Yãmb yaa kiris-ned sẽn “bɩ sõma” bɩ?
“MAM sẽn da yaa biiga, mam goama ne m tagsga la m yama ra yaa biig rẽnda.” Woto la tʋm-tʋmd a Poll gʋls-yã. Sɩda, wakat n zĩnd tɩ tõnd fãa ra yaa kom-peels sẽn dat sõngre. La d yaool n pa kell n pa woto ye. A Poll yeelame: “La mam sẽn lebg raoa, mam basa kamb dẽnda.”—1 Korẽnt dãmba 13:11.
Woto me, kiris-nebã fãa sɩngdame n yaa kom-peels tẽebã wɛɛngẽ. La sã n wa beẽ-beẽ, b fãa tõeeme n wa “paam tẽeb a yembre, la yam vẽnegre n bãng Wẽnnaam Biigã, tɩ tõnd bɩ zãnga n zems wa Kirist sẽn zems zãngã.” (Efɛɛz rãmba 4:13) B sagenda tõnd 1 Korẽnt dãmba 14:20 pʋgẽ tɩ: “M ba-biisi, ne yam vẽnegre, bɩ y ra yɩ wa kom-bõoneg ye . . . La ne yam vẽnegre, bɩ y yɩ wa neb sẽn bɩ.”
Rũndã-rũndã, kiris-neb sẽn bɩ sõma wã belem yaa bark n kõ Wẽnnaam nin-buiidã rũndã-rũndã, sẽn yɩɩd fãa nin-paalsã sẽn yaa wʋsgã yĩnga. Kiris-neb sẽn bɩ sõma wã sõngd n kɩtdame tɩ tigingã vigl kãn-kãe. B tara pãn-tusdg sẽn yaa sõma tiging ning fãa b sẽn beẽ wã manesem zugu.
D tõe n yeelame tɩ yĩngã wɛɛngẽ bɩʋʋngã yaa waaziba, la tẽebã bɩʋʋng yaa sẽk la modgr bal n wat ne-a. Rẽnd pa lingr tɩ kiris-neb sãnda pa “pẽdg n ta bɩʋʋng zĩigẽ” a Poll wakatã ye, baa ne b sẽn sõgen Wẽnnaam yʋʋm wʋsg pʋgẽ wã. (Hebre dãmba 5:12; 6:1, NW ) Yaa wãn to ne yãmba? Yãmb sõgna Wẽnnaam yʋʋm wʋsg pʋgẽ tɩ yaa sẽn pa kaoos pʋgẽ me, yɩtẽ-la sõma tɩ y vaees y mengã ne pʋ-peelem n gese. (2 Korẽnt dãmba 13:5) Yãmb bee neb nins b sẽn tõe n sɩd bool tɩ kiris-neb sẽn bɩ sõma wã sʋk bɩ? Sã n pa woto, wãn to la y tõe n yɩ neb sẽn bɩ?
‘Ne yam vẽnegre, bɩ y yɩ wa neb sẽn bɩ’
Ned sẽn yaa bi-pɛɛlg tẽebã wɛɛngẽ ‘sakda kareng buud toor-toor wa sobg sẽn dɩkd bũmbu, la neba belgre la b sɩlem wẽnga b sẽn baood weer tɩ belg neba.’ Woto yĩnga a Poll sagla woto: ‘Bɩ tõnd bɩ ne bũmb fãa ne sẽn yaa tẽedba zugã; bãmb yaa Kirist.’ (Efɛɛz rãmba 4:14, 15) Wãn-wãn la ned maand woto? Hebre dãmba 5:14 (NW ) yetame: “La rɩɩb sẽn yaa taokã yaa neb nins sẽn bɩ wã yĩnga, yaa neb ninsi, ne rɩk-n-tʋmã maasem, sẽn paam tɩ b yam-welgrã tõod paam zãmsgo, sẽn na yɩl n bãng sõma ne wẽng n bakã.”
Bãng-y tɩ neb nins sẽn bɩ wã yam-welgr tõod paama zãmsg ne rɩk-n-tʋmã maasem, bɩ ne b sẽn tar minim Biiblã noy tũub pʋgẽ wã. Rẽnd vẽenega, ned pa bɩt zĩig pʋgẽ ye. Kaoosdame tɩ ned bɩ tẽebã wɛɛngẽ. Baa ne rẽ, y tõe n maana yɛl wʋsg n kɩt tɩ y tẽebã bɩʋʋng yɩ nana ne meng zãmsgã, sẽn yɩɩd fãa ne Wẽnnaam Gomdã yel-zulums zãmsgo. Sẽn pa kaoos pʋgẽ, Gũusg Gasgã goma yel-zulums wʋsg yelle. Sẽn bɩ-bã pa gind zãms-kãense, b sẽn tar ‘bũmb kẽer b sʋk sẽn yaa toog tɩ bãng b võyã’ yĩng ye. (2 Pɩɛɛr 3:16) Walla tɩ yɩ woto, b yɩta tao-tao n dɩ tẽeb rɩ-kãng buud sẽn tagma!
Moondb sẽn tar yẽesem la karen-saam dãmba
A Zezi kõo a karen-biisã noor woto: “Bɩ y kẽng n maan neba buud fãa tɩ b yɩ mam karem-biisi n lis bãmb ne Ba la Biiga la Sɩɩg Sõng yʋʋre. La zãms bãmb tɩ b sak bũmb nins fãa mam sẽn da togs yãmbã.” (Matɩe 28:19, 20) Y sã n kẽes y meng koe-moonegã tʋʋmd pʋgẽ ne yẽesem, tõeeme me n paas y tẽebã bɩʋʋngo. Bõe yĩng tɩ y pa na n modg n kẽes y meng a pʋgẽ sõma, yɛlã sã n kõt-y sore?—Matɩe 13:23.
Wakat kẽere, vɩɩmã weoogr tõe n kɩtame tɩ sẽn na yɩl n yã sẽk n moona yaa toogo. La y sã n ‘mao’ n moon koe-noogã, y wilgdame tɩ y getame tɩ “Koe-nooga” tara yõodo. (Luk 13:24; Rom dãmba 1:16) Woto b tõe n ges-y-la wa “mamsg Wẽnnaam tẽedba yĩnga.”—1 Tɩmote 4:12.
Burkĩnd talldba
Bɩ n ta wã baoodame me tɩ y modg n tall y burkĩndã. Wa b sẽn gʋls Yɩɩl Sõamyã 26:1 pʋgẽ wã, a Davɩɩd togsame: “Zusoaba, bɩ y kõ maam bʋʋm; tɩ bõe, mam kẽnda sõmblem [“burkĩnd,” NW ] pʋgẽ.” Burkĩnd yaa vɩɩm manesem sẽn yaa sõma, sẽn pid zãnga. La a pa rat n yeel tɩ f zemsa zãng ye. A Davɩɩd mengã maana yel-wẽn-kãsems a wãna. La a sẽn sak kiblgã la a rems a soayã yĩnga, a wilgame t’a sũurã ra ket n tara nonglem hakɩk ne Wẽnnaam a Zeova. (Yɩɩl Sõamyã 26:2, 3, 6, 8, 11, NW ) Burkĩnd tɩ loee ne wẽn-sakr ne f sũur fãa. A Davɩɩd yeela a biribl a Salomo: “Bɩ f bãng f ba Wẽnnaam la f sak bãmb ne f sũur fãa.”—1 Kɩbaya 28:9.
Tall burkĩndlem tɩ loee ne f sẽn pa “dũniyã rẽnd[a],” n pa kẽed tẽn-tẽnsã politik yɛlẽ la b zabẽ ye. (Zã 17:16) Y segd n laka y mens me ne minim wẽns wala yoobo, kãadem pʋgẽ yoob la dorg rɩkre. (Galat dãmba 5:19-21) La burkĩnd tallg võor yɩɩda f lak f meng ne bõn-kãensa. A Salomo keooga woto: “Zõos kiida tidar kaam pʋgẽ t’a yũug ka le yaa sõama ye. Yalemd bilf woogda yam la waoogre.” (Koɛɛg Soaba 10:1) N-yẽe, baa “yalemd bilf” wala kʋʋsem sẽn pa zems bɩ rolsem manesem ne pag bɩ rao tõe n sãama ned sẽn tar ‘yam la waoogr’ yʋ-noogo. (Zoob 31:1) Woto yĩnga, bɩ y wilg y bɩʋʋngã n bao n yɩ tɩrg y tʋʋm-manesmã fãa pʋgẽ, n lak y meng ne “bũmb sẽn wõnd wẽng” menga.—1 Tesalonik rãmba 5:22, King James Version.
Kɩs-sɩd dãmbã
Kiris-ned sẽn bɩ sõma yaa kɩs-sɩd soab me. Wala d sẽn karemd Efɛɛz rãmba 4:24 (NW ) pʋgẽ wã, tʋm-tʋmd a Poll sagenda kiris-nebã tɩ: “Yeelg[-y] nedemd paalgã b sẽn naan tɩ zems ne Wẽnnaam daabã tɩrlem la kɩs-sɩd hakɩk pʋgẽ wã.” Gerɛk Gʋlsgã pʋgẽ, gom-biig ning b sẽn tũnug ne pipi buud-gomdã pʋgẽ n lebg “kɩs-sɩdã” tara tagsg sẽn tɩ loe ne sõmblem, tɩrlem la balengo. Ned sẽn tar kɩs-sɩd yaa wẽn-tũuda, wẽn-sakda. A maanda tʋʋm nins fãa Wẽnnaam sẽn baood t’a maana neere.
Manesem kẽer bʋs la y tõe n tũnug ne n bɩɩs kɩs-sɩd a woto? Manesem a yembr yaa y sẽn na n lagem n tʋm ne y tigingã kẽem dãmba. (Hebre dãmba 13:17) B sẽn sak n deeg tɩ b yãka Kirist t’a yaa kiris-neb tigingã Zugã, kiris-neb nins sẽn bɩ wã tara kɩs-sɩd ne nin-kãensa b sẽn yãk tɩ b “kɩɩm Wẽnnaam tigingã.” (Tʋʋma 20:28, NW ) Ad sɩd na n yɩɩ bũmb sẽn pa zems tɩ d kɩɩs bɩ n paoog kẽem dãmbã b sẽn yãkã zu-sobendo! Y segdame me n bãng tɩ y segd n talla kɩs-sɩd ne “kɩs-sɩd la gũusd yambã,” la ne neb nins b sẽn tũnugd ne n pʋɩt tẽeb “rɩɩbã wakat sẽn zems pʋgẽ wã.” (Matɩe 24:45, NW ) Yɩ-y tao-tao n karem la y tũ zãmsg ning sẽn be Gũusg Gasgã la sɛb a taaba pʋsẽ wã.
Wilg-y nonglem ne y tʋʋmã
A Poll gʋlsa kiris-neb nins sẽn da be Tesalonikã woto: “Yãmb tẽeba ne yãmb fãa sẽn nong taaba tara paasg wʋsgo.” (2 Tesalonik rãmba 1:3) Sẽn yɩɩd fãa, nonglmã pʋgẽ bɩɩbã yaa tẽebã bɩʋʋng neng a yembr sẽn tar yõod wʋsgo. A Zezi yeela Zã 13:35 pʋgẽ: “Yãmb sã n nong taaba, neba fãa na n bãngame tɩ yãmb yaa mam karen-biisi.” Saam-biir nonglem a woto pa yĩn-sidg bal ye. Vine’s Expository Dictionary of Old and New Testament Words yeta woto: “B tõe n bãnga nonglmã ne tʋʋm nins a sẽn kɩtd tɩ b maana yĩng bala.” N-yẽe, y tata bɩʋʋng zĩigẽ, y sã n tʋm nonglem tʋʋma!
Wala makre, Rom dãmba 15:7 pʋgẽ d karemdame: “Bɩ y reeg taab[a].” Manesem a yembr y sẽn tõe n tũnug ne n wilg nonglem yaa y sẽn na n pʋʋs y tẽed-n-taasã la wat-paalsã tigingã tigissẽ ne nonglem la ne yamleoogo! Bao-y n bãng-ba. ‘Ges-y’ neb a taabã ‘yelle.’ (Filip rãmba 2:4) Tõe tɩ y tõe n yɩɩ sãamb rɛɛgd n bool neb toɛ-toɛ tɩ b wa y yiri. (Tʋʋma 16:14, 15) Wakat ninga, neb a taabã pa-zems-zãng tõe n yɩɩ makr ne yãmb nonglmã sẽn ta zĩig ningã, la y sã n zãms n ‘tall sũ-mar ne taab nonglem pʋgẽ,’ y wilgdame tɩ y bɩɩ sõma.—Efɛɛz rãmba 4:2, NW.
D rɩk d paoongã n kɩt tɩ baleng yɩlemdã kẽng taoore
Tẽn-kʋdem wẽndẽ wã, pa Wẽnnaam sõgen dãmba fãa n pids b zɩɩbã n teel a Zeova wẽn-doogã ye. Woto, Wẽnnaam tʋma no-rɛɛsdb wala a Azze la a Malaki tɩ b tus A nin-buiidã tɩ b maan woto. (Azze 1:2-6; Malaki 3:10) Rũndã-rũndã, kiris-neb nins sẽn bɩ wã rɩkda b paoongã n tʋmd ne sũ-noog n teend a Zeova balengã. Rɩk-y nin-kãens togs-n-taar n tũ noor ning sẽn be 1 Korẽnt dãmba 16:1, 2 pʋgẽ wã, n ‘bĩng ligd sẽn zems y paoongo,’ sẽn na yɩl n maan kũun tigingã la a Zeova Kaset rãmbã dũni gill tʋʋmd yĩnga. Wẽnnaam Gomdã kãabda woto: “Ned ninga sẽn bʋt wʋsgo, a na n wʋka wʋsgo.”—2 Korẽnt dãmba 9:6.
Ra yĩm-y paoong a taab wala y sẽkã la y pãngã y sẽn tarã ye. Modg-y n ‘bao sẽkã’ tʋʋm yõod sẽn paoodã zutu. (Efɛɛz rãmba 5:15, 16, NW; Filip rãmba 1:10) Zãms-y y sẽkã rɩk n tʋm sõma n paase. Rẽ maaneg tõe n kɩtame tɩ y tõog n kẽes y toog Rĩungã Roog zãab pʋgẽ, la tʋʋm a taab sẽn wõnd woto sẽn kɩtd t’a Zeova balengã kẽng taoore. Y sã n dɩk y paoongã n tʋm woto, na n yɩɩ kaset vẽeneg n paas tɩ y lebgda kiris-ned sẽn bɩ sõma.
Pẽdg-y n ta bɩʋʋng zĩigẽ!
Raop la pagb sẽn nong zãmsg baoob la sẽn tar bãngre, n yaa moondb sẽn tar yẽesmã, sẽn yaa burkĩmb tɩ kɩɩsg kaẽ wã, sẽn tar kɩs-sɩd la nonglmã, la sẽn dat n teel Rĩungã tʋʋmd ne b pãngã la b laogã sɩd yaa bark menga. Rẽnd pa lingri, tʋm-tʋmd a Poll sẽn sagl woto wã ye: “Masã tõnd sẽn bas yẽbgr tẽeb zãmsgã Kirist wɛɛngẽ wã, bɩ d pẽdg n ta bɩʋʋng zĩigẽ”!—Hebre dãmba 6:1, NW.
Yãmb yaa kiris-ned sẽn bɩ sõma bɩ? Bɩ ne manesem buudu, yãmb ket n wõnda tẽeb bi-pɛɛlga? (Hebre dãmba 5:13) Sẽn yaa to-to fãa, bɩ y rɩk sard kãn-kãe n modg meng zãmsgã pʋgẽ, n moone, la y wilg y saam-biisã nonglem. Sak-y saglg la kiblg buud fãa sẽn bɩ-bã sẽn kõ. (Yelbũna 8:33) Tʋk-y y kiris-ned zɩɩbã fãa. Sã n wa tar-n-tarẽ, la ne y modgrã, yãmb me tõeeme n ‘paam tẽeb a yembre, la yam vẽnegre n bãng Wẽnnaam Biigã, tɩ yãmb bɩ zãnga n zems wa Kirist sẽn zems zãngã.’—Efɛɛz rãmba 4:13.
[Foto rãmba, seb-neng a 5]
Neb nins sẽn bɩ wã paasda tiging yam-sõngã, b sẽn get neb a taabã yellã yĩnga