Tara yõod tɩ y bãng Edɛn kibarã sã n yaa sɩda

WAKAT ning me, sẽn na yɩl n wilg tɩ Edɛn kibarã pa sɩda, bãngdb kẽer yetame tɩ Biiblã sɛb a taabã pa gomd kiba-kãng yell ye. Wala makre, a Paul Morris sẽn yaa tũudmã yɛl karen-saambã yeela woto: “Biiblã sɛb a taabã pʋsẽ, zĩig kae b sẽn gomd Edɛn kibarã yell vẽeneg-vẽeneg ye.” Baa bãngdb kẽer sã n sak n deega a sẽn yeelã me, pa sɩd ye.

Biiblã zĩis wʋsg gomda a Ãdem, a Hawa, waafã la Edɛn zẽedã zĩig yelle.a Bãngdb nins sẽn kɩɩsd rẽ wã tudga wʋsgo. La d tõe n yeelame tɩ tũudmã taoor dãmb kẽer ne Biiblã kɩɩsdbã sẽn pa tẽed tɩ Sɩngr sebrã sẽn yetã yaa sɩdã wẽnem n yɩɩde. Bala yaa Biiblã tõrã fãa la b paoogda. Bõe yĩng tɩ d yet woto?

D sã n wʋm bũmb ning sẽn zĩnd Edɛnnã võor la d na n tõog n wʋm Biiblã tõrã võore. Sogsg n be tɩ tar yõod wʋsg tɩ ned fãa bãng b leoorã. La Wẽnnaam sẽn kõ tõnd a Gomdã yaa sẽn na yɩl n sõng-d tɩ d sɩd paam b leoorã. Naoor wʋsgo, Biiblã sẽn leokd sogs-kãensã to-to wã tara loees ne yell ning sẽn zĩnd Edɛnnã. Bɩ d ges sogsg a wãn bala.

● Bõe yĩng tɩ d kʋʋndẽ la d kiidẽ? A Ãdem ne a Hawa sã n da kell n sakẽ-la a Zeova, b ra na n vɩɩmda wakat sẽn kõn sa. Wẽnnaam ra yeelame tɩ b sã n da kɩɩs-a la b na n ki. Dẽnd b sẽn kɩɩsã tɛka b lebga kiidba. (Sɩngre 2:16, 17; 3:19) B pa le zems zãng ye. La rẽ kɩtame tɩ b kambã la b yagensã yaa koangdba, n pa zems zãng ye. Biiblã goma rẽ yell n yeel woto: “Rao a yembr n wa ne yel-wẽnã dũniyã, tɩ kũum wa yel-wẽnã yĩnga. Rẽ n kɩt tɩ kũum yõkd nebã fãa, fãa sẽn maand yel-wẽnã yĩnga.”—Rom dãmba 5:12.

● Bõe yĩng tɩ Wẽnnaam bas tɩ wẽnemã beẽ? A Sʋɩtãan yeela Edɛn zẽedẽ wã tɩ Wẽnnaam yagda ziri, la t’a mongda a bõn-naandsã bõn-sõma. (Sɩngre 3:3-5) A sẽn maan woto wã, a rat n yeelame t’a Zeova sẽn dɩt a naamã to-to wã pa ne tɩrlem ye. A Ãdem ne a Hawa saka a Sʋɩtãan sẽn yeelã, tɩ wilgdẽ tɩ bãmb me zãgsa a Zeova naamã, n yetẽ tɩ ninsaal tõe n bãng n yãka sẽn yaa sõma ne wẽng a toore. A Zeova tɩrlmã ne a yamã sẽn ka to wã yĩnga, a ra miime tɩ bũmb a ye bal la a tõe n maan n welg yel-kãngã tɩ yɩ vẽenega. Yaa a sẽn na n bas ninsaalbã tɩ b soog b mens wa b sẽn datã, wakat a wãn pʋgẽ. Ninsaalbã sẽn soog b mens t’a Sʋɩtãan me kẽes a toog tɩ kɩt tɩ wẽnemã pid zĩig fãa wã, sɩd lebga vẽeneg tɩ ninsaal pa tõe n soog a meng tɩ naf-a tɩ pa tũ ne Wẽnnaam sõngr ye.—Yelbũna 20:24.

● Wẽnnaam datame tɩ tẽngã gill yɩ wãn to? A Zeova sẽn kɩt tɩ Edɛn zẽedã zĩigẽ ra yaa neerã wilgda a sẽn da rat tɩ tẽngã gill yɩ to-to wã. A yeela a Ãdem ne a Hawa tɩ b rog kamb n pid dũniyã la b “tõog-a.” Ra yaa sẽn na yɩl tɩ bilf-bilfã bɩ tẽngã gill wa lebg neere, tɩ bũmb fãa yaa sõma wa Edɛn zẽedã zĩig sẽn da yaa to-to wã. (Sɩngre 1:28) Dẽnd Wẽnnaam da ratame tɩ tẽngã yaa zĩ-neere, t’a Ãdem ne a Hawa la b kambã ne b yagensã vɩ a zugu, n yaa neb sẽn zems zãnga, n nong taab n zemsd taaba. Biiblã tõr la bal wilgda Wẽnnaam sẽn na n pids a raab kãng to-to.

● Bõe yĩng t’a Zezi Kirist wa tẽngã zugu? Kɩɩsgã sẽn zĩnd Edɛnnã kɩtame t’a Ãdem ne a Hawa ki, tɩ b kambã la b yagensã fãa me lebg kiidba. La Wẽnnaam sẽn yaa nonglmã yĩnga, a maana bũmb sẽn na yɩl tɩ ãdem-biisã wa paam fãagre. A tʋma a Biigã tẽngã zugu, t’a wa kõ a vɩɩmã tɩ yɩ rondo, n yao ãdem-biisã fãagr yĩnga. (Matɩe 20:28) Woto rat n yeelame tɩ bõe? Bãng-y tɩ b boola a Zezi tɩ “yaoolem Ãdem,” bala a tõog n maana bũmb a Ãdem sẽn pa tõog n maane. A saka a Zeova tɩ kɩt t’a kell n yɩ ned sẽn zems zãnga. Dẽnd a sẽn sak n ki wã yɩɩ maoongo, bɩ rond a sẽn kõ, tɩ kɩt tɩ neb nins fãa sẽn sakd Wẽnnaamã tõe n paam b yel-wẽnã sugri, la b wa paam vɩɩm ning buud a Ãdem ne a Hawa sẽn da vɩ Edɛn zẽedã zĩigẽ nand tɩ b kɩɩs Wẽnnaamã. (1 Korẽnt dãmba 15:22, 45; Zã 3:16) A Zezi sẽn maan woto wã, wilgda vẽeneg t’a Zeova raabã sẽn yaa a kɩt tɩ tẽngã wa lebg wa Edɛn zẽedã zĩig sẽn da yaa to-to wã na n pidsame.b

Wẽnnaam daabã yaa bũmb sẽn yaa vẽenega, sẽn na n sɩd pidsi. Pa bũmb ninsaalb sẽn mams b yamẽ bal ye. Wala Edɛn zẽedã zĩig sẽn da yaa zĩig sɩd-sɩd n da be tẽngã zug t’a tɩɩsã la a rũmsã ra yaa sɩd-sɩda, t’a Ãdem ne a Hawa me ra yaa neb sɩd-sɩdã, Wẽnnaam sẽn kãab bũmb ninsã fãa me yaa sɩda. Yaa bũmb sẽn na n pids ka la bilfu. Yãmb na n zĩnda wakat kãng bɩ? Rẽ bee ne yãmba. Wẽnnaam datame tɩ nebã fãa modg n wa paam rẽ, baa neb nins sẽn maand wẽngã.—1 Tɩmote 2:3, 4.

B sẽn wa n ka a Zezi raoogã zugã, a goma ne rao b sẽn da ka n yɛgl-a. Ra-kãng ra yaa bi-bɛɛga, sẽn da sak n deeg tɩ sɩd zemsame tɩ b kʋ yẽnda. La a goma ne a Zezi sẽn na yɩl n paam belsgo, la beoog daar sẽn yaa neere. A Zezi leok-a lame tɩ bõe? A yeel-a-la woto: “Fo na n zĩnda ne maam paradis [bɩ arzãnã pʋgẽ, NW ].” (Luk 23:43) Sẽn mik t’a Zezi ratame tɩ bi-be-kãngã vʋʋg n vɩɩmd wakat sẽn kõn sa tẽngã sẽn na n lebg wa Edɛn sẽn da yaa to-to wã zugã, yaa vẽeneg t’a ratame tɩ yãmb me wa paam rẽ. A Zezi ne a Ba wã fãa rata woto. Yãmb sã n dat bark kãensã, bɩ y maan y sẽn tõe fãa n bao n bãng Wẽnnaam ning sẽn naan-a Edɛn zẽedã zĩigã.

[Tẽngr not rãmbã]

[Zĩ-gũbri/Foto rãmba, seb-​neng 10]

BÃNGR-GOMD NING ZUG BIIBLÃ GOAM FÃA SẼN TIKÃ

“Mam na n ninga beem foo [rat n yeel tɩ waafã] ne pagã sʋka, la fo yageng ne yẽ yageng sʋka. Yẽ yagengã na n pogla fo zugu, la fo na n pogla yẽ na-kãsenkãare.”—Sɩngre 3:15.

Woto yaa Biiblã pipi bãngr-gomde, Wẽnnaam sẽn togs Edɛn zẽedã zĩigẽ. La pagã, pagã yagengã, waafã, la waafã yagengã yaa ãnda rãmba? “Beem” ning sẽn na n zĩnd b sʋkã na n waa ne bõe?

WAAFÃ

Yaa a Sʋɩtãana.—Wilgri 12:9.

PAGÃ

Yaa malɛgsã fãa sẽn be saasẽ ne a Zeova wã sẽn naag taab la b sẽn mak ne pagã. (Galat dãmba 4:26, 27) A Ezai pĩnd n goma “pãgã” yelle, n wilg t’a na n wa paama kamb wʋsgo.—Ezai 54:1; 66:8.

WAAFÃ YAGENGÃ

Yaa neb nins fãa sẽn yãk yam n maand a Sʋɩtãan daabã.—Zã 8:44.

PAGÃ YAGENGÃ

Yaa a Zezi Kirist la pipi. A yii malɛgsã sẽn be saasẽ wã sʋk n wa tẽngã zugu. La Kiristã ba-biisã sẽn yaa neb nins sẽn na n dɩ naam saasẽ ne-a wã me naagame. Nin-kãensã sẽn yaa kiris-neb sẽn paam vʋʋsem sõng zaeebã lebga buud Wẽnnaam sẽn so. B boond-b lame tɩ “Israɛll sẽn yaa Wẽnnaam dẽnda.”—Galat dãmba 3:16, 29; 6:16; Sɩngre 22:18.

NA-KÃSENKÃARÃ POGLGÃ

Makda toog ning sẽn da na n paam Mesi wã wakat bilf yĩngã. Sɩd me, a Sʋɩtãan tõogame n kɩt tɩ b kʋ a Zezi. La Wẽnnaam vʋʋg-a lame.

ZUGÃ POGLGÃ

Makda a Sʋɩtãan menesgã. A Zezi na n sãama a Sʋɩtãan wakat fãa yĩnga. Nand t’a maan rẽ menga, a na n kɩtame tɩ kɩɩsgã a Sʋɩtãan sẽn wa ne Edɛnnã biis fãa menem.—1 Zã 3:8; Wilgri 20:10.

Y sã n dat n paam vẽnegr Biiblã tõr gom-zug wɛɛngẽ n paase, bɩ y karem La Bible — Quel est son message ? sebrã. A Zeova Kaset rãmbã n yiis seb-kãngã.

[Foto, seb-​neng 11]

A Ãdem ne a Hawa kɩɩsgã wã-b lame