“Yaa m wakatã n da nan pa ta!”

Mobill-kẽeng sẽn wʋk sagd n bas a sor n bʋdg n kẽ naoã rãmb zĩigẽ, n fão pag ne a sɩda, la yʋʋm 23 bi-ribla. Niuyork zʋrnall a yembr goma rẽ yelle, n wilg tɩ pagã ne a sɩdã kii zĩig pʋgẽ, tɩ bi-bɩɩgã sobge. Bi-bɩɩgã sẽn wa n vʋʋg n yã yɛlã sẽn yɩ to-to wã, a yeela woto: ‘Pa sɩd ye! Wẽnde, sõng-m tɩ m yi yel-kãngã pʋgẽ.’ A paasa woto: “Yaa m wakatã n da nan pa ta.”

TÕE tɩ y zoe n wʋma yel-beed a woto buudu. Ned sã n põs kũum sabaab pʋgẽ, nebã wae n yetame tɩ yaa a ‘soabã wakat n da nan pa ta,’ la a sã n maan kaalem, b yetame ‘t’a daar n ta,’ wall b yetẽ tɩ ‘yaa Wẽnd ne a tʋʋmde.’ Kẽer tẽedame tɩ sabaab sẽn baas to-to fãa tũu ne nedã zu-noogo, wall yaa pʋlengo, pa rẽ bɩ Wẽnd yelle. Sẽn yaa a soab fãa, yaa ãdem-biisã sẽn tẽed tɩ bũmb nins fãa sẽn paamd–bã ra pĩnd n pʋlmame tɩ ned pa tõe n gɩdgã yĩng n kɩt tɩ b tagsd woto wã. La pa ned sã n maan kaalem wall ned sã n fão bal la b yet woto ye. Leb n pa rũndã-rũndã la ãdem-biisã yik n tẽed woto ye. B sɩng n tẽeda rẽ hal daar zãra.

Wala makre, pĩnd wẽndẽ Babilon nebã ra tẽedame tɩ ãdem-biisã yɛl sẽn yaa to-to wã bee ne ãdsã. Woto kɩtame tɩ b ra get sa-gãnã n bʋgd bagre. Gɛrk rãmbã ne Rom nebã ra tara zu-noog wẽn-pogse, la b tẽed tɩ wẽn-kãens tõe n kɩtame tɩ ned vɩɩm yɩ sõma wall b sãam-a. B ra tagsdame meng tɩ mi n yaa tɩlae t’a Zes ne a Zipitɛɛr sẽn yaa b wẽn-kãsemsã bas b raabã n tũ wẽn-pogs kãensã sẽn datã.

Ẽndu rãmbã ne Budist rãmbã tẽedame tɩ neb nins sẽn vɩ rũndã-rũndã wã ra reng n vɩɩmda pĩnda, la tɩ b yɛlã sẽn yaa to-to wã bee ne b sẽn da maan bũmb ning b pĩnd vɩɩmã pʋgẽ wã. B leb n tẽedame tɩ yaa nebã sẽn maand bũmb nins masã wã n na n wilg b vɩɩm ning sẽn watã sẽn na n yɩ to-to. Tũudum a taaba, la baa kiris-neb ne yʋʋrã sul wʋsg me tẽedame tɩ Wẽnnaam pʋlma ãdem-biisã.

Woto fãa kɩtame tɩ baa rũndã-rũndã b sẽn tagsd tɩ nebã yam wekame wã, neb wʋsg n ket n tẽed tɩ bũmb nins sẽn paamd ãdem-biisã yaa Wẽnnaam n pʋlme, la tɩ bũmb pa tõe tɩ pa yɩ wa a sẽn pʋlmã ye. Yãmb me tẽeda rẽ bɩ? Rẽ yĩnga bũmb nins fãa sẽn paamd ãdem-biig a vɩɩmã pʋgẽ wã, baa a rogmã ne a kũumã daar pʋlmã Wẽndẽ bɩ? Wẽnnaam pʋlma yãmb vɩɩmã tɩ sẽn maand kaẽ bɩ? Bɩ d ges Biiblã sẽn leokd sogs-kãensã to-to.

[Fotã saoodba]

Ken Murray/New York Daily News