“Laafɩ Wakat” Kolgame!
“Bũmb fãa tara a wakate. . . . Zabr wakat beeme, la laafɩ wakat me beeme.”—KOƐƐG SOABA 3:1, 8.
1. Yell sẽn wõnd bõn-lebend bʋg n zĩnd yʋʋm kob-gĩnd 20 soabã wakat zabã la laafɩ wã wɛɛngẽ?
NEB wʋsg sẽn yɩɩd baooda laafɩ wã ne b sũy fãa, la b bee bʋʋm. Kʋdemdã pʋgẽ, laafɩ wã zɩ n paoog yʋʋm kob-gĩnd ba a ye pʋgẽ wa yʋʋm kob-gĩnd 20 soab kãngã ye. Wõnda bõn-lebende, bala nebã zɩ n modg wʋsg woto me n bao la b kogl laafɩ wã ye. Yʋʋmd 1920, b maana Tẽn-tẽns Lagem taabã. Yʋʋmd 1928 Briand-Kellogg Kaoolã, sebr a yembr sẽn bool tɩ “modgr nins sẽn yaa kãseng n yɩɩdã b sẽn maan n na n paam laafɩ Dũni gill Pipi Zabrã poorã,” yɩɩ kaool “dũniyã tẽn-tẽnsã fãa la bal [sẽn teele] . . . tɩ b sak tɩ tẽng ra ye tũnug ne zabr yɛs ye.” Rẽ poore, yʋʋmd 1945, b lugla Tẽn-tẽns sẽn Lagem taabã sẽn na yɩl n ledg Tẽn-tẽns Lagem taabã sẽn da ye pa be wã.
2. Tẽn-tẽns sẽn Lagem taabã togsa vẽeneg tɩ b yãka bõn-datl bʋgo, la hal sẽn ta zĩ-bʋg la a tõog-yã?
2 Wala Tẽn-tẽns Lagem taabã, Tẽn-tẽns sẽn Lagem taabã togsa vẽeneg tɩ b yãka bõn-datl sẽn yaa kɩt tɩ dũniyã paam laafɩ la a kogl-a. La tõogrã pa yɩ wʋsg ye. Yaa sɩda, dũniyã pa be zabr pʋgẽ sẽn yaa wa dũni gill zab a yiibã ye. Baasg zãnga, zab-bõoneg pi-gĩn n ket n be n kɩt tɩ neb tus-kobs yam pa gãe bãane, n sãamd b tarem la b yõyã meng naoor wʋsgo. D tõe n saagame tɩ Tẽn-tẽns sẽn Lagem taabã tõe n kɩtame tɩ yʋʋm kob-gĩnd 21 soabã yɩ “laafɩ wakat” bɩ?
Laafɩ hakɩkã yẽbgre
3. Bõe yĩng tɩ laafɩ hakɩkã ne kisgr pa tõe n lagem taab n zĩndi?
3 Yɩlẽ tɩ laafɩ zĩnd nebã la tẽn-tẽnsã sʋka, rẽnda b maan tɩ yɩɩg sak taab bala. Ned sɩd tõe n talla laafɩ ne ned a sẽn kis sɩda? Sã n yaa ne 1 Zã 3:15 pa woto ye: “Ned ninga fãa sẽn kis a ba-biiga, a yaa nin-kʋʋda, la yãmb miimi tɩ nin-kʋʋd ka tar vɩɩm sẽn-ka-sɛt ye.” Wala yɛl sẽn loog sẽn pa kaoosã sẽn wilgdã, yaa nana tɩ kisgr sẽn tar pãng wʋsg zẽn n wa ne nen-kɛglem tʋʋma.
4. Ãnda rãmb bal n tõe n paam laafɩ, la bõe yĩnga?
4 Sẽn mik t’a Zeova yaa “Wẽnnaam sẽn so laafɩ” wã, yaa neb nins bal sẽn nong Wẽnnaamã, la sẽn tar waoogr sõma-sõma ne a no-tɩrsã n tõe n paam laafɩ. Vẽenega, pa ned fãa la a Zeova kõt laafɩ wã ye. “Mam Wẽnnaam yeelame: ‘Laafɩ ka be nin-wẽng yĩng ye.’ ” Sẽn yaa woto wã yaa nin-wẽnsã sẽn zãgsd tɩ b kõn bas tɩ Wẽnnaam vʋʋsem sõngã biig sẽn yaa laafɩ wã wilg b sorã yĩnga.—Rom dãmba 15:33; Ezai 57:21; Galat dãmba 5:22.
5. Bõe n yaa bũmb sẽn pa saagd ne kiris-neb hakɩkã?
5 Maan zabr ne ninsaalb a taabã wala kiris-neb ne yʋʋrã sẽn nong n maandẽ wã, sẽn yɩɩd fãa yʋʋm kob-gĩnd 20 soabẽ wã, yaa bũmb sẽn pa saagd ne kiris-neb hakɩkã. (Zak 4:1-4) Yaa sɩd tɩ nin-kãensã zabd n kɩɩsda zãmsg nins sẽn pa togsd sɩd Wẽnnaam wɛɛngẽ wã, la b sẽn maand zab-kãngã wã yaa sẽn na yɩl n sõng nebã, pa sẽn na yɩl n maan-b wẽng ye. Nams neb a taabã b tũudmã sẽn pa yembr ne f rẽndã, bɩ maan ned wẽng yĩngã wɛɛngẽ tẽn-nonglem yĩng yaa bũmb sẽn yaa lebend zãng fasɩ ne kiris-nedemd hakɩkã. A Poll kõo kiris-nebã sẽn da be Romã noor woto: “Bɩ y maan yãmb sẽn tõe tɛka, t’a sã n tõe, bɩ laafɩ zĩnd yãmb ne neba fãa sʋka.”—Rom dãmba 12:17-19; 2 Tɩmote 2:24, 25.
6. Yɛ bal la d tõe n yã laafɩ hakɩkã rũndã-rũndã?
6 Rũndã-rũndã, yaa a Zeova Wẽnnaam balemdb hakɩkã sʋk bal la d yãt Wẽnnaam laafɩ wã. (Yɩɩl Sõamyã 119:165; Ezai 48:18) Welgr ba a ye politikã wɛɛngẽ pa sãamd b zems-n-taarã ye, bala zĩig fãa b pa kẽesd b toog politikã pʋgẽ ye. (Zã 15:19; 17:14) B sẽn ‘lagem taab sõama n paam tagsgo la yam a yembrã’ yĩnga, welgr ba a yembr ka be tũudmã wɛɛngẽ n sãamd b laafɩ wã ye. (1 Korẽnt dãmba 1:10) Laafɩ ning a Zeova Kaset rãmbã sẽn tarã yaa yel-solemd rũndã-rũndã. Yaa yel-solemd Wẽnnaam sẽn wa ne, tɩ zems ne a kãabg kãngã: “Mam na n kɩtame tɩ laafɩ soog foom tɩ tɩrlem lebg fo tʋʋm soaadba.”—Ezai 60:17; Hebre dãmba 8:10.
Bõe yĩng tɩ b yãk “zabr wakat[e]”?
7, 8. a) Baa ne a Zeova Kaset rãmbã sẽn dɩk sard kãn-kãe n na n teel laafɩ wã, wãn-wãn la b get masã wakatã? b) Kiris-nebã zab-te-kãseng yaa bʋgo?
7 Baa ne a Zeova Kaset rãmbã sẽn dɩk sard kãn-kãe n na n teel laafɩ wã, baasgo, sẽn yɩɩd fãa, b geta masã wakatã wa “zabr wakat[e].” Yaa vẽeneg tɩ pa zabr sɩd-sɩd ye, bala modg nebã tɩ b sak Biiblã koɛɛg ne pãng ra na n yɩɩ bũmb sẽn kɩɩsd booll ning Wẽnnaam sẽn maanã. A yeelame tɩ ‘ned ninga sẽn data, bɩ a reeg vɩɩm koom zaalem.’ (Wilgri 22:17) B pa modgd nebã tɩ b tuub ye! Zabr ning a Zeova Kaset rãmbã sẽn maandã yaa tẽeb zabr bala. A Poll gʋlsame: “Tɩ bõe, zab-teed nins tõnd sẽn tar n zabdẽ wã ka ninsaal dẽnd ye, la b tara pãng Wẽnnaam maasem yĩnga tɩ sik pãens rãmba.”—2 Korẽnt dãmba 10:4; 1 Tɩmote 1:18.
8 “Zab-teed nins tõnd sẽn tar n zabdẽ wã” sʋka, sẽn tɩ yɩɩd-a fãa yaa “vʋʋsmã sʋʋga, sẽn yaa Wẽnnaam gomdã.” (Efɛɛz rãmba 6:17, NW) Sʋ-kãng pãngã yaa wʋsgo. “Wẽnnaam gomda vɩɩme la a tara pãnga, la a rɩtame n yɩɩd sʋʋg buud fãa sẽn tar noy a yiibu, la a kẽeda hali n welgd sɩɩg ne vʋʋsem la kõb-sugds ne [b] sɩɩlem, la a tõe n bãnga sũur tagsg la a tʋlsem n welge.” (Hebre dãmba 4:12, NW) Kiris-nebã sã n tũnugd ne sʋ-kãngã, b tõe n tõogame n kɩɩs “tagsgo la bũmb nins fãa sẽn zẽkd b meng ne Wẽnnaam bãngrã.” (2 Korẽnt dãmba 10:5) A kɩtdame tɩ b tõe n puk n wilg ziri zãmsgã, minund nins sẽn yaa wẽnsã, la filozofi rãmb nins sẽn basd Wẽnnaam yamã n pukd ninsaal yamã sẽn yaa b rãmba.—1 Korẽnt dãmba 2:6-8; Efɛɛz rãmba 6:11-13.
9. Bõe yĩng tɩ pemsg kae ne zabr ning tõnd sẽn zabd ne nemsã sẽn maand yel-wẽna?
9 Tẽeb zabr buud a to yaa zabr ning d sẽn maand ne yĩngã sẽn maand yel-wẽnã. Kiris-nebã tũuda a Poll sẽn sak n deeg woto wã makre: “Mam modgda m menga n tõogd m yĩnga, tɩ mam sẽn moond koɛɛgã n togsd neb a taabã, Wẽnnaam kõn yaool n zãgs maam ye.” (1 Korẽnt dãmba 9:27) B ra sagla kiris-nebã sẽn da be Kolosã tɩ b kiis b “yĩnga ratem dũniyã zug ka, sẽn yaa yoobo la rẽgdo la wẽng ratem la tags-wẽnse la zoe-bõne sẽn yaa bõn-naands pʋʋsgo.” (Kolos rãmba 3:5) La Biibl gʋlsd a Ziid sagla kiris-nebã ‘tɩ b mao ne b pãng tɛk tẽeba yĩnga. A yaa tẽeb ninga sẽn dag n kõ Wẽnnaam neba vugr bala wakat fãa yĩngã.’ (Ziid 3) Bõe yĩng tɩ d segd n maan woto? A Poll leokdame: “Yãmb sã n sak yĩnga ratem yãmb na ki. La yãmb sã n kʋ yĩnga tʋʋma ne Sɩɩg Sõng pãnga, yãmb na vɩ.” (Rom dãmba 8:13) Togs-kãngã b sẽn maan tɩ yaa vẽenegã yĩnga, pemsg kae ne zabr ning tõnd sẽn maand ne tʋlsem wẽnsã ye.
10. Bõe n zĩnd yʋʋmd 1914, n tar n na n wa baas ne bõe beoog-daar sẽn pa zãrã pʋgẽ?
10 La bʋʋm a to sẽn kɩt tɩ d tõe n ges masã wakatã wa zabr wakatã yaa tɩ “tõnd Wẽnnaam sũ-dokr daar[ã]” kolga wʋsgo. (Ezai 61:1, 2) Yʋʋmd 1914, a Zeova sẽn yãk wakat ningã ra taame t’a na n lugl Mesi Rĩungã la a kõ-a sor t’a maan zabr ne a Sʋɩtãan siglgã. Wakat ning b sẽn kõ ninsaalbã tɩ b mak ninsaal naamã tɩ Wẽnnaam pa kẽes a toog tɩ b gesã ta a tɛka. Wala b na sak Rĩm sẽn yaa Mesi ning Wẽnnaam sẽn yãkã, neb wʋsg sẽn yɩɩd ket n zãgsd-a lame, wala neb wʋsg sẽn yɩɩd sẽn zãgs-a yʋʋm kob-yendẽ wã. (Tʋʋma 28:27) Woto yĩnga, b sẽn kɩɩs Rĩungã yĩngã, yɩɩ tɩlae ne Kirista t’a ‘tʋg n dɩ naam a bɛɛba sʋka.’ (Yɩɩl Sõamyã 110:2) Zu-noogo, Wilgri 6:2, (NW) kãabdame t’a na n “baas[a] a tõogrã.” A na n maana woto “Wẽnnaam Sẽn-tõe-fãa daar kãsenga zabre . . . b sẽn boond ne hebre goama tɩ Harmagedõ” wã sasa.—Wilgri 16:14, 16.
Sasa kãngã yaa “goam wakat[e]”
11. Bõe yĩng t’a Zeova tall maag-m-meng wʋsg ne ãdem-biisã, la bõe n na n wa baas n yɩ?
11 Yʋʋmd 1914 sẽn yɩ wakat kãseng ninsaal yɛlã pʋsẽ wã tɛka, yaa yʋʋm 85 n looge. A Zeova talla maag-m-meng wʋsg ne ãdem-biisã. A kɩtame t’a Kaset dãmbã bãng sõma-sõma tɩ yellã pa reem yell ye. Neb milyõ rãmb yõy n be yell pʋgẽ. Neb kʋʋnd kãensã zemsa ne keoogre, “Zusoaba . . . sẽn ka rat tɩ ned ba a ye sãama yĩnga.” (2 Pɩɛɛr 3:9) Baasg zãnga, ka la bilfu, ‘Zusoab a Zezi na n yii arzãn ne bãmb malɛk kãsemsã.’ Rẽ, neb nins fãa sẽn zãgs Wẽnnaam Rĩungã koɛɛg ne yamleoogã na n paama ‘sɩbgr’ ning a Zezi sẽn na n wa ne “neb nins sẽn ka mi Wẽnnaam la sẽn ka sakd tõnd Zusoab a Zezi Koe-noogã” zugã.—2 Tesalonik rãmba 1:6-9.
12. a) Bõe yĩng tɩ magb sẽn tɩ loe ne to-kãsengã sẽn tõe n sɩng wakat ningã pa tar yõodo? b) Rẽ wɛɛngẽ wã a Zezi keoogame tɩ d gũus ne yel-bʋgo?
12 Wakat bʋg la a Zeova maag-m-mengã na n wa baas n sa? Magb buud fãa sẽn tɩ loe ne “toog kãseng[ã]” sẽn tõe n sɩng wakat ningã pa tar yõod ye. A Zezi togsa vẽenega: “Ned ba a yembr ka mi daar kãnga la wakat kãng ye.” La a sagla woto: “Woto yĩnga, bɩ yãmb gũusi tɩ yãmb ka mi daar ninga yãmb Zusoaba sẽn na n wa ye. . . . Bɩ y segle tɩ Ninsaal Biiga wata wakat ninga yãmb sẽn ka tẽeda.” (Matɩe 24:21, 36, 42, 44) D sã n na n togs vẽenega, woto rat n yeelame tɩ daar fãa, tõnd segd n gũus n gesa dũniyã yɛla n da yĩm to-kãsengã pusgr ye. (1 Tesalonik rãmba 5:1-5) Ad sɩd na n yɩɩ yell tɩ d tags tɩ d pa le segd n maan modgre tɩ d tõe n vɩɩ b sẽn boond tɩ vɩɩm wa neb a taabã bala, n gũud yɛlã sẽn na n yidg to-to! A Zezi yeelame: “Bɩ y gũus y mense n da sak tɩ yão-beed ne rã-yũuri la vɩɩm kãnga yɛla pak yãmb tɩ ra-kãng wa ling yãmb ye. Tɩ bõe, a na n wa linga neba fãa sẽn be dũniyã zuga wa kũusri.” (Luk 21:34, 35) Tõnd tõe n kɩsa sɩd ne woto: Sãoongã “sobd a naasa” a Zeova “malɛk rãmb a naas[ã]” sẽn gãd masã wã, b pa na n gãt sob-kãens wakat fãa ye.—Wilgri 7:1-3.
13. Bõe la neb sẽn pẽneg milyõ a yoob sak n deege?
13 Kolg-n-togs daar n kãngã sẽn kolgd wʋsgã yĩnga, a Salomo goam nins sẽn tɩ loe ne “goam wakat[ã]” võor tagmame. (Koɛɛg Soaba 3:7) B sẽn sak n deeg tɩ masã sɩd yaa goam wakate, sẽn pẽneg a Zeova Kaset rãmb milyõ a yoob gomda Wẽnnaam naamã ziir yell ne yẽesem la b keoogd nebã t’a sũ-dokrã daar watame. B kõta b mens Kirist tãb-biis daar kãngã ne yamleoogo.—Yɩɩl Sõamyã 110:3; 145:10-12.
Neb nins sẽn yet tɩ ‘Laafɩ beeme, tɩ laafɩ yaool n kaẽ wã’
14. Ziri no-rɛɛsdb bʋs n zĩnd yʋʋmd kob-gĩnd a yopoe soab S.D.T.W.?
14 Yʋʋm kob-gĩnd a yopoe soab S.D.T.W., Wẽnnaam no-rɛɛsdb a Zeremi la a Ezekɩɛll taasa Wẽnnaam bʋ-kaoor koees Zerizalɛm zugu, a sẽn wilg tõdgr manesem n kɩɩs Wẽnnaamã yĩnga. Sãoong ning b sẽn deng n togsã waa yʋʋmd 607 S.D.T.W., baa ne Wẽnnaam koe-taasdbã sẽn da seg tũudmã taoor dãmb sẽn tar pãng la pãn-tusdg kãsengã kɩɩsgã fãa. Nin-bãmba yɩɩ “bãngdb . . . sẽn yaa yalemb . . . bãmb sẽn kɩt tɩ [Wẽnnaam] neba yõsga yĩnga. Bãmb yeelame tɩ yaa laafɩ, la laafɩ ka be ye.”—Ezekɩɛll 13:1-16; Zeremi 6:14, NW, 15; 8:8-12.
15. Ziri no-rɛɛsdb sẽn wõnd woto bee rũndã-rũndã bɩ? Wilg-y-yã.
15 Wala “bãngdb nins sẽn yaa yalemb” rẽ wẽndã, rũndã-rũndã me, tũudum taoor dãmb wʋsg sẽn yɩɩd me pa keoogd nebã tɩ Wẽnnaam bʋ-kaoorã daar watame ye. Sẽn yaa lebende, b bilgda politikã sul wa neb sẽn na n baas n tõog n wa ne laafɩ la bãane. Sẽn pak-b n yɩɩd sẽn yaa ta ninsaalbã yam n yɩɩd b ta Wẽnnaamã yama yĩnga, b yeta b egiliiz rãmbã neb b sẽn dat n wʋm bũmb ninsã, la b pa wilgd-b tɩ Wẽnnaam Rĩungã luglame, la t’a Rĩmã sẽn yaa Mesi wã na n waa ka la bilf n baas a tõogrã ye. (Daniɛll 2:44; 2 Tɩmote 4:3, 4; Wilgri 6:2, NW) Wala ziri no-rɛɛsdbã, bãmb me yetame “tɩ yaa laafɩ, la laafɩ ka be ye.” La b bas-yardã na n lebg yɛɛsg zĩig pʋgẽ, b sã n wa segd n sɛg Ned ning b sẽn pa togs sɩd a zugã la b wa ne taal wʋsg a yʋʋrã zugã sũ-yikrã. Dũni gill ziri tũudum taoor dãmbã b sẽn bilg Biiblã pʋgẽ wa pʋg-yoodrã na n paama sãoongo, b laafɩ kelemsã sẽn yaa tudgrã yĩnga.—Wilgri 18:7, 8.
16. a) B bãnga a Zeova Kaset rãmbã wa nin bʋs buudu? b) Wãn-wãn la b yaa toor ne neb nins sẽn yet tɩ ‘yaa laafɩ, tɩ laafɩ ka be’ wã?
16 Taoor dãmb sẽn tar pãng la pãn-tusd-kãsengã wʋsg sẽn yɩɩd sẽn pẽdgd b zãmb laafɩ kãabgã pʋgẽ wã pa rĩmsd neb nins sẽn tar tẽeb ne Wẽnnaam laafɩ hakɩk kãabgã bas-yard ye. Sẽn yɩɩd yʋʋm kob-gĩnd pʋgẽ, b bãnga a Zeova Kaset rãmbã wa Wẽnnaam Gomdã tɛɛndb sẽn tar kɩs-sɩda, wala neb sẽn yaa ziri tũudmã kɩɩsdb sẽn tar daoodo, wala Wẽnnaam Rĩungã tɛɛndb piig la a yiibu. B sẽn zãr ne b belg nebã ne koɛɛg sẽn noom-b kelgr la koɛɛg sẽn yaa koe-yaalg laafɩ wã wɛɛngẽ, b modgda ne yẽesem n na n kɩt tɩ b bãng tɩ sɩd-sɩda rũndã-rũndã wã yaa zabr wakate.—Ezai 56:10-12; Rom dãmba 13:11, 12; 1 Tesalonik rãmba 5:6.
A Zeova yii a sĩndgã pʋgẽ
17. A Zeova sẽn na n bas sĩndgã ka la bilfã rat n yeelame tɩ bõe?
17 A Salomo yeelame me: “Wẽnnaam na n kaoo nin-tɩrga la nin-wẽng bʋʋdo; tɩ bõe, yɛla fãa . . . tara b wakate.” (Koɛɛg Soaba 3:17) N-yẽe, a Zeova yãka wakat n na n pids a bʋ-kaoorã ziri tũudmã la ‘dũniyã rĩm dãmba sẽn zẽkd b mens la b kɩɩsd a Zeova la a nin-tũusdgã’ zutu. (Yɩɩl Sõamyã 2:1-6; Wilgri 16:13-16) Wakatã sã n ta, ray nins a Zeova sẽn da ket n ‘sĩndã’ na n saame. (Yɩɩl Sõamyã 83:2; Ezai 62:1; Zeremi 47:6, 7, NW) Ne Rĩm sẽn yaa Mesi a Zezi Kirist a sẽn zĩnig naamã geer zugã tũnugri, a na n ‘goma’ buud-gom-yɛng ning pʋgẽ a bɛɛbã sẽn wʋmd n yeele: ‘Zusoaba yita wa gãndaoogo. Bãmb gãndaalma yaa wa tãp soab sẽn nong zabre. Bãmb zẽkda b koɛɛg n kelemdẽ. Bãmb zabda ne b bɛɛba ne pãnga. Mam sĩndame n kaoose. Mam yõka m meng n ka gom ye. Mam na n wiisa wa pag sẽn dat n doge. Mam na n sesame la m vʋʋsem na n yii wakat a ye pʋgẽ. Mam na n sãama tãensa ne kunkubã la m kʋɩɩs mo-maasa fãa. Mam na n kɩtame tɩ kʋɩlsa lebg tẽng koɛɛnga tɩ bãgsa kʋɩ. La mam na n kɩtame tɩ zoensa tũ sor b sẽn ka mi. Mam na n kɩtame tɩ bãmb tũ so-bugs b sẽn zɩ n tũ. Mam na n kɩtame tɩ lik lebg vẽenem bãmb taoore. La m dems zĩ-golemsã. Ad bũmb nins mam sẽn na n maan bãmb yĩngã. Mam ka na n bas bãmb ye.’—Ezai 42:13-16.
18. Wãn to wɛɛngẽ la Wẽnnaam nin-buiidã na n ‘sĩnd’ ka la bilfu?
18 A Zeova sã n wa ‘gomd’ n teend a Wẽndlmã, pa na n le yɩ tɩlae ne a nin-buiidã tɩ b gom n teel b mens ye. Wakat kãngã yaa bãmb n segd n ‘sĩndi.’ Wala sẽn yɩ to-to ne Wẽnnaam sõgen dãmbã tẽn-kʋdem wẽndẽ wã, gom-kãensã na n pidsa b zutu: “Ka yãmb n na n zab zab-kãng ye. Bɩ y sũ tãp n yaas n ges Zusoabã sẽn na n tõog n kõ yãmba.”—2 Kɩbaya 20:17.
19. Zu-no-bʋg la Kirist tẽeb saam-biisã na n paam ka la bilfu?
19 Ad sɩd yaa tõogr meng-meng la b na n tõog a Sʋɩtãan la a siglgã! Kirist saam-biisã sẽn paam ziirã na n kẽesa b toog n wa ne tõogr sẽn yaa kãseng tɩrlmã yĩnga, wa sẽn zems ne kãabg kãngã: “Wẽnnaam sẽn so laafɩ na n sãama Sʋɩtãana tao-tao tɩ yãmb tab-a.” (Rom dãmba 16:20) Laafɩ wã d sẽn gũ n kaoosã yaa n kolgame.
20. Ka la bilfu, na n yɩɩ bõe wakate?
20 Ad sɩd yaa bark tɛkẽ la neb nins fãa sẽn na n põs tẽngã zug a Zeova pãn-kãsengã pukr kãngã sasa wã na n paame! Rẽ poor bilfu, pĩnd wẽndẽ roap la pagb sẽn tall kɩs-sɩd na n wa bʋʋg-b lame, nin-kãens vʋʋgrã wakat sẽn yãkã sã n wa ta. Kirist Yʋʋm Tusr Naamã rɩɩb sɩd na n yɩɩ ‘bʋdb wakate, tɩpg wakate, meeb wakate, laad wakate, warb wakate, mobgr wakat la nonglem wakate.’ N-yẽe, wakat fãa, na n yɩɩ “laafɩ wakate”!—Koɛɛg Soaba 3:1-8; Yɩɩl Sõamyã 29:11; 37:11; 72:7.
Yãmb leokda bõe?
◻ Laafɩ sẽn kaoosd yẽbgr yaa bõe?
◻ Bõe yĩng t’a Zeova Kaset rãmbã get masã wakatã wa “zabr wakate”?
◻ Wakat bʋg la Wẽnnaam nin-buiidã segd n ‘gome,’ la wakat bʋg la b segd n ‘sĩndi’?
◻ Wãn-wãn la wakat bʋg la a Zeova na n yi a sĩndgã pʋgẽ?
[Box/Pictures on page 24]
A Zeova yãka wakat n na n
◻ kɩt t’a Goog zab ne Wẽnnaam nin-buiidã.—Ezekiɛll 38:3, 4, 10-12
◻ ning ninsaalbã nanambs yamẽ tɩ b sãam Babilon Kãsengã.—Wilgri 17:15-17; 19:2
◻ maan Pebilã kãadem.—Wilgri 19:6, 7
◻ sɩng Harmagedõ zabrã.—Wilgri 19: 11-16, 19-21
◻ loe a Sʋɩtãan t’a Zezi Yʋʋm Tusr Naamã rɩɩb sɩnge.—Wilgri 20:1-3
B sõdga yel-kãensã pʋgdg-pʋgdg wa b sẽn gʋls-b Gʋlsg Sõamyã pʋgẽ bala. D tõe n kɩsa sɩd tɩ yel-kãensã b nu wã fãa na n waa pʋgdg-pʋgdg ning a Zeova sẽn yãkã, la sasa ning a sẽn yãkã takɩ.
[Picture on page 26]
Kirist yʋʋm tusr naamã rɩɩb na n sɩd yɩɩ . . .
laado . . .
mobg taaba . . .
nonglem . . .
selbo . . .
warba . . .
meeb wakate