Tõog-y Y Vɩɩmã Pʋgẽ
“Sũ-noog soab la ned ning sẽn pa tũ nin-wẽnsã saglga . . . Bũmb ning fãa a sẽn maandã na n tõogame.”—YƖƖL SÕAMYÃ 1:1, 3, NW.
1. a) Wãn-wãn la kom-bɩɩs wʋsg get tõogrã dũniyã pʋgẽ? b) Wãn-wãn la Biiblã bilgd ned sẽn tõoge?
TÕOGRE. Yaa bõe la gom-bi-kãngã rat n yeel ne yãmba? “Mam bõn-datl sẽn yaa kãseng n yɩɩd fãa yaa m tõog ligd baoondã pʋgẽ,” woto la bi-bɩɩg togs-yã. Bipugl yeela woto: “Mam tʋlsem sẽn yɩɩd fãa yaa m paam zak pʋgẽ sũ-noogo.” La bipugl a to togsame: “Mam tʋlsem fãa yaa m paam do-neere, mobil-neere . . . Sẽn pak maam yaa m mengã.” Sẽn be yaa tɩ pa ligdi, pa kãadem bɩ nug tʋʋmd sẽn yaood sõma n wat ne tõogr hakɩkã ye. Yɩɩl Sõamyã 1:1-3, (NW ) pʋgẽ d karemda woto: “Sũ-noog soab la ned ning sẽn pa tũ nin-wẽnsã saglg ye . . . A maanda sũ-noog ne a Zeova noyã . . . Bũmb ning fãa a sẽn maandã na n tõogame.”
2. Yɛ la d tõe n paam tõogr hakɩkã, la yaa ne manesem bʋg bal la d tõe n paam-a?
2 Ka wã Biiblã kãabda bũmb ninsaal ba a yembr sẽn pa tõe n kõ ye: yaa tõogr sɩd-sɩdã! La a pa gomd tõogr ligdã wɛɛngẽ ye. Biiblã meng keoogda woto: “Ligd nonglem yaa bõn-wẽns buud fãa yẽgre.” (1 Tɩmote 6:10, NW ) Tõogr hakɩkã d paamd-a lame, d sã n noog a Zeova Wẽnnaam sũuri, t’a noyã tũub be sʋka. Yaa woto bal n tõe n kõ sũ-noog hakɩka! Tõe tɩ y sẽn mi tɩ y segd n saka a Zeova noyã, la b sẽn yet-y y sẽn segd n maan bũmb ningã pa noom-y ye. A Zezi yaool n yeelame: “Sũ-noog rãmb la neb nins sẽn mi tɩ b tara tẽeb ratmã.” (Matɩe 5:3, NW ) Yãmb ne rẽ tɩ y pa ne rẽ me, b naan-y-la ne tẽeb ratem: sẽn be rẽ sʋk yaa ratem sẽn kɩ yẽg wʋsg tɩ y rat n bãng Wẽnnaam la y wʋm a raabã võore. Woto yĩnga, y tõe n paama sũ-noog hakɩkã, y sẽn na n pids ratem kãens la y sak “a Zeova noyã” bala.
Bũmb ning sẽn kɩt tɩ d rat Wẽnnaam noyã
3. Bõe yĩng tɩ d sũy segd n yɩ noog tɩ d bas t’a Zeova ‘wilg d nao-yakmã sore’?
3 No-rɛɛs a Zeremi gʋlsa woto: “O Zeova, mam mii neer tɩ ninsaal sẽn yi tẽng tomẽ pa so a meng sor ye. Ninsaal sẽn kẽnd pa so a nao-yakemd sor wilgr meng ye.” (Zeremi 10:23, NW ) Yaa woto ne ninsaalbã fãa, kom-bɩɩs la nin-kẽemba. Pa d pa tar yam, minim la bãngr n na n wilg d mens nao-yakmã sor bal ye. D pʋd n pa tara sor ne rẽ. Wilgri 4:11 pʋgẽ, Biiblã yetame: “Tõnd Zusoaba la tõnd Wẽnnaam, yãmb n zems tɩ reeg pẽgre la waoogre la pãnga; tɩ bõe, yãmb n naan bũmb fãa, la yaa yãmb daaba yĩng la yãmb naan bãmb tɩ b beẽ.” A sẽn yaa tõnd Naandã yĩnga, a Zeova yaa “vɩɩmã yẽgre.” (Yɩɩl Sõamyã 36:9, NW ) A sẽn yaa d Naandã yĩnga, a mii tõnd sẽn segd n dɩk d vɩɩmã n tʋm to-to n yɩɩd ned a to buud fãa. Woto, a lugla noyã, pa sẽn na yɩl n sãam d sũ-noogã ye, la yaa sẽn na yɩl n sõng tõnd tɩ naf-do. (Ezai 48:17) Y sã n kɩɩs Wẽnnaam noyã fãa, bɩ y bãng tɩ y vɩɩmã pa na n yãk neng ye.
4. Bõe yĩng tɩ kom-bɩɩs wʋsg sãamd b vɩɩmã?
4 Wala makre, yãmb zoe n sʋka y meng n gese bõe yĩng tɩ kom-bɩɩs wʋsg sãam b vɩɩmã ne dorge, yoob la minim wẽns a taab woto sɩda? Yɩɩl Sõamyã 36:2, 3 wilgda woto: “Kɩɩsg gomda ne nin-wẽng a sũur pʋgẽ. Yẽ zãgsda Wẽnnaam n ka zoet bãmb ye. Tɩ bõe, a belgda a menga n ka rat tɩ ned yã a yel-wẽna n kisg-a ye.” B sẽn pa ‘zoet Wẽnnaam’ ne zoees sẽn yaa sõma wã yĩnga, kom-bɩɩs wʋsg belgda b mens n tagsdẽ tɩ b sã n tall kɩɩsg manesem me pa na n yɩ yell ye. La baasgo, b na n mika tɩlae tɩ no-kãngã sẽn pa toeemdã yaa sɩda: “Ned sẽn bʋt bũmb ninga, yaa bõn-kãng la a na n wʋke. Ned ninga sẽn bʋt yĩnga ratem yĩnga, a na n wʋka yĩnga ratem yaoodo sẽn yaa sãoongo; la ned ninga sẽn bʋt Sɩɩg Sõng yĩnga, a na n wʋka Sɩɩg Sõng yaoodo sẽn yaa vɩɩm sẽn ka sɛta.”—Galat dãmba 6:7, 8.
‘Rasmã sõdbo’
5, 6. a) Bõe yĩng tɩ kom-bɩɩsã segd n ‘sõd b rasmã,’ la rẽ maaneg rat n yeelame tɩ bõe? b) ‘Tẽeg d Naand Kãsengã yell’ rat n yeelame tɩ bõe?
5 Wãn-wãn la y tõe n tõog y vɩɩmã pʋgẽ n paam “yaoodo sẽn yaa vɩɩm sẽn ka sɛta”? A Moiiz gʋlsame: “Tõnd yʋʋma tõnd vɩɩm wakat yaa yʋʋm pis-yopoe, la yĩns keelem sã n beẽ, b tõe n taa pis-nii. . . . Bãmb loogda tao-tao, tõnd loogdame.” (Yɩɩl Sõamyã 90:10) Tõe tɩ y pa tagsd kũumã yell wʋsg bɩ baa-baa meng ye. Sɩda, kom-bɩɩs wʋsg maanda wala b ra pa tõe n ki ye. La a Moiiz togsda tõnd sɩd kãngã sẽn sãamd sũurã n wilgdẽ tɩ vɩɩmã yaa koɛɛga. Bũmb pa wilgd meng tɩ d na n sɩd taa yʋʋm 70 bɩ 80 ye. “Wakat la yel-lingdem” tõe n kʋʋga neb nins sẽn yaa kom-bɩɩs n tar laafɩ wã meng yõyã. (Koɛɛg Soaba 9:11, NW ) Rẽ, wãn-wãn la y na n dɩk vɩɩm sẽn tar yõod ning y sẽn tarã n tʋme? A Moiiz pʋʋsa woto: “Bɩ y wilg tõnd tɩ d sõd tõnd dasma neere tɩ d sũyã zãms yam.”—Yɩɩl Sõamyã 90:12.
6 Sõd yãmb dasma rat n yeelame tɩ bõe? Pa rat n yeel tɩ y segd n maana yɩɩr ne yʋʋm sõor nins y sẽn tõe n vɩɩmdã ye. A Moiiz ra pʋʋsdame t’a Zeova zãms A nin-buiidã tɩ b bãng b sẽn na n dɩk b vɩɩmã rasem sẽn ketã n tʋm to-to tɩ waoog Yẽ. Yãmb sõta y vɩɩmã rasma, n get raar fãa wala bũmb sẽn tar yõod wʋsg y sẽn segd n dɩk n tʋm n pẽg Wẽnnaam bɩ? Biiblã yeta kom-bɩɩsã tɩ b maan woto: “Rig sũ-pa-noom t’a loog n bas-fo, la f zãag f meng ne wẽnga. Tɩ bõe, yãadem ne bi-bɩɩlem wakat yaa zaalem. Tẽeg f naanda [Naand Kãsengã, NW ] yell f bi-bɩɩlem wakate.” (Koɛɛg Soaba 11:10–12:1) Tẽeg d Naandã yell yɩɩda d ra yĩm bal t’a beeme ye. Bi-bɛɛgã sẽn bõos a Zezi tɩ: “Yãmb sã n wa reeg y naama bɩ y tẽeg mam yelle,” a sẽn da rat t’a Zezi maan yɩɩda a yʋʋrã tẽegr bala. A ra ratame t’a Zezi maan bũmb n vʋʋg-a wɛ! (Luk 23:42; mak-y ne Sɩngre 40:14, 23; Zoob 14:13.) Woto me, tẽeg a Zeova yell baoodame tɩ d maan bũmbu, tɩ d maan sẽn tat a yam. B tõe n yeelame tɩ yãmb tẽegda a Zeova yell bɩ?
Gũus-y n da wa maan sũ-kiir ne wẽng maandbã ye
7. Bõe yĩng tɩ kom-bɩɩs sãnda yãk n na n yĩm b Naandã? Kõ-y makre.
7 Kom-bɩɩs wʋsg yãkdame n na n yĩm a Zeova, bala b tagsdame tɩ yɩ Kaset soab tara gɩdgr tɩ yaa n looge. Saam-biig sẽn be Ɛspayn tẽra a sẽn da tagsd to-to a sẽn da yaa bi-bɩɩg sasa woto: “M da nonga dũniyã, bala sɩdã ra wõnda toog la dem-dem. Ra yaa zĩndgu, zãmsgo, tigissẽ kẽngre, karvat ningri, la mam da pa nong bõn-kãensã ye.” Yãmb mi n tagsdame tɩ y kongda bũmb y sẽn sõgend Wẽnnaamã yĩng bɩ? Tõe tɩ na n ling-y lame tɩ y bãng tɩ Biiblã gʋlsdb a yembr n tags woto. D bõos tɩ y lak y Biiblã n karem Yɩɩl Sõamyã 73 soaba.
8. Bõe yĩng t’a Azaf ra ‘maand sũ-kiir ne wuk-m-mens rãmba’?
8 Bɩ d vaees yɩɩn-kãngã goamã ball-balle. Verse a 2 la a 3 yetame: “Kella bilf bala tɩ mam nao wã yõsge; mam nao wã da rat n salgame. Tɩ bõe, mam da maanda sũ-kiir ne wuk-m-mens rãmba mam sẽn yã nin-wẽns zu-nooga yĩnga.” Goam nins sẽn deng yɩɩn-kãngã wilgdame tɩ yaa a Azaf n gʋls-a. A ra yaa Levi buudã ned sẽn maand miziki, n vɩɩmd Rĩm a Davɩɩd wakatã. (1 Kɩbaya 25:1, 2; 2 Kɩbaya 29:30) Baa ne a sẽn da tar zu-noog sẽn be rasãnd n na n sõgen Wẽnnaam doogẽ wã, a “da maanda sũ-kiir” ne neb sẽn da wukd b mens ne b kɩɩsgã. Ra wõnda koɛɛg kae ne b vɩɩmã ye. Ra wõnda b ra tara laafɩ la bãane. Sɩda, sẽn da wõnd b tõogame wã ‘ra pida b sũyã n daagdẽ.’ (Verse a 5, 7) B ra gomda b sẽn tõog n pidsã yell ne ‘zẽk-m-menga,’ sẽn dat n yeel tɩ ne tɩtaam. (Verse a 8) ‘Bãmb da zẽkda b noor hal tɩ ta saasẽ; la bãmb zɛlma ra gõoda dũniyã pʋgẽ,’ tɩ b toor kae ne ned ba a yembre, yaa saasẽ tɩ yaa tẽng zugu.—Verse a 9.
9. Wãn-wãn la kom-bɩɩs kẽer sẽn yaa kiris-neb rũndã-rũndã tõe n wa tags wa a Azafe?
9 Tõe tɩ b tõe n yeela woto me ne yãmb kom-bɩ-taasã sẽn be lekollã. Y tõe n wʋma b sẽn gomd n wukd b mens ne b yoob tʋʋmã, b kibs-yoodã, la b rãamã la dorgã yũubã n pʋd n pa zoet yãnd ye. Y sã n ges b vɩɩmã b sẽn yet t’a kõta sũ-noogã sẽn yaa lebend ne so-sẽkã yãmb sẽn yaa kiris-ned sẽn segd n tũ wã, wakat ninga y tõe n maana “sũ-kiir ne wuk-m-mens rãmba.” (Matɩe 7:13, 14) A Azaf mengã wa n tagsa woto a sẽn wa n zẽk a koɛɛg n yeel tɩ: “Sɩda, yaa zaalem tɩ mam zĩnd ne pʋ-peelem n nudg m nus ne bʋʋm. La mam paamda pãbr daar fãa.” (Verse 13, 14) N-yẽe, a sɩngame n maand sãmb-sãmb ne Wẽnnaam sõgenegã la vɩɩmd nin-tɩrg vɩɩmã yõodo.
10, 11. a) Bõe n kɩt t’a Azaf toeem a manesmã? b) Wãn-wãn la wẽng maandbã be “zĩ-saals pʋsẽ”? Kõ-y makre.
10 Zu-noogo, a Azaf pa kell n pa raood komsg kãngã pʋgẽ n kaoos ye. Tao-tao t’a wa n bãngame tɩ sẽn wõnd nin-wẽnsã ra tara bãanã ra pa bũmb n zʋʋg belgre, wakat bilf bãan bal ye! A zẽka a koɛɛg n yeel woto: “Sɩda, yãmb ninga bãmb zĩ-saals pʋsẽ, yãmb tusda bãmb tɩ b lʋɩ sãoong pʋgẽ. Ad wɛ! Bãmb sãama nif kamsg pʋgẽ. B menemame n sɛ ne yɛɛsgo.” (Verse 18, 19) Woto me, yãmb kom-bɩ-taas wʋsg bee “zĩ-saals pʋsẽ.” Sã n beẽ-beẽ me, b wẽn-kɩɩsg manesmã na n dɩ-b lame, tõe tɩ na n wa baasa ne pʋg rɩkr b sẽn pa tʋlle, taoor bãag bɩ bi-bees roogẽ kõom wall kũum menga! Sẽn yaa wẽng n yɩɩda, b zãra ne Wẽnnaam.—Zak 4:4.
11 Kaset soab sẽn yaa bi-bɩɩg sẽn be Ɛspayn reng n bãnga woto vẽenega. A sẽn da yaa bi-bɩɩga a ra solg n maanda wẽnga, n lagem a meng tɩ loog ne kom-bɩɩs sull sẽn yaa wẽn-kɩɩsdba. Pa kaoos la a sɩng n nong bãmb ned a yembr sẽn da yaa dorgã yamb ye. Baa ne yẽ mengã sẽn da pa rɩkd dorgã, a ra baooda dorgã n kõt a zoa wã. “Mam sõng-a lame meng t’a vʋdg a meng n ning dorgã a yĩngẽ wã,” woto la a sak n deege. Zu-noogo, saam-bi-poak kãngã yam wa n waame t’a paam sãoogr tẽebã wɛɛngẽ. La a sũur sɩd sãama wʋsg a sẽn wa n bãng wakat a wãn poor tɩ rol-kʋdr ning sẽn da rɩkd dorgã kii SƖDA wã bãag yĩngã. N-yẽe, wa yɩɩl-gʋlsdã sẽn yeelã, wẽn-kɩɩsdbã bee “zĩ-saals pʋsẽ.” Kẽer tõe n kii vugr yell woto, b vɩɩm manesmã sẽn yaa wẽngã yĩnga. Sã n yaa ne neb a taabã, sã n pa b toeema b soyã fãa, ka la bilfu b na n bãnga yam ne “Zusoab a Zezi sẽn na n yi arzãn ne bãmb malɛk kãsemsã n wa wã. Bãmb na n puka bug-witim pʋgẽ. Bãmb na n sɩbga neb nins sẽn ka mi Wẽnnaam la sẽn ka sakd tõnd Zusoab a Zezi Koe-noogã.” —2 Tesalonik rãmba 1:7, 8.
12. Zapõ, wãn-wãn la bi-bɩɩg wa n yã tɩ sũ-kiir maaneg ne wẽng maandbã yaa yalemdo?
12 Rẽnd ad sɩd yaa yalemd tɩ d maan sũ-kiir ne “neb nins sẽn ka mi Wẽnnaam[ã]”! Sɩd-sɩda, d sẽn segd n dat n yɩ wa neb nins yaa b rãmb nins sẽn mi a Zeova la sẽn tar saagr n na n vɩɩmd wakat sẽn-kõn-sa wã. Saam-biig sẽn yaa bi-bɩɩg sẽn be Zapõ wa n bãnga woto vẽenega. A sẽn da yaa bi-bɩɩga, yẽ me ra “rata soog-m-meng n paase.” A wilgda woto: “M da tagsdame tɩ m da kongda bũmbu. Rẽ, m yãa m vɩɩmã sẽn da na n yɩ a soaba, m sã n da pa mi sɩdã. M da tõe n vɩɩmda yʋʋm 70 bɩ 80 n ki. La a Zeova kãabda vɩɩm sẽn-kõn-sa wã! M sẽn bãng rẽ vẽenegã sõng-m lame tɩ m tall naneb ne m sẽn sɩd ra tar bũmb ningã.” Baa ne rẽ fãa, kell n yɩ kɩs-sɩd soab neb sẽn pa tũud Wẽnnaam noyã sʋk pa nana ye. Yɛl sãnda bʋs la y tõe n maan n yals kãn-kãe weoogr kãensã taoore?
Gũus-y ne y tũud-n-taarã!
13, 14. Bõe yĩng tɩ tar yõod tɩ y tũus y tũud-n-taasã?
13 Bɩ d ye ges b sẽn bilg ned sẽn tõogã Yɩɩl Sõamyã 1:1-3 (NW ) pʋgẽ wã: “Sũ-noog soab la ned ning sẽn pa tũ nin-wẽnsã saglga, la a pa yals yel-wẽn-maandbã sor zug ye, la yaandbã zaoog zugu a pa zĩ ye. La a maanda sũ-noog ne a Zeova tõogã, la a sikda a koɛɛg n karemd a tõogã wĩndg la yʋngo. La sãmbg sẽn ka be, a na n yɩɩ wa tɩɩg sẽn sel ko-zoetem noore, sẽn womd a biis a wakate, t’a vãadã pa kʋɩtẽ ye, la bũmb ning fãa a sẽn maand na n tõogame.”
14 Reng-y n bãng-y tɩ y tũud-n-taarã tara pãn-tusdg sẽn yaa kãsenga. Yelbũna 13:20 yetame: “Ned sã n tũud yam damba, a na n lebga yam soaba. La ned sã n tũud yalma, a na n paama toogo.” Woto pa rat n yeel tɩ y ra tall nonglem, zood manesem, bɩ y yɩ nin-toos ne kom-bɩɩs nins sẽn pa a Zeova Kaset rãmbã ye. Biiblã sagenda tõnd tɩ d nong d taab la d tall ‘laafɩ ne neba fãa.’ (Rom dãmba 12:18; Matɩe 22:39) Baasg zãnga, y tõe n wa mikame tɩ y ‘tũud saglg’ sẽn yit neb nins sẽn pa tũud Biiblã noyã nengẽ, y sã n maan tũud-n-taar wʋsg ne-ba.
Biiblã kareng nafa
15. Wãn-wãn la kom-bɩɩsã tõe n bɩɩs nonglem ne Biiblã karengo?
15 Yɩɩl-gʋlsdã wilgame me tɩ ned sẽn tõog maanda sũ-noog ne Wẽnnaam tõogã kareng n ‘sikd a koɛɛg n karemd-a wĩndg la yʋngo.’ (Yɩɩl Sõamyã 1:1, 2, NW ) La Biiblã pa sebr sẽn karemd yĩngr-yĩngr ye, bala yɛl kẽer sẽn be a pʋgẽ wã yaa “toog tɩ bãng b võeyã.” (2 Pɩɛɛr 3:16) La pa tɩlae tɩ Biiblã kareng yɩ tʋʋm-toog ye. D tõeeme n “nong Wẽnnaam koɛɛga sẽn wẽnd wa bĩisim sẽn ka pulã.” (1 Pɩɛɛr 2:2) Modg-y n karem baa yaa bilf daar fãa. Zĩis sã n be be tɩ y pa wʋmd b võor bɩ y maan vaeesgo. Rẽ poor bɩ y tags y sẽn karem bũmb ningã zugu. (Yɩɩl Sõamyã 77:12, 13) Sã n yaa toog tɩ y sik y yamã karengã zug bɩ y ‘sik y koɛɛga’ n mak n karem. Sã n wa beẽ, y na n sɩd nonga Biiblã kareng n paase. Saam-bi-poak sẽn yaa bi-bɩɩg n be Berzill tẽra woto: “Wakat fãa ra wõnda a Zeova zãra ne maam. La sẽn na maan kiis a wãn masã, mam kẽngda taoor sõma m meng zãmsgã la Biiblã kareng pʋgẽ. Masã m neeme tɩ m zems-n-taarã ne a Zeova wã pãng paasame. A belmã yaa vẽeneg n yɩɩd ne maam.”
16. Wãn-wãn la d tõe n dɩ tigingã tigiss nafa n paase?
16 Tigingã tigissẽ kẽngr me tara yõod wʋsg ne y tẽebã bɩʋʋngo. Y sã n “gũus neer ne yãmb sẽn kelgdã,” y tõe n paama raoolg wʋsgo. (Luk 8:18) Yãmb mi n tagsdame tɩ tigissã pa be yamleoog bɩ? Be neere, bɩ y sʋk y mense: ‘Bõe la mam maand sẽn na yɩl tɩ tigissã tall yamleoogo? M kelgda sõma bɩ? M segend-b lame bɩ? M kõta leoor bɩ?’ Sẽn paas rẽ fãa, Biiblã yeta tõnd tɩ d “tẽeg taab yelle la d yik taab ratem tɩ maan nonglem la tʋʋm sõama . . . La bɩ d sagl taaba.” (Hebre dãmba 10:24, 25) Sẽn na yɩl n maan woto, rɩlla y kẽes y menga! Yaa sɩd tɩ sẽn na yɩl tɩ y kẽes y menga, rẽnda y reng n zãmse. Saam-bi-poak sẽn yaa bi-bɩɩg sak n deegame: “Sɩd-sɩda yaa nana n yɩɩd tɩ y kẽes y toog tigissẽ wã, y sã n segl y menga.”
Wẽnnaam sorã tũub tar n debda tõogr pʋgẽ
17. Wãn-wãn la ned sẽn karemd Biiblã sõma yaa “wa tɩɩg sẽn sel ko-zoetem noore”?
17 Sẽn paase, yɩɩl-gʋlsdã bilga ned sẽn tõog n wilg t’a yaa “wa tɩɩg sẽn sel ko-zoetem noore.” Tõe tɩ ko-zoetem tɩ loee ne zãgsg ko-soy nins b sẽn da tũnugd ne n zãgsd tɩɩsã zẽedẽ wã. (Ezai 44:4) Biiblã kareng daar fãa yaa wa f sẽn na n pẽ ko-bundim zĩig a woto sẽn zãad tɩɩg la a kõt-a maasrã. (Zeremi 17:8) Daar fãa y na n paama pãng ning y sẽn datã sẽn na yɩl n sõng yãmb makrã la zu-loeesã pʋsẽ wã. Y sẽn zãms n bãng a Zeova tagsgã, y na n paama yam ning y sẽn datã sẽn na yɩl n dɩk sard sẽn zemse.
18. Bõe n tõe n sɩd kɩt tɩ bi-bɩɩg tõog n sõgen a Zeova?
18 Wakat ninga, a Zeova sõgenegã tõe n wõnega toogo. La ra tol-y n tags tɩ yaa toog hal n kɩt tɩ y pa tõe ye. (Tõodo 30:11) Biiblã kãabdame tɩ ‘bũmb ning fãa yãmb sẽn maanda na n tõoga’ kaoosg zugẽ, sã n mik tɩ yãmb bõn-datl sẽn tɩ yɩɩd fãa wã yaa ta a Zeova yam la noog a sũuri! (Yelbũna 27:11) La y bãng tɩ y pa maood y yembr ye. Y tara a Zeova la a Zezi Kirist teelgo. (Matɩe 28:20; Hebre dãmba 13:5) B mii weoogr nins yãmb sẽn segdã, la b pa na n tol n yĩm-y ye. (Yɩɩl Sõamyã 55:23) Y leb n tara “saam-biisã lagem taab fãa” la y roagdbã teelgo, sã n mik tɩ b yaa wẽn-zoɛtba. (1 Pɩɛɛr 2:17, NW ) Ne teelg a woto, ne yãmb sẽn dɩk sard sẽn pa vigsdã la ne y modgrã, y tõe n tõoga y vɩɩmã pʋgẽ masã la wakat sẽn-kõn-sa yĩnga!
Lebg-n-ges sʋgsgo
◻ Tõogr hakɩkã yaa bõe?
◻ Bõe yĩng tɩ d rat t’a Zeova wilg d nao-yakmã sore?
◻ Wãn-wãn la kom-bɩɩsã tõe n ‘sõd b rasma’?
◻ Bõe yĩng tɩ yaa yalemd tɩ d maan sũ-kiir ne wẽng maandbã?
◻ Wãn-wãn la Biiblã kareng daar fãa la tigissẽ wã kẽngr wakat fãa sõngd kom-bɩɩsã tɩ b tõog b vɩɩmã pʋgẽ?
[Picture on page 26]
B sẽn pa tar ‘Wẽnnaam zoees’ sẽn zemsã yĩnga, kom-bɩɩs wʋsg kẽesda b mens manesem sẽn na n sãam-b pʋgẽ
[Picture on page 28]
Kom-bɩɩs wʋsg nong n yĩmdame tɩ b tʋʋma womda biisi
[Picture on page 29]
Bɩɩs-y nonglem ne Biiblã karengo
[Picture on page 29]
Tigissã na n talla yamleoog n yɩɩda, y sã n kẽes y mense