D Vɩɩmd Ne Tẽeb Ne Wẽnnaam Kãabsã
“Mam yaa Wẽnnaam. Wẽnnaam a to ka be ye. Mam yaa Wẽnnaam sẽn ka to. Hal sɩngr wakate, mam wilga bũmb nins sẽn maan n loogã, la mam da reng n wilga bũmb nins sẽn nan ka maana me yelle.”—EZAI 46:9, 10.
1, 2. Tagsa toɛ-toɛ bʋs n be sã n yaa ne Wẽnnaam kẽes a toog tẽng zug yɛlẽ wã?
HAL sẽn ta zĩ-bʋg la Wẽnnaam kẽesd a toog tẽng zug yɛlẽ wã? Nebã tagsa yaa toɛ-toɛya. Kẽer tagsdame t’a pa tond n kẽes a toog ye. Sã n yaa ne bãmba, a sẽn naan ninsaal n sa wã bala, Wẽnnaam pa rat n kẽes a toog n sõng tõnd bɩ a pa tõe ye. Sã n yaa ne tags-kãngã, Wẽnnaam yaa wa ba sẽn zombg a biribl kut wed-paall n teel-a, n tus-a t’a rɩk sorã. Rẽ poor tɩ ba wã loog n bas-a. Yaa biriblã n bãngd a sẽn na n maanega. Tõe t’a lʋɩ, tõe t’a pa lʋɩ. Sẽn ya a soab fãa, yellã ye pa be ba wã nusẽ ye.
2 Tagsg a to me n yet tɩ Wẽnnaam tʋmdame n wilgd tõnd vɩɩmã neng fãa sore, la t’a kẽesda a toog bũmb ning fãa sẽn maand a naanegã pʋgẽ. Baasg zãnga, sã n yaa woto, sãnda na n baas n yeelame tɩ Wẽnnaam n wat ne sẽn yaa sõma wã, la a wat ne bi-beerã la yel-beedã me sẽn namsd ãdem-biisã. D sã n sɩd bãng Wẽnnaam manesmã sẽn yaa to-to, rẽ na n sõng-d lame tɩ d bãng bũmb nins d sẽn gũud t’a maana. Na n kɩtame me tɩ d tẽ n paas t’a kãabsã pidsg yaa waaziba.—Hebre dãmba 11:1.
3. a) Wãn-wãn la d mi t’a Zeova yaa Wẽnnaam sẽn yãkd raab n na n maane? b) Bõe yĩng tɩ b gomd a Zeova yell wala ned sẽn ‘yãkd’ la sẽn manegd a raabo?
3 Bõn-kãseng sẽn tɩ loe ne Wẽnnaam kẽes-m-mengã ninsaal yɛlẽ wã yaa t’a Zeova yaa Wẽnnaam sẽn yãkd raabo. Yaa woto la a yʋʋrã meng wilgda. “Zeova” rat n yeelame tɩ “A kɩtdame tɩ yɩ.” Ne manesem sẽn kẽngd taoor bilf-bilfu, a Zeova kɩtdame t’a mengã yɩ a kãabsã fãa Pidsda. Woto yĩnga, b gomda a Zeova yell wa ned sẽn ‘yãkd’ bɩ sẽn manegd a raabã sẽn tɩ loe ne beoog-daar yɛl bɩ tʋʋma. (2 Rĩm dãmba 19:25; Ezai 46:11, NW ) Gom-kãensã yita Hebre gom-biig ning sẽn yaa yatsar pʋgẽ, sẽn tɩ loe ne gom-biig ning võor sẽn yaa “yagda.” (Zeremi 18:4, NW ) Wala yagd mit sẽn tõe n dɩk yagd n maan la-neerã, a Zeova tõe n maaname, bɩ n wẽnemd yɛl tɩ b pids a raabã.—Efɛɛz rãmba 1:11.
4. Wãn-wãn la Wẽnnaam segl tẽngã tɩ ninsaal zĩnd a zugu?
4 Wala makre, Wẽnnaam yãka raab n yeel tɩ tẽngã ra na n yɩɩ sũ-noog zĩig sẽn be rasãnde, ninsaan-sakdb sẽn zems zãng sẽn da na n zĩnd a zugu. (Ezai 45:18) Hal sẽn deng wʋsg t’a nan pa naan pipi rao wã la pipi pagã, a Zeova segla yɛlã ne nonglem b yĩnga. Sɩngr sebrã pipi sags bilgda a Zeova sẽn maan wĩntoog la yʋngo, tẽn-koɛɛng la mogr to-to. Rẽ poore, a naana tɩɩsã la rũmsã. B sẽn segl tẽngã tɩ ninsaal vɩɩmd a zugã kaoosa yʋʋm tusa wʋsgo. Tʋʋmdã tõog n baasame. Pipi rao wã la pipi pagã sɩnga b vɩɩmã Edɛne, sẽn yaa arzãn sẽn kõt sũ-noog wʋsgo, sẽn da tar bõn-yood wʋsg sẽn kɩt tɩ vɩɩmã ra yaa noogã. (Sɩngre 1:31) Woto, a Zeova ra kẽesa a toog vẽeneg tẽng zug yɛlẽ wã, n manegd a tʋʋmã bilf-bilf a raabã sẽn be ziirã yĩnga. Ninsaalbã buud fɩɩgr kɩtame t’a ye pa kẽesd a toog bɩ?
A Zeova yãka koak a manesmã ne ninsaalbã pʋgẽ
5, 6. Bõe yĩng tɩ Wẽnnaam yãkd koak a manesmã ne ninsaalbã pʋgẽ?
5 A Zeova pa wilgd ninsaalbã tʋʋm yel-bõoneg fãa sor la a baood n soog-b ye, baa ne a sẽn tõe n maan woto wã. Bʋʋm n be rẽ yĩnga. Bʋʋm a yembr yaa tɩ b naana ninsaalbã Wẽnnaam wõneg pʋgẽ, tɩ b tar yam-daabo, n yaa neb sẽn so b mens n na n yãk b vɩɩm manesem. A Zeova pa modgd tõnd tɩ d tũ a noyã ye. D leb n pa robo rãmb ye. (Tõodo 30:19, 20; Zozue 24:15) Baa ne Wẽnnnaam sẽn get tɩ d segd n kolg n togsa d tʋʋmã yĩngã, ne nonglem, a kõo tõnd sor wʋsg sẽn na yɩl n dɩk sard ne d sẽn na n zã d vɩɩmã to-to.—Rom dãmba 14:12; Hebre dãmba 4:13.
6 Bʋʋm a to sẽn kɩt tɩ Wẽnnaam pa ningd a nug yell fãa sẽn wat pʋgẽ wã tɩ loee ne yell ning a Sʋɩtãan sẽn wa ne Edɛnã. A Sʋɩtãan kɩɩsa Wẽnnaam naam sẽn-ka-to wã. A kãaba a Hawa bũmb sẽn wõnd na n kõ-a-la sor t’a paam soog-m-menga, kãabg yẽ, rẽ poore a sɩd a Ãdem sẽn sake. (Sɩngre 3:1-6) Rẽ kɩtame tɩ Wẽnnaam me kõ ninsaalbã wakat tɩ b rɩ naam b toore, sẽn na yɩl n wilgi, a Sʋɩtãan kɩɩsgã sã n zemsame bɩ pa zemse. Bʋʋm kãng yĩnga, bõn-wẽns nins nebã sẽn maand rũnda-rũnda wã taal pa tõe n zomb Wẽnnaam ye. A Moiiz gʋlsa woto nin-kɩɩsdbã wɛɛngẽ: “Sã n yaa ne bãmba, b tʋma wẽnga; b pa [Wẽnnaam] kamb ye, b tara zanga.”—Tõodo 32:5, NW.
7. A Zeova raabã tẽngã la ãdem-biisã yĩng yaa bõe?
7 Baasg zãnga, ne a Zeova sẽn bas tɩ ninsaalbã tõe n yãk n maan b yam daabã, la a bas tɩ ninsaalbã rɩ naam soog-m-meng pʋgẽ wã, a pa yãk a toog fas-fas n bas tẽngã ne a yɛl ye. Sã n yaẽ-la woto, d ra pa na n paam saagr sõma-sõma t’a na n pidsa a kãabsã ye. Baa ne a Ãdem ne a Hawa sẽn kɩɩs Wẽnnaam naam sẽn-ka-to wã, a Zeova pa toeem a raabã sẽn tar nonglmã ne tẽngã la ãdem-biisã ye. Sãmbg sẽn ka be, a na n toeema tẽngã t’a lebg arzãn sẽn pid ne neb sẽn zems zãnga, n yaa sakdb sẽn tar sũ-noogo. (Luk 23:42, 43, NW ) Sẽn sɩng ne Sɩngr sebrã n tɩ tãag Wilgr sebrã, Biiblã kɩbar bilgda a Zeova sẽn tʋmd bilf-bilf to-to n na n pids raab kãngã.
Wẽnnaam tʋmdame n na n pids a raabã
8. Tall Israɛll nebã n kẽes Kãabg Tẽngẽ wã ra baooda bõe maanego?
8 Wẽnnaam manesmã ne Israɛll buudã wilgdame t’a na n tʋmame n pids a raabã. Wala makre, a Zeova kõo a Moiiz bas-m-yam t’A na n fãaga Israɛll nebã Ezipt n tall-b n tɩ kẽes Kãabg Tẽngẽ wã, sẽn yaa tẽng sẽn tar bĩisim la sɩɩd wʋsg sẽn zoet wa kooma. (Yikri 3:8) Woto ra yaa gom-kãseng sẽn kõt bas-m-yam. Rẽ ra baoodame tɩ b fãag Israɛll nin-kãens ne b tũud-n-taasã sẽn da zems milyõ a tãabã n yiis buud sẽn tar pãng sẽn da rat n gɩdg b loogrã nugẽ. (Yikri 3:19) Buud sẽn tar pãng wʋsg sẽn da na n gɩdg b kõomã n da be tẽng ning pʋgẽ b sẽn da na n tall-b n kẽngã. (Tõodo 7:1) Nand tɩ b ta tẽngẽ wã, rasempʋɩɩg n da be sʋk be, tɩ rɩɩb la koom yell na n pak Israɛll nebã beenẽ. Yel-kãngã kõo a Zeova sor t’a wilg a pãngã sẽn-ka-to wã la a Wẽndlmã.—Maankʋʋre 25:38.
9, 10. a) Bõe yĩng t’a Zozue ra tõe n kõ kaset tɩ d tõe n talla bas-yard ne Wẽnnaam kãabsã? b) Hal sẽn ta zĩ-bʋg la tar yõod tɩ d kɩs sɩd tɩ Wẽnnaam tõe n keoa a kɩs-sɩd sõgen dãmbã?
9 Wẽnnaam tũnuga ne tʋʋm sẽn yaa yel-soalem sẽn pʋg taab n yiis Israɛll neba Ezipti. Pipi, a waa ne sãoong tood piig Ezipt buudã zugu. Sẽn pʋgda, a welga Mog-Miuugã koom, n kɩt tɩ Israɛll nebã põse, tɩ Ezipt tãb-biisã sẽn da ra rigd-bã ki. (Yɩɩl Sõamyã 78:12, 13, 43-51) Rẽ poore, a gesa Israɛll nebã yell yʋʋm 40 b sẽn maan rasempʋɩɩgẽ wã sasa, n dɩlg-b ne mann, n kõ-b koom, hali n kɩt meng tɩ b futã pa ki, la tɩ b nao wã pa mod ye. (Tõodo 8:3, 4) Israɛll nebã sẽn wa n kẽ Kãabg Tẽngẽ wã poore, a Zeova kɩtame tɩ b tõog b bɛɛbã. A Zozue sẽn tall tẽeb kãseng ne a Zeova kãabsã ra maana nif kaset ne bõn-kãens fãa. Woto, a ra tõe n yeela a wakatẽ nin-kẽembã woto ne bas-yardo: “Yãmb bãngame la y miimi tɩ Zusoab a Wẽnnaam sẽn da yeel tɩ b na n maana bũmb nins fãa n kõ yãmbã, b maaname n ka tol n bas ba a ye tɩ vaal ye. Bãmb maana fãa, ba a ye ka pa ye.”—Zozue 23:14.
10 Wala a Zozue pĩnd wẽndẽ wã, rũndã-rũndã kiris-nebã kɩsa sɩd zãng fasɩ tɩ Wẽnnaam datame la a tõeeme n sõng neb nins sẽn sõgend-a wã. Tẽeb kãng sẽn pa vigsdã yaa tõnd tẽebã neng a ye sẽn yaa kãsenga. Tʋm-tʋmd a Poll gʋlsame: “Tẽeb sã n kaẽ, ned ka tõe n ta Wẽnnaam yam ye; tɩ bõe, ned ninga sẽn wat Wẽnnaam nengẽ, a tog n tẽeme tɩ . . . bãmb yaa neb nins sẽn baood bãmba roanda.”—Hebre dãmba 11:6.
Wẽnnaam deng n mii sẽn wat beoogo
11. Yel-bʋs n kɩtd tɩ Wẽnnaam tõe n pids a kãabsã?
11 Hal tɩ ta masã, d yãame tɩ baa ne Wẽnnaam sẽn kõt sor tɩ d wilg d yam daabã, la a bas tɩ ninsaal rɩt naamã soog-m-meng pʋgẽ wã, a tara pãnga, la a ratame n tʋm n pids a raabã. La bũmb a to n sõngd n kɩtdẽ tɩ Wẽnnaam kãabsã pidsdẽ tɩ sãmbg ka be ye. A Zeova tõe n deng n bãnga sẽn wat beoogo. (Ezai 42:9) Wẽnnaam tũnuga ne a no-rɛɛsã n yeele: “Tẽeg-y bũmb nins sẽn da zĩnd pĩnda yelle. Tɩ bõe, mam yaa Wẽnnaam. Wẽnnaam a to ka be ye. Mam yaa Wẽnnaam sẽn ka to. Hal sɩngr wakate, mam wilga bũmb nins sẽn maan n loogã, la mam da reng n wilga bũmb nins sẽn nan ka maana me yelle. La m yeelame tɩ m goama na n yalsame. La m na n maana m yam n baase.” (Ezai 46:9, 10) Wala ka-koaad sẽn mi a tʋʋmd sẽn mi wakat ning la zĩig ning a sẽn na n bʋd bõn-buudã, “Wakat fãa Rĩma” tõe n deng n bãnga wakat la zĩig ning takɩ a sẽn segd n maan bũmb n pids a raabã.—1 Tɩmote 1:17, NW.
12. Wãn-wãn la a Zeova wilg yɛl reng-n-bãng a Nowe wakatã?
12 Ges-y Wẽnnaam sẽn deng n wilg t’a mii yɛlã to-to a Nowe wakatã. Wẽngã sẽn da pid dũniyã zĩig zãng fãa wã yĩnga, Wẽnnaam dɩka sard sẽn pa vigsd n na n sãam ãdem-bi-kɩɩsdbã. A yãka wakat n na n maan woto, yʋʋm 120 wakat sẽn da wat pʋgẽ. (Sɩngre 6:3) A sẽn yãk wakat takɩ kãngã wã, a Zeova pa tags nin-wẽnsã sãoong a sẽn tõe n maan wakat buud fãa wã yell bal ye. A Zeova sẽn yãk yɛlã pidsg wakatã leb n kõo sor tɩ nin-tɩrsã na n paam fãagre. (Mak-y ne Sɩngre 5:29.) Ne a yamã, Wẽnnaam bãnga wakat ning a sẽn na n bobl tʋʋmd ning sẽn na n wa baas ne rẽ wã. Wakatã sẽn ta wã, A togsa a Nowe kɩbay n fasem tɩ seke. Ra yaa dũni gill sa-kãseng n da segd n sãam nin-wẽnsã, la a Nowe ra segd n kaa koglg “n fãag a yir dãmba.”—Hebre dãmba 11:7; Sɩngre 6:13, 14, 18, 19.
Meeb sẽn yaa me-kãsenga
13, 14. Bõe yĩng tɩ koglgã kaab ra yaa tʋʋm-saalg menga?
13 Mams-y n ges a Nowe sẽn da get tʋʋm-kãngã to-to. A Nowe sẽn da yaa Wẽnnaam nedã yĩnga, a ra miimi t’a Zeova ra tõe n sãama wẽn-kɩɩsdbã. Baasg zãnga, nand tɩ rẽ wa, tʋʋmd n da segd n deng n tʋme: ra yaa tʋʋmd sẽn baood tɩ f tall tẽebo. Koglgã kaab ra na n yɩɩ tʋʋm-kãsenga. Wẽnnaam wilga koglgã bedrem sẽn da segd n yɩ to-to takɩ. Koglgã woglem da segd n yɩɩga rũndã-rũndã ball tãoog zĩis sãnda, t’a zãntlmã ta etaaz a naas roogo. (Sɩngre 6:15) Koglgã kaadb ra yaa neb sẽn pa tar minim tʋʋmdã pʋgẽ, tɩ b sõorã ra yaa bilfu. B ra pa tar rũndã-rũndã tʋʋm-teedã sẽn yaa sõma wʋsgã ye. Sẽn paase, a Nowe sẽn da pa tõe n deng n bãng beoog yɛl wa a Zeova wã yĩnga, a ra pa tõe n bãng yɛl nins sẽn da tõe n sõng bɩ n gɩdg koglgã kaab tʋʋmd ye. Wõnda a Nowe tagsa yɛl wʋsg yelle. Wãn-wãn la b ra na n paam kaabã tʋʋm-teedo? Wãn-wãn la a ra na n n tigim dũmsã? Bõe rɩɩb n da yaa tɩlae, la a waooglmã ra segd n yɩɩ wãn-wãna? Pʋd n yaa wakat bʋg takɩ la Sa-kãseng b sẽn deng n togsã ra na n wa?
14 Yɛlã sẽn da yaa to-to yẽ ne nebã sʋkã me n da be. Wẽnemã ra yaa wʋsgo. Nifilim dãmbã sẽn tar pãngã, sẽn yaa malɛk rãmb la pagb kambã ra pidsa tẽngã ne nen-kɛglem. (Sɩngre 6:1-4, 13) Sẽn paase, koglgã kaab ra pa tʋʋmd b sẽn da tõe n solg n tʋm ye. Nebã ra sʋkdame n getẽ yaa bõe tʋʋmd la a Nowe sẽn da tʋmdã, la a ra togsd-b-la sẽn da yaa tʋʋmd ninga. (2 Pɩɛɛr 2:5) B ra tõe n gũume tɩ b pẽg tʋʋmdã bɩ? Yaa toogo! Yʋʋm a wãn sẽn deng rẽ, kɩs-sɩd soab a Enok ra moona nin-wẽnsã sãoongo. Nebã ra kisa a koɛɛgã hal tɩ Wẽnnaam ‘dɩk yẽnda,’ bɩ n kʋʋg a yõorã koɛɛga. Vẽenega, yaa sẽn na yɩl tɩ Wẽnnaam bɛɛbã ra kʋ-a ye. (Sɩngre 5:24; Hebre dãmba 11:5; Ziid 14, 15) A Nowe ra pa segd bal n moon koɛɛg woto buud nebã sẽn pa nong ye, la a ra segdame me n ka koglgo. Koglgã sẽn da kaadã, a ra yaa tẽegr sẽn yaa kãseng tɩ Wẽnnaam dɩka sard sẽn pa vigsd n na n sãam a Nowe wakatẽ nebã!
15. Bõe yĩng t’a Nowe ra tar bas-yard t’a ra tõe n pidsa a tʋʋmdã?
15 A Nowe ra miimi tɩ Wẽnnaam sẽn yaa Pãng sẽn-tõeyã-fãa soabã ra teenda tʋʋmdã la a ra ningd-a barka. Ra pa a Zeova mengã n bobl tʋʋmdã sɩda? A Zeova ra kõo a Nowe bas-m-yam tɩ yẽ la a zakã neb ra na n kẽe koglg b sẽn ka n sa pʋgẽ, n paam koglg dũni gill Sa-kãsengã sasa. Wẽnnaam wilgame meng tɩ rẽ yaa waaziba, n maan kãabg ne-a. (Sɩngre 6:18, 19) Wõnda a Nowe bãngame t’a Zeova ra reng n beoolame la a mag yɛl nins fãa sẽn da kẽed sʋkã, n yaool n bobl tʋʋmdã. Sẽn paase, a Nowe bãngame t’a Zeova ra tara pãng n na n kẽes a toog n sõng-a, sõngr daab sẽn da beẽ. Woto yĩnga, a Nowe tẽebã tus-a lame t’a tʋme. Wala a yageng a Abrahaam, a Nowe ra “tẽe hakɩɩka tɩ Wẽnnaam sẽn kãab bũmb ninga, bãmb tõe n pidsame.”—Rom dãmba 4:21.
16. Koglgã kaab sẽn da kẽngd taoorã, wãn-wãn la a Nowe tẽebã pãng paas-yã?
16 Yʋʋmã sẽn da loogd tɩ koglgã ra tar yikrã, a Nowe tẽebã pãng ra paama paasgo. Zu-loees nins sẽn tɩ loe ne koglgã kaabã la zu-loees nins sẽn tɩ loe ne tʋʋmdã siglgã ra paama tɩɩm. B tõoga yel-toodã. Gɩdgr ba a ye ra pa tõe n yals tʋʋmdã ye. A Nowe zakã neb paama a Zeova teelg la a koglgo. A Nowe sẽn kell n kẽng taoorã, ‘a tẽebã makr waa ne sũ-mare.’ (Zak 1:2-4) Koglgã kaab baas n saame, tɩ Sa-kãsengã wa, t’a Nowe la a zakã rãmb põse. A Nowe maana kaset ne Wẽnnaam kãabsã pidsg wa a Zozue sẽn maan kaset ne rẽ kaoosg zugẽ wã. A Nowe tẽebã paama keoobo.
A Zeova teenda tʋʋmdã
17. Wãn-wãn la tõnd wakatã wõnd a Nowe wakatã?
17 A Zezi reng n togsame tɩ tõnd wakatã ra na n wõnega a Nowe wakatã. Ye yaasa, Wẽnnaam dɩka sard kãn-kãe n na n sãam dũni wẽngã, la a yãka wakat ne rẽ sẽn na n wa wakat ningã. (Matɩe 24:36-39) A leb n dɩka segls n na n kogl nin-tɩrsã. A Nowe ra segd n kaa koglgo, la rũndã-rũndã Wẽnnaam sõgen dãmbã segd n moona a Zeova raabã, n zãms nebã a Gomdã, la b maan karen-biisi.—Matɩe 28:19.
18, 19. Wãn-wãn la d mi t’a Zeova teenda koe-noogã mooneg tʋʋmde?
18 A Zeova sã n da pa zĩndẽ ne a Nowe n teel-a la a sõng-a, koglgã ra pa na n kaẽ ye. (Mak-y ne Yɩɩl Sõamyã 127:1.) Woto me, sã n pa ne a Zeova sõngr yĩng fãa, kiris-nedemd hakɩkã kõn põsẽ, tɩ pa sʋkd a fɩɩgr ye. Yʋʋm kob-yendẽ wã a Gamaliɛll sẽn da yaa Fariziẽ la Tõogã karen-saamb b sẽn da waoogd wʋsgã ra sak n deega woto. Zʋɩf rãmba bʋ-kaoodb sul-kãseng sẽn da rat n sa ne tʋm-tʋmdbã, a keooga bʋ-kaoodb sull kãnga woto: “Bɩ y bas daop kãense n da maan bãmb bũmb ye. La yɛɛsg kãngã wala tʋʋm kãng sã n yaa neb rẽnda a na n yɩɩ zaalem. La a sã n yaa Wẽnnaam dẽnda, yãmb ka tõe t’a yɩ zaalem ye.”—Tʋʋma 5:38, 39.
19 Moonegã tʋʋmd tõogr yʋʋm kob-yendẽ wã la rũndã-rũndã wã wilgame t’a ra pa yit ninsaalb nengẽ ye, la yaa Wẽnnaam nengẽ. Sõsg ning sẽn pʋgdã na n goma yɛl sẽn be yamleoog la yɛl sẽn sõng n kɩt tɩ tʋʋm-kãngã tõog wʋsg zĩis wʋsg pʋgẽ woto wã yelle.
Ra tol-y n bas-y ye!
20. Ãnd n teend tõnd koe-noogã mooneg tʋʋmd pʋgẽ?
20 Baa ne d sẽn vɩ ‘wakat tood’ pʋsẽ wã, d tara kaset sẽn tar pãng sẽn wilgd tɩ yɛlã fãa bee a Zeova nugẽ. A teendame la a sõngd a sõgen dãmbã wakat ning b sẽn tʋmd n na n baas koe-noogã mooneg tɩ sasa ning Wẽnnaam sẽn yãk n na n baas yɛl siglg wẽng kãngã yaool n ta wã. (2 Tɩmote 3:1; Matɩe 24:14) A Zeova boonda tõnd tɩ d wa yɩ “tʋmd-n-taas” ne yẽ. (1 Korẽnt dãmba 3:9) Tõnd tara bas-m-yam me tɩ Kirist Zezi bee ne tõnd tʋʋm-kãngã pʋgẽ la tɩ d tõe n talla bas-yard ne malɛk rãmbã teelg la b sor-wilgri.—Matɩe 28:20; Wilgri 14:6.
21. Tẽeb kãn-kãe bʋg la d pa segd n bas abada?
21 A Nowe ne a zaka rãmb sẽn wilg tẽeb ne a Zeova kãabsã yĩnga, b fãag-b-la sa-kãsengã koomẽ. Rũndã-rũndã, neb nins sẽn wilgd tẽeb woto wã na n paama fãagr “to-kãsenga” sẽn watã pʋgẽ. (Wilgri 7:14) D sɩd vɩɩ wakat sẽn sɩd be yamleoog wʋsg pʋgẽ. Yel-kãsems n be taoor n watẽ! Wẽnnaam kẽes-m-mengã wakat pa loog ye! Ka la bilfu, Wẽnnaam na n waa ne sa-paals la tẽn-paalg sẽn tar ziiri, tɩ nin-tɩrsã na n zĩnd b pʋsẽ. (2 Pɩɛɛr 3:13) Ral tol-y abada n bas tẽeb kãn-kãe ning y sẽn tar tɩ bũmb ning fãa Wẽnnaam sẽn yetã, a tõeeme n pids-a ye.—Rom dãmba 4:21.
D sẽn segd n ning d yamẽ
◻ Bõe yĩng t’a Zeova pa baood n na n ning a nug ninsaal tʋʋmã yel-bõoneg fãa pʋsẽ?
◻ Wãn-wãn la a Zeova sẽn da tar tõog n na n pids a raabã yɩ vẽeneg a manesmã ne Israɛllã pʋgẽ?
◻ Wãn-wãn la a Zeova sẽn tar tõog n tõe n deng n bãng beoog-daarã yɩ vẽeneg a Nowe wakatã?
◻ Bas-yard bʋg la d tõe n tall ne Wẽnnaam kãabsã?