Kɩt-y tɩ y vɩɩmã tall võor masã tɛka, la wakat fãa yĩnga

BAA rũndã menga, y tõe n kɩtame tɩ y vɩɩmã tall võore. Wãn to la y tõe n maan dẽ? Yaa y sẽn na n tũud Biiblã sẽn yaa Wẽnnaam Gomdã saglsã. D gom sagl-kãens kẽer yelle.

BIIBLÃ SAGLGA: Rĩm a Salomo yeela woto: “Bũmb ka be sẽn yaa noog ne ninsaal n yɩɩd a sẽn na n paam n dɩ la a yũ n maan sũ-noog ne a tʋʋmd ye.”—KOƐƐG SOABA 2:24.

Wẽnnaam sẽn naan tõnd to-to wã, kɩtame tɩ d sã n tʋmd tʋʋm sẽn tar yõod bɩ noom-do. Baa yɛlã sẽn yaa toog to-to rũndã-rũndã, y sã n tar tʋʋmd y sẽn tʋmd ne y sũur fãa la ne pʋ-peelem, y tõe n paama sũ-noogo.

BIIBLÃ SAGLGA: “Sẽn kõt-a sũ-noog yɩɩda sẽn deegd-a.”—TƲƲMA 20:35, SEBR SÕNGO.

Neb wʋsg mikame tɩ b sã n dɩkd b sẽkã la b keelmã n sõngd neb nins sẽn be zu-loees pʋgẽ n dat sõngrã, b paamda sũ-noogo, la tɩ rẽ kɩtdame me tɩ b vɩɩmã tar barka. A Salomo ra yeela woto: “Fo sã n tõe n sõng f yaka, bɩ f sõng-a la f ra zãgs ye.”—Yelbũna 3:27.

D gom a Ralph yelle. A sẽn dɩk a retrɛtã poore, mikame t’a pagã ra zoe n yaa so-pakda, t’a me yãk yam n kẽ so-pakrã. Kiuug fãa, b rɩkda lɛɛr dãmb ka tɛk n moond koɛɛgã, la b zãmsd nebã Biiblã. Ad a sẽn yeele: “Zaabr fãa, d sã n lebg n wa yiri, d mikdame tɩ d yaame. La pa d sẽn kʋʋndã yĩng ye, yaa d sẽn dɩkd d pãngã fãa n tʋmd d saasẽ Ba wã tʋʋmdã yĩnga. La baa ne yaamsã, d sũur yaa noogo.” Yẽ ne a pagã fãa sẽn maand nebã neer ningã yaa wa kũun b sẽn kõte, la woto kɩtame tɩ b tar sũ-noogo.

BIIBLÃ SAGLGA: “Zo-rãmb kẽer n be n sãamd neda. La zood kẽer me n be n yaa noog n yɩɩd rogem.”—YELBŨNA 18:24.

F sã n be zu-loees pʋgẽ la f tar neb sẽn teend-fo, boogda f toogã. Sɩd me, Ãngeletɛɛr dao a Francis Bacon yeelame tɩ f sã n pa tar zo-tɩrga, f vɩɩ “wa ned sẽn menem rasempʋɩɩgẽ.” Woto wilgdame tɩ y sã n tar zo-rãmb hakɩk tɩ y nong taab la y sõngd taaba, tõe n kɩtame tɩ y yɛlã kolg weoogo, tɩ y vɩɩmã tar yamleoog hal tɩ noom-y-yã.

BIIBLÃ SAGLGA: “Sũ-noog rãmb . . . la sẽn kelgd-b Wẽnnaam gomde, la b reegd-a.”—LUK 11:28, SEBR SÕNGO.

Ne gom-kãensã, a Zezi wilga bũmb sẽn tar yõod wʋsgo, sẽn dat-b n wa yã Wẽnnaam pʋlem-noodã pidsgã sẽn segd n maane. A yeelame tɩ b segd n kelga Wẽnnaam koɛɛgã la b reeg-a. Wẽnnaam a Zeova sõngda tõnd ne Biiblã sẽn yaa a Gomdã maasem, n dat tɩ d bãng vɩɩmã võore, la a sẽn dat tɩ d maan bũmb ninsã. Wa d sẽn yã sõsg ning sẽn loogã pʋgẽ wã, Biiblã wilgda tõnd Wẽnnaam daabã ne tẽngã sẽn yaa a soaba, la bũmb ning sẽn kɩt tɩ namsgã waoog rũndã-rũndã wã me. Yel-kãensã fãa bãngr yaa tɩlae sẽn na yɩl n tall vɩɩm sẽn tar bark la sẽn kõt sũ-noogo. Neb nins sẽn baood sẽk n zãmsd Biiblã la b tũud a saglsã paamda sũ-noogo. Bõe yĩnga? Bala, rẽ kɩtdame tɩ b paamd b Naand a Zeova sẽn yaa “sũ-noog buud fãa yẽgrã” zoodo.—1 Tɩmote 1:11, Sebr Sõngo.

BIIBLÃ SAGLGA: “Tẽeg f naandã yell . . . tɩ f toogã wakat nan ka ta ye, la tɩ yʋʋm nins fo sẽn na n yeel tɩ f ka tar sũ-noogã wakat nan ka kolg ye.”—KOƐƐG SOABA 12:1.

Yaa kom-bɩɩsã la rĩm a Salomo kõ sagl-kãngã, b sẽn tõe n mi n wa yĩm tɩ vɩɩmã pida ne zu-loeesã yĩnga. La a saglgã tõe n nafa d fãa. Woto yĩnga, lʋɩɩs-y y Naandã raab taoor y vɩɩmã pʋgẽ. Yaa rẽ n na n kɩt tɩ y vɩɩmã sɩd tall võore. Ra tagsd-y wa neb kẽer sẽn yet tɩ ‘d rɩ la d yũ tɩ bala beoogo, d na n kiime’ wã ye. (1 Korẽnt dãmba 15:32) Goam nins sẽn be Koɛɛg Soab 8:12 wã wilgdame tɩ y sã n lʋɩɩs Wẽnnaam daabã maaneg taoore, y “na n paama sũ-noogo.”

Pʋg-sad a ye yʋʋr sẽn boond t’a Wendi sak n deegame tɩ woto sɩd yaa sɩda. A sẽn wa n yaa bilfu, yẽ ne a yao-bi-pugl n zãms Ɛspayn buudã goam sẽn na yɩl n tõog n kẽng Repiblik Dominikɛn n tɩ sõng n moon koe-noog ning sẽn be Biiblã pʋgẽ wã, beenẽ koe-moondbã sẽn da pa waoogã yĩnga. Ad a sẽn yeele: “Tõnd monga d mens bũmb wʋsg sẽn na yɩl n tõog n tɩ sõng n moon koɛɛgã, la d sẽn kẽngã, yɩ-d-la noog hal wʋsgo! D zĩnda be kiis a yoobe. La bũmb pa be d sẽn da tõe n maan tɩ kõ-d sũ-noog n yɩɩg koe-moonegã sẽn kõ tõnd sũ-noog ningã ye. Bark nins tõnd sẽn paamã yɩɩda modgr ning d sẽn maanã.”

Wẽnnaam sakr kɩtdame tɩ d vɩɩmã tar võore

Y sã n bao a Zeova zoodo, tõe n kɩtame tɩ y vɩɩmã tall bark hal sõma. Wãn to? A Sʋɩtãan pa tus a Ãdem ne a Hawa tɩ b tõdg tɩ Wẽnnaam kõn yɩ b naab bal ye. A yeelame me tɩ toog sã n paam ned buudã fãa, a na n basa Wẽnnaam sakre. (Zoob 1:9-11; 2:4) Y tõe n sõng n wilgame t’a Sʋɩtãan gomdã yaa ziri! Wãn to la y tõe n maan dẽ? Yaa y sẽn na n sakd Wẽnnaam a Zeova noyã, la y wilgdẽ me tɩ y sak n deegame tɩ yẽ n tog n wilgd tõnd sẽn segd la sẽn pa segde.—Wilgri 4:11.

D sã n dat n maand sẽn yaa tɩrga, tõe tɩ d na n mi n wa sega zu-loeese. La rẽ yĩnga zu-loe-kãens na kɩt tɩ d vɩɩmã pa le noom-d sɩda? D rɩk mak wala bɛ sẽn na n dõt d zoa wall d roagda. Rẽ yĩnga d sã n baood n na n sõng d nedã tɩ kɩt tɩ d paam zu-loeese, na boog d sũ-noogã sɩda? Yaa vẽeneg tɩ ayo! D nedã yʋʋr manegr yĩnga, d na n saka ne yamleoog n mao ne zu-loe-kãense. Yaa woto me ne Wẽnnaam sakrã. D sã n sakd Wẽnnaam baa zu-loe-kɛgems pʋsẽ, noogda a sũuri.—Yelbũna 27:11.

Y tõe n paama vɩɩm sẽn na n tall bark wakat fãa yĩnga

Maan-y y sẽn tõe fãa n bao n bãng Wẽnnaam la a raabã. A Zezi Kirist meng yeelame: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” (Zã 17:3) Wẽnnaam a Zeova sã n wa pids raab ning a sẽn da sɩng n tar ne tẽngã, wẽn-sakdbã fãa na n paama vɩɩm ning a sẽn da rat tɩ b vɩɩmd hal sɩngrẽ wã. B na n paama “vɩɩm sẽn ka sɛtã,” n zĩnd tẽngã sẽn na n lebg arzãnã zugu. Wakat kãnga, vɩɩmã na n talla võore, hal n kõt sũ-noogo.—Yɩɩl Sõamyã 145:16.

Yɛ la y tõe n paam bãngr ning yell a Zezi sẽn gomã? Yaa Biiblã sẽn yaa Wẽnnaam Gomdã pʋgẽ. Y sã n dat tɩ b sõng-y tɩ y paam-a, bɩ y gʋls seb-kãngã yiisdbã. B sũur na n yɩɩ noog tɩ b bao ned t’a sõng-y tɩ y bãng Biiblã sẽn sɩd yet bũmb ningã.