Bõe la kambã segd n bãnge?

“Gʋlsg Sõamyã zãng yaa Wẽnnaam n kõ tõndo: La a bee bark zãmsg yĩnga, la tɩ wilg ned a kongre, la saglg yĩnga, la tɩ zãms tɩrlem.”—2 TƖMOTE 3:16.

KAMBÃ segd n bãnga sɩdã Wẽnnaam zugu. Yɛ la b tõe n yã sɩd-kãnga? Yaa Biiblã pʋgẽ. Dũniyã gill zugu, tũudum sebr ning nebã wʋsg sẽn nand n yɩɩd yaa Biiblã.

Biiblã yaa wa lɛtr Wẽnnaam sẽn gʋls n tool-do. Lɛt-kãng pʋgẽ, a wilgda tõnd a sẽn yaa Wẽnnaam ning buudã. A leb n wilgda a kambã fãa, b bõoneg la b kãsemb fãa sẽn segd n vɩɩmd to-to. D na n goma Biiblã sẽn yet bũmb ninsã kẽer yelle, la d ges kom-bõonesã meng sẽn tõe n dɩk yam nins b pʋsẽ.

Bõe la Wẽnnaam dat tɩ tõnd bãng yẽ mengã zugu?

◼ Biiblã sẽn yete: “Tɩ nebã bãng tɩ fo yʋʋr sẽn yaa a Zeova wã, foo f yembr bal n ka to dũniyã tɛk fãa.”—Yɩɩl Sõamyã 83:18, MN.

Rẽ sẽn wilgd tõndo: Wẽnnaam sɩd beeme. A tara yʋ-peelle.

◼ Biiblã sẽn yete: “Zusoabã feesda nebã fãa sũyã n mi tõnd fãa tagsg la d ratem. Fo sã n bao bãmba, fo na n yã-b lame.”—1 Kibaya 28:9.

Rẽ sẽn wilgd tõndo: Tõnd fãa yell paka Wẽnnaam a Zeova. Dẽnd a geta kom-bõonesã me yelle. (Yɩɩl Sõamyã 10:14; 146:9) A ratame tɩ d bãng a sẽn yaa Wẽnnaam ning buudã.

◼ Biiblã sẽn yete: “Da nams pʋg-kõor ne kɩɩb ye. Fo sã n nams bãmb tɩ b kelem n bool maam, mam na n wʋma bãmb kɛlengã.”—Yikri 22:21-23.

Rẽ sẽn wilgd tõndo: A Zeova kelgda kom-bõonesã meng pʋʋsgo. D tõe n pʋʋsda Wẽnnaam wakat fãa, n pelgd d pʋs n wilgd-a bũmb nins sẽn pak tõndã.

◼ Biiblã sẽn yete: “Bãmb leb n maka Wẽnnaam yɛsa; bãmb beega Israɛll Sõng-soabã.”—Yɩɩl Sõamyã 78:41.

Rẽ sẽn wilgd tõndo: Tõnd no-goamã la d tʋm-tʋmdɩ wã tõe n nooga a Zeova sũur wall sãam a sũuri. Dẽnd nand tɩ d gom gomd wall d maan bũmbu, d segd n deng n tagsame.

Manesem bʋg la d segd n tall ne neb nins buud wall b tũudum sẽn yaa toor ne tõndã?

◼ Biiblã sẽn yete: “Wẽnnaam ka tũusd neb ye. La buudã fãa sʋka, ned ning sẽn zoet bãmb la sẽn maand tɩrga, yẽ soab tata bãmb yam.”—Tʋʋma 10:34, 35.

Rẽ sẽn wilgd tõndo: Sẽn mik tɩ Wẽnnaam nonga ninsaal buud fãa wã, tõnd me pa segd n kisg neda, a soabã yĩngã kõbg bɩ a nengã yalẽ sẽn yaa toor ne tõnd rẽndã yĩng ye.

◼ Biiblã sẽn yete: “Bɩ y bãng daar fãa tɩ leok ne sũ-maasem la sik-m-menga, ned ning fãa sẽn sokd yãmb tẽeb yelle.”—1 Pɩɛɛr 3:15.

Rẽ sẽn wilgd tõndo: Tõnd ne ned sã n wa sõsd tũudmã yɛl zugu, d segd n wilga d sẽn tagsdã ne yẽesem, la segd n yɩɩ ne bʋgsem. Sẽn paase, d pa segd n paoogd neb nins tẽeb sẽn yaa toor ne tõnd rẽndã ye.

Manesem bʋg la d segd n tall ne d zakã rãmba?

◼ Biiblã sẽn yete: “Kamba, bɩ y sak y ba rãmb ne y ma rãmb ne bũmb fãa, tɩ bõe, bõn-kãng tata Zusoabã yam.”—Kolos rãmba 3:20.

Rẽ sẽn wilgd tõndo: Kambã sã n sakd b roagdbã, pa wilgd tɩ b nong-b lame bal ye. Wilgdame me tɩ b rat n taa Wẽnnaam yam.

◼ Biiblã sẽn yete: “Bɩ yãmb maan taab neere, la paam sũ-bʋgsem, la kõ taab sugr wa Wẽnnaam sẽn kõ yãmb sugr Kirist yĩngã.”—Efɛɛz rãmba 4:32.

Rẽ sẽn wilgd tõndo: Neb a taabã tõe n wa maana bũmb tɩ yik d sũuri. Baa tõnd zakã rãmb menga. D sã n yaool n dat tɩ Wẽnnaam kõt-d sugr d beegr yĩnga, tõnd me segd n kõta d taabã sugri.—Matɩe 6:14, 15.

Bõe yĩng tɩ d segd n yɩ pʋ-peelem soab la nin-sõngo?

◼ Biiblã sẽn yete: “Woto yĩnga, bɩ y bas ziri yagbo, la ned kam fãa togs sɩd ne a yaka.”—Efɛɛz rãmba 4:25.

Rẽ sẽn wilgd tõndo: D sã n togsd sɩda, d rɩkda Wẽnnaam togs-n-taare, tɩ rẽ noogd a sũuri. La d sã n nong n yagd ziri, d rɩkda Wẽnnaam bɛ a Sʋɩtãan sẽn yaa “ziri ba” wã togs-n-taare.—Zã 8:44; Tɩt 1:2.

◼ Biiblã sẽn yete: “Bũmb nins fãa yãmb sẽn dat tɩ neb a taabã maan yãmbã, bɩ yãmb me maan bãmb bõn-kãense.”—Matɩe 7:12, Kãab-paalgã Koe-noogo.

Rẽ sẽn wilgd tõndo: D pa segd n maand d toor kae ne d zakã rãmb la neb a taabã tagsgo, la bũmb nins sẽn pak-bã ye. Wala makre, d sã n wilgdẽ tɩ d nonga d taabã, bãmb me na n nong-d lame.—1 Pɩɛɛr 3:8; Luk 6:38.

Wala makr nins d sẽn yã wã fãa sẽn wilgdã, Biiblã sagls tõe n sõnga kambã tɩ b bɩʋʋng zugẽ, bɩ b yɩ mi-beoog rãmba, neb sẽn waoogd b taab la b kʋmd-ba. La yaa ãnd n segd n sõng kambã tɩ wa tall zʋg-sõma kãensã?