A Abrahaam yɩɩ ned sẽn tall tẽebo

Daar a yembre, a Abrahaam yii ne yʋng n na n kok pemsem. A wa n nak n gesa ãdsã sẽn yaa ka tɛkã, tɩ tẽeg-a Wẽnnaam sẽn da yeel-a t’a yagensã sõor na n yɩɩ wa ãdsã. (Sɩngre 15:5) Ãdsã ra tẽegda a Abrahaam a Zeova sẽn kãab-a bũmb ningã. Leb n da wilgd-a lame t’a Zeova na n sɩd pidsa a sẽn pʋlmã. Bala a sã n tõog n naana saasã la tẽngã ne bũmb nins fãa sẽn be a pʋgẽ wã, yaa vẽeneg t’a tõeeme tɩ yẽ ne a Saara paam biiga. Ad a tẽebã sɩd da tara pãnga!

TẼEB YAA BÕE? Biiblã wilgdame tɩ “tẽeb” yaa f sẽn tar kaset tɩ bũmb f sẽn pa ne sɩd beeme. Ned sã n tẽed a Zeova, a tagsda a pʋlemsã pidsg yelle, bala a kɩsa sɩd tɩ pa tõe n pa pids ye.

WÃN TO LA A ABRAHAAM WILG T’A TARA TẼEBO? A wilgame t’a tẽeda bũmb nins fãa Wẽnnaam sẽn pʋlmã. Ne tẽebo, a Abrahaam basa a ba-yirã, n kɩs sɩd tɩ wa a Zeova sẽn yeelã, a na n wilg-a-la tẽng a to t’a tɩ zĩndi. Ne tẽebo, a Abrahaam gilga Kanaã soolmã pʋgẽ, n kɩs sɩd t’a yagensã na n wa sooga tẽn-kãngã. Ne tẽebo, a sakame me n dɩk a Izaak n na n maan maoongo, n kɩs sɩd tɩ baa a sã n ki, a Zeova tõe n vʋʋg-a lame.—Hebre dãmba 11:8, 9, 17-19.

A Abrahaam da pa tagsd bũmb nins sẽn loogã yell ye. A ra tagsda sẽn watã yelle. Baa ne a Abrahaam la a Saara vɩɩmã sẽn da segd n yaa noog Uur tẽngã n yɩɩd b sẽn wa n tɩ vɩ Kanaã wã, b ra ‘pa tagsd tẽng ninga bãmb sẽn yi n basã yell’ ye. (Hebre dãmba 11:15) B ra tagsda Wẽnnaam sẽn na n wa ning bãmb ne b yagensã bark to-to wã.—Hebre dãmba 11:16.

A Abrahaam tẽebã yɩɩ zaalem bɩ? Ayo! A Zeova pidsa bũmb nins fãa a sẽn da pʋlmã. A Abrahaam yagensã sɩd wa n lebga bu-kãsenga, tɩ b boond-b tɩ Israyɛll neba. Kaoosg zugẽ, Israyɛll nebã wa n tɩ zĩnda Kanaã, tẽng ning a Zeova sẽn da yeel a Abrahaam t’a na n kõo a yagensã.—Zozue 11:23.

A ABRAHAAM KIBARÃ WILGDA TÕND BÕE? Tõnd me tõe n kɩsa sɩd t’a Zeova na n pidsa a kãabsã fãa. Baa a kãabs kẽer sã n wõnd bũmb sẽn pa tõe, d kɩsa sɩd tɩ “Wẽnnaam tõee bũmb fãa.”—Matɩe 19:26.

A Abrahaam kibarã le wilgda tõnd tɩ d segd n tagsda bark nins sẽn watã yelle, la d ra nong n tagsd bũmb nins sẽn loogã yell ye. Yaa woto la rao a ye yʋʋr sẽn boond t’a Jason maanda. A Jason tara bãag sẽn kɩt t’a koms zãnga. A yeela woto: “Wakat ninga m tagsda bũmb nins sẽn loogã, tɩ rẽ mi n namsd maam. Wala makre, m sẽn pa le tõe n paam n mobg m pag a Amanda wã.”

A Jason tẽeda ne a sũur fãa t’a Zeova na n pidsa a kãabsã, wala a sẽn yeel tɩ tẽngã gill na n wa lebga arzãnã, tɩ wẽn-sakdbã vɩɩmd a zug wakat sẽn kõn sa tɩ bãas pa le beẽ wã.a (Yɩɩl Sõamyã 37:10, 11, 29; Ezai 35:5, 6; Wilgri 21:3, 4) A yeela woto: “Mam mi n tagsda bark nins sẽn watã yelle, la m tẽegdẽ tɩ ka la bilfu, yaamsã, yɩɩrã, la sũ-sãamsã fãa na n saa fasɩ.” Ad nin-kãngã tẽebã sɩd yaa wa a Abrahaam tẽebã.

[Tẽngr note]