Wãn to la roagdbã tõe n zãms kambã tɩ yɩ sõma?

“Bɩ y sak tɩ b sẽn togs yãmb goam nins rũnda wã pa y sũyã pʋsẽ. Rɩk-a n zãms f kambã neere. Fo sã n zĩ f zak pʋgẽ, bɩ f gomd a yelle, la f sã n kẽnd sor zug me, bɩ f gomd a yelle. Gom a yell f gãandg la f yikr wakate.”—TÕODO 6:6, 7.

ROAGDBÃ tõe n mi n getame tɩ kambã zãmsg yaa toog wʋsg ne-ba. La b sã n bao sõngr me, b sẽn na n paam sagls toor-toor ka tɛkã tõe n kɩtame tɩ maneg n lebg toogo. Neb b sẽn kĩ ne la b zo-rãmb na n yɩɩ tao-tao n kõ-b saglse. Sɛb toɛy-toɛy la ẽntɛrnetã pʋgẽ, sagls nins b sẽn kõt roagdbã sõor tara paasgo, la b kɩɩsd taab me.

La Biiblã yẽ pa wilgd roagdbã bũmb ning b sẽn segd n zãms b kambã bal ye. A wilgd-b-la b sẽn segd n zãms-b to-to wã me. Wa Biiblã vɛrse nins sẽn be zugẽ wã sẽn wilgã, roagdbã segd n baooda weer daar fãa n gomd ne b kambã Wẽnnaam yelle. D na n goma Biiblã sagls a naas bal yelle. Sagl-kãens sõnga roagdb tusa tɩ b tõog n zãms b kambã sɩdã Wẽnnaam zugu.

1. Tik-y bũmb nins Wẽnnaam sẽn naanã n zãms-ba: Tʋm-tʋmd a Poll yeela woto: “Bũmb nins [Wẽnnaam] sẽn naan hal dũniyã naaneg wakatã pukda Wẽnnaam zemsg nin sẽn ka tõe n yã ye, la bãmb pãngã sẽn ka sɛtã, la bãmb wẽnego.” (Rom dãmba 1:20) Roagdbã tõe n maoome n sõng b kambã tɩ b bãng tɩ Wẽnnaam sɩd beeme, b sẽn na n kɩtdẽ tɩ b tagsd bũmb nins Wẽnnaam sẽn naanã zugu. Rẽ na n sõng-b lame tɩ b bãng bõn-kãens fãa sẽn wilgd bũmb ning Wẽnnaam zugã.

A Zezi ra maanda woto n zãmsd a karen-biisã. Wala makre, daar a yembre, a yeela woto: “Bɩ y ges bõn-yɩgdse. Bãmb ka bʋta, la b ka tigisd me ye, la bãmb ka suiid bao pʋsẽ ye. La yãmb Ba sẽn be [saasẽ] rɩlgda bãmba. Yãmb ka yɩɩd bãmb wʋsg sɩda?” (Matɩe 6:26) A yeela a karen-biisã woto n na n sõng-b tɩ b bãng a Zeova nonglmã la a nimbãan-zoeerã. La pa rẽ bal ye. A sõnga a karen-biisã tɩ b tags n bãng Wẽnnaam sẽn nong a kambã la a zoet b nimbãaneg to-to wã.

Rĩm a Salomo sẽn yɩ yam soabã ra goma Wẽnnaam sẽn kõ gũur yam ningã yelle, la a wilg tɩ d tõe n gesa gũur sẽn vɩ to-to wã n dɩk yam. A yeela woto: “Kʋɩɩma, kẽng n tɩ ges gũur sẽn maand bũmb ningã n bãng yam. Bãmb ka tar naab ne kãsem la soaal ye. Bãmb wʋkda b rɩɩb sɩpaolgo. La bõn-bɩʋʋng wakate, b wʋkda ki n bĩngdẽ.” (Yelbũna 6:6-8) A sẽn yeel woto wã, a wilga ne manesem sẽn sɩd be yamleoog tɩ yaa sõma tɩ d yãk bũmb sẽn tar yõod d sẽn dat n maane, la d tʋm ne d sũur fãa n tõog n maan-a.

Roagdbã tõe n dɩka a Zezi ne a Salomo fãa sẽn da maand to-to tɩ b zãmsgã yaa sõma wã togs-n-taare. Rẽ baoodame tɩ b maan woto: 1) Sok-y y kambã tɩɩs bɩ rũms nins b sẽn nonge. 2) Bao-y n bãng-y bõn-kãens sõma. 3) Tik-y bõn-kãens sẽn wilgd tõnd bũmb ning Wẽnnaam zugã n sõng kambã.

2. Rɩk-y manesem ning a Zezi sẽn da tar ne a sẽn da zãmsd-b rãmbã togs-n-taare: Bũmb nins a Zezi sẽn da tar n na n wilg nebã yõod yɩɩda ned buudã fãa sẽn tar n dat n wilg a to. La baasgo, a ra nong n sokda nebã sogsg wʋsgo. A ra baood n na n bãnga neb nins a sẽn zãmsdã tagsa, la yɛl nins sẽn da pak-bã. (Matɩe 17:24, 25; Mark 8:27-29) Bũmb nins roagdbã me sẽn segd n zãms b kambã tara yõod wʋsgo. La sẽn na yɩl tɩ b zãmsgã yɩ sõma, b segd n dɩka a Zezi naoore, n sõngd b kambã tɩ b sakd n togsd bãmb me tagsgo.

La kambã sã n tar manesem sẽn pa sõma wall b pa reegd saglsã tao-tao yẽ? Tẽeg-y manesem ning a Zezi sẽn tall ne a tʋm-tʋmdbã. B ra mi n wẽeda no-koɛɛm wʋsg ne taaba. Sẽn paase, b pa sak n deeg sagls nins a sẽn da kõt-b sik-m-mengã wɛɛngẽ wã tao-tao ye. La a Zezi kell n bʋka a meng ne-ba, n da ket n tẽegd-b sik-m-mengã yõodo. (Mark 9:33, 34; Luk 9:46-48; 22:24, 25) Roagdb nins sẽn dɩkd a Zezi togs-n-taarã maagda b yĩns n zãmsd b kambã, tɩ b sã n wa pa wʋmd bũmb võore, bɩ b mi n ket n zãmsd-b bõn-kãng hal tɩ b wa wʋm-a võorã sõma.a

3. Kõ-y y kambã mak-sõngo: Segdame tɩ roagdbã tẽeg bũmb ning tʋm-tʋmd a Poll sẽn da yeel Rom kiris-nebã. A yeela woto: “Fo zãmsda neb a taaba, n yaool n ka zãmsd f meng ye. Fo sẽn moond tɩ ned ra zu wã, yaa bõe tɩ fo zuuda?”—Rom dãmba 2:21.

Gom-kãensã yaa saglg sẽn tar yõodo, bala bũmb nins roagdbã sẽn maandã tara pãng wʋsg kambã zut n yɩɩd b no-goamã. Sɩd me, roagdb nins sẽn tũud bũmb nins b sẽn yetã tõe n paamame tɩ b kambã kelg-b n yɩɩda.

4. Sɩng-y y kambã zãmsg b yãadmẽ: Nand t’a Tɩmote sɩng tʋm-tʋmd a Poll sõngr a misioneeremdã pʋgẽ, a ra tara yʋ-noog a tẽed-n-taasã sʋka. (Tʋʋma 16:1, 2) Bũmb a ye sẽn kɩt tɩ yɩ woto wã yaa tɩ hal a “yãadem wakate,” b zãms-a-la “Gʋlsg Sõamyã.” A Tɩmote ma wã ne a yaab-poakã ra pa karemd Gʋlsg Sõamyã bal t’a kelgdẽ ye. B ra sõngd-a lame me t’a tagsd sɩdã sẽn be a pʋgẽ wã zugu.—2 Tɩmote 1:5; 3:14, 15.

Y tõe n paama sõngre

A Zeova Kaset rãmbã yiisa sɛb wʋsg n na n sõng roagdbã tɩ b zãms b kambã tɩ b bãng Wẽnnaam. Sɛb kẽer yaa kom-bõonegã yĩnga, tɩ b sãnda tõe n sõng roagdbã tɩ b tõogd n sõsd ne b kom-bɩɩsã nana-nana.b

La yaa vẽeneg tɩ nand tɩ roagdbã tõog n zãms b kambã tɩ b bãng Wẽnnaam, bãmb mensã segd n deng n bãnga sogsg kẽer leoore, sogsg leokr sẽn pa nana tɩ kambã yaool n tõe n wa soke. Wala makre, wãn to la y na n leok sogsg nins sẽn pʋgdã: Bõe yĩng tɩ Wẽnnaam bas tɩ namsgã beẽ? Wẽnnaam daabã ne tẽngã yaa bõe? Sẽn ki-bã bee yɛ? Y sã n data, a Zeova Kaset rãmbã na n sak n sõng-y lame tɩ y paam sogs-kãensã la b taab leoore, tɩ sõng yãmb ne y zakã rãmb tɩ y tõog n paam Wẽnnaam zoodo.—Zak 4:8.

[Tẽngr not rãmbã]