Kiris-neb hakɩkã fãa yaa koe-noogã moondba
“Bɩ y yɩɩl Zusoaba [“a Zeova,” NW] yĩnga n waoog bãmb yʋʋre.
Bɩ y moon bãmb fãagr koɛɛga daar fãa.”—YƖƖL SÕAMYÃ 96:2.
1. Koe-noog bʋg la nebã segd n wʋme, la wãn to la a Zeova Kaset rãmbã kõ mak-sõng n yelg koe-noog kãngã?
DŨNI sabaab rãmb sẽn wat daar fãa pʋgẽ, sɩd kõta belsg tɩ d bãng tɩ Biiblã yetame tɩ ka la bilfu, zabã, bi-beerã, komã la weoogrã na n saame. (Yɩɩl Sõamyã 46:10; 72:3, 7, 8, 12, 16) Sãmbg sẽn ka be, woto pa koe-noog ning nebã fãa sẽn segd n wʋma sɩda? Yaa woto la a Zeova Kaset rãmbã tagsda. B mi-b-la zĩig fãa wa neb sẽn moond “koe-noogo.” (Ezai 52:7) Yaa sɩda, Kaset rãmb wʋsg namsame, b sẽn dɩk sard ne manesem sẽn pa vigsd n na n moon koe-noogã yĩnga. La yaa nebã neer n pak-ba. Ad Kaset rãmbã tall yẽesem la pẽdgr meng-meng b tʋʋmdã pʋgẽ!
2. Bũmb a ye sẽn kɩt t’a Zeova Kaset rãmbã tar yẽesmã yaa bõe?
2 Rũndã-rũndã, a Zeova Kaset rãmbã yẽesem wõnda pipi yʋʋm kob-gĩndẽ kiris-nebã yẽesem. Bãmb wɛɛngẽ, Rom Katolik kɩbay sebr (L’Osservatore Romano) yeta woto wa sẽn zemse: “Pipi kiris-nebã sẽn deeg lisg bala, b yãame tɩ b segd n yelga koe-noogã. Yembsã taasa evãnzillã goam ne noore.” Bõe yĩng t’a Zeova Kaset rãmbã tar yẽesem wa pipi kiris-nin-kãensã sẽn tall yẽesem ningã? Pipi, yaa koe-noogã b sẽn moonda sẽn yit Wẽnnaam a Zeova meng nengẽ wã yĩnga. Bõe yɛs n da tõe n kɩt tɩ b tall yẽesem n yɩɩg woto? B moonegã yaa yɩɩn-kãngã goamã sakre: “Bɩ y yɩɩl Zusoaba [“a Zeova,” NW ] yĩnga n waoog bãmb yʋʋre. Bɩ y moon bãmb fãagr koɛɛga daar fãa.”—Yɩɩl Sõamyã 96:2.
3. a) Bũmb a yiib-n-soab sẽn kɩt t’a Zeova Kaset rãmbã tar yẽesem la bʋgo? b) Bõe n be ‘Wẽnnaam fãagrã’ pʋgẽ?
3 Yɩɩl gʋlsdã goam tẽegda tõnd bũmb a yiib-n-soab sẽn kɩt t’a Zeova Kaset rãmbã tar yẽesem. B koɛɛgã yaa fãagr koɛɛga. Neb n be n yaa logtoɛɛmba, neb sẽn get nebã ne taab vɩɩm yelle, t’a taab get laogã fɩɩgr yelle, bɩ zĩis a taab sẽn na yɩl n maneg ninsaalbã vɩɩm, la modg-kãens zemsa pẽgre. La bũmb ning fãa ninsaal sẽn tõe n maan n kõ a to wã yõod ka tõe n dɩk n mak ne ‘Wẽnnaam fãagrã’ ye. Ne a Zezi Kirist tũnugri, a Zeova na n fãaga sũ-bʋgsem dãmbã ne yel-wẽnã, bãasã la kũumã. Neb nins sẽn na n paam fãagrã na n vɩɩmda wakat sẽn pa sate! (Zã 3:16, 36; Wilgri 21:3, 4) Rũndã-rũndã, fãagrã bee “bõn-bãna” kiris-nebã sẽn togsda sʋka, b sã n tũud gom-kãensã: “Bɩ y togs [Wẽnnaam] ziir bu-zẽmsa sʋka la y togs bãmb bõn-bãna neb buud fãa sʋka. Tɩ bõe, Zusoaba yaa kãsenga la bãmb toga pẽgr wʋsgo. Bãmb seka zoees n yɩɩd wẽnnaam dãmba fãa.”—Yɩɩl Sõamyã 96:3, 4.
Zusoabã mak-sõngo
4-6. a) Bũmb a tãab-n-soab bʋg n kɩt t’a Zeova Kaset rãmbã tar yẽesem? b) Wãn to la a Zezi wilg yẽesem ne koe-noogã moonego?
4 Bũmb a tãab-n-soab n kɩt t’a Zeova Kaset rãmbã tar yẽesem. B tũuda a Zezi Kirist mak-sõngã. (1 Pɩɛɛr 2:21) Yẽ sẽn yaa ninsaal sẽn zems zãngã saka ne a sũur fãa n “togs naong rãmba koe-noogo.” (Ezai 61:1; Luk 4:17-21) Woto, a lebga Evãnzill moonda, koe-noog taasda. A saaga Galile la Zide soolma fãa n “moon Wẽnnaam soolem koe-noogo.” (Matɩe 4:23) La a sẽn da mi tɩ neb wʋsg ra na n saka koe-no-kãngã yĩngã, a yeela a karen-biisã tɩ: “Tigisg yaa wʋsgo la tigisdba yaa bilfu. Dẽ yĩnga, bɩ y kos tigisga soaba tɩ b tʋm tigisdba tɩ b kẽng bãmb tigisgã.”—Matɩe 9:37, 38.
5 Wa sẽn zems ne yẽ mengã pʋʋsgã, a Zezi zãmsa neb a taab tɩ b yɩ koe-noog moondba. Wakat n zĩnd t’a tʋm a tʋm-tʋmdbã tɩ b tɩ moone, n yeel-ba: “Bɩ y kẽng n moone n yeel tɩ arzãn soolem kolgame.” Kõn zemsẽ n yɩɩd tɩ b maan tʋʋm n boog bãmb wakatẽ nebã zu-loees sɩda? Bɩ b ra segd n kẽesa b toog naamã yɛl pʋsẽ n zab ne bãmb wakatẽ zãmbã? Ayo. Sẽn yaa lebende, a Zezi wilga kiris-neb nins fãa sẽn yaa koe-noog moondbã sẽn segd n maanega, a sẽn wa n yeel a karen-biisã tɩ: “Bɩ y kẽng n moone.”—Matɩe 10:5-7.
6 Kaoosg zugẽ, a Zezi tʋma karen-biis sull a to tɩ b tɩ moon woto: “Wẽnnaam soolem kolga[me].” B sẽn lebg n tɩ togs a Zezi b moonegã sẽn yɩ to-to wã, a sũur yɩɩ noog wʋsgo, t’a pʋʋs woto: “M Ba sẽn yaa arzãn la dũniyã Zusoaba, mam pẽgda yãmba yãmb sẽn solg bõn-kãens ne yam dãmba la yẽesem dãmba n yaool n vẽneg bõn-kãens ne kom-bõonega yĩnga.” (Luk 10:1, 8, 9, 21) A Zezi karen-biisã sẽn da tʋmd wʋsg n yaa zĩm-yẽedba, koaadb bɩ n da tʋmd tʋʋm-zẽmsã ra yaa wa kom-bõonego, b sã n mak-b ne b buudã tũudum taoor dãmb sẽn paam zãmsg wʋsgã. La karen-biisã ra paama zãmsg n na n moon koɛɛg ning sẽn yaa noog n yɩɩd a taabã fãa wã.
7. A Zezi saasẽ dʋʋbã poore, ãnd dãmb la a karen-biisã reng koe-noogã moonego?
7 A Zezi saasẽ dʋʋbã poore, a karen-biisã kẽnga taoor ne fãagr koe-noogã yelgre. (Tʋʋma 2:21, 38-40) Ãnd dãmb la b reng n moone? B kẽnga bu-zẽmsã sẽn da pa mi Wẽnnaamã nengẽ bɩ? Ayo, b pipi mooneg zĩig ra yaa Israɛlle, sẽn da yaa nin-buiid sẽn da mi a Zeova sẽn yɩɩd yʋʋm 1500 pʋgẽ wã. B ra tara sor n na n moon tẽngẽ b sẽn da zoe n balemd a Zeova bɩ? N-ye. A Zezi ra yeel-b lame: “Yãmb na n yɩɩ mam kaset dãmb Zerizalɛm, ne Zide la Samari ne dũniyã tɛk fãa.” (Tʋʋma 1:8) Israɛll da segd n wʋma koe-noogã wa buud a taabã fãa.
8. Rũndã-rũndã, wãn to la a Zeova Kaset rãmbã rɩkd a Zezi pipi karen-biisã togs-n-taare?
8 Woto me, rũndã-rũndã, a Zeova Kaset rãmbã moonda dũniyã gill zugu. B tʋmda ne malɛk ning a Zã sẽn yã t’a “tara Koenoog sẽn ka sɛta n na n moon neb nins sẽn be dũniyã soolem fãa la buud fãa la goam toɛ-toɛya fãa la neba fãa” wã. (Wilgri 14:6) Yʋʋmd 2001 wã pʋgẽ, b ra moonda tẽns 235 pʋsẽ, tɩ tẽns kẽer b sẽn nong n yet tɩ yaa kiris-neb tẽns be sʋka. Yaa wẽng t’a Zeova Kaset rãmbã moon zĩis nins dũni kiris-nedemdã sẽn zoe n lugl a egiliiz rãmb bɩ? Kẽer yetame tɩ yaa wẽnga, hali n tõe meng n get koe-mooneg kãngã wa “bãmb piisã zuubu.” Baasg zãnga, a Zeova Kaset rãmbã tẽra a Zezi tagsg sẽn da ya a soab ne yẽ wakatẽ Zʋɩf rãmb nins sẽn yaa sik-m-mens rãmbã. Baa ne b sẽn da zoe n tar maan-kʋʋdbã, a Zezi pa maan sãmb-sãmb la a togs-b koe-noogã ye. “B nimbãanega yõka [yẽ], tɩ bõe, bãmb sũyã sãama wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye.” (Matɩe 9:36) A Zeova Kaset rãmbã sã n yã neb sẽn pa mi a Zeova la a Rĩungã, b segd n tõdgame n pa moon nin-kãensã koe-noogã, tũudum sẽn yet t’a tara zu-sobend b zut yĩng bɩ? Wa a Zezi tʋm-tʋmdbã, d leokr yaa ayo. D segd n moona koe-noogã “buuda fãa sʋka,” n da badg ned ye.—Mark 13:10.
Pipi kiris-nebã fãa ra yaa koe-noogã moondba
9. Pipi yʋʋm kob-gĩndẽ wã, kiris-neb tigingã pʋgẽ, ãnd n kẽes a meng koe-noogã moonegẽ?
9 Pipi yʋʋm kob-gĩndẽ wã, ãnd dãmb n kẽes b mens koe-moonegã pʋgẽ? Yɛlã wilgdame tɩ kiris-nebã fãa ra yaa koe-nooga moondba. Gʋlsd a Samuel Williams yetame: “Kaset wʋsg wilgdame tɩ kiris-nebã fãa sẽn da be pipi egiliizẽ wã . . . moona koe-noogã.” Sẽn tɩ loe ne yɛl nins sẽn zĩnd yʋʋmd 33 T.W. Pãntekotã Biiblã yetame: “Bãmb [rap la pagb] fãa pida ne Sɩɩg Sõngo. La b sɩngame n gom gom-zẽna sẽn zems wa Sɩɩg Sõngo sẽn kõ-bã.” Rap la pagba, kom-bɩɩs la nin-kẽemba, yembs la neb sẽn pa yembs n wa n be koe-noogã moondb sʋka. (Tʋʋma 1:14; 2:1, 4, 17, 18; Zoɛll 3:1, 2; Galat dãmba 3:28) Kiris-neb wʋsg sẽn wa n paam namsg b tẽebã yĩnga, b zoe n yii Zerizalɛm, la “neb nins sẽn sãeega kẽnga zĩig-zĩiga n moon Koe-noogo.” (Tʋʋma 8:4) Yaa “neb nins [fãa] sẽn sãeega,” la pa neb a wãn bal b sẽn yãke, n moon koe-noogã ye.
10. Tʋʋmd sẽn tar nens a yiib bʋs la b maan tɩ b nan pa sãam Zʋɩf rãmbã zãmaane?
10 Pipi yʋʋm kob-gĩndã tõr pʋgẽ, yɩɩ woto. A Zezi togsa bãngr-gomd woto: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Matɩe 24:14) Gom-kãensã pidsa pipi yʋʋm kob-gĩndẽ wã, b sẽn wa n moon koe-noogã zĩis wʋsg tɩ Rom tãb-biisã nan pa sãam Zʋɩf rãmbã tũudum la b politik siglga ye. (Kolos rãmba 1:23) Sẽn paase, a Zezi karen-biisã fãa saka a no-kãngã: “Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la Sɩɩg Sõng yʋʋre. La zãms bãmb tɩ b sak bũmb nins fãa mam sẽn da togs yãmbã. La gese, mam bee ne yãmb wakat fãa hal tɩ ta wakat sɛɛbo.” (Matɩe 28:19, 20) Pipi kiris-nebã pa yeel sũ-bʋgsem dãmbã tɩ b tẽ a Zezi la b tud b sor n loog n bas-b tɩ b bãng b sẽn na n maanega, wala rũndã-rũndã dũni kiris-nedemdã pʋgẽ koe-moondb kẽer sẽn maandã ye. Sẽn yaa lebende, b zãms-b lame tɩ b lebg a Zezi karen-biisi, n sigl-b tigims-tigimsi, la b zãms-ba, tɩ bãmb me tõog n moon koe-noogã la b maan karen-biisi. (Tʋʋma 14:21-23) Rũndã-rũndã, a Zeova Kaset rãmbã tũuda mak-kãngã.
11. Rũndã-rũndã, ãnd dãmb n moond koɛɛg ning sẽn yaa noog n yɩɩdã ãdem-biisã?
11 A Zeova Kaset rãmb wʋsg sẽn tũ pipi yʋʋm kob-gĩndẽ neb mak-sõng wa a Polle, a Barnabas la a taab rẽnd yɩɩ misioneer dãmb tẽn-zẽmse. Tʋʋm-kãng sɩd talla nafr wʋsgo, bala b pa kẽes b mens naamã yɛlẽ bɩ n bas koe-noogã mooneg ne manesem a taab ye. B saka a Zezi no-kãngã bala: “Bɩ y kẽng n moone.” Baasg zãnga, a Zeova Kaset rãmb wʋsg sẽn yɩɩd pa misioneer dãmb tẽn-zẽms ye. Bãmb wʋsg tʋmda nug tʋʋmd n paamd b noor dɩɩbo, tɩ kẽer ket n be lekolle. Kẽer wubda kamba. La Kaset rãmbã fãa moonda neb a taabã koe-noog ning bãmb mens sẽn zãms n bãngã. Kom-bɩɩs la sẽn kʋʋl-ba, pagb la rapa, b fãa sakda Biiblã sagl-kãngã ne sũ-noogo: “Bɩ f moon Wẽnnaam koɛɛgã, la f nang pãng wakat fãa, nana walla toog pʋgẽ.” (2 Tɩmote 4:2) Wala reng-taoor dãmb nins sẽn zĩnd pipi yʋʋm kob-gĩndẽ wã, b ket n ‘zãmsda neba la b moond a Zezi Kirist koe-noogã n ka basdẽ ye.’ (Tʋʋma 5:42) B ra moonda ãdem-biisã koɛɛg ning sẽn yaa noog n yɩɩdã.
Yaa neb tuubg bɩ, bɩ yaa koe-noog moonego?
12. Wãn to la b wa n get neb tuubgu?
12 Rũndã-rũndã, neb kẽer yetame tɩ neb tuubg yaa wẽnga. Sebr a yembr (World Council of Churches) goma “neb tuubgã yel-wẽnd” meng yelle. Bõe yĩnga? Zʋrnall a yembr (Catholic World Report) yetame: “Ortodogs rãmbã yẽgem-toogã kɩtame tɩ b wʋmd neb tuubgã võor wala tuub neb ne pãnga.”
13. Tuubg sẽn yaa wẽng makr kẽer la bʋse?
13 Kɩt tɩ neb tuub yaa wẽng bɩ? A tõe n yɩɩ woto. A Zezi yeelame tɩ gʋlsdbã la Fariziẽ rãmbã sẽn tuubd nebã ra yaa wẽng ne neb nins b sẽn tuubã. (Matɩe 23:15) Sɩd-sɩda, “tuub neb ne pãnga” yaa wẽnga. Sã n yaa ne pĩnd yɛl-mit a Zozɛfe, wala makre, Makabe a Zã Hirkan sẽn soog Idume nebã, a “kõ-b-la sor tɩ b pa b tẽngẽ wã, b sã n da sak n kẽ bãong la b sak Zʋɩf rãmbã tõodo.” Idume nebã sã n da rat n vɩɩmd Zʋɩf rãmbã soogr pʋgẽ, b ra segd n tũu Zʋɩf rãmbã tũudum. Pĩnd yɛl mitbã yetame tɩ yʋʋm kob-gĩnd a nii soab tõnd wakatã, a Sarlemayn zab n tõoga Erop rɩtg Sagsõ rãmbã sẽn yaa kɩfen dãmbã, n modg-b ne pãng tɩ b tuubi.a La Sagsõ rãmbã bɩ Idume rãmbã sẽn tuubã, yaa ne pʋ-peelem bɩ? Wala makre, Rĩm a Herood sẽn da yaa Idume nedã ra makame n na n kɩt tɩ b kʋ a Zezi a kɩdg wẽnde. Dẽ hal sẽn ta zĩ-bʋg la yẽ ra tar nonglem hakɩk ne a Moiiz Tõogã Wẽnnaam sẽn vẽneg tɩ b gʋlsã?—Matɩe 2:1-18.
14. Wãn to la dũni kiris-nedemdã misioneer dãmb kẽer tusd nebã ne pẽdgr n tuubd-ba?
14 B modgda neb tɩ b tuub rũndã-rũndã bɩ? Yaa woto ne tuubg kẽere. B yeelame tɩ dũni kiris-nedemdã misioneer dãmb sãnda kõta neb sẽn na n sak n tuub burs rãmb sẽn na yɩl tɩ b tɩ karem nasaar tẽnga. Bɩ b kɩt tɩ neb sẽn zoet n baood b mens kom sẽn dat n kʋ zĩnd n kelg tũudum zãmsg n yaool n paam rɩɩb pʋɩɩre. Sã n yaa ne togsg evɛk rãmb sull sẽn maan yʋʋmd 1992, “wakat ninga b tũnugda ne kũuni, wakat ning me ne pãng maaneg buud toor-toor n tuubd nebã.”
15. A Zeova Kaset rãmbã tuubda nebã wa b sẽn wʋmd tuubg võor to-to rũndã-rũndã wã bɩ? Bɩ y wilgi.
15 Modg ned t’a toeem tũudum yaa wẽnga. Sɩd-sɩda, a Zeova Kaset rãmbã pa maand woto ye.b B pa tuubd nebã wa b sẽn wʋmd tuubgã võor to-to rũndã-rũndã wã ye. Sẽn yaa lebend ne rẽ, wala pipi kiris-nebã, b moonda neba fãa koe-noogã. Ned ning sẽn sak ne yamleoogo b yet-a lame t’a zãms Biiblã n bãng n paase. Nin-kãensã sẽn dat n bãngã zãmsdame n tall tẽeb ne Wẽnnaam la a raab ning a sẽn dat n pids beoog-daarã, tɩ rẽ yaa tẽeb sẽn tik Biiblã bãngr hakɩk zug sõma. Woto kɩtame tɩ b pʋʋsd ne Wẽnnaam yʋʋrã sẽn yaa Zeova wã sẽn na yɩl n paam fãagre. (Rom dãmba 10:13, 14, 17) B na n saka koe-noogã bɩ b pa na n sak-a wã bee ne neba mense. Modgr pa be rẽ pʋgẽ ye. Sã n da tũẽ ne modgre, tuubgã ra pa na n tall yõod ye. Sẽn na yɩl tɩ Wẽnnaam sak ned balengo, rẽndame tɩ balengã yi a sũurẽ.—Tõodo 6:4, 5; 10:12.
Koe-noogã moonegã rũndã-rũndã
16. Wãn to la a Zeova Kaset rãmbã koe-noogã mooneg pãng paas rũndã-rũndã?
16 A Zeova Kaset rãmbã moona Rĩungã koe-noog rũndã-rũndã tɩ pids Matɩe 24:14 n yɩɩd pĩndã. B koe-noogã mooneg pʋgẽ, tʋʋm-te-kãseng yɩɩ Gũusg Gasgã.c Yʋʋmd 1879, b sẽn maan Gũusg Gasgã sɛb n yiis pipi wã, a sõorã ra zemsa 6000 buud-gom-yɛng pʋgẽ. Yʋʋmd 2001 wã, sẽn yɩɩd yʋʋm 122 loogr poore, a sõorã taa 23 042 000 buud-goam 141 pʋsẽ. A Zeova Kaset rãmbã koe-noogã mooneg pãng paasg n wa ne fɩɩg-kãnga. Mak-y lɛɛr tusa a yẽebã b sẽn dɩk n kẽes koe-no-moonegã pʋgẽ yʋʋmd fãa yʋʋm kob-gĩnd 19 soabã pʋgẽ wã ne lɛɛr 1 169 082 225 b sẽn dɩk n kẽes moonegã pʋgẽ yʋʋmd 2001 wã n gese. Ges-y neb 4 921 702 b sẽn zãms Biiblã zãmsg zaalem kiuug fãa, b sã n pʋɩ tɩ zemsã. Ad sɩd yaa tʋʋm-kãseng meng la b maan-yã! La yaa Rĩungã moondb 6 117 666 n tʋm woto.
17. a) Ziri wẽnnaam dãmb bʋs buud la b balemd rũndã-rũndã? b) Bõe la ned fãa segd n bãnge, ba a buud-gomde, a tẽngã, a arzɛk bɩ naam sẽn yaa to-to fãa?
17 Yɩɩl-gʋlsdã yeelame: “Buud toɛy-toɛya wẽnnaam dãmba fãa yaa zaalem, la Zusoabã [“a Zeova,” NW ] n naan saase.” (Yɩɩl Sõamyã 96:5) Rũndã-rũndã dũniyã pʋgẽ, nebã balemda b tẽnsã, b tãb-kao wã, nin-kãsemsã, laogã, la arzɛkã menga. (Matɩe 6:24; Efɛɛz rãmba 5:5; Kolos rãmba 3:5) A Mohandas Gandhi yeela woto vugri: “Mam tagsdame tɩ . . . Erop tẽnsã yaa kiris–neb ne yʋʋr tẽns bala. Sɩd-sɩdã yaa arzɛkã la a balemda.” La sẽn be yaa tɩ b segd n wʋma koe-noogã zĩig fãa. Ned fãa, a buud-gomdã, a tẽngã, a tarem bɩ a naam sẽn yaa to-to fãa, a segd n bãngã a Zeova la a raab sẽn tɩ loe ne beoog-daarã. D saagdame tɩ nebã fãa na n saka yɩɩl gʋlsdã gom-kãensã: “Bɩ y kõ [a Zeova, NW ] waoogre la y wilg tɩ bãmb tara pãnga. Bɩ y kõ [a Zeova, NW ] waoogr sẽn zemsd ziir sẽn yaa bãmb yʋʋr dẽnda.” (Yɩɩl Sõamyã 96:7, 8) A Zeova Kaset rãmbã sõngda neb a taabã tɩ b bãng a Zeova sẽn na yɩl tɩ b tõog wa sẽn segd n ning-a ziiri. La woto nafda sẽn sakd-bã wʋsgo. Yaa bõe nafa la b paamda? D na n sõsa rẽ yell sõsg ning sẽn pʋgdã pʋgẽ.
[Tẽngr not rãmbã]
a Sã n yaa ne bãngr sebr a yembre (The Catholic Encyclopedia), Remsgã wẽnde, yaa ne gom-kãngã la b ra wilgd b sẽn modgd nebã tɩ b sak tũudmã: Cuius regio, illius et religio (Gom-kãng võor yaa: “Ned ning sẽn so-a tẽng n yãkd tẽn-kãng tũudum me.”)
b Tẽnsã fãa yĩng Tũudum Soog-m-meng Siglg sẽn be Etazĩni sẽn maan tigisg yʋʋmd 2000, sɩpaolg kiuug rasem 16, ned a yembr wilgame tɩ welgr n be ned sẽn makd n na n tuub neb ne pãnga, ne a Zeova Kaset rãmbã tʋʋmdã. B wilgame t’a Zeova Kaset rãmbã sã n moond b taabã, b sẽn maand to-to wã kɩtame tɩ nedã tõe n yeel bal tɩ “m pa rat n kelg ye,” la a pag a kʋɩlenga.
c Sebrã gom-zug zãng yaa Gũusg Gasgã moonda a Zeova Rĩungã.
Y tõe n wilga a võor bɩ?
• Bõe yĩng t’a Zeova Kaset rãmbã yaa koe-noog moondb sẽn tar yẽesem?
• Bõe yĩng t’a Zeova Kaset rãmbã moond zĩig ning dũni kiris-nedemdã sẽn lugl egiliiz rãmbã?
• Bõe yĩng t’a Zeova Kaset rãmbã pa tuubd neb wa b sẽn wʋmd tuubg võor to-to rũndã-rũndã wã?
• Wãn to la a Zeova Kaset rãmbã sẽn moond koe-noogã pãng paas rũndã-rũndã?
[Foto, seb-neng 19]
A Zezi ra yaa koe-noog moond sẽn tar yẽesem, la a zãmsa neb a taabã tɩ b tʋm tʋʋm-kãngã
[Foto, seb-neng 20]
Pipi yʋʋm kob-gĩndẽ tigingã pʋgẽ, nebã faa ra yaa koe-nooga moondba
[Foto, seb-neng 21]
Modg neb tɩ b toeem b tũudum yaa wẽnga