Bao-y n pẽneg-y Wẽnnaam

A belsda sũ-sãams rãmba

KIRIS-NIN-POAK a ye sũ-sãams sẽn da nams tɩ wa lebg bãag yeela woto: ‘Mam miime tɩ m pa tol n tõe n paam t’a Zeova nong-m ye.’ A ra ninga a yamẽ t’a Zeova zãaga a meng ne yẽ. A Zeova nin-buiidã sʋka, neb sũy sẽn sãam hal wʋsg tɩ lebg bãag ka kongd ye. La rẽ yĩnga a Zeova zãagda a meng ne nin-kãensã bɩ? Sok-kãngã leoorã bee goam nins Wẽnnaam sẽn vẽneg yɩɩl-gʋlsd a Davɩɩd t’a togs Yɩɩl Sõamyã 34:19 wã pʋgẽ. Gom-kãens sɩd kengda raoodo.

A Davɩɩd ra mii sũ-sãang sẽn loog noor sẽn tõe n maan ned sẽn tũud a Zeova ne a sũur fãa bũmb ningã. A bi-bɩɩlem wakate, Rĩm a Sayull wa n maanda sũ-kiir ne-a, tɩ kɩt t’a rigd-a n dat n kʋ. Woto kɩtame t’a ra zoet n baood a menga. A Davɩɩd wa n tɩ solga zĩig a ye, tɩ tõe tɩ yaa a sẽn da tẽed t’a Sayull pa na n tol n wa gẽes-a be wã yĩnga. A kẽnga Gaat sẽn da yaa Filisti soolmã tẽng a ye wã. Tẽn-kãng nebã yaool n da yaa Israɛll bɛɛba. Tẽngã rãmb sẽn wa n bãng a Davɩɩd sẽn yaa ned ningã, yɩɩ tɩlae t’a maan wa a yaa gãeenga, n paam n põse. A Davɩɩd yeelame tɩ yaa Wẽnnaam n fãag yẽ yellã pʋgẽ, la a tik rẽ zug n gʋls Yɩɩl Sõamyã 34 soabã.

Rẽ yĩnga a Davɩɩd ra tagsdame tɩ Wẽnnaam zãagda a meng ne neb nins sũy sẽn sãam b zu-loeesã yĩnga, tɩ kɩt tɩ b tagsdẽ tɩ b pa tar yõod n sek a na ges b yellã bɩ? Ad a Davɩɩd sẽn yeele: “Zusoabã pẽnegda neb nins sũy sẽn sãamã, la bãmb fãagda sũ-pa-noom dãmbã.” (Vɛrse 19) Bɩ d ges gom-kãensã sẽn kengd raood to-to, la b sẽn kõt saagr ningã.

“Zusoabã pẽnegda.” Sebr a yembr pʋgẽ, b yeelame tɩ gom-kãensã rat n yeelame tɩ “Zusoabã geta a nin-buiidã, n gũusd-b n dat n sõng-b la a fãag-b wakat fãa.” D sẽn mi t’a Zeova geta a nin-buiidã yellã kengda d raoodo. A nee b sẽn maood ne zu-loees nins rũndã-rũndã sẽn yaa ‘toog wakatã,’ la a mi zu-loe-kãens sẽn namsd-b to-to wã me.—2 Tɩmote 3:1; Tʋʋma 17:27.

“Neb nins sũy sẽn sãamã.” Bãngd a yembr yeelame tɩ ka wã, yɩɩl-gʋlsdã gomda “sũ-sãang buud fãa yelle.” Sɩd me, baa neb nins sẽn tũud Wẽnnaam ne pʋ-peelmã tõe n mii n wa sega zu-loe-kɛgemse, tɩ kɩt tɩ b sũy sãame.

“Sũ-pa-noom dãmbã.” Yaa neb nins raood sẽn komsã. Nin-kãensã tõe n wa tagsdame tɩ b pa le tar yõodo, hal tɩ tõe n mi n wa kɩt tɩ b pa le tẽed tɩ b yɛlã na n manegame ye. Sɩd me, sebr a ye b sẽn gʋls n na n sõng biibl-lɛbgdbã wilgame tɩ b tõe n lebga gom-kãensã tɩ “neb nins sẽn pa tẽed manegrã.”

Manesem bʋg la a Zeova tar ne “neb nins sũy sẽn sãamã,” la ne “sũ-pa-noom dãmbã”? Rẽ yĩnga a zãagda a meng ne-ba, n tagsdẽ tɩ pa zems t’a nong-b la a get-b yell bɩ? Ayo! A Zeova belsda a nin-buiidã sʋk neb nins sẽn kelemd n kot a sõngrã, wa roagd sẽn belsd a biig sẽn be toog pʋgẽ to-to wã. A rata ne a sũur fãa n bels neb nins sũy sẽn sãamã, la a keng sũ-pa-noom dãmbã raoodo. A tõe n kõo nin-kãens yam la pãnga, tɩ b tõog n mao ne b zu-loeesã.—2 Korẽnt dãmba 4:7; Zak 1:5.

Yãmb me tõe n bao n bãnga y sẽn tõe n maanega, n paam n pẽneg Wẽnnaam a Zeova sẽn yaa nimbãan-zoɛtã. A pʋlm-d-la woto: “M bee ne nimbãan-dãmba, n be ne neng sẽn sur-a tẽngã, tɩ m datame n keng b sũuri, m datame n doog b nenga, la m vʋʋg toogã sẽn zɩsg b rãmbã.”—Ezai 57:15, Sebr Sõngo.