D Sõng Nebã Tɩ B Pẽneg A Zeova

“Ned ka tõe n ta m Ba nengẽ a sã n ka mam maasem yĩng ye.”—ZÃ 14:6.

1. A Zezi sẽn vʋʋgã kõ a karen-biisã no-bʋgo, la a Zeova Kaset rãmbã sẽn sak no-kãngã wã biis yɩɩ bõe?

A ZEZI KIRIST kõo a karen-biisã noor tɩ b “maan neba buud fãa tɩ b yɩ mam karen-biisi n lis bãmb ne Ba la Biiga la Sɩɩg Sõng yʋʋre.” (Matɩe 28:19) Yʋʋm piigã sẽn nan loogã pʋgẽ, a Zeova Kaset rãmbã sõnga sẽn yɩɩd neb milyõ a tãab tɩ b wa Wẽnnaam nengẽ, n wa lis-ba, tɩ rẽ yɩ makr tɩ b rɩka b mens n kõ-a sẽn na yɩl n maan a raabã. Ad d sũy sɩd yaa noog tɩ d sõng-b tɩ b pẽneg Wẽnnaam!—Zak 4:8.

2. Baa ne nin-paals wʋsg sẽn deegd lisgã, yaa bõe n zĩndi?

² Baasg zãnga, tẽns kẽer pʋsẽ b sẽn lis karen-bi-paals wʋsgo, Rĩungã koe-moondb fɩɩgr sẽn zem woto pa zĩnd ye. Yaa sɩda, d segd n sõda sẽn maan-b kaalmã n bãng a võore. B sã n pʋɩ tɩ zemse, yʋʋmd fãa yaa ned a yembr koabg zug n maand kaalem. La yʋʋm a yẽebã sẽn nan loogã, kẽer n leb poorẽ bʋʋm kẽer yĩnga. Bõe yĩnga? Sõs-kãngã la sẽn pʋgd-a wã na n vaeesa d sẽn tõe n tak nebã tɩ b kẽng a Zeova nengẽ to-to, la bʋʋm kẽer sẽn tõe n wa kɩt tɩ kẽer lʋtẽ wã.

Tõnd moonegã bõn-datla

3. a) Wãn-wãn la tẽn-tʋmd ning b sẽn bobl a Zezi karen-biisã yaa yembr ne malɛk ning yell b sẽn gom Wilgri 14:6 pʋgẽ wã rẽnda? b) Manesem bʋg n yɩ sõma sẽn na yɩl n nek nebã ratem ne Rĩungã koɛɛga, la zu-loɛɛg bʋg n be?

³ ‘Sɛɛbã wakat’ kãngã, a Zezi karen-biisã tara tẽn-tʋmd sẽn yaa yelg ‘bãngr hakɩkã’ sẽn tɩ loe ne ‘rĩungã koe-noogo.’ (Daniɛll 12:4, NW; Matɩe 24:14, NW ) B tẽn-tʋmdã yaa yembr ne malɛk ning sẽn “tara Koe-noog sẽn ka sɛta n na n moon neb nins sẽn be dũniyã soolem fãa la buud fãa la goam toɛ-toɛya fãa la neba fãa” wã. (Wilgri 14:6) Sẽn pak zãmaan kãngã neb wʋsg yaa dũniyã yɛla. Naoor wʋsgo, manesem sẽn yaa sõma n yɩɩd sẽn na yɩl tɩ nebã wilg ratem ne Wẽnnaam Rĩungã la d sõng-b tɩ b pẽneg a Zeova yaa d sẽn na n togs-b vɩɩm sẽn-kõn-sa tẽng zug arzãnẽ wã saagre. Baa ne woto sẽn zemsã, neb nins sẽn lagemd Wẽnnaam sõgen dãmbã sẽn na yɩl n paam n kẽ Arzãnẽ wã bal pa paam n kɩ yẽg so-sẽk ning sẽn tar n debd vɩɩmã zĩigẽ wã ye.—Matɩe 7:13, 14.

4. Sã n yaa ne a Zezi ne malɛk ning sẽn yɩgd yĩngr tẽn-sʋkã, tõnd moonegã tʋʋmd bõn-datl yaa bõe?

⁴ A Zezi yeelame: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” (Zã 17:3) Malɛkã sẽn yɩgd yĩngr tẽn-sʋkã togsda “Koe-noog sẽn ka sɛta,” la a yet neb nins sẽn be tẽngã zugã tɩ: “Bɩ y zoe Wẽnnaam la y waoog bãmba; tɩ bõe, bãmb bʋʋd kaoob wakat taame. Bɩ y waoog sẽn naan-a yĩngri la tẽnga ne ko-kãsenga la ko-bundsã.” (Wilgri 14:7) Woto yĩnga, tõnd sẽn moond koe-noogã bõn-datl meng-meng yaa d sõng nebã tɩ b pẽneg a Zeova, Kirist Zezi maasem yĩnga.

Tõnd zĩig a Zeova tʋʋmdã pʋgẽ

5. A Poll ne a Zezi gom-bʋs n wilgd tɩ yaa a Zeova tʋʋmd la tõnd sẽn tʋmdã, lakae pa tõnd tʋʋmde?

⁵ A sẽn wa n gʋlsd a kiris-nin-zaeeds a taabã, tʋm-tʋmd a Poll goma “zems-taab tʋʋmd” yelle, n yetẽ tɩ Wẽnnaam da zemsda neb ne a mengã, a Zezi Kirist yao-n-dɛɛk maoongã maasem yĩnga. A Poll yetame tɩ yaa “wala Wẽnnaam sã n da maanda bõosg n tũnugd ne tõndo,” la tɩ wala “Kirist lɛdgba, tõnd bõosdame: ‘Bɩ y zems ne Wẽnnaam.’ ” Ad sɩd yaa tagsg sẽn noogd sũuri! Tõnd yaa neb sẽn zae n yaa “ãmbasadɛɛr dãmb Kirist zĩigẽ” bɩ d yaa neb b sẽn tʋm sẽn tar saagr n na n vɩɩmd tẽngã zug me, d pa segd n yĩm abada tɩ yaa a Zeova tʋʋmd lakae pa tõnd tʋʋmd ye. (2 Korẽnt dãmba 5:18-20, NW ) Sɩd yaa Wẽnnaam n takd nebã la a zãmsd neb nins sẽn wat Kirist nengẽ wã. A Zezi yeelame: “Ned ka tõe n wa mam nengẽ tɩ ka m Ba sẽn tʋma maama n bool-a ye. La mam na n vʋʋga yẽnda yaoolem daare. A gʋlsa Wẽnnaam no-rɛɛsdba sɛba pʋsẽ yaa: ‘Bãmb fãa na n paama zãmsg Wẽnnaam nengẽ.’ Woto yĩnga, ned ninga fãa sẽn wʋm m Ba koɛɛga n deeg bãmb zãmsgã, a wata mam nengẽ.”—Zã 6:44, 45.

6. Wãn-wãn la a Zeova reng n dĩmsd tẽn-tẽnsã, la wakat kãng pʋgẽ, ãnd n paamd koglg a balengã ‘roogẽ’?

⁶ Yaoolem day kãensã, wãn-wãn la a Zeova tak nebã la a pak “tẽeb kʋɩleng[a]”? (Tʋʋma 14:27; 2 Tɩmote 3:1) Manesem kãseng a ye sẽn sõngd ne rẽ ya a sẽn tʋmd a Kaset rãmbã tɩ b moond a fãagrã koɛɛga, la a koɛɛg sẽn tɩ loe ne a bʋ-kaoorã sẽn wat yɛl siglg wẽng kãngã zugã. (Ezai 43:12; 61:1, 2) Mooneg kãngã b sẽn maand dũniyã gill zugã reng n yaa rĩmsg ne tẽn-tẽnsã. Rẽ yaa bãnd sẽn wilgd rĩmsg bʋ-kaoor ning sẽn wat ka la bilfã. Wakat kãng pʋgẽ, b yiisda neb nins sẽn “tar yõod” Wẽnnaam nifẽ wã yɛl siglg kãngã pʋgẽ tɩ b wat n paamd koglg a baleng hakɩkã ‘roogẽ.’ Yaa woto la a Zeova pidsd a bãngr-goam nins a Azze sẽn gʋlsã: “M na n digimda buuda fãa soolem tɩ b bõn-neeba wa ka tɩ m dooga pid ne arzɛgse (ziiri, NW ).”—Azze 2:6, 7; Wilgri 7:9, 15.

7. Wãn-wãn la a Zeova pakd nebã sũyã, la a tũnugd ne a Biriblã n takd nebã n wat a meng nengẽ?

⁷ A Zeova pakda wẽn-zoɛtb kãensã sũyã, sẽn na yɩl tɩ b “kelg yɛl nins [a Kaset rãmbã] sẽn togsã.” Yaa bãmb la “tẽn-tẽnsã fãa bõn-sõma wã.” (Azze 2:7, NW; Tʋʋma 16:14, NW ) Wala yʋʋm kob-yendẽ wã, wakat-wakate a Zeova tũnugda ne a malɛk rãmbã n teesd a Kaset rãmbã pʋ-peelem dãmb nins sẽn yãbd n baood a sõngrã nengẽ. (Tʋʋma 8:26-31) Nebã sã n bãng Wẽnnaam sẽn tũnug ne a Biribl a Zezi Kirist n dɩk segl-kãsems nins b yĩngã, a Zeova nonglmã takd-b lame n kẽng a nengẽ. (1 Zã 4:9, 10) N-yẽe, Wẽnnaam takda nebã n wat yẽ mengã la a Biriblã nengẽ, A “sõmblem d sẽn pa segd ne wã,” bɩ a “kɩs-sɩd nonglmã” maasem yĩnga.—Zeremi 31:3, NW.

Ãnd dãmb la a Zeova takd n wat a nengẽ?

8. Yaa nin-bʋs buud la a Zeova takd n wat a nengẽ?

⁸ Yaa neb nins sẽn baood a Zeova wã la a takd n wat a mengã la a Biriblã nengẽ. (Tʋʋma 17:27) Neb nins sẽn “wõosd n yãbd bõn-wẽns nins sẽn maand” dũni kiris-nedemdã la dũniyã gill zugã bee nin-kãens sʋkã. (Ezekɩɛll 9:4) B “miimi tɩ b tara tẽeb ratem.” (Matɩe 5:3, NW ) Sɩda, yaa bãmb la “tẽnga sik-m-mens rãmba,” sẽn na n zĩnd tẽng zug arzãnẽ wã wakat sẽn-kõn-sa yĩngã.—Sofoni 2:3.

9. Wãn-wãn la a Zeova tõe n yã nebã sã n “bee yam-sõng pʋgẽ vɩɩm sẽn-kõn-sa wã yĩnga,” la wãn-wãn la a takd-b n wat a nengẽ?

⁹ A Zeova tõe n karma ned sũuri. Rĩm a Davɩɩd yeela a biribl a Salomo woto: “Zusoaba feesda neba sũyã n mi tõnd fãa tagsgo la d ratem. Fo sã n bao bãmba, fo na n yã-b lame.” (1 Kɩbaya 28:9) A Zeova tikda ned sũur la a yamã halhaale, bɩ a manesem ning sẽn tar pãng n yɩɩdã n bãng rao bɩ pag sã n sɩd na n saka Wẽnnaam seglsã a sẽn dɩk yel-wẽnã sugr kũuni, la vɩɩm sẽn-kõn-sa wã saagr Wẽnnaam yɛl siglg paalgã pʋgẽ wã yĩngã. (2 Pɩɛɛr 3:13) Ne a Gomdã a Kaset rãmbã sẽn moond la b zãmsd nebã maasem, a Zeova takda ‘neb nins fãa sẽn be yam-sõng pʋgẽ vɩɩm sẽn-kõn-sa wã yĩngã’ n wat a mengã la a Biriblã nengẽ, tɩ nin-kãensã ‘tẽeda.’—Tʋʋma 13:48.

10. Bõe n wilgd t’a Zeova sẽn takd neb kẽer n wat a nengẽ n bas neb a taabã pa bũmb sẽn deng n pʋlem?

¹⁰ A Zeova sẽn takd neb kẽer n wat a nengẽ n bas neb a taabã yaa bũmb sẽn deng n pʋlem bɩ? Abada lae! Wẽnnaam sẽn takd nebã bee ne bãmb mensã raabo. A pa modgd ned t’a maan bũmb tɩ pa tũ ne a soabã yam daab ye. Yãkr ning a Zeova sẽn tẽgen dũniyã neb taoor rũndã-rũndã wã yaa yembr ne a soab ning a sẽn da tẽgen Israɛll nebã taoor sẽn yɩɩd yʋʋm 3000 sẽn loogã, a Moiiz sẽn wa n yeel tɩ: “Mam wilgda yãmb vɩɩm ne sũ-noogo la kũum ne toogo. . . . Dũnda, mam boonda yĩngr ne tẽnga tɩ b wa yɩ kaset dãmb tõnd sʋka tɩ mam wilga yãmb vɩɩm ne kũum la bark ne kãab wẽnse. Bɩ y sak vɩɩm tɩ yãmb ne y yagensa tõe n vɩɩnde. La y nong Zusoab a Wẽnnaam la y sak bãmb koɛɛga n gãd bãmba. Yaa woto la yãmb na n vɩɩnd n paam yõ-woko.”—Tõodo 30:15-20.

11. Wãn to la Israɛll nebã ra segd n yãk vɩɩmã?

¹¹ Bãng-y tɩ Israɛll nebã ra segd n yãka vɩɩm n ‘nong a Zeova, n sak a koɛɛgã la b gãd-a.’ B sẽn da wa n togs gom-kãensã wã tɩ Israɛll nebã ra nan pa paam Kãabg Tẽngã ye. B ra bee Moaab zĩ-lamẽ wã n da segend b mens n na n pasg Zʋrdẽ Kʋlgã n kẽ Kana. Baa ne sẽn da zems ne bãmb tɩ b tags “tẽn-sõng sẽn yaa bedr[e],” tẽng ‘sẽn tar bĩisim ne sɩɩd wʋsgã’ yellã, b ra na n paama b sẽn gẽegd bũmb ningã pidsgu, b sã n da nong a Zeova, n sakd a koɛɛgã, la b gãt-a. (Yikri 3:8) A Moiiz togsa rẽ vẽeneg n yeel woto: “Yãmb sã n sak Zusoab a Wẽnnaam tõod nins mam sẽn kõt yãmb dũnda wã, la y nong Zusoabã n tũ bãmb sora la y sak bãmb noora ne b tõoda la b minundã, yãmb na n vɩɩmdame n lebg wʋsgo. Zusoab a Wẽnnaam na n ninga yãmb ne tẽng ninga yãmb sẽn na n kẽ n sooga barka.”—Tõodo 30:16.

12. Bõe la Israɛll nebã makr segd n zãms tõnd d moonegã la d zãmsgã tʋʋmd wɛɛngẽ?

¹² Tõnd sẽn yã tɩ loogã pa zãmsd tõnd bũmb d moonegã la d zãmsgã tʋʋmd wɛɛngẽ saabã wakat kãngã pʋgẽ sɩda? D tagsda Arzãnã sẽn wata yelle, la d gomd a yell d ministɛɛrã pʋgẽ. La tõnd bɩ karen-biis nins d sẽn maandã pa na n yã kãabg kãngã pidsgu, sã n mikame tɩ tõnd bɩ bãmb sõgenda Wẽnnaam ratem yembr yĩng ye. Wala Israɛll nebã, tõnd la neb nins d sẽn zãmsdã segd n zãmsame n ‘nong a Zeova, n sakd a koɛɛgã, la d gãt-a.’ D sã n tẽegd rẽ yell d ministɛɛrã pidsg sasa, d na n sɩd lagem n tʋma ne Wẽnnaam n tak nebã n wa a nengẽ.

Wẽnnaam tʋmd-n-taase

13, 14. a) Sã n yaa ne 1 Korẽnt dãmba 3:5-9, wãn-wãn la d lebgd tʋmd-n-taas ne Wẽnnaam? b) Ãnd la b segd n waoog fɩɩgr buud fãa sẽn wa yĩnga, la bõe yĩnga?

¹³ A Poll bilga lagem-n-tʋm ne Wẽnnaamã ne pʋʋg koobo. A gʋlsame: “Dẽ, a Apollos yaa ãnda, la a Poll yaa ãnda? Bãmb yaa tʋm-tʋmdba sẽn sõng yãmb tɩ y tẽ wa sẽn zems Zusoaba sẽn kõ ned kam fãa. Maam n sele, t’a Apollos zãgs koom, la Wẽnnaam n kɩt tɩ bɩ. Ned ninga sẽn senda ne ned ninga sẽn zãgsd kooma yaa yembre, la ned kam fãa na n deega a meng keoore tɩ zems a meng tʋʋmde. Tɩ bõe, tõnd yaa tʋmd-n-taas ne Wẽnnaam. Yãmb yaa Wẽnnaam pʋʋgo, la b roogo.”—1 Korẽnt dãmba 3:5-9.

¹⁴ D sẽn yaa Wẽnnaam tʋmd-n-taasã, d segda ne kɩs-sɩd n sel ‘soolmã koɛɛg’ neba sũyẽ, tɩ rẽ poor bɩ d zãgs ratem buud fãa sẽn puk ne koom ne lebg-n-tɩ-ges rãmb la Biibl zãms rãmb sẽn segl sõma. Sã n mik tɩ tẽngã sẽn yaa nedã sũurã yaa sõma, a Zeova na n maana a rẽnd n kɩt tɩ Biiblã sɩd bõn-buud bɩ n lebg tɩɩg sẽn womd biisi. (Matɩe 13:19, 23) A na n taka nedã n wa a meng la a Biriblã nengẽ. Rẽnd d sã n na n gese, Rĩungã koe-moondb sõor fɩɩgr buud fãa yaa a Zeova tʋʋmdã nebã sũyẽ maasem yĩnga, n kɩtdẽ tɩ sɩdã bõn-buud bɩtẽ, la a takd neb a woto n wat a mengã la a Biriblã nengẽ.

Meeb tʋʋmd sẽn na n pa

15. Bilgr bʋg la a Poll tũnug ne n wilg d sẽn sõngd neb a taabã to-to tɩ b bɩɩs tẽebo?

¹⁵ Baa ne d sẽn kɩdemd ne fɩɩgrã, d rata ne d sũy fãa tɩ nebã ket n nong a Zeova, n sakd a koɛɛgã la b gãt-a. Kẽer sã n maag n base, d sũur sãamdame. Bũmb la d tõe n maan tɩ ra wa yɩ woto bɩ? Bilgr a to pʋgẽ, a Poll wilga d sẽn tõe n maan to-to n sõng neb a taabã tɩ b bɩɩs tẽebo. A gʋlsame: “Ned ka tõe n me yẽbgr a to ye, kal sẽn dag n me, sẽn yaa a Zezi Kirist. La ned sã n me yẽbgr kãng zug ne sãnem wala wanzũri wala kug sẽn yaa neer wʋsgo wala raado wala moodo wala kãnkãeyã, ned kam fãa tʋʋmd na n pukame. Daar kãng na n wilga a tʋʋmde; tɩ bõe, tʋʋma na n paama makr ne bugum, la bugum na n wilga ned kam fãa tʋʋmd sẽn yaa bũmb ninga.”—1 Korẽnt dãmba 3:11-13.

16. a) Wãn-wãn la bilsg a yiib nins a Poll sẽn dɩk n tʋma bõn-datɩ yaa toore? b) Wãn-wãn la tõnd meebã tʋʋmd na n wa baas n sãam d sũur n pa yals bugum makr taoore?

¹⁶ A Poll sẽn maan bilgrã sẽn tɩ loe ne pʋʋgã pʋgẽ, bɩʋʋngã bee ne f sẽn pa na n deem ne bʋdbã la koomã zãgsg wakat fãa, la ne Wẽnnaam barkã. Tʋm-tʋmdã bilgr a to wã wilgda tʋm-tʋmd sẽn yaa kiris-nedã zɩɩb sẽn ya a soab vẽeneg ne a meebã tʋʋmd sẽn lebgd bũmb ningã. A mee yẽbgr sẽn tar pãng zug ne meeb teed sẽn yaa sõma bɩ? A Poll keoogda woto: “Bɩ ned kam fãa gũus ne a sẽn met yẽbgr kãng zugã.” (1 Korẽnt dãmba 3:10) D sã n gom ne ned vɩɩm sẽn-kõn-sa Arzãn pʋgẽ yell n nek a ratem, tõnd zãmsgã pʋgẽ d sẽn wilgd n yɩɩd yaa zĩis nins rẽ sẽn tik Gʋlsg Sõamyã bãngr zugã, tɩ rẽ poor bɩ d wilg n tadg nedã sẽn segd n maaneg n paam vɩɩm sẽn-kõn-sa wã bal bɩ? Tõnd zãmsgã tõe n teka woto bal bɩ: ‘Yãmb sã n dat n vɩɩmd wakat sẽn-kõn-sa Arzãnã pʋgẽ, y segd n zãmsa Biiblã, n kẽng tigissã, la y kẽes y meng moonegã tʋʋmdẽ bɩ’? Sã n yaa woto, tõnd pa met nedã tẽeb yẽbgr sẽn yaa kãn-kãe zug ye, la tõnd sẽn metã tõeeme n pa yals kãn-kãe makrã sẽn yaa wa bugmã taoore, bɩ a tẽebã tõeeme n pa kaoos wʋsg ye. Sã n yaa ne vɩɩmã saag n paam Arzãnã pʋgẽ yĩng bal la d makd n tak nebã n kẽng a Zeova nengẽ, yʋʋm a wãn bal b sẽn na n dɩk n sõgen-a yĩnga, yaa wa d sẽn met ne “raado wala moodo wala kãnkãenyã.”

D kɩt tɩ b tall nonglem ne Wẽnnaam la ne Kirista

17, 18. a) Bõe n yaa tɩlae, ned sã n dat t’a tẽeb kaoose? b) Wãn-wãn la d tõe n sõng ned t’a paam tɩ Kirist zĩnd a sũurẽ wã?

¹⁷ Sẽn na yɩl tɩ tẽeb kaoose, rɩlla a tik zems-n-taar f mengã sẽn tar ne a Zeova Wẽnnaam a Zezi Kirist maasem yĩnga. D sẽn yaa ninsaalb sẽn pa zems zãngã, yaa ne Wẽnnaam Biriblã tũnugr bal la d tõe n paam zems-n-taar a woto ne Wẽnnaam. (Rom dãmba 5:10) Tẽeg-y t’a Zezi yeelame: “Ned ka tõe n ta m Ba nengẽ a sã n ka mam maasem yĩng ye.” Sẽn na yɩl n sõng neb a taabã tɩ b me tẽebo, “ned ka tõe n me yẽbgr a to ye, kal sẽn dag n me, sẽn ya a Zezi Kirist.” Rẽ baooda bõe maanego?—Zã 14:6; 1 Korẽnt dãmba 3:11.

¹⁸ Me Kirist sẽn yaa yẽbgrã zug rat n yeelame tɩ kõ zãmsg ne manesem sẽn kɩtd tɩ Biibl zãms bɩɩs nonglem sẽn yaa kãseng a Zezi yĩnga, a sẽn na n bãng sõma-sõma t’a Zezi yaa Fãagda, tigengã Zugu, Maan-kʋʋd Kãsem sẽn tar nonglem la Rĩm sẽn dɩt naam. (Daniɛll 7:13, 14; Matɩe 20:28; Kolos rãmba 1:18-20; Hebre dãmba 4:14-16) Rẽ rat n yeelame tɩ d maan t’a Zezi yɩ sɩd-sɩd b yamẽ wã hal t’a be b sũyẽ wã. Tõnd sẽn pʋʋsd b yĩngã segd n yɩɩ wala a Poll sẽn bõos Efɛɛz kiris-nebã yĩngã. A gʋlsame: “Mam yĩgimdeda tõnd Ba taoore, . . . tɩ Kirist na zĩnd yãmb sũyã pʋsẽ ne tẽebo; tɩ yãmb . . . kɩ yẽg n yẽbg nonglem pʋgẽ.”—Efɛɛz rãmba 3:14-17.

19. Tõnd sã n bɩɩs nonglem Kirist yĩng d Biibl zãms rãmbã sũyẽ, a segd n woma bõe biisi, la bõe la d segd n zãms-ba?

¹⁹ Tõnd sã n me ne manesem sẽn kɩtd tɩ nonglem ne Kirist bɩ d Biibl zãms rãmbã sũyẽ, yaa vẽeneg tɩ rẽ na n baas n bɩɩsa nonglem a Zeova Wẽnnaam yĩnga. A Zezi nonglmã, a yĩn-sidgã la a ninbãan-zoeerã yaa a Zeova zʋg-sõma wã pukr sɩd-sɩda. (Matɩe 11:28-30; Mark 6:30-34; Zã 15:13, 14; Kolos rãmba 1:15; Hebre dãmba 1:3) Woto, nebã sã n paam n bãng a Zezi la b nong-a, b na n paam n bãnga a Zeova la b nong-a.a (1 Zã 4:14, 16, 19) D segd n zãmsa Biibl zãms rãmbã tɩ Kirist sẽn maan bũmb ning fãa ãdem-biisã yĩngã yaa a Zeova n tʋm-a t’a wa maane, la d wilg-b tɩ rẽ kɩtame tɩ d segd n pʋʋs a Zeova barka, n pẽg-a la d balm-a t’a yaa “Wẽnnaam sẽn yaa tõnd fãagda.”—Yɩɩl Sõamyã 68:20, 21; Ezai 12:2-5; Zã 3:16; 5:19.

20. a) Wãn-wãn la d tõe n sõng nebã tɩ b pẽneg Wẽnnaam la a Biriblã? b) Bõe la d na n ges sõsg ning sẽn pʋgdã pʋgẽ?

²⁰ D sẽn yaa Wẽnnaam tʋmd-n-taasã bɩ d sõng nebã tɩ b pẽneg Wẽnnaam la a Biriblã, n sõng-b tɩ b bɩɩs nonglem la tẽeb b sũyã pʋsẽ. Woto a Zeova na n yɩɩ sɩd-sɩd ne-ba. (Zã 7:28) Ne Kirist tũnugri, b na n tõogame n lugl zood ne Wẽnnaam, la b na n nong-a lame la b gãd-a. La nonglmã yĩng na n kɩtame tɩ b tʋm wʋsg a sõgenegã pʋgẽ, n tall tẽeb t’a Zeova kãabs kãsemsã na n pidsa b wakate. (Wiisgu 3:24-26; Hebre dãmba 11:6) Baasg zãnga d sẽn sõngd neb a taabã tɩ b bɩɩs tẽebo, saagr la nonglmã sasa, d segd n mee tõnd mengã tẽeb t’a yaa wa batayo sẽn tar pãng n tõe n yals seb-bɛd sẽn pa nana taoore. D na n vaeesa rẽ sõsg ning sẽn pʋgdã pʋgẽ.

[Footnotes]

Lebg-n-gese

◻ Naoor wʋsgo, wãn-wãn la d nekd nebã ratem ne Rĩungã koɛɛga, la yel-bʋg n be rẽ pʋgẽ?

◻ Nin-bʋs buud la a Zeova takd n wa a mengã la a Biriblã nengẽ?

◻ Israɛll kõomã Kãabg Tẽngẽ wã ra bee ne bõe maanego, la bõe la rẽ zãmsd tõndo?

◻ Tʋʋm bʋg n zao tõnd zugu, sã n yaa ne sõng nebã tɩ b pẽneg a Zeova la a Biriblã wɛɛngẽ?

[Picture on page 10]

Baa ne d sẽn taasd neba vɩɩm sẽn-kõn-sa Arzãn pʋgẽ wã saagrã, tõnd sẽn dat n yɩɩd fãa yaa d tak-b n kẽng a Zeova nengẽ

[Picture on page 13]

Tõnd sã n segl neere, d lebg-n-tɩ-ges rãmbã tõe n woma biis sõma