“Kãab-kʋdgã” ket n tara yõod bɩ?
YƲƲMD 1786 soabã pʋgẽ, Fãrens logtor a yembr yiisa logtoeemd sebr b sẽn bool tɩ Traité d’anatomie et de physiologie. B pẽga sebrã hal wʋsg a yiibã sasa n yeel t’a to kae ye. A yãab sẽn lebg toogã yĩng kɩtame tɩ b koosd a ye fãa sẽn yɩɩd dolaarã ligd tus 27 menga! Baasg zãnga, rũndã-rũndã, bãad rãmb sẽn na n sak tɩ logtor teeg seb-kʋd-kãngã saglsã n tɩp-b sõor paoodame. Baa ne sẽn yaa logtoeemd sebr sẽn da tall yõodã, a pa ye tõe n sõng bãad rũndã-rũndã ye.
Neb wʋsg me tẽedame tɩ Biiblã pipi babgã b sẽn boond tɩ Kãab-kʋdgã pa ye tar yõod ye. Yaa sɩd tɩ b sak n deegame tɩ Israɛll buudã kibay sẽn be a pʋgẽ wã yaa sɩda, la b nong a goam a taaba. La a yʋʋmã sẽn yɩɩd 2400 yĩnga, b yam yooda ne sagls nins a sẽn kõtã sã n ket n tara yõodo. Yaa sɩd tɩ rũndã-rũndã, siãnsã, leebgã la baa zagsã pʋsẽ vɩɩmã pa tol n wõnd sẽn da yaa to-to Biiblã gʋlsg sasa wã ye. A Philip Yancey sẽn da yaa zʋrnall ning b sẽn boond tɩ Christianity Today taoor soabã gʋlsa a sebr (La Bible que Jésus lisait) pʋgẽ woto: “Kãab-kʋdgã goam võor wʋmb nong n yaa toogo, la a goam nins võor b sẽn wʋmdã meng pa noom nebã rũndã-rũndã ye. Woto fãa kɩtame tɩ naoor wʋsgo, nebã pa karemd Biiblã bab-kãngã sẽn ta Kãab-paalgã naoor a tã wã ye.” La pa pipi d sẽn wʋmd tɩ neb yet woto ye.
Yʋʋmd 100 soabã sẽnese, rat n yet tɩ sẽn pa yã n ta yʋʋm 50 tʋm-tʋmd a Zã kũumã poore, rao a ye sẽn yaa arzɛk soab t’a yʋʋr boondẽ t’a Marcion yiisa sebr n yeel tɩ kiris-nebã pa segd n ye karem Kãab-kʋdgã ye. Ãngeletɛɛr ned sẽn yaa kʋdem yɛl-mit t’a yʋʋr boondẽ t’a Robin Lane Fox wilgame t’a Marcion togsa bũmb ning sẽn kɩt t’a yetẽ tɩ b pa segd n ye karem-a wã võore, n yeel woto: “Wẽnnaam ning yell Kãab-kʋdgã sẽn gomdã teela neb sẽn yɩ bi-bees la teerorist rãmb wa Israɛll rĩm a Davɩɩde. La Kiristã sẽn wilg nebã Wẽnnaam ningã yẽ yaa toor fasɩ ne Kãab-kʋdgã pʋgẽ Wẽnnaamã. Wẽnnaam kãng sɩd yaa sõma zãnga.” A Fox paasame tɩ “neb wʋsg wa n saka a Marcion sẽn yeelã. Sẽn yɩɩd fãa, Erop yaangã buud nins sẽn gomd siriakã tẽ-a lame. Neb n kell n tẽ a goamã hal n tãag yʋʋmd 400 soabã pʋgẽ, tɩ b boond rẽ tɩ ‘Marcionisme.’” Hal ne rũndã, neb n ket n tẽed a Marcion goamã. Rẽ n so t’a Philip Yancey wa yeel yʋʋm 1600 zugẽ tɩ “Kãab-kʋdgã tara meneng kiris-nebã sʋka, la tɩ b pʋd n pa ye gomd a yell woto ye.”
La rẽ yĩnga Kãab-paalgã ledga Kãab-kʋdgã bɩ? Bõe n tõe n kɩt tɩ d sak n deeg tɩ yaa Wẽnnaam yɛngã la b sẽn boond Kãab-kʋdgã pʋgẽ tɩ “Saasẽ-pãng-soab [a Zeova]” la Kãab-paalgã pʋgẽ tɩ “nonglem la laafɩ soabã”? (Ezai 13:13; 2 Korẽnt dãmba 13:11) Rẽ yĩnga Kãab-kʋdgã tõe n naf-y-la rũndã-rũndã bɩ?