Kiris-nin-pogs nins sẽn yaa sakdbã yaa Wẽnnaam balemdb sẽn tar yõod wʋsgo
“Pag tõe n nagame n belg neda. Neer loogdame. La yaa pag ninga sẽn zoet Zusoaba la b na n pẽge.”—YELBŨNA 31:30.
1. Wãn-wãn la a Zeova sẽn get neermã to-to wã yaa toor ne dũniyã rãmb sẽn get-a to-to wã?
DŨNIYÃ rãmb sẽn ne n yɩɩd yaa sẽn pukd yɩng tɩ nebã neẽ wã bala, sẽn yɩɩd fãa sẽn tɩ loe ne pagbã. La bũmb ning sẽn pak a Zeova n yɩɩd yaa sẽn be ned sũurẽ wã, tɩ baa nedã sã n kʋʋndẽ bɩ bõn-kãng meng tõe n lebgd neer n paasdẽ wã. (Yelbũna 16:31) Yaa rẽ la Biiblã sẽn sagend pagbã woto wã: “Yãmb sã n na n maneg y mense, a ka tog n yɩ nagem zut pãnengo walla sãnem fãnteed ningr walla nagem fut yeelgr ye. La a tog n yɩɩ sũur dẽnda sẽn lilli, sẽn ka sãamd ye, sẽn yaa sũ-bʋgsem la sũ-maasem, sẽn yaa paoong kãseng Wẽnnaam nifẽ.”—1 Pɩɛɛr 3:3, 4.
2, 3. Wãn-wãn la pagbã sõng tɩ koe-noogã paam pãng pipi yʋʋm kob-gĩndẽ wã, la wãn-wãn la b reng n togs rẽ?
2 Biiblã goma pagb wʋsg sẽn tall manesem sẽn zems ne pẽgr yelle. Pipi yʋʋm kob-gĩndẽ wã, pʋg-kãens kẽer paama zu-noog n tʋm n sõng a Zezi ne a tʋm-tʋmdbã. (Luk 8:1-3) Kaoosg poore, kiris-nin-pogs kẽer lebga koe-moondb sẽn tar yẽesem, t’a taab me sõnga rap sẽn da yaa taoor-lʋɩtb wala tʋm-tʋmd a Poll sõma. Sẽn paase, kẽer yɩɩ sãamb rɛɛgdb hal sõma, n sak tɩ tigingã neb wa tigimd b zakẽ wã menga.
3 Gʋlsg Sõamyã reng n togsame t’a Zeova ra na n wa tʋma ne pagb hal sõma n pids a raabã. Wala makre, Zoɛll 3:1, 2 reng n togsame tɩ rap la pagba, kom-bɩɩs la sẽn kʋʋl-b fãa na n paama vʋʋsem sõngã n naag n moon Rĩungã Koe-noogo. Bãngr-gom-kãngã sɩnga pidsg yʋʋmd 33 Pãntekotẽ wã. (Tʋʋma 2:1-4, 16-18) Pagb kẽer b sẽn zae ne vʋʋsem sõng paama yel-soalem maaneg tõodo, wala bãngr-goam togsgã. (Tʋʋma 21:8, 9) Pʋg-kãensã sẽn yaa tẽebã pʋgẽ tãb-biis kʋʋngã sẽn moon koe-noogã ne yẽesem ningã sõngame tɩ kiris tũudmã piuug tʋʋll-tʋʋll pipi yʋʋm kob-gĩndẽ wã. Yʋʋmd 60 sẽnẽ, tʋm-tʋmd a Poll gʋlsame tɩ koe-noogã “moona dũniyã fãa.”—Kolos rãmba 1:23.
B pẽg-b-la b raoodã, b yẽesmã, la b sẽn yɩ sãamb rɛɛgdbã yĩnga
4. Bõe yĩng t’a Poll ra tar bʋʋm n na n pẽg pipi yʋʋm kob-gĩndẽ kiris-neb tigingã pagb kẽere?
4 Wala makre, tʋm-tʋmd a Poll ra nanda Wẽnnaam tʋʋmd ning pagb kẽer sẽn da maandã, wa rũndã-rũndã yel-gɛtbã me sẽn nand Wẽnnaamã tʋʋmdã pʋg-yẽesensã sẽn maandã. A Poll sõdga pagb kẽer yʋy wala a “Tirfɛn la a Tirfooz sẽn tʋmd Zusoaba tʋʋmdã,” ne “tõnd zo-nongr a Persiid sẽn tʋm Zusoaba tʋʋmd wʋsgã.” (Rom dãmba 16:12) A Poll gʋlsame n yeel t’a Evodi ne a Sẽntiis ‘tʋma ne yẽ koe-nooga pʋgẽ.’ (Filip rãmba 4:2, 3) A Pirsill ne a sɩd a Akila me tʋma ne a Polle. Yẽ ne a Akila “gẽnega b yõe” n fãag a Polle, tɩ rẽ kɩt t’a gʋlse: “A ka maam bal n pʋʋsd bãmb bark ye, la ya a Zezi tẽedba fãa sẽn yaa bu-zẽmsa me.”—Rom dãmba 16:3, 4; Tʋʋma 18:2.
5, 6. Wãn-wãn to la a Pirsill kõ rũndã-rũndã saam-bi-pogsã mak-sõngo?
5 Bõe n sõng a Pirsill t’a tall yẽesem la raoodo? B wilga bũmb a yembr sẽn sõng-a t’a tall raoodã Tʋʋma 18:24-26 pʋgẽ. Beenẽ d karemdame t’a sõnga a sɩdã n zãms a Apolos sẽn yaa gom-minim soabã sɩdã Wẽnnaam sẽn vẽnegã tɩrga. Vẽenega, a Pirsill ra zãmsa Wẽnnaam Gomdã la tʋm-tʋmdbã sẽn zãms-b bũmb ningã sõma. Rẽ kɩtame t’a paam zʋg-sõma sẽn kɩt t’a tall yõod Wẽnnaam ne a sɩdã nifẽ, la t’a yɩ pipi tigingã ned sẽn tall yõod wʋsgo. Rũndã-rũndã me yaa woto ne kiris-nin-pogs wʋsg sẽn tʋmd wʋsgo, sẽn zãmsd Biiblã sõma la sẽn dɩt tẽebã rɩɩb a Zeova sẽn kõt ne “tʋm-tʋmd sẽn tũud sɩda” maasmã.—Luk 12:42.
6 A Akila ne a Pirsill yɩɩ sãamb rɛɛgdb tɛkẽ! A Poll zĩnda b zakẽ, a sẽn da wa n tʋmd ne-bã, n naag-b n sẽt fu-rot Korẽntã. (Tʋʋma 18:1-3) B sẽn da wa n yik n kẽng Efɛɛz la Romã, b kell n yɩɩ kiris-neb sẽn yaa sãamb rɛɛgdba, hal n sak meng tɩ tigingã tigiss maand b zakẽ wã. (Tʋʋma 18:18, 19; 1 Korẽnt dãmba 16:8, 19) A Nimfa, ne a Zã Mark ma a Maari me sakame tɩ tigingã tigiss maand b zagsẽ wã.—Tʋʋma 12:12; Kolos rãmba 4:15.
B tara yõod wʋsg tõnd wakatã
7, 8. Baleng tʋʋm-bʋs sẽn zems ne pẽgr la rũndã-rũndã kiris-nin-pogs maanda, la b tõe n kɩsa sɩd ne bõe?
7 Wala sẽn da yɩ to-to pipi yʋʋm kob-gĩndẽ wã, rũndã-rũndã, kiris-nin-pogs nins sẽn yaa wẽn-sakdbã tara tʋʋmd sẽn yaa kãseng Wẽnnaam raabã pidsg pʋgẽ, sẽn yɩɩd fãa koe-moonegã tʋʋmd pʋgẽ. La sɩd me saam-bi-pogsã modgame! D rɩk makr ne a Gwen, sẽn tũ a Zeova yʋʋm 50 la zakã, hal n tɩ tõk a kũum yʋʋmd 2002 wã. A sɩdã yeela woto: “Tõnd galʋ-tẽngã pʋgẽ, neb wʋsg ra miime t’a Gwen yaa ned sẽn moond koe-noogã ne yẽesem. Yẽ ra tagsdame tɩ ned buud fãa ra tõe n paamame t’a Zeova nong-a, la a paam a kãabsã pidsg nafa. A ra kɩsa sɩd ne Wẽnnaam, ne a siglgã, la ne tõnd zakã nebã, la a ra leb n kengda tõnd raood ne nonglem, d sã n wa koms raoodo. Woto fãa yɩɩ sõng-kãseng n kõ maam ne d kambã, d sẽn da wa n be ne taab tɩ d vɩɩmã be barkã sasa. Ad a loogrã sɩd namsda tõnd wʋsgo.” A Gwen ne a sɩdã kãadem kaoosa yʋʋm 61.
8 Kiris-nin-pogs tusa sẽn kẽ kãadem la sẽn pa kẽ kãadem yaa so-pakdb la misioneer dãmba, n pa baood tɩ zʋʋg bũmb nins sẽn yaa tɩlae ne vɩɩmã ye, la b yelgd Rĩungã koɛɛg galʋ-tẽn-bɛd la tẽn-kɩremsẽ. (Tʋʋma 1:8) Bãmb wʋsg yãkame n ka na n bao b mens zags bɩ n paam kamba, sẽn na yɩl n tõog n kẽes b mens zãng a Zeova tʋʋmdã pʋgẽ. Pʋg-kãens yaa b rãmb nins sẽn sakd n yãagd b sɩdbã sẽn yaa kaagr yel-gɛtbã, la saam-bi-pogs tusa wã sẽn tʋmd Betɛllã zagsẽ dũniyã gill zugã. Sãmbg sẽn ka be, pʋg-kãensã sẽn maand modgr sõma wã bee ‘buuda fãa soolem bõn-neeb’ sẽn pidsd a Zeova roogã ne ziirã sʋka.—Azze 2:7.
9, 10. Wãn to la zags neb kẽer wilg tɩ b nanda mak-sõng ning pagb la ma rãmb sẽn yaa kiris-neb sẽn kõ wã?
9 Yaa sɩd tɩ kiris-nin-pogs wʋsg tara tʋʋm wʋsg zakã pʋgẽ n segd n tʋme, la b lʋɩɩsda Rĩungã yɛl taoore. (Matɩe 6:33) Saam-bi-poak sẽn pa kẽ kãadem n yaa so-pakd gʋlsame: “M ma sẽn da tar tẽeb sẽn yaa kãn-kãe la a kõt mak-sõngã yĩngã, yaa yẽ n sõng maam tɩ m lebg wakat fãa so-pakd n yɩɩda. Togs sɩda, a ra yaa mam so-pakd-taas nins sẽn sõngd-b maam n yɩɩdã a yembre.” Rao a yembr goma a pag sẽn yaa kompugl kãsems a naas ma yelle, n yeele: “Wakat fãa tõnd zakã ra yaa yɩlemd tɩ bũmbã fãa be a zĩigẽ. A Bonnie kɩtame tɩ tõnd zakã ka yãmb ne teed wʋsgo, sẽn na yɩl tɩ zakã neb tõog n tik b yamã tẽebã yɛl zutu. A sẽn sõngd maam n zãad ligdã neerã kɩtame tɩ mam tõog n tʋm wakat pʋɩ-sʋk tʋʋmd yʋʋm 32, tɩ rẽ sõng maam tɩ m tõog n paam sẽk n paas n ges m zakã la tẽebã yɛla. Mam pagã zãmsa kambã me tɩ b yɩ neb sẽn nong tʋʋma. A sɩd zemsa ne pẽgre.” Rũndã-rũndã, pʋg-kãngã ne a sɩdã tʋmda a Zeova Kaset rãmbã dũni gill tʋʋmdã yẽgrẽ.
10 Sɩd a yembr gʋlsame n gom a pagã sẽn tar kom-kãsemsã yell woto: “Mam sẽn nong bũmb ning a Suzan nengẽ ya a sẽn nong Wẽnnaam la nebã wʋsgã, n paas a sẽn yaa wʋmda, nimbãan-zoɛt la pʋ-peelem soabã. Wakat fãa, a tagsdame t’a Zeova n zems ne bũmb ning fãa d sẽn tar tɩ yaa sõma n yɩɩdã. Yẽ mengã tũuda no-kãngã a sẽn yaa Wẽnnaam sõgen la a yaa kamb ma wã yĩnga.” Ne a pagã sõngre, ra-kãngã tõog n saka zu-nood tʋʋm tẽebã wɛɛngẽ, n yɩ kãsem soaba, so-pakda, tigims gĩnd yel-gɛt pʋgdga, la Logtor yirẽ wʋm-taab Sull (C. L. H) neda. Ad pʋg-kãensã buud sɩd tara yõod b sɩdbã nifẽ, b kiris-nin-taasã, la sẽn yɩɩd fãa a Zeova nifẽ!—Yelbũna 31:28, 30.
Pagb sẽn ka sɩdba, la sẽn tar yõod wʋsgo
11. a) Wãn-wãn la a Zeova wilg tɩ pagbã, sẽn yɩɩd fãa pʋg-kõapã yell pak-a lame? b) Pʋg-kõap nins sẽn yaa kiris-neb la saam-bi-pogs nins sẽn ka tar sɩdbã segd n kɩsa sɩd ne bõe?
11 A Zeova wilga naoor wʋsg tɩ pʋg-kõapã yell pak-a lame. (Tõodo 27:19; Yɩɩl Sõamyã 68:6; Ezai 10:1, 2) A ka toeem ye. Neb nins yell sẽn ket n pak a Zeova wʋsgã pa pʋg-kõapã bal ye, leb n yaa pagb sẽn tar kamb n vɩ b yembrã, ne pagb nins sẽn nan pa kẽ kãadem b sẽn dat woto bɩ sẽn nan ka paam kiris-ned sẽn zems ne-b n na n kẽ kãadem ne wã yĩngã. (Malaki 3:6; Zak 1:27) Yãmb sã n bee kiris-neb nins sẽn balemd a Zeova ne kɩs-sɩd n yaool n ka tar kẽed-n-taag sẽn yaa kiris-ned sẽn na n sõng-yã, bɩ y bãng tɩ y tara yõod wʋsg Wẽnnaam nifẽ.
12. a) Wãn to la kiris-nin-pogs kẽer wilgd tɩ b sakda a Zeova wakat fãa? b) Bõe n namsd tõnd saam-bi-pogs kẽere?
12 D rɩk makr ne kiris-nin-pogs nins sẽn pa kẽ kãadem, b sẽn sak na n tũ a Zeova noor ning sẽn yet tɩ d kẽ kãadem ne ‘ned sẽn tũud Zusoabã balã’ yĩngã. (1 Korẽnt dãmba 7:39; Yelbũna 3:1) Wẽnnaam Gomdã kõt-b-la bas-m-yam woto: “Ned sã n ka bas [a Zeova, yẽ] me ka basd a soab ye.” (2 Sãmwɛll 22:26, Sebr Sõngo) La ne bãmb wʋsgo, kell n pa woto n pa kẽ kãadmã ka nana ye. Saam-bi-poak a yembr yeelame: “Mam dɩka sard sẽn ka vigsd tɩ m na n kẽe kãadem ne ned sẽn tũud Soaalã bala, la togs sɩdã, m sã n ne m zo-rãmbã sẽn kẽed kãadem ne kiris-nin-dap sẽn yaa sõma woto tɩ m ket n be m yembrã, m daagda nintãm.” Ad saam-bi-poak a to sẽn yeele: “Mam balma a Zeova yʋʋm 25. Mam dɩka sard sẽn ka vigsd n na n ket n sakd-a, la naoor wʋsgo m sidgda m sẽn yaa m yembrã yĩnga.” A paasa woto: “Saam-bi-pogs sẽn yaa wala maam ratame tɩ b keng b pelse.” Wãn to la d tõe n sõng wẽn-sakdb kãensã?
13. a) Bõe la neb nins sẽn da wat n get a Zɛfte bipuglã makr zãmsd tõndo? b) Bõe me la d tõe n maan n wilg tɩ tõnd tigingã saam-bi-pogs nins sẽn nan pa kẽ kãadmã yell pak-d lame?
13 Makr a yembr sẽn zĩnd pĩnd wilgda bũmb a ye d sẽn tõe n maan n sõng-ba. A Zɛfte bipuglã sẽn da wa n sak n pa na n kẽ kãadmã, neba ra yãame tɩ sɩd yaa mong-m-meng yam la a sẽn tallã. Bõe la b maan n keng a pɛlga? ‘Yʋʋmd fãa, Israɛll pagba kẽngdame n tɩ [pẽg] Galaad dao a Zɛfte biiga rasem a naase.’ (Bʋkaoodba 11:30-40) Tõnd me segd n sɩd pẽga saam-bi-pogs nins sẽn nan pa kẽ kãadem n ket n sakd Wẽnnaam noyã wakat fãa wã sõmb-sõmb woto.a Bõe me la d tõe n maan n wilg tɩ b yell pak-d lame? Yaa d sẽn na n pʋʋsd n kotẽ t’a Zeova sõng-b tɩ b ket n balemd a Zeova ne kɩs-sɩd wakat fãa. D segdame n kɩt tɩ b tall bas-m-yam t’a Zeova la kiris-neb tigingã tõr nong-b-la sõma la b nand-ba.—Yɩɩl Sõamyã 37:28.
Roagdb nins sẽn wubd b kambã b yembrã sẽn tõogd to-to
14, 15. a) Bõe yĩng kiris-neb nins sẽn yaa ma rãmb sẽn wubd b kamb b yembrã segd n kos a Zeova sõngre? b) Wãn to la roagdb nins sẽn wubd b kamb b yembrã tõe n tʋm tɩ zems ne b pʋʋsgã?
14 Kiris-nin-pogs nins sẽn wubd b kambã b yembrã maooda ne zu-loees wʋsgo. La b tõe n kosa a Zeova t’a sõng-b tɩ b wub b kambã tɩ zems ne Biiblã noyã. Yaa sɩda, yãmb sã n yaa roagd sẽn wubd y kambã y yembre, ka bũmbã fãa pʋgẽ la y tõe n yɩ ma la ba ye. Baasg zãnga y sã n kos a Zeova sõngr ne tẽebo, a na n sõng-y lame tɩ y tõog n ges y zɩɩb toɛy-toɛyã yell sõma. D rɩk makre: Mams-y y sẽn na n tar kamaan-yolg sẽn zɩs n dat n tɩ wer masĩnẽ. Rẽ yĩnga yãmb na n namsame n tʋk yolgã ne zugu, sã n mik tɩ yãmb mii weefo, tɩ ned me rat n kõ yãmb a weef tɩ y zɩlg n kẽnge? Yaa vẽeneg tɩ y na n sak n deega weefã. Woto me, ra namsd-y ne sũ-sãamsã y yembr bala, n yaool n tõe n kos t’a Zeova sõng-y ye. Sɩd me yaa yẽ mengã n yet tɩ y kos-a t’a sõng-yã. Yɩɩl Sõamyã 68:19 (NW ) yeelame: “Bɩ a Zeova sẽn tʋkd tõnd zɩɩbã n kõt-d daar fãa wã paam pẽgre.” Pipi Pɩɛɛr 5:7 me yeta yãmb tɩ y bas y yɩɩrã fãa ne a Zeova, ‘tɩ bõe, yẽ menga geta yãmb yelle.’ Woto, zu-loeesã la yɩɩrã sã n wa komsd yãmb daood fãa, bɩ y rok y zɩɩbã n dogl y saasẽ Ba wã, n maan dẽ “n da bas ye.”—1 Tesalonik rãmba 5:17; Yɩɩl Sõamyã 18:7; 55:23.
15 Wala makre, y sã n yaa ma, yaa vẽeneg tɩ y maanda yɩɩr ne y kambã karen-bi-taas sẽn tar pãn-tusd-wẽns nins b zutã, bɩ ne makr nins b sẽn maood ne, b sẽn dat n yɩ burkĩmbã yĩngã. (1 Korẽnt dãmba 15:33) Y bee bʋʋm. La y leb n segd n pʋʋsa yel-kãens wɛɛngẽ me. La bõe yĩng tɩ y ka na n pʋʋs yel-kãensã wɛɛngẽ ne y kambã, nand tɩ b kẽng lekolle, wala makre y sã n vaees daar verse wã ne taab n sa poore? Y sã n pʋʋs ne pʋ-peelem yɛl takɩ zutu, rẽ tõe n talla pãn-tusdg sẽn yaa kãseng kambã tagsg zugu. Sẽn yɩɩd fãa, y sã n modgd ne sũ-mar n zãmsd y kambã Wẽnnaam Gomdã tɩ kẽed b sũyã, y na n paama a Zeova sõngre. (Tõodo 6:6, 7; Yelbũna 22:6) Tẽeg-y t’a Zeova ‘geta nin-tɩrse, la a wʋmd bãmb pʋʋsgo.’—1 Pɩɛɛr 3:12; Filip rãmba 4:6, 7.
16, 17. a) Bõe la biribl a yembr yeel nonglem ning a ma wã sẽn wilgã wɛɛngẽ? b) Wãn to la ma wã tẽeb tall pãn-tusdg a kambã zutu?
16 D rɩk makr ne a Olivia sẽn yaa kamb a yoob ma wã. A sɩdã sẽn ka tẽedã loogame n bas yẽ ne a kambã b bi-yaoogã rogem poore, la tao-tao bala, pagã sɩngame n wubd a kambã Wẽnnaam soayã pʋsẽ. A Olivia biribl a Darren sẽn da tar yʋʋm a 5 wakat kãngã wã tara yʋʋm 31 masã, n yaa kiris-neb kãsem soab la so-pakda. Bã-kɛgeng n da yõk a Darren, hal tɩ ket n namsd-a rũndã mengã, tɩ rẽ fãa ra paas a Olivia yɩɩrã. A Darren tagsa a yãadmã yell n gʋls woto: “M ket n tẽra m sẽn da mi n zĩ logtor yir m gãagã zug n gẽegd m ma ne yãgbã. Daar fãa a ra mi n zĩnd n yɛgla maam n karemd Biiblã tɩ m kelgdẽ. Rẽ poore, a ra yɩɩnda Rĩungã yɩɩll ning gom-zug sẽn yaa ‘Barka, Zeova’ wã.b Hal rũndã menga, Rĩungã yɩɩn-kãngã la mam nong n yɩɩda.”
17 A Olivia bas-yardã la a nonglmã ne a Zeova sõng-a lame t’a yɩ ma sẽn yaa a yembr ne a kamb sẽn tõog n zã a zak sõma. (Yelbũna 3:5, 6) Bõn-datɩ nins a sẽn da rat t’a kambã yãkã wilgdame t’a ra tara yam-sõngo. A Darren yeelame: “Wakat fãa m ma sagla tõnd tɩ d bao n kẽ Wẽnnaam wakat fãa tʋʋmdã pʋgẽ. Rẽ kɩtame tɩ maam ne m tãop a naas kẽ Wẽnnaam wakat fãa tʋʋmdã pʋgẽ. La m ma zɩ n wuk a meng ne rẽ neb a taabã taoor ye. Mam modgdame n na n dɩka m ma togs-n-taar n tall a zʋg-sõma wã.” Yaa sɩd tɩ pa kambã fãa n bɩt n lebg Wẽnnaam sõgen dãmb wa a Olivia kambã ye. La ma sã n maan a sẽn tõe fãa n tũ Biiblã noyã, a tõe n talla bas-m-yam t’a Zeova na n wilg-a-la sore, la a sõng-a ne nonglem.—Yɩɩl Sõamyã 32:8.
18. Wãn-wãn la d tõe n wilg tɩ kiris-neb tigingã a Zeova sẽn kõ-dã tara yõod wʋsg ne-do?
18 Wẽnnaam tũnugda ne kiris-neb tigingã ne a tigissã sẽn dɩlgd tõnd tẽebã wɛɛngẽ wakat fãa wã, ne d tẽeb saam-biisã, la ne sẽn bɩ-b tẽebã wɛɛngẽ sẽn yaa ‘rap sẽn yaa kũunã’ n sõngd tõndo. (Efɛɛz rãmba 4:8) Kãsem dãmb sẽn yaa wẽn-sakdbã tʋmda wʋsg n kengd tigingã neb fãa tẽebo, sẽn yɩɩd fãa n sõngd ‘kɩɩbs ne pʋg-kõap sẽn be toog pʋgẽ’ n pidsd b raabã. (Zak 1:27) Dẽ, bɩ y modg n kell n pa Wẽnnaam nin-buiidã sʋka, n da tol n zãag y meng ne-b ye.—Yelbũna 18:1; Rom dãmba 14:7.
Sakr sɩd bee rasãnde
19. Bõe yĩng tɩ pag sakrã ka rat n yeel t’a yõodã ka ta a sɩdã, la Biiblã mak-bʋg n sɩd wilgd rẽ?
19 A Zeova naana pag t’a yɩ rao loakda. (Sɩngre 2:18) Dẽ, pag sẽn segd n sak a sɩdã, ka rat n yeel t’a yõodã ka ta a sɩdã ye. La sakrã yaa bũmb sẽn waoogd paga, n kɩtdẽ t’a tõe n tʋm ne a tõodã tɩ zems ne Wẽnnaam daabã. Yel-bũna sak 31 wã bilgda tʋʋm wʋsg nins tẽn-kʋdem wẽndẽ Israɛll pʋg-sõng sẽn da maandã. A ra sõnga sẽn be-b raab pʋgẽ, a sela viyn pʋto, la a ra zĩiga. N-ye, ‘a sɩd teeg-a lame n ka kong yõod ye.’—Verse 11, 16, 20.
20. a) Wãn to la pag sẽn yaa kiris-ned segd n ges tõod nins Wẽnnaam sẽn kõ-a wã? b) Zʋg-sõma bʋs la a Ɛstɛɛr tall-yã, la rẽ kɩtame t’a Zeova tõog n tʋm ne-a wãn-wãn to?
20 Pag sẽn yaa sik-m-meng soab la wẽn-zoɛt ka baood n na n wuk a meng bɩ n wags ne a sɩd ye. (Yelbũna 16:18) A ka na n tik dũniyã yɛl zut n bao n na n zẽk a meng ye, la sẽn yɩɩd fãa a na n tʋma ne tõod nins Wẽnnaam sẽn kõ-a wã tɩ naf neb a taabã, wala a zak rãmba, a kiris-nin-taase, a yagse, la sẽn yɩɩd fãa a Zeova. (Galat dãmba 6:10; Tɩt 2:3-5) Ges-y Rĩm poak a Ɛstɛɛr makrã b sẽn gʋls Biiblã pʋgẽ wã. A ra yaa neer yaa sɩda, la a ra leb n yaa sik-m-meng soab la sakda. (Ɛstɛɛr 2:13, 15) A kãadmã poore, a waooga Rĩm a Asueris sẽn yaa a sɩdã wʋsgo, tɩ rẽ yaa lebend ne rĩma pĩnd pag a Vasti sẽn maanã. (Ɛstɛɛr 1:10-12; 2:16, 17) Ba a sẽn wa n lebg rĩm-poakã poore, a Ɛstɛɛr soka a roagd a Mardose ne waoogr n na n bãng a sẽn tagsd yɛl kẽer zugu. La a ra tara raood me! Ne raoodo, a puka a Haman sẽn da yaa nin-kãseng sẽn ka zoet ned nimbãanegã bãongo, bala a ra gãanda tẽng n maan sɩlem sẽn na yɩl tɩ b sãam Zʋɩf rãmbã. A Zeova tũnuga ne a Ɛstɛɛr hal wʋsg n fãag a nin-buiidã.—Ɛstɛɛr 3:8–4:17; 7:1-10; 9:13.
21. Wãn to la kiris-nin-poak tõe n tall yõod ne a Zeova n paas wakat fãa?
21 Vẽenega, pĩnd wẽndẽ la tõnd wakatã, pagb n sak a Zeova zãng-zãng la b balm-a ne b sũy fãa. Rẽ n so tɩ pagb nins sẽn yaa wẽn-zoɛtbã tar yõod wʋsg a Zeova nifẽ. D saam-bi-pogse, bas-y t’a Zeova toeemd-y bilf-bilf n paasdẽ ne a vʋʋsem sõngã maasem, tɩ y wa lebg ‘laag’ sẽn tar yõod n yɩɩda, “sẽn tõe n maan tʋʋm sõama fãa.” (2 Tɩmote 2:21; Rom dãmba 12:2) Wẽnnaam Gomdã goma balemdb sẽn tar yõod woto wã yell n yeele: “Waoog-a a tʋʋmda nafr yĩnga. La f bas t’a tʋʋma pẽg-a tẽnga pʋgẽ.” (Yelbũna 31:31) Bɩ sɩd yɩ woto ne yãmb ned kam fãa.
[Tẽngr not rãmbã]
a Sã n yaa ne d sẽn tõe n pẽg-b to-to wã, bɩ y ges yʋʋmd 2002, tʋʋlg kiuug rasem 15 Gũusg Gasgã ne farende, seb-neng 26-8.
b Yaa yɩɩll 212 sẽn be Yɩɩl-y n pẽg a Zeova wã sebr pʋgẽ wã, a Zeova Kaset rãmbã sẽn yiisã.
Yãmb tẽrame bɩ?
• Wãn to la pipi yʋʋm kob-gĩndẽ kiris-nin-pogs kẽer wilg tɩ b yaa pagb sẽn tar yõod wʋsg a Zeova nifẽ?
• Wãn to la saam-bi-pogs wilg tɩ b tara yõod ne Wẽnnaam tõnd wakatã?
• Wãn-wãn la a Zeova sõngd ma rãmb nins sẽn wubd b kamb b yembrã, la saam-bi-pogs a taab nins sẽn ka tar sɩdbã?
• Wãn to la pag tõe n wilg t’a waoogda zu-sobendã Wẽnnaam sẽn luglã ne a sũur fãa?
[Zĩ-gũbri, seb-neng 31]
MAK-SÕMS Y SẼN TÕE N TAGS B ZUTU
Yãmb rat n bãnga makr a taab sẽn tɩ loe ne pagb sẽn yɩ wẽn-sakdb tɩ Biiblã gom b yell bɩ? Sã n yaa woto, bɩ y karem verse nins b sẽn ning tẽngrã. Y sã n wa bʋgsd pagb toɛy-toɛyã b sẽn sõdgã zugu, bɩ y bao n bãng noy nins y sẽn tõe n tũ sõma n paas y vɩɩmã pʋgẽ.—Rom dãmba 15:4.
◆ A Saara: Sɩngre 12:1, 5; 13:18a; 21:9-12; 1 Pɩɛɛr 3:5, 6.
◆ Israɛll pagb sẽn yɩ kõatba: Yikri 35:5, 22, 25, 26; 36:3-7; Luk 21:1-4.
◆ A Debora: Bʋkaoodba 4:1–5:31.
◆ A Rut: Rut 1:4, 5, 16, 17; 2:2, 3, 11-13; 4:15.
◆ Sunem poakã: 2 Rĩm dãmba 4:8-37.
◆ Fenisi poakã: Matɩe 15:22-28.
◆ A Mart ne a Maari: Mark 14:3-9; Luk 10:38-42; Zã 11:17-29; 12:1-8.
◆ A Tabita: Tʋʋma 9:36-41.
◆ A Filip kompugli wã: Tʋʋma 21:9.
◆ A Foebe: Rom dãmba 16:1, 2.
[Foto, seb-neng 29]
Yãmb pẽgda saam-bi-pogs nins sẽn nan pa kẽ kãadem, sẽn sakd Wẽnnaam noyã wakat fãa wã bɩ?
[Foto, seb-neng 30]
Bõe ne bõe takɩ la y tõe n pʋʋs n kos tɩ kambã yaool n loog karengo?