Wẽnnaam Pa Maasg ne a kãabgã wɛɛngẽ ye

“ZUSOABA, [“o Zeova,” NW ] yaa wakat a wãn la m na n bool yãmb tɩ y wa sõng-m tɩ y ka wʋm?” Yão wã yaa a Habakuk sẽn ya Hebre no-rɛɛs goama, sẽn vɩɩmd yʋʋm kob-gĩn a yopoe S.D.T.W. La yaa d sẽn mii n wʋmdẽ bɩ bõe? Ninsaal sẽn nong yaa a paam a sẽn dat bũmb ning ne a sũur fãa wã zĩig pʋgẽ, bɩ tao-tao bala. La yel-kãngã yaa sɩd zall tõnd wakatã neb sẽn baood keoor zĩig pʋgẽ wã.—Habakuk 1:2.

Yʋʋm kob-yendẽ wã, wõnda neb sãnda ra tagsdame tɩ Wẽnnaam da segd n pidsa a kãabsã pĩnd sẽn yɩɩd woto. B ra yɩɩ yãg-yãg rãmb wʋsg n da yetẽ meng tɩ Wẽnnaam yaa maasg bɩ ned sẽn pa poorẽ. Rẽ wɛɛngẽ, tʋm-tʋmd a Pɛɛr ra tẽeg-b lame tɩ Wẽnnaam tagsg ne wakatã yaa toor zãng fasɩ ne tõnd rẽndã. A Pɛɛr gʋlsa woto: “Mam zo-nongdse, bũmb a ye n be yãmb sẽn ka tog n yĩm ye. Yaa tɩ ne Zusoabã, daar a ye wẽnda yʋʋm tusri, la yʋʋm tusri wẽnda daar a ye.”—2 Pɛɛr 3:8.

Sã n yaa ne wakatã geelg ne manesem kãnga, ned sẽn kʋʋl n tar yʋʋm 80 vɩɩmda sẽn zems lɛɛr a yiib bala, la ãdem-biisã kʋdemd fãa kaoosa sẽn zems rasem a yoobe. D sã n get yɛlã ne tagsg kãngã, lebgda nana n yɩɩd ne-do, tɩ d wʋm Wẽnnaam manesmã ne tõndã võore.

La Wẽnnaam pa maand toor kae ne wakatã ye. Wall tɩ yɩ woto, a tagsda wakatã yell wʋsgo. (Tʋʋma 1:7) Woto yĩnga, a Pɛɛr kẽngda taoor n yetẽ: “A Zeova pa maasg a kãabgã wɛɛngẽ, wa neb kẽer sẽn get maasmã sẽn yaa to-to wã ye, la a yaa maag-m-meng soab ne yãmba, bala a pa tʋll tɩ ned ba a yembr sãam ye, la a tʋllame tɩ neba fãa paam n tek yam n kos sugri.” (2 Pɛɛr 3:9 NW ) Sẽn yaa lebend ne ninsaalbã, Wẽnnaam pa pẽdgd n maand yɛlã wala wakatã ra zoet n basd-a lame ye. A sẽn yaa “wakat fãa Rĩma” yĩnga, a mii yɛlã fãa sõma n tõe bãng wakatã pʋgẽ, sasa ning sẽn zems n yɩɩd t’a tʋʋma na n naf neb nins b sẽn pakã.—1 Tɩmotɩ 1:17 NW.

A sẽn wilg bũmb ning sẽn kɩt tɩ wõnd wa Wẽnnaam yaa maasgã poore, a Pɛɛr kõo keoogr kãngã: “A Zeova daarã na n waa wa wagdre.” Sẽn dat n yeel tɩ kolg-n-togsã daar na n waa wakat ning nebã sẽn pa gũud-a wã kɛpɩ. Dẽ, verse rãmb nins sẽn pʋgdã pʋsẽ, a Pɛɛr wilga b rãmb nins sẽn na n puk “yel-manesem sẽn yaa sõma la wẽn-zoeer tʋʋma” saagr kãsengã, n yetẽ tɩ b tõe n põsame n kẽ Wẽnnaam kãabg “yĩngr paalgã la tẽn-paalgã” pʋgẽ.—2 Pɛɛr 3:10-13, NW.

Yão wã segd n kɩtame tɩ d tall naneb n yɩɩd Wẽnnaam bʋ-kaoorã sẽn nan pa wa wã yĩnga. A maag-m-menga kɩtame tɩ d wa bãng a raabã la d manes d vɩɩmã sẽn na yɩl n paam a bark nins a sẽn kãabã. Rẽ yĩnga, d pa segd n ges ‘Zusoaba sẽn maand sũ-mara wala d fãagr’ sɩda? Woto la a Pɛɛr togs-yã. (2 Pɛɛr 3:15) Baasg zãnga, bũmb a to n be Wẽnnaam maag-m-mengã pʋgẽ.

Kongrã segd n pidame

D sã n zãmsd Wẽnnaam pĩnd yel-manesmã ne ninsaalbã wɛɛngẽ, d yãtame t’a nong n yõkda a bʋ-kaoorã hal n tɩ ta wakat ning remsg saagr sẽn ye kae. Sẽn tɩ loe ne Wẽnnaam bʋ-kaoorã Kana rãmbã zutu, wala makre, a reng n wilga b yel-wẽna a Abrahaam hal sẽn kaoose. La a bʋ-kaoorã wakat pidsg ra nan pa ta rẽ wẽnd ye. Bõe yĩnga? ‘Tɩ bõe, Amoor dãmba [Kana rãmba] wẽnem nan ka ta a tɛk nand ye,’ bɩ wala a Knox lebgrã sẽn yetã: “Amoor dãmbã tʋʋm-wẽnsã nan pa pid n ta a tɛk ye.”—Sɩngre 15:16.a

Baasg zãnga, yʋʋm 400 loogr poore, Wẽnnaam bʋ-kaoorã waame, la a Abrahaam yagensã sẽn yaa Israɛll rãmbã reega tẽngã. Kana neb bilf bal n da põs b yel-manesmã la b tʋʋmã yĩnga, la bãmb wʋsg sẽn yɩɩd talla tʋʋm-dẽgd maaneg sẽn loog noore, wala rũndã-rũndã tẽn-vaeesgã tuub sẽn wilgã. B ra maanda raoolem la poglem balengo, wẽn-doog pʋgẽ yoob la kamb maoongo. A Halley’s Bible Handbook yetame: “Tẽn-vaeesdb nins sẽn tu Kana galʋ-tẽns raboodã ra sʋkda b mens bũmb ning sẽn kɩt tɩ Wẽnnaam da pa sãam-b hal pĩnd sẽn yɩɩd woto.” Baasgẽ wã, Kana rãmbã ‘wẽnem taa a tɛka’. B tʋʋm-wẽnsã da ‘pidame n ta a tɛka.’ Ned ba a ye da pa tar bʋʋm n na n dõd Wẽnnaam t’a pa tʋm tɩrg wakat ning a sẽn kõ sor tɩ b yɩlg tẽngã la a sẽn fãag b rãmb nins sẽn puk manesem tɩrga ye.

D nee bũmb sẽn wõnd woto a Nowe wakatẽ wã. Baa nebã sẽn da yaa nin-wẽns nand tɩ Sa-kãsengã ta wã, ne ninbãan-zoeere, Wẽnnaam da rɩka sard tɩ b wakatã ra na n paasa yʋʋm 120 a taaba. Wakat kãng babgẽ, a Nowe sõgena wala “tɩrlem koe-moaanda.” (2 Pɛɛr 2:5) Wakatã sẽn da loogdã, wõnda b wẽnemã da piuugdame. “Wẽnnaam yãame tɩ dũniyã yaa wa bũmb sẽn põoge, Tɩ bõe, ninsaalba fãa ra maanda wẽng dũniyã zugu.” (Sɩngre 6:3, 12) B ‘wẽnemã ta a tɛka’, wakatã loogr ra kɩtame tɩ b tags-wẽnsã pid n puugi. Wẽnnaam sẽn kẽes a toogã wakate, a ra tara bʋʋm tɩ seke. Neb a nii bal n da yaa nin-tɩrs Wẽnnaam nifẽ, la a fãag-b lame.

Yaa makr a woto me la d tõe n yã Wẽnnaam sẽn tʋm ne Israɛll nebã. Baa ne b sẽn tall manesem sẽn pa zems la rẽgd manesmã, Wẽnnaam talla maag-m-meng ne-b yʋʋm kobs pʋgẽ. Kɩbarã yetame: “Zusoab [“a Zeova,” NW ] Wẽnnaam da tʋma neb tɩ b tɩ sagl-ba n ka bas ye; tɩ bõe, Wẽnnaam da zoeta b neba . . . nimbãanega. La b . . . ka nand Wẽnnaam goama ye. La b paooga Wẽnnaam no-rɛɛsdba hal tɩ Wẽnnaam sũur wa yik ne b neba tɩ manegr kaẽ ye.” (2 Kɩbaya 36:15, 16) Nin-buiidã ra taa zĩig ning tɩ remsg ra pa tõe yɛs ye. Ra yaa a Zeremi la neb a wãn bal n da tõe n paam fãagre. B ra pa tõe n yeel tɩ Wẽnnaam yaa kɛgr soab a sẽn baas n wa ne bʋ-kaoor b zutã ye.

Wẽnnaam sẽn na n kẽes a toogã wakat taame

Mak-kãensã d sẽn yã wã sõngdame tɩ d bãng tɩ Wẽnnaam sẽn gãt masã yɛl siglgã bʋ-kaoorã yaa sẽn na yɩl bal tɩ wakatã pidi. B wilga woto ne noor ning b sẽn kõ Wẽnnaam makr bʋ-kaood pidsdã: “ ‘Bɩ y rɩk yãmb goeegã n wʋr dũniyã vigne biisa t’a bɩɩ zãnga.’ La malɛkã rɩka a goeegã n wʋr dũniyã viyn biis n ning Wẽnnaam sũ-puugr vẽ wẽkr koglg kãsenga pʋgẽ.” Ges-y tɩ ãdem-biisã wẽnemã “bɩɩ zãnga,” sẽn dat n yeel t’a ra taa a zug tẽn-sʋk tɩ lebs-n-maneg pa ye tõe ye. Wẽnnaam sã n kaood bʋʋdo, sãmbg pa na n zĩnd t’a sẽn kẽes a toogã zemsame ye.—Wilgri 14:18, 19.

Wala d sẽn yã zugẽ wã, yaa vẽeneg tɩ Wẽnnaam sẽn na n kao dũniyã bʋʋdã tog n kolgame, bala, dũni wã talla zʋgd n kɩt tɩ Wẽnnaam kao bʋʋd pĩnda. D sẽn get zĩig ning fãa, tẽngã pida ne nin-kɛglem, wala sẽn deng a Nowe wakatẽ Sa-kãsengã. Nebã yel-manesem lebgd n paasda wala b sẽn bilg tɩ be Sɩngre 6:5 wã “Wakat fãa, ninsaalba yam ne b sũy tagsg fãa yaa wẽng bala.” Yel-wẽn-kãsems nins meng sẽn kɩt tɩ Wẽnnaam wa ne bʋ-kaoor Kana rãmbã zutã bee zĩig fãa rũndã-rũndã.

Rẽ yaa zall hal sẽn sɩng ne Dũni gill Pipi Zabrã, ãdem-biisã bãnga toeeng sẽn sãamd sũuri. B yãa tẽngã sẽn mad ne neb milyõ rãmb zɩɩm. Zabre, buud tõr sãoongo, terorism, bi-beer la tõog-kɩɩsg ra pida dũniyã gill fãa. Kom, bãas la raglem pida d dũniyã. Bũmbã fãa yaa vẽeneg n wilgdẽ tɩ masã d vɩɩ zãmaan wẽngã sʋk a Zezi sẽn yeel tɩ: “Mam yeta yãmb sɩda tɩ zãmaan kãnga kõn loog ye, hal tɩ bõn-kãens fãa paam pidsgu.” (Matɩe 24:34) Dũni wã pidsda “a wẽnemã” tɩ ta a tɛka masã, “dũniyã viyn biisa” bɩtame n dat wʋrbo.

Masã la wakat y sẽn segd n tʋme

Bʋ-kaoorã wakat sẽn kolgdã yĩnga, tʋm-tʋmd a Zã ra paama vʋʋsem sõng vẽnegr n yeel tɩ bɩʋʋng a yiib n na n zĩndi. Sẽn paase, “ned ninga sẽn maand tʋʋm wẽnse, bɩ a kell n maan tʋʋm wẽnse; ned ninga sẽn yaa rẽgdo, bɩ a kell n maan dẽgdo.” La sẽn yaa lebende, “ned ninga sẽn yaa tɩrga, bɩ a kell n maan tɩrlem; ned ninga sẽn yaa sõngo, bɩ a kell n zĩnd sõmblem.” (Wilgri 22:10, 11) Yaoolem yel-kãensã sẽn maandã tɩ loee ne dũni gill Biiblã zãmsg tʋʋmd a Zeova Kaset rãmbã sẽn maandã. Tʋʋm-kãngã bõn-datl yaa zãms nebã Wẽnnaam sẽn baood tɩ b maan sẽn na yɩl tɩ b ges-b wa neb sẽn segd n paam vɩɩm sẽn-kõn-sa. Masã tʋʋm-kãngã taa tẽns 233 tigims 87 000 maasem yĩnga.

Wẽnnaam pa maasg ye. Ne maag-m-menga, a kõo ned kam fãa wakat ning sẽn segdã sẽn na yɩl n “yeelg nedemd paalgã” tɩ zems ne a kãabsã. (Efɛɛz rãmba 4:24, NW) Rũndã-rũndã, baa ne yɛlã sẽn lebgd wẽng n paasd dũni wã pʋgẽ, Wẽnnaam ket n gũudame. A Zeova Kaset rãmbã sẽn be dũniyã gill zugã maanda b sẽn tõe tɛk fãa sẽn na yɩl n taas b yagsã bãngr sẽn tar n debd vɩɩm sẽn-kõn-saẽ wã. (Zã 17:3, 17) Yaa ne sũ-noog la yʋʋmd fãa sẽn yɩɩd neb 300 000 sakd sɩdã la b reegd lisgu.

Vɩɩm sẽn-kõn-sa wã sẽn be d yamẽ yĩnga, masã pa yalsg wakat ye, la yaa tʋʋm wakate. Bala ka la bilfu, d na n yãa a Zezi kãabgã pidsg sẽn yaa: “Ned ninga fãa sẽn vɩ n tẽed maam, a kõn ki abada ye.”—Zã 11:26.

[Footnotes]

[Picture on page 6]

B ra togsa Wẽnnaam bʋ-kaoor pidsdã t’a tẽeg goeegã tẽngã viyn biis sã n wa bɩ wakate

[Picture on page 7]

Dũni wã gill fãa a Zeova Kaset rãmbã sõngda nebã tɩ b wa paam Wẽnnaam bark sẽn ka saabã