn yaa yam dãmb la sẽn ya-b yalembã bilgr pʋgẽ?

◻ Ne talã rãmbã bilgr maasem, sagl-kãseng bʋg la a Zezi kõt yãmba?

◻ Wãn-wãn la yãmb sũ-marã sẽn tɩ loe ne parousia wã wõnd Israɛll ka-koaad rẽnda?

◻ Bõe yĩng tɩ sẽn yɩɩd fãa, masã wakatã tõnd sẽn vɩ a pʋgẽ wã be yamleoog la a baood modgr la gũusg me?

1. Bõe la tʋm-tʋmd a Zã ra gẽegda?

[Picture on page 29]

Zãms-bʋs la y paamd pʋg-sadbã la talã rãmbã bilsg pʋsẽ?