A 5 soabã: A Maari yaa Wẽnnaam ma

Sɩnga wãn tɩ b wa tẽed woto? Sebr a yembr yeta woto: “Yɩɩ sẽn da pʋʋsd bõn-naandsã neb wʋsg sẽn wa n tuub n lebg kiris-nebã, . . . la a Maari pʋʋsgã paam pãnga. . . . Sẽn tuub-bã ra minima wẽn-pogsã pʋʋsgo. Hal sẽn kaoose, b yaab rãmbã ra sɩng n pʋʋsda wẽn-pogse, n boond a ye tɩ “gãrãnd mɛɛre,” la a to tɩ “divin vɩɛɛrze.”—The New Encyclopædia Britannica (1988), Volim 16, seb-neng 326 la 327.

Bõe la Biiblã yeta? ‘Fo na n dɩka pʋga, n dog bi-ribla, n pʋd a yʋʋr t’a Zezi. A na n yɩɩ nin-kãsenga, la b na n boond-a lame tɩ Sẽn-ka-to Biiga. . . . Woto yĩnga, bi-sõng ninga fo sẽn na n dogã, b na n boonda yẽ tɩ Wẽnnaam Biiga.’—Luk 1:31-35.

Biiblã gom-kãensã wilgda vẽeneg t’a Maari yɩɩ “Wẽnnaam biigã” ma, a pa Wẽnnaam ma ye. Biiblã yetame tɩ ‘saasã ne yĩngrã ka sek Wẽnnaam’ zĩndg ye. (1 Rĩm dãmba 8:27) Dẽnd yaa vẽeneg t’a Maari pʋgã pa sekd Wẽnnaam ye. A Maari meng zɩ n yeel t’a roga Wẽnnaam ye. Yaa tãablem-sõngã tẽeb n wa n kɩt tɩ kẽer boond a Maari tɩ Wẽnnaam ma wã. Yʋʋmd 431 soabã, egiliizã taoor dãmb talla b tigisg a ye Efɛɛz tẽngã pʋgẽ. La yaa tigis-kãng sasa la b yeel t’a Maari yaa Theotokos bɩ “Wẽnnaam ma.” Bala Theotokos yaa Gɛrk gom-bil sẽn dat n yeel tɩ “sẽn dog-a Wẽnnaamã.” Yaa rẽ n wa ne a Maari pʋʋsgã. La yʋʋm sẽn kaoose, wẽn-naandsã pʋʋsg ra tara pãng Efɛɛz tẽngã, hal tɩ b ra maand kibs rãmb n kõt b wẽn-poak a Artemis.

Efɛɛz nebã ra yetame tɩ bõn-naandg ning sẽn makd b wẽn-poak a Artemisã “yii yĩngr n lʋɩ,” tɩ kɩt tɩ b ra maand yɛl wʋsg n waoogd bõn-naandgã. (Tʋʋma 19:35) La yel-kãens kẽer me bee b sẽn maand n waoogd a Maari wã pʋgẽ. Wala makre, b sẽn mi n tʋk bõn-naandgã n gilgdẽ tɩ nebã pʋgd n yɩɩndẽ la b pẽgd-a wã. Bilf-bilfã, b wa n tõogame me n kɩt tɩ b pʋʋsd bõn-naands sẽn makd a Maari la neb a taaba.

Ges-y Biiblã vɛrse kãensã me: Matɩe 13:53-56; Mark 3:31-35; Luk 11:27, 28.

SƖDÃ LA WOTO:

A Maari pa Wẽnnaam ma ye. A yaa Wẽnnaam biigã ma. Yaa tãablem-sõngã tẽeb n kɩt tɩ wa pʋʋsd a Maari la b boond-a tɩ Wẽnnaam ma wã