A Zezi sẽn wilg bũmb ning a meng zugã

Seb-gʋlsd a Herbert Lockyer yeela woto: “A Zezi ra mi a sẽn yaa ned ningã vẽenega. A ra mi a sẽn yitẽ, a sẽn wa tẽngã zug bũmb ning yĩnga, la a vɩɩmã sẽn da na n wa yɩ to-to.”

NAND tɩ d sak n deeg a Zezi goamã la d tẽ-ba, rẽndame tɩ d bao n bãng-a sõma. A pʋd n yɩɩ nin-bʋg buudu? A yii yɛ? A wa n na n maana bõe? A Matɩe, a Mark ne a Luk la a Zã evãnzill dãmbã pʋsẽ, a meng leokda sogs-kãensã.

Nand tɩ b rog-a tẽngã zugu, a ra beeme: Daar a yembre, a Zezi yeela woto: “A Abrahaam sẽn da waa n nan ka beẽ, dẽ tɩ mam beeme.” (Zã 8:58, Sebr Sõngo) Yaa yʋʋm 2 000 a Abrahaam kũumã poor la a Zezi rog-yã. Ne rẽ fãa, a Zezi ra sɩng n beeme tɩ wẽn-sakd a Abrahaam da nan pa rog ye. La wakat kãng t’a Zezi ra bee yɛ? A meng yeela woto: ‘Mam yii saasẽ n wa.’—Zã 6:38.

A yaa Wẽnnaam bi-ribla: A Zeova tara kom-dibli sõor ka tɛk sẽn yaa malɛgse. La a bi-ribl a Zezi ka to ye. A Zezi yeelame tɩ yẽ yaa Wẽnnaam “Bi-yende.” (Zã 3:18, Sebr Sõngo) Woto rat n yeelame tɩ yaa a Zezi a ye bal la Wẽnnaam naan a toore. Rẽ zugẽ, a Zeova bi-yendã sõng-a lame n naan bũmb nins fãa sẽn be yĩngri, la sẽn be tẽngã zugã.—Kolos rãmba 1:15, 16.

“Ninsaal Biigã:” A Zezi ra wae n boonda a meng woto. (Matɩe 8:20) Yaa sẽn na yɩl tɩ b bãng t’a sɩd ra yaa ninsaala, a ra pa malɛk sẽn tedg a meng ye. A sɩd ra yaa neda. Ne vʋʋsem sõngã maasem, Wẽnnaam dɩka a Bi-riblã vɩɩm saasẽ n ning a Maari sẽn da nan pa kẽ ne raoã pʋgẽ, t’a rog-a. Woto kɩtame t’a Zezi yɩ ned sẽn zems zãng fasɩ, n pa tall yel-wẽnd ye.—Matɩe 1:18; Luk 1:35; Zã 8:46.

Mesi ning b sẽn da yeel tɩ watame wã: Samari pag n da yeel a Zezi woto: ‘Mam miime tɩ Mesi wã na n waame.’ La a Zezi leok-a lame yaa: ‘Maam, a soab ning sẽn gomd ne fooma, yaa maam la yẽ.’ (Zã 4:25, 26, Kãab-paalgã Koe-noogo) Gom-bil ning b sẽn lebg tɩ “Mesi” bɩ “Kiristã” rat n yeelame tɩ “ned Wẽnnaam sẽn zae ne a vʋʋsem sõngã.” Wẽnnaam zaeya a Zezi, rat n yeel t’a yãk-a lame, sẽn na yɩl t’a wa tʋm tʋʋmd sẽn pa wõnd a taaba, a raabã pidsg pʋgẽ.

Bũmb ning a sẽn wa n na n maanã: Daar a yembre, a Zezi yeela woto: “Yaa tɩlae tɩ mam moon Wẽnnaam soolem koe-noog tẽns a taab me; tɩ bõe, b tʋma maam bõn-kãng yĩnga.” (Luk 4:43) Yaa sɩd t’a Zezi maana tʋʋm sõma toor-toor n sõng nin-buiidã. La sẽn da pak-a n yɩɩda, yaa Wẽnnaam Rĩungã koɛɛg moonego. Sõss nins sẽn na n pʋglã pʋgẽ, d na n wa goma bũmb nins a sẽn wilg nebã Wẽnnaam Rĩungã zugã yelle.

Yaa vẽeneg t’a Zezi pa yɩ nin-zaalg ye.a Wa d sẽn na n yã wã, a sẽn deng n zĩnd saasẽ wã yĩng kɩtame t’a goamã tar pãnga. Rẽnd koɛɛg ning a sẽn moonã sẽn toeem neb milyõ rãmb vɩɩm dũniyã gill zugã pa lingr ye.

[Tẽngr note]