Roagdba, Bõe Zãmsg La Yãmb Makrã Kõta?
“Bɩ yãmb yɩ Wẽnnaam togs-n-taas wa kom-nongdse, la y kẽn ne nonglem.”—EFƐƐZ RÃMBA 5:1, 2.
1. Sor-wilgr bʋs buud la a Zeova kõ pipi kẽed-n-taas nins sẽn yaa ninsaalbã?
A ZEOVA la zak Sɩngda. Zak fãa belem bee ne yẽ, bala a lugla pipi zakã la a kõ pipi kẽed-n-taas nins sẽn yaa ninsaalbã rogem tõodo. (Efɛɛz rãmba 3:14, 15, NW ) A kõo a Ãdem ne a Hawa no-kãsemse, tɩ b bãng b zɩɩbã sẽn yaa b rãmba, la a ye kõ-b sor tɩ b tũnug ne b toorẽ yam wʋsg n pids zɩɩb kãense. (Sɩngre 1:28-30; 2:6, 15-22) A Ãdem ne a Hawa sẽn maan yel-wẽndã poore, yɛl nins zagsã sẽn da segd n mao ne wã gĩd n paasame. Baasg zãnga, ne nonglem, a Zeova kõo sor-wilgr sẽn da na n sõng a sõgen dãmbã tɩ b mao ne yɛl a woto.
2. a) Ne bõe tũnugr la a Zeova paas saglsã sẽn gʋlsã pãng ne no-goam zãmsgã? b) Sʋk-bʋg la roagdbã segd n sʋk b mense?
2 A sẽn yaa tõnd Karen-saam Kãsengã, a Zeova maana sẽn yɩɩd kõ sor-wilgr sẽn gʋlse, sã n yaa ne tõnd sẽn segd n maan bɩ d sẽn pa segd n maana. Pĩnd wẽndẽ wã, a naaga zãmsg sẽn gʋlsã ne zãmsg b sẽn kõ ne no-goamã n tũnug ne maan-kʋʋdbã la no-rɛɛsdbã la zak soben dãmbã. Ãnd la a tũnugd ne rũndã-rũndã n kõt zãmsg a woto ne no-goama? Yaa kẽem dãmb la roagdb sẽn yaa kiris-nebã. Yãmb sã n yaa roagda, yãmb maanda y tʋʋmd n zãmsd y zakã a Zeova soyã bɩ?—Yelbũna 6:20-23.
3. Bõe la zak soben dãmbã tõe n zãms a Zeova nengẽ, sã n yaa ne kõ zãmsg sõma wã wɛɛngẽ?
3 Wãn-wãn la b segd n kõ zãmsg a woto zak pʋgẽ? A Zeova kõta mak-sõngo. A togsda sẽn yaa sõma la sẽn yaa wẽng vẽenega, la a togsd n yɩlemda wʋsgo. (Yikri 20:4, 5; Tõodo 4:23, 24; 5:8, 9; 6:14, 15; Zozue 24:19, 20) A tũnugda ne sʋgsg sẽn wat ne tagsgo. (Zoob 38:4, 8, 31) Ne bilsg la neb sẽn sɩd vɩɩmd magsa tũnugri, a nekda tõnd yĩn-sidsã n toeemd d sũyã. (Sɩngre 15:5; Daniɛll 3:1-29) Roagdba, y sã n wa zãmsd y kambã, y modgdame n dɩkd togs-n-taar ne mak-kãngã bɩ?
4. Bõe la d zãmsd a Zeova nengẽ, sã n yaa ne kiblgã kũun wɛɛngẽ, la bõe yĩng tɩ kiblgã tar yõodo?
4 A Zeova yaa pa-vigsd soab ne sẽn yaa tɩrga, la a yaa wʋmd ne pa-zems-zãngã pãn-tusdga. Woto yĩnga, nand t’a wa ne sɩbgre, a zãmsdame la a kõt ninsaalbã sẽn pa zems zãngã keoogr la tẽegr n yɩlem. (Sɩngre 19:15, 16; Zeremi 7:23-26) A sã n kibendẽ, a maand-a-la ne tɩrlem, a pa maand tɩ loog ye. (Yɩɩl Sõamyã 103:10, 11; Ezai 28:26-29) Sã n yaa woto la d maand ne d kambã, rẽ wilgda vẽeneg tɩ d mii a Zeova, la na n yɩɩ nana n yɩɩd ne bãmb me tɩ b bãng-a.—Zeremi 22:16; 1 Zã 4:8.
5. Bõe la roagdbã tõe n zãms a Zeova nengẽ sã n yaa ne kelgrã wɛɛngẽ?
5 Wala yĩngr Ba sẽn tar nonglem, a Zeova kelgda sõma-sõma. A pa kõt noy bal ye. A raoonda tõnd tɩ d togs-a d sũurẽ yɛlã. (Yɩɩl Sõamyã 62:9) La yĩn-sids nins tõnd sẽn wilgdã sã n pa zems kɛpɩ, a pa zĩnded saasẽ n tãs ye. A zãmsda tõnd ne sũ-mare. Woto yĩnga, ad tʋm-tʋmd a Poll sagl-kãngã sɩd zemsa sõma: “Bɩ yãmb yɩ Wẽnnaam togs-n-taas wa kom-nongdse”! (Efɛɛz rãmba 4:31-5:1) Ad sɩd yaa mak-sõng tɛkẽ la a Zeova kõ roagdbã, b sẽn baood n na n zãms b kambã sasa! Yaa mak-sõng sẽn kẽed tõnd sũyã la sẽn kɩtd tɩ tõnd rat n kẽn a vɩɩm sorã zugu.
Mak-sõng sẽn tar pãn-tusdg ningã
6. Wãn-wãn la roagdbã yel-manesem la b makr tar pãn-tusdg b kambã zutu?
6 Zãmsg ne no-goamã toor sẽn ka be, makr tara pãn-tusdg kãseng kom-bɩɩsã zutu. Roagdbã nong tɩ b pa nong me, b kambã na n dɩka b togs-n-taare. Tõe n yɩɩ roagdbã noogo, wakat ninga tõe n sãama b sũya, b sã n wʋmd b kambã sẽn yet bõn-yood bãmb mensã sẽn yeele. Roagdbã manesem sã n pukd naneb sẽn yaa kãseng ne tẽebã yɛla, rẽ tara pãn-tusdg sẽn yaa sõma kambã zutu.—Yelbũna 20:7.
7. Roagd mak-bʋg buud la a Zɛfte bas n kõ a bipuglã, la rẽ wa n baasa ne bõe?
7 B bilga roagdbã makr sẽn womd biis ninsã sõma Biiblã pʋgẽ. A Zɛfte a Zeova sẽn tũnug ne t’a lʋɩ Israɛll taoor n tõog Amonit rãmbã ra yaa ba me. A sẽn leok Amon rĩmã to-to wã kɩbar wilgdame t’a Zɛfte ra segd n yaa ned sẽn da nong n karemd kʋdemd yɛl nins sẽn tɩ loe ne a Zeova manesmã ne Israɛllã. A ra tõe n goma kʋdemd yel-kãens yell nana-nana, la a wilga tẽeb sẽn tar pãng ne a Zeova. Sãmbg sẽn ka be, a mak-sõnga sõnga a bipuglã t’a bɩɩs tẽeb la maan-m-meng maoong yam sẽn kɩt t’a rɩk a mengã n kõ a Zeova n sõgen-a a vɩɩmã tõr rakõt pʋgẽ.—Bʋkaoodba 11:14-27, 34-40; mak-y ne Zozue 1:8.
8. a) Manesem sõma bʋs la a Sãmwɛll roagdbã puk-yã? b) Wãn-wãn la rẽ naf a Sãmwɛlle?
8 A Sãmwɛll yɩɩ togs-ta-sõng a sẽn da yaa biiga, la kɩs-sɩd soab ne Wẽnnaam, a sẽn da wa n lebg no-rɛɛsã a vɩɩmã tõr pʋgẽ. Yãmb ratame tɩ y kambã yɩ wa yẽ bɩ? Vaees-y mak-sõng ning a Sãmwɛll roagdb a Ɛlkana la a Ana sẽn kõ wã. Baa ne yɛlã sẽn da pa zems zãng b zakẽ wã, wakat fãa b ra kẽngda Sɩlo n tɩ balem, zĩig ning balengã sɛk roog sẽn da beẽ wã. (1 Sãmwɛll 1:3-8, 21) Ges-y a Ana sẽn pʋʋs ne yĩn-sidg kãseng ningã. (1 Sãmwɛll 1:9-13) Ges-y bãmb b yiibã sẽn ges pʋleng fãa b sẽn maan Wẽnnaamã pidsgã yõod sẽn ta zĩig ninga. (1 Sãmwɛll 1:22-28) Sãmbg sẽn ka be, b mak-sõngã sõnga a Sãmwɛll t’a bɩɩs zʋg-sõma sẽn kɩt t’a yɩ nin-tɩrg a vɩɩmã pʋgẽ, baa neb nins sẽn da gũbg yẽ sẽn da yet tɩ b sõgenda a Zeova wã sẽn pa wilg waoogr ne Wẽnnaam soyã. Wakat n zĩnd t’a Zeova kõ a Sãmwɛll zɩɩb t’a yɩ A no-rɛɛsa.—1 Sãmwɛll 2:11, 12; 3:1-21.
9. a) Zak pʋgẽ pãn-tusd bʋs n yɩ sõma a Tɩmote zugu? b) A Tɩmote lebga nin-bʋg buudu?
9 Yãmb ratame tɩ y biribl yɩ wala a Tɩmote, sẽn da yaa bi-bɩɩg sẽn lebg tʋm-tʋmd a Poll tʋmd-n-taagã bɩ? A Tɩmote ba wã ra pa tẽed ye, la a ma wã ne a yaab-poakã kõo mak-sõngo, sã n yaa ne tẽebã yɛl naneb wɛɛngẽ. Sãmbg sẽn ka be, rẽ yɩɩ yẽbgr sẽn sõng a Tɩmote a kiris-nedemdã vɩɩm pʋgẽ. B yeela tõnd t’a ma a Enis la a yaab-poak a Loiis ra tara ‘tẽeb sẽn ka tar pʋ-lika.’ B sẽn da yaa kiris-nebã, ra pa ne belgem-belgem ye. B sɩd vɩɩmdame tɩ zems ne bũmb ning b sẽn yet tɩ b tẽedame wã, la b zãmsa bi-bɩɩg a Tɩmote t’a maan woto. A Tɩmote wilgame t’a ra zemsa ne bas-yardo, la t’a sɩd ra baooda neb a taabã yɩ neere.—2 Tɩmote 1:5, NW; Filip rãmba 2:20-22.
10. a) Yɩng mak-bʋs n tõe n tall pãn-tusdg tõnd kambã zutu? b) Manesem bʋg la d segd n talle, pãn-tusdg kãens sã n pukd tõnd kambã goamẽ la b yel-manesmẽ?
10 Pa makr nins fãa sẽn tar pãn-tusdg tõnd kambã zutã n yit zakẽ wã ye. B karemda ne kamba, b tara karen-saam dãmb tʋʋmd sẽn yaa toeem kambã sẽn nan pa mi yɛl wʋsgã yam, neb n be n tagsd sõma-sõma tɩ ned fãa segdẽ lame n sak buud bɩ zãma wã minungã, ɛspoorã nin-bɛd n be tɩ b kilsd b tõogrã zĩig fãa wã, tɩ zãma wã nin-bɛd manesem b sẽn yiisd kɩbayẽ wã beẽ. Kamb milyõ rãmb me maana kaset ne zabrã nen-kɛglem. Segd n linga tõndo, pãn-tusd kãensã sã n pukd tõnd kambã goamẽ bɩ b yel-manesmẽ bɩ? B sã n maand woto, tõnd manesem yaa wãn-wãna? Tãsg bɩ toom goam la yellã tɩɩm bɩ? Walla tɩ d yik d sũur tao-tao ne d kambã, sẽn são yaa d sẽn na n sʋk d mens woto: ‘Bũmb n be a Zeova manesmã ne tõndã pʋgẽ sẽn tõe n sõng maam tɩ m bãng m sẽn na n maan to-to yel-kãngã taoor bɩ?’—Mak-y ne Rom dãmba 2:4.
11. Roagdbã sã n konge, wãn-wãn la rẽ tõe n tall pãn-tusdg b kambã yel-manesem zugu?
11 Yaa sɩda, roagdb sẽn pa zems zãng pa na n tall manesem sẽn yaa sõma n yɩɩdã wakat fãa yɛlã taoor ye. B na n kongame. Kambã sã n yã rẽ, na n booga b waoogrã ne b roagdbã bɩ? Tõe n yɩɩ woto, sẽn yɩɩd fãa roagdbã sã n mak n wilg tɩ bãmb mensã beegr pa yell n wilg b zu-sobendã ne toom. La tõe n yɩɩ toor wʋsgo, roagdbã sã n yaa sik-m-mens rãmb la b sakd n deeg b kongrã nana-nana. Rẽ wɛɛngẽ wã, b tõe n kõo mak-sõng sẽn tar yõod wʋsg b kambã sẽn segd n zãms n maan wa bãmba wã.—Zak 4:6.
Tõnd mak-sõngã sẽn tõe n zãms bũmb ningã
12, 13. a) Bõe la kambã segd n zãms n bãng nonglmã wɛɛngẽ, la wãn-wãn la b tõe n zãms rẽ tɩ yɩ sõma n paase? b) Bõe yĩng tɩ tar yõod tɩ kambã paam zãmsg nonglmã wɛɛngẽ?
12 Zãmsg toor-toor sẽn tar yõod wʋsg la b tõe n zãms kambã tɩ yɩ sõma n yɩɩda, zãmsg ne no-goamã sã n naag ne mak-sõngo. Ges-y bãmb b wãna.
13 Wilg-y nonglem sẽn ka rat-m-yembre: Zãmsg nins sẽn tar yõod n yɩɩdã a yembr b sẽn segd n keng ne mak-sõng yaa nonglmã võore. “Tõnd nongame, [Wẽnnaam] sẽn deng n nong tõnda yĩnga.” (1 Zã 4:19, NW ) Yaa yẽ la nonglem mak-sõng sẽn yɩɩd fãa wã Yẽgre. Nonglem kãngã, sẽn yaa agapɛ sẽn tik noy zutã bee Biiblã pʋgẽ sẽn yɩɩd naoor 100. Yaa zʋg-sõng ning sẽn kɩtd tɩ b bãng kiris-neb hakɩkã n welgã. (Zã 13:35) D segd n wilga nonglem kãng ne Wẽnnaam la a Zezi Kirista. Ninsaalbã segd n wilg-a-la ne taab me, baa ne ninsaalb nins tõnd sẽn pa tar zood ne wã. (Matɩe 5:44, 45; 1 Zã 5:3) Nonglem kãng segd n zĩnda tõnd sũyẽ wã, la a yɩ vẽeneg tõnd vɩɩmã pʋgẽ, tɩ d yaool n tõog n zãms-a d kambã sõma. Tʋʋm tara pãn-tusdg n yɩɩd goama. Zakã pʋgẽ, kambã ratame n yã la b vɩɩmd nonglmã la zʋg-sõma nins sẽn tɩ loe ne-a wala sũurẽ nonglmã. Bõn-kãensã sã n kaẽ, biig bɩʋʋng tõe n paama gɩdgr yĩngã, tagsgã la yĩn-sidgã wɛɛngẽ. Kambã ratame me n yã nonglmã la sũurẽ nonglmã sẽn pukd sõma kiris-nebã sʋk to-to, tɩ pa tũ ne zakã pʋgẽ ye.—Rom dãmba 12:10; 1 Pɩɛɛr 3:8.
14. a) Wãn-wãn la b tõe n zãms kambã tɩ b maan tʋʋmd sẽn yaa sõma sẽn kõt sũ-noogo? b) Wãn-wãn la b tõe n maan woto yãmb zakã pʋgẽ?
14 Zãms-y b sẽn segd n tʋm to-to: Tʋʋmd yaa vɩɩmã nen-kãsenga. Sẽn na yɩl tɩ ned nong a menga, a segd n zãmsame n tʋm tʋʋmd t’a yɩ sõma. (Koɛɛg Soaba 2:24; 2 Tesalonik rãmba 3:10) B sã n kõ biig tʋʋm t’a maane, t’a yaool n da pa paam wilgr tɩ seke, tɩ b zab-a rẽ poor t’a pa tʋmd tʋʋm-kãens sõma, sã n pa gũusi a pa na n bãng tʋʋmd tʋm tɩ yɩ sõma ye. La kambã sã n sɩd zãmsd n tʋmd ne b roagdbã, tɩ b pẽgd-b wa sẽn zemse, rẽ, tõeeme tɩ b sɩd wa tõog n bãng b sẽn na n tʋm tʋʋmd to-to t’a kõ-b sũ-noogo. Roagdbã mak-sõng sã n naag ne võor-wilgri, kambã na n zãms n bãnga tʋʋmd maaneg yembo, la b na n bãnga zu-loees welgr me, b sẽn na n pẽdg tʋʋmd pʋgẽ hal t’a wa sa to-to, la b zãms b sẽn na n tags la b rɩk sard to-to. Sã n yaa woto, b tõe n sõnga kambã tɩ b bãng t’a Zeova me tʋmdame, t’a tʋmda sõma, la t’a Zezi rɩkda a Ba wã togs-n-taare. (Sɩngre 1:31; Yelbũna 8:27-31; Zã 5:17, NW ) Zak sã n tʋmda koob tʋʋmd bɩ a maanda koosem, zakã neb kẽer tõe n tʋma ne taaba. Bɩ ma wã tõe n zãmsa a biriblã bɩ a bipuglã tɩ b bãng rɩɩb seglgo la teed pɛgb rɩɩb poore. Ba wã tʋʋmd sã n pa be yirã, a tõe n yãka wakat n tʋm tʋʋm zakã pʋgẽ ne a kambã. Ad sɩd bee nafr wʋsgo, roagdbã sã n pa baoodẽ bal tɩ b maan tʋʋm kẽer zĩig pʋgẽ, la b segend kambã vɩɩmã yĩnga!
15. Wãn-wãn la b tõe n kõ tẽeb pʋgẽ zãmsgo? Kõ-y makre.
15 Tall-y tẽeb namsgã taoore: Tẽebã me yaa tõnd vɩɩmã neng sẽn yaa kãsenga. B sã n sõsd tẽebã zug zak pʋgẽ zãmsgẽ, kambã tõeeme n zãms n bãng a võorã wilgri. B tõeeme me n bãng yel-sɩd sẽn kɩtd tɩ tẽeb sɩngd n bɩt b sũyã pʋsẽ wã. La b sã n ne b roagdbã sẽn wilgd tẽeb sẽn pa vigsd mak-toos taoorã, a pãn-tusdgã bãmb zugã tõe n kaoosa b vɩɩmã tõre. Panama, Biibl zãms sɩd n da yet-a t’a na n dig-a lame n yiis zakẽ wã, a sã n pa bas a Zeova sõgenego. Baasg zãnga, ne a kom-bõoneg a naasã, wakat fãa, a ra kẽnda nao kɩlometr 16, rẽ poore a rɩkda biis n maan kɩlometr 30 n kẽng Rĩung Roog ning sẽn pẽ n yɩɩdẽ wã. B sẽn paam daoolg ne mak-sõng kãngã, zakã neb sẽn na ta 20 n sak sɩdã sore.
Kõ-y mak-sõng n karemd Biiblã daar fãa
16. Bõe yĩng tɩ b sagendẽ tɩ zakã tall daar fãa Biibl karengo?
16 Minung nins sẽn tar yõod n yɩɩdã a yembr zak fãa sẽn tõe n lugli, minung sẽn na n naf roagdbã la a yɩ mak-sõng n kõ kambã tɩ b rɩk togs-n-taar ne woto yaa Biiblã kareng wakat fãa. Sã n tõe fãa, bɩ y karem Biiblã daar fãa. Pa b sẽn karem wʋsg to-to wã n tar yõod n yɩɩd ye. Sẽn be yõod n yɩɩd yaa b sẽn karemd-a wakat fãa wã, la b sẽn karemd-a to-to wã. Sã n yaa ne kambã, Biiblã kareng tõe n naaga ne Mam Biibl kɩbay sebrã kelgr ne kasɛt dãmba, b sã n bee yãmb buud-gomdẽ wã. Wẽnnaam Gomdã kareng daar fãa sõngda tõnd tɩ d ket n lʋɩɩsd Wẽnnaam tagsa wã taoore. La sẽn paas ne nebã yembr-yembr sẽn karemd Biiblã, zakã neb fãa sã n lagemd taab n karemd-a me, rẽ tõe n sõnga zakã tõr neb tɩ b kẽn a Zeova soyã pʋsẽ. Yaa minung kãngã la b sagl tɩ b tall “Wẽnnaam vɩɩm sorã” Tigis-kãsemsẽ dram ning sẽn yaa Zagsã: Kɩt-y tɩ Biiblã kareng daar fãa yɩ y vɩɩm manesem! pʋgẽ.—Yɩɩl Sõamyã 1:1-3.
17. Wãn-wãn la zak pʋgẽ Biibl karengã la verse yẽgã zãmsg ne zug sõngd tɩ b tũ saglg ning sẽn be Efɛɛz rãmb 6:4 pʋgẽ wã?
17 Biiblã kareng zakã pʋgẽ zemsa ne tʋm-tʋmd a Poll sẽn gʋls a lɛtr ning vʋʋsem sõngã sẽn vẽneg a sẽn taas kiris-nebã Efɛɛzã, n yet woto wã: “Ba rãmba, bɩ y ra kãbg y kambã sũy ye, la bɩ y ket n wubd-b a Zeova kiblgã la a tagsgã zãmsg pʋgẽ.” (Efɛɛz rãmba 6:4, NW ) Rẽ võor yaa bõe? “Tagsgã zãmsg” rat n yeela sɩd-sɩd tɩ “ning f yamẽ.” Woto, b sagenda ba rãmb nins sẽn yaa kiris-nebã tɩ b ning a Zeova Wẽnnaam tagsgã b kambã sũyẽ, sẽn na yɩl n sõng kambã tɩ b bãng Wẽnnaam tagsã. Raool kambã tɩ b zãms verse yẽgã ne zug tõe n sõnga ne rẽ maanego. Bõn-datlã yaa paam t’a Zeova tagsgã wilg kambã tagsg sore, sẽn na yɩl tɩ bilf-bilf bɩ b tʋlsmã la b yel-manesmã wa puk Wẽnnaam noyã, roagdbã sã n bee ne kambã tɩ b pa be ne-ba. Woto yaa bũmb sẽn yẽbg Biiblã zugu.—Tõodo 6:6, 7.
18. D sã n wa karemd Biiblã, bõe n tõe n yaa tɩlae sẽn na yɩl a) n wʋm a võor vẽenega? b) n dɩ sagls nins a sẽn tarã nafre? d) n maan tɩ zems ne bũmb a sẽn pukd a Zeova raabã wɛɛngẽ wã? e) n dɩ bũmb ning a sẽn yet nebã yel-manesem la b tʋʋmã wɛɛngẽ nafre?
18 Yaa sɩda, tõnd sã n dat tɩ Biiblã tall pãn-tusdg d vɩɩmã pʋgẽ, d segd n wʋma a sẽn yet bũmb ningã võore. Ne neb wʋsgo, rẽ tõe n baoodame tɩ b karem zĩis kẽer tɩ yɩɩg vugri. Sẽn na yɩl n wʋm goam kẽer võore, tõe tɩ d segd n gesa gom-biis gom-biis-võor sebrẽ bɩ Perspicacité grâce aux Écritures sebrã pʋgẽ. Verse wã sã n tar saglg bɩ noore, rɩk-y sẽk n gom yɛl tõnd wakatã wɛɛngẽ sẽn kɩt tɩ verse kãng zemse. Rẽ poore, y tõe n sʋkame: ‘Tõnd sã n tũ sagl-kãngã wãn-wãn la a tõe n naf-do?’ (Ezai 48:17, 18) Verse wã sã n gomd a Zeova raabã neng a yembr yell bɩ y sʋke: ‘Wãn-wãn la rẽ mat tõnd vɩɩmã?’ Tõe tɩ y karemda kɩbar sẽn gomd neb yel-manesem la b tʋʋm yelle. Vɩɩmã weoogr bʋs la b ra segda? Wãn-wãn la b mao ne-ba? Wãn-wãn la b makrã tõe n naf tõndo? Wakat fãa bɩ y bao sẽk n sõs kɩbarã võor sẽn ya a soab tõnd rũndã-rũndã vɩɩmã pʋgẽ zugu.—Rom dãmba 15:4; 1 Korẽnt dãmba 10:11.
19. D sã n yaa Wẽnnaam togs-n-taase, bõe la d na n kõt d kambã?
19 Ad sɩd yaa manesem sẽn be rasãnd sẽn na yɩl n paam tɩ Wẽnnaam tagsgã kẽ d yamã la d sũyã! Woto na n sɩd sõnga tõnd tɩ d lebg “Wẽnnaam togs-n-taas wa kom-nongdse.” (Efɛɛz rãmba 5:1) La d na n kõo mak-sõng sẽn na n sɩd zems ne d kambã na rɩk togs-n-taar ne-a.
Y tẽrame bɩ?
◻ Wãn-wãn la a Zeova mak-sõngã tõe n naf roagdbã?
◻ Bõe yĩng tɩ kambã zãmsg ne no-goamã segd n naag ne roagdbã mak-sõng kũuni?
◻ Zãms-bʋs sẽn yaa sõma n yɩɩd la roagdbã togs-n-ta-sõng zãmsd b kambã?
◻ Wãn-wãn la d tõe n dɩ Biiblã kareng zakã pʋgẽ nafr tɩ pidi?
[Picture on page 16]
Neb wʋsg karemda Biiblã daar fãa ne b zakã rãmba