Yãmb ‘gũuda Wẽnnaam bɩ?’
“Yãmb ka rat n yɩ neba b yel-manesem sẽn yaa sõama la sẽn sakd Wẽnnaam n gũud bãmb daara ne datem kãseng bɩ?”—2 PƖƐƐR 3:11, 12.
1, 2. Wãn-wãn la d tõe n bilg d sẽn ‘gũud’ a Zeova raarã to-to?
MAMS-Y n ges wala zak neb sẽn na n gũud sãamb n na n dɩ ne-ba. Sãambã waoong lɛɛr kolgda tao-tao. Masã, sɩdã ne kambã sõngda zakã pag n maand tʋm bõoneg nins sẽn ketã, sẽn na yɩl tɩ bũmbã fãa yɩ kɛpi. Ned kam fãa sũur yaa noogo. N-ye, zakã neb fãa gũuda sãambã waoong ne yãgb n na n lagem ne-b n dɩ rɩ-noogã b sẽn seglã, la b sõs ne taaba.
2 Tõnd sẽn yaa kiris-nebã, d gũuda bũmb sẽn yaa kãseng n yɩɩd woto menga. Yaa bõe la d gũuda? Ya a ‘Zeova ra-kãsengã’ la d fãa gũuda. Nand tɩ ra-kãngã ta, d segd n yɩɩ wa no-rɛɛs a Miise. A ra yeela woto: “Mam na n gesa Zusoabã. Mam na n gũu Wẽnnaam, bãmb yaa mam fãagda.” (Miise 7:7) La rẽ yĩnga, gũ Wẽnnaamã rat n yeelame tɩ d zĩ n pa maand baa fʋɩ bɩ? Ayo. D segd n tʋma tʋʋm wʋsgo.
3. Sẽn zems ne 2 Pɩɛɛr 3:11,12 goamã, manesem bʋg la kiris-nebã ra segd n talle?
3 Tʋm-tʋmd a Pɩɛɛr sõngd-d lame tɩ d bãng d sẽn segd n sɩd gũ to-to tɩ zemse. A yeelame: “Yãmb ka rat n yɩ neba b yel-manesem sẽn yaa sõama la sẽn sakd Wẽnnaam n gũud bãmb daara ne datem kãseng bɩ?” (2 Pɩɛɛr 3:11, 12) A Pɩɛɛr sẽn gom ka woto wã yaa saglga. A lɛta a yiibã Wẽnnaam sẽn vẽneg-a t’a gʋlsã pʋgẽ, a bilga kiris-nebã sẽn segd n yɩ neb nins buudu. A leb n sagl-b lame me tɩ b kell n yɩ “neb yel-manesem sẽn yaa sõama la sẽn sakd Wẽnnaam.” Baa ne a Zezi Kirist sẽn da kõ ‘dũniyã sɛɛb bãnd’ sẽn na maan yʋʋm 30 sẽn loogã, kiris-nebã ra segd n ket n gũusdame. (Matɩe 24:3) B ra segd n ket n “ningda a Zeova raarã b yamẽ wakat fãa.”
4. “Ning a Zeova raarã f yamẽ wakat fãa” baooda bõe maanego?
4 Gɛrk gom-biig ning b sẽn lebg tɩ ‘ratem-kãsengã’ rat n yeelame tɩ “kɩt tɩ wa tao-tao.” Yaa vẽeneg tɩ d sɩd pa tõe n kɩt t’a Zeova raarã “wa tao-tao” ye. Bala, d pʋd n pa mi raar ning la wakat ning a Zezi sẽn na n wa kao a Ba wã bɛɛb bʋʋdã ye. (Matɩe 24:36; 25:13) Gom-biis võor wʋmb sebr a ye bilgame tɩ gom-biig ning b sẽn lebg zĩ-kãngã tɩ ‘wa tao-tao’ wã võor yaa “ ‘maan tʋʋlle,’ tɩ woto kɩt t’a võorã pẽ wʋsg ne ‘tall yẽesem, yɩ ned sẽn tʋmde, bɩ yɩ ned sẽn maand yɩɩr ne yelle.’ ” Dẽnd a Pɩɛɛr da sagenda a tẽed-n-taasã tɩ b ‘gũud a Zeova raarã ne tʋlsem sẽn yaa kãsenga.’ Yaa b sẽn na n ningd raarã b yamẽ wakat fãa la b ra tõe n sɩd maan woto. (2 Pɩɛɛr 3:12) “[A Zeova] ra-kãsengã sẽn tar dabeema” sẽn kolg wʋsgã yĩnga, tõnd fãa me tagsg segd n yɩɩ woto.—Zoɛll 3:4.
Gũ-y ne “yel-manesem sẽn yaa sõama”
5. Wãn-wãn la d tõe n wilg tɩ d sɩd tʋlla wʋsg n põs a Zeova ra-kãsengã sasa?
5 D sã n sɩd tʋll wʋsg n põs a Zeova ra-kãsengã sasa, d segd n wilga vẽeneg ne d tʋʋm tɩ d sɩd yaa neb “yel-manesem sẽn yaa sõama la sẽn sakd Wẽnnaam.” B sẽn yeel tɩ “yel-manesem sẽn yaa sõama” wã, tõe n tẽeg-d-la a Pɩɛɛr sẽn sagl woto wã: “Wa kamb sẽn mi sakre, lak-y y yam ne pĩnd tʋls-wẽns sẽn da be y sũurẽ, y sẽn wa n da ket likẽ wã. La wala sẽn bool-a yãmbã sẽn yaa Sõmblem naaba, y me yɩ sõma, y manesem fãa pʋgẽ, tɩ yaa woto la b gʋls-yã: ‘Yɩ-y sõma tɩ mam menga yaa sõngo.’ ”—1 Pɩɛɛr 1:14-16, Sebr Sõngo.
6. Sẽn na yɩl n yɩ sõmse bõe la d segd n maane?
6 Sẽn na yɩl n yɩ sõmse, d segd n yɩɩ yɩlem d yĩnsã, d tagsgã, d vɩɩm manesmã pʋgẽ la d tẽebã wɛɛngẽ. Rẽ yĩnga, d segenda d mens n gũud a “Zeova raarã,” n ket n yaa yɩlem wala neb sẽn zãad a Zeova yʋʋrã bɩ? Rũndã-rũndã, yɩlemd tallg pa nana ye. Bala, dũniyã vɩɩm manesem noy tara sãoong n debda. (1 Korẽnt dãmba 7:31; 2 Tɩmote 3:13) Rẽ yĩnga, tõnd neeme tɩ welgr ning sẽn be vɩɩm manesem noy nins tõnd sẽn tũudã ne b rãmb nins dũniyã neb sẽn tũudã lebgda vẽneg n paasdẽ bɩ? D sã n pa neẽ, rat n yeelame tɩ d bee yell pʋgẽ. Tõe tɩ noy nins tõnd sẽn tũudã ne b sẽn yaa sõma n yɩɩd dũniyã rãmb noyã sãamdame bɩ? Sã n yaa woto, d segd n maana modgr n dems yɛlã sẽn na yɩl n ta Wẽnnaam yam.
7, 8. a) Wãn-wãn la d tõe n wa le pa tagsd tɩ tara yõod tɩ d tall “yel-manesem sẽn yaa sõama?” b) Bõe la d segd n maan tao-tao n dems d mense?
7 B sẽn wilgd yoobã yɛl ẽntɛrnetã pʋgẽ masã tɩ ned tõe n paamd-b n getẽ tɩ b pa ne-a wã, neb kẽer sẽn da pa tõe n paam n ges yoob yɛl woto pĩndã tõe n paam n gesame, tɩ logtor a yembr yet tɩ “yaa yoob yɛl buud ka tɛka.” Sã n mik tɩ d geta ẽntɛrnetã pʋgẽ tʋʋm-dẽgdã, yaa vẽeneg tɩ d kɩɩsda Biiblã sẽn yeel tɩ d ‘ra sɩɩs bõn-dẽgdã.’ (Ezai 52:11) Rẽ yĩnga, d sã n maand woto, d tõe n yeelame tɩ d ningda a Zeova raarã d yamẽ wakat fãa sɩda? Bɩ d viigda ra-kãng d yamẽ wã, n tagsdẽ tɩ baa d sã n dẽgemd d yamã ne bõn-dẽgd me, d ket n tara sẽk n na n wa yɩlg d mense? Yoobã yɛl gesg sã n sɩd yaa d zu-loɛɛga, d segd n yɩɩ tao-tao n kos a Zeova t’a ‘kɩt tɩ d wẽneg n da ges bõn-zaals ye, la a kõ-d vɩɩm a sorã pʋgẽ.’—Yɩɩl Sõamyã 119:37.
8 A Zeova Kaset rãmb wʋsgo, kom-bɩɩs la kãsemb sẽn naag taab tũuda vɩɩm manesem no-kãsemsã Wẽnnaam sẽn luglã, n gind dũni-kãngã vɩɩm manesem sẽn dẽgem hal wʋsgã. B sẽn mi tɩ tond wakatã yaa yãgdem wakatã, la t’a Pɩɛɛr keoogame t’a Zeova ‘raarã na n waa wa wagdrã’ yĩngã, b ket n tara “yel-manesem sẽn yaa sõama.” (2 Pɩɛɛr 3:10) B tʋʋmã wilgdame tɩ b ‘ningda a Zeova raarã b yamẽ wakat fãa.’a
Gũ-y ne wẽn-sakr tʋʋmã
9. Bõe la wẽn-sakrã segd n kɩt tɩ tõnd maane?
9 Wẽn-sakr tʋʋmã tara yõod wʋsgo, d sã n gũud a Zeova raarã ne ratem kãsenga. Wẽn-sakr tʋʋm baoodame tɩ d waoog Wẽnnaam, tɩ woto kɩtdẽ tɩ d tʋll n maan sẽn tat a yam. Yaa kɩs-sɩd ne a Zeova n tusd tõnd tɩ d tʋmd wẽn-sakr tʋʋmã. A ratame “tɩ neb buud fãa paam fãagr la b wa paam sɩda bãngr hakɩka.” (1 Tɩmote 2:4, NW ) Wẽnnaam ‘ka rat tɩ ned ba a ye sãam ye, a ratame tɩ neba fãa yam tek tɩ b kos sugri.’ (2 Pɩɛɛr 3:9) Woto yĩnga, d wẽn-sakrã pa segd n kɩt tɩ d modg sõma n paas n sõng nebã tɩ b bãng a Zeova la b rɩk a togs-n-taar sɩda?—Efɛɛz rãmba 5:1.
10. Bõe yĩng tɩ d segd n gũus d mens ne ‘arzɛgsã belgre?’
10 Tõnd sã n deng n bao Wẽnnaam Rĩungã, d vɩɩmã na n pida ne wẽn-sakr tʋʋmã. (Matɩe 6:33) Rẽ baoodame tɩ d tall tagsg sẽn zems laogã wɛɛngẽ. A Zezi ra keooga woto: “Gũus-y y mens ne rat wʋsgã. Bala, hal baa naar pʋgẽ, ninsaal vɩɩmã ka tũud ne bũmb nins a sẽn tarã ye.” (Luk 12:15, Kãab-paalgã Koe-noogo) Baa ne sẽn tõe n yɩ toog ne-d tɩ d tags tɩ laogã nonglem tõe n belga tõndã, d tẽeg tɩ ‘yɩɩr ne dũni kãngã yɛlã la arzɛgsã belgr’ tõe n ‘dɩɩ Wẽnnaam koɛɛgã.’ (Matɩe 13:22). Noorã rɩɩb paoong lebga toogo. Woto kɩtame tɩ dũniyã babs kẽer pʋsẽ, sãnda tagsdẽ tɩ sẽn na yɩl n tõog n paam vɩɩm sẽn yaa sõma, b segd n basa b zakã neb yʋʋm a wãna, n tɩ tʋm tẽng sẽn tar laog n yɩɩd pʋgẽ. Baa Wẽnnaam nin-buiidã sʋka, neb kẽer me tagsa woto. Yaa sɩd tɩ b sã n kẽng tẽn-zẽnga, tõe tɩ b tõog n sɩd sõng b zakã neb tɩ b paam rũndã-rũndã te-paalsã. La baasg zãnga, bõe n tõe n yõd n paam b nin-nongdsã b sẽn bas yirã tẽebo? Rẽ yĩnga, taoor-sobend sẽn zems sẽn ye pa be zakẽ wã yĩngã, b na n talla tẽeb sẽn segdã n wa paam fãagr a Zeova raarã sasa sɩda?
11. Wãn-wãn la ned a ye sẽn toeem tẽng n na n tɩ tʋm wilg tɩ wẽn-sakr tʋʋm yõod yɩɩda arzɛka?
11 Ned a ye sẽn da yi Filipin n kẽng Zapõ n na n tɩ tʋm wakat bilf zãmsa Biiblã ne a Zeova Kaset rãmbã beenẽ. A sẽn bãng Biiblã sẽn yet bũmb ning zak soab zu-sobendã wɛɛngẽ wã, a bãngame masã t’a segd n sõnga a zakã neb tɩ b lebg a Zeova sõgen dãmba. (1 Korẽnt dãmba 11:3) A pagã sẽn pa Filipinnã kɩɩsa tẽeb ning a sẽn paam paalmã hal wʋsgo, n yeel-a bal t’a sẽn paad be n toond bãmb ligd n são a sẽn na n lebg n wa zãms a zakã neb Biiblã. Raoã sẽn yã tɩ wakatã yaa yãgdem wakat la t’a zakã neb yell sɩd pak-a lame wã, a baas n lebg n kulame. A sẽn tɩ tall sũ-mar ne a zakã rãmb n ges b yell ne nonglmã, sɩd woma biis wʋsgo. A zakã neb wa n baas n sak n naag-a-la baleng hakɩkã pʋgẽ, t’a pagã meng lebg wakat fãa so-pakda.
12. Bõe yĩng tɩ d segd n ning tẽebã yɛl pipi zĩigẽ d vɩɩmã pʋgẽ?
12 D tõe n maka tõnd yɛlã sẽn yaa to-to wã ne roog sẽn sok bugum tɩ neb be a pʋgẽ. Rẽ yĩnga, yɩta yam tʋʋmd tɩ d be be n tar gĩnd-gĩnd n dat n yiis teed roogã sẽn dat n sirgã pʋgẽ bɩ? Pa d sẽn na n bao n fãag d mengã, d zakã neb la neb a taab sẽn be roogã pʋgẽ vɩɩm n tar yõod wʋsg n yɩɩd sɩda? Be neere, dũni-wẽn-kãngã rebda a sãoong zĩigẽ tao-tao tɩ neb wʋsg vɩɩm be yell pʋgẽ. D sẽn mi woto tiirã, vẽenega d segd n sɩd ninga tẽebã yɛl pipi zĩigẽ d vɩɩmã pʋgẽ la d kẽes d mens ne yẽesem Rĩungã koɛɛg mooneg sẽn fãagd yõyã pʋgẽ.—1 Tɩmote 4:16.
D pa segd n tall “dẽgd” ye
13. D ratame t’a Zeova ra-kãsengã wa mik tɩ d yaa nin-bʋs buudu?
13 A Pɩɛɛr wilga vẽeneg tɩ tara yõod wʋsg tɩ d ket n gũudẽ, n yeel woto: “Mam zo-nongdse, yãmb sẽn gũud bõn-kãensã, bɩ y maan yãmb sẽn tõe tɛka tɩ [Wẽnnaam wa] mik tɩ yãmb bee laafɩ pʋgẽ, tɩ dẽgd tosbo ne dõdb kaẽ ye.” (2 Pɩɛɛr 3:14) A Pɩɛɛr sẽn sagl-d tɩ d yɩ neb yel-manesem sẽn yaa sõma la sẽn sakd Wẽnnaamã poore, a wilga vẽeneg me tɩ tara yõod t’a Zeova wa mik tɩ d yaa neb b sẽn pek ne a Zezi zɩɩmã sẽn tar yõod wʋsgã. (Wilgri 7:9, 14) Woto baoodame tɩ ned tall tẽeb ne a Zezi maoongã la a rɩk a meng n kõ n deeg koom lisg n lebg a Zeova balemda.
14. Sẽn na yɩl n da tall ‘rẽgdo,’ bõe la d segd n maane?
14 A Pɩɛɛr saglame tɩ d mao ne d pãng tɛk sẽn na yɩl tɩ b wa mik tɩ d yaa neb sẽn pa tar ‘dẽgd ye.’ Rẽ yĩnga, tõnd sẽn yaa kiris-nebã, d gũusdame tɩ d manesmã la d zʋgã ra wa wõneg dũniyã rẽnd bɩ? D sã n yã rẽgd sẽn tosg d fuugu, d yɩta tao-tao n yẽes-a. Sã n yaa fuug d sẽn nong wʋsg meng la rẽgdã sẽn tosgã d modgdame n yẽes-a neere. Rẽ yĩnga, tõnd kiris-nedemdã sẽn yaa wa fuug d sẽn yeelgã sã n wa rẽgem, d zʋgã bɩ d manesmã sẽn tar zang yĩnga, d maooda woto me n na n dems-a tao-tao bɩ?
15. a) Bõe yĩng tɩ Israɛll nebã ra segd n ning b futã noy zerdo? b) Bõe yĩng t’a Zeova rũndã-rũndã sõgen dãmbã yaa toore?
15 Israɛll nebã ra segd n ‘ninga b futã noy zerdo,’ la b “loe zerda ne gĩs sẽn yaa kẽeg haoo.” Bõe yĩnga? Rẽ ra yaa sẽn na yɩl n tẽeg a Zeova tõodã yell daar fãa n sak-ba, la “b yɩ sõama” b Wẽnnaamã nifẽ. (Sõdbo 15:38-40) Tõnd sẽn ya a Zeova rũndã-rũndã sõgen dãmbã yĩng kɩtame tɩ d welg n yaa toor ne dũniyã rãmba, bala d tũuda Wẽnnaam noyã. Wala makre, d tara vɩɩm manesem sẽn yaa yɩlemde, d getame tɩ zɩɩmã yaa sõng Wẽnnaam nifẽ, la d lakd d mens ne bõn-naands buud fãa pʋʋsgo. (Tʋʋma 15:28, 29) Neb wʋsg waoogda tõndo, d sẽn dɩk sard sẽn pa vigsd n zãad d mens yɩlmã yĩnga.—Zak 1:27.
D pa segd n tall zang ye
16. Mao n da tall zang baooda bõe maanego?
16 A Pɩɛɛr sagl-d lame me tɩ d modg tɩ b wa mik tɩ d pa tar zang ye. Wãn-wãn la d na n tõog tɩ woto yɩ? Naoor wʋsgo, b tõe n yẽesa rẽgdo. La ned sã n tar zanga, rẽ yaa yell n yɩɩda. Woto rat n yeelame t’a tara zʋg-wẽnga, bɩ zanga. Tʋm-tʋmd a Poll ra sagla Filip kiris-nebã woto: “Bɩ y maan bũmb fãa tɩ yẽgeng ne yam yuusg ra zĩnd ye, tɩ yãmb na yɩ neb sẽn ka tar yell ye, la sẽn tar pʋ-peelem, la sẽn yaa Wẽnnaam kamba sẽn ka tar dõdb nin-kɩɩsdba ne nin-wẽnsa sʋk ye, neb nins yãmb sẽn yãgd b sʋk wa fɩtl dãmb dũniyã pʋgẽ.” (Filip rãmba 2:14, 15) Tõnd sã n tũud sagl-kãngã d na n laka d mens ne yẽgeng la no-koɛɛmã, la d balem Wẽnnaam ne yam sõngo. D sẽn nong a Zeova la neb a taabã yĩng na n kɩtame tɩ d moon Rĩungã “koe-no-kãngã.” (Matɩe 22:35-40; 24:14) Sẽn paase, d na n ket n moonda koe-noogã, baa neb wʋsg sã n pa mi bũmb ning sẽn kɩt tɩ d ket n modgd n kẽesd d sẽk ne yamleoog n dat n sõng nebã tɩ b bãngd Wẽnnaam la Biiblã sẽn ya a Gomdã.
17. D sã n baood zu-noog tʋʋmd kiris-neb tigingã pʋgẽ, yaa yam bʋg la d segd n talle?
17 D sẽn pa tʋll n tall zangã yĩnga, d sẽn dat n maana fãa pʋgẽ, d segd n vaeesa d yam-tusdi wã n gese. Tõnd pa ye maand d yɛlã wa dũniyã rãmb sẽn maand yɛlã to-to b mens nafr yĩng balã, wala makre, b sẽn maood n dat n yɩ laog rãmb la nin-bɛdã ye. D sã n wa baood zu-noog tʋʋmd kiris-neb tigingã pʋgẽ bɩ d kell n tall yam-sõngo, tɩ wakat fãa bɩ ya a Zeova la neb a taabã nonglem yĩng la d tʋll n sɩd maan dẽ. Sɩd kõta sũ-noog d sẽn ne rap sẽn tar tẽeb ‘sẽn dat n yɩ [yel-gɛtba],’ la sẽn tʋll ne sik-m-meng n na n tʋm wʋsg ne sũ-noogo, a Zeova la b tẽed-n-taasã yĩngã. (1 Tɩmote 3:1; 2 Korẽnt dãmba 1:24) Sɩd-sɩda, neb nins sẽn tar zʋg nins sẽn zems n tõe n yɩ kãsem dãmbã ‘rɩlgda Wẽnnaam piisa . . . ne yamleoogo, ka ligd yĩng ye, la yaa nonglem yĩnga, ka tɩ soog bãmb ne pãng ye, yaa tɩ yɩ mamsg bãmb yĩnga.’—1 Pɩɛɛr 5:1-4.
D segd n zĩnda “laafɩ pʋgẽ”
18. B mii a Zeova Kaset rãmbã ne zʋg-sõma bʋse?
18 Sẽn na n baase, a Pɩɛɛr wilgame tɩ b segd n wa mikame tɩ d be “laafɩ pʋgẽ.” Sẽn na yɩl n tõog n tũ sagl-kãngã, d segd n talla zems-n-taar ne a Zeova la ne neb a taabã. A Pɩɛɛr sagla tõnd tɩ sẽn yɩɩd fãa, d segd n talla “nonglem wʋsg tõnd sʋka,” la d bao tɩ laafɩ zĩnd tõnd ne kiris-neb a taabã sʋka. (1 Pɩɛɛr 2:17; 3:10, 11; 4:8; 2 Pɩɛɛr 1:5-7) Sẽn na n yɩl n kogl d laafɩ wã, d segd n talla nonglem ne taaba. (Zã 13:34, 35; Efɛɛz rãmba 4:1, 2) Sẽn yɩɩd fãa, d tẽn-tẽns tigs-kãsemsã sasa, b nee vẽeneg tɩ d sɩd nonga taaba. Tigis-kãseng a ye sẽn zĩnd Kosta Rɩka, yʋʋmd 1999 wã, ned a ye sẽn koosd teed sɩlg yirã sũur sãamame, bala a Zeova Kaset rãmb nins sẽn be tẽn-kãngã sẽn wa n na n deeg sãambã lilla a koosmã n pa bãng ye. La vẽk-n-beoogã, a yãa tẽngã Kaset rãmbã sẽn deeg sãambã ne nonglem ningã, baa b sẽn da pa mi-bã. La yaoolem daarã, te-koaasã naaga saam-biisã n beel sãambã la a kos Biibl zãmsgo.
19. Bõe yĩng tɩ d segd n bao laafɩ ne d tẽed-n-taasã?
19 Tõnd sẽn baood ne pʋ-peelem n na n zĩnd ne d tẽeb saam-biisã la d saam-bi-pogsã laafɩ pʋgẽ wã wilgdame tɩ d sɩd gũuda a Zeova raarã la dũni-paalgã a sẽn kãab tɩ watẽ wã ne d sũur fãa. (Yɩɩl Sõamyã 37:11; 2 Pɩɛɛr 3:13) Mak-y n ges wala tõnd sẽn na n pa tõe n tall laafɩ ne d tẽed-n-taaga. Rẽ yĩnga d tagsdame tɩ d na n wa tõog n naaga saam-bi-kãng n zĩnd arzãnã pʋgẽ bãan sɩda? D tẽed-n-taag sã n wa tar yell ne-do, d segd n tɩ yã-a-la tao-tao n ‘maneg yellã.’ (Matɩe 5:23, 24) Woto maaneg tara yõod hal wʋsgo, d sã n dat n kell n tall laafɩ ne a Zeova.—Yɩɩl Sõamyã 35:27; 1 Zã 4:20.
20. Zĩ-bʋs pʋsẽ la d segd n wilg tɩ d ‘gũuda Wẽnnaam’?
20 Rẽ yĩnga, tõnd meng ‘ningda a Zeova raarã d yamẽ wakat fãa bɩ’? Yaa d sẽn na n tar vɩɩm manesem sẽn yaa yɩlemd dũni kãngã sẽn põogã pʋgẽ la d wilgd vẽeneg tɩ d gũuda wẽnga saab ne d sũur fãa. Sẽn paase, tõnd wẽn-sakrã tʋʋm wilgdame tɩ d gũuda a Zeova ra-kãsengã hal wʋsgo, la tɩ d tʋlla ne d sũur fãa n na n vɩɩmd Rĩungã naam sasa. La d sẽn gũud dũni paalg laafɩ sẽn na n zĩnd a pʋgẽ wã leb n yaa vẽeneg me d sẽn baood laafɩ ne d tẽed-n-taasã to-to wã pʋgẽ. Ne woto, d wilgdame tɩ d ‘gũuda Wẽnnaam,’ la tɩ d ‘gũuda a Zeova raarã ne ratem kãsenga.’
[Tẽngr note]
a Ges-y yʋʋmd 2000, yʋʋm-vẽkr kiuug pipi daar Gũusg Gasgã seb-neng 31, la Annuaire des Témoins de Jéhovah 1997, seb-neng 51.
Y tẽrame bɩ?
• Gũ a ‘Zeova raarã ne ratem kãseng’ rat n yeelame tɩ bõe?
• Wãn-wãn la tõnd manesmã wilgd tɩ d ‘gũuda Wẽnnaam?’
• Bõe yĩng tɩ wẽn-sakr tʋʋm tar yõod wʋsgo?
• Bõe la tõnd segd n maan sẽn na yɩl t’a Zeova wa mik ‘tɩ d ka tar dẽgd bɩ zanga, la tɩ d bee laafɩ pʋgẽ’?
[Foto, seb-neng 11]
Yel-manesem sẽn yaa sõma wilgdame tɩ d ‘gũuda Wẽnnaam’
[Foto rãmba, seb-neng 12]
Rĩungã koɛɛg mooneg fãagda yõyã
[Foto, seb-neng 14]
D sẽn gũud a Zeova raarã bɩ d bao laafɩ ne neb a taabã